Read Biblia Mixe de Quetzaltepec Oseas 12 Bible Online

Oseas 12 - Biblia Mixe de Quetzaltepec bible

Oseas 12

¹Yë Efraín poj jyi'kxyp: Tu'kxëëw tpaye'ey yë poj mëti'ipë xëëwpëtsëmtsyow tso'onpën. Këjääjëp yë wyin'ë'ënën ets tsyip y'äkë. Yë Asiria ja'ay yë'ë mëët käjpxytyu'unën tuny ets Egiptë ja'ayëty tyuknikejxyp yë olivë on tä tu'uk näynyamo'ojën.

²Tëë yë Wintsën tsyipëjktä'äky ma Israel kajpnën. Tyiytyunäämpy yë Jacob mëët ko ëxëëk y'ëti'itsy y'ënä'äny; jëtu'un tukumëtowa'any tä pyäätyë nyitëkëtyën.

³Ka'anëm ënäty myëxu'unk'atynyëm ko yë Jacob tkunajxy yë y'äjty ets ko ojts myëjnë'ajnë tsiptuun mëët yë Tios.

⁴Tsiptuun mëët yë tsajpjotmëtë kukäjpxy ets myëmëtak; jëëpy yaxp t'amëtooy ets yajpa'ëyowëty. Jam Betel pyatë Tios ets mëët myëtyäky.

⁵Yë Wintsën, mëti'ipë maaytyääyëpën winë: Wintsën xyëëwajtyp.

⁶Paaty myaj'ënëëmë mijts Israel, niwinpit yë mTios; oy winë xytyunëty ets tëy jaanty, yë Tios yë'ë xëmë mtuk'ijxpätëp.

⁷Jëtu'un yë Wintsën y'ënä'äny: Yë Canaán ka'ap tii oy tkijpxy, jä'ä ko yë'ë tsyokpy wi'ix yë myëku'uk tsuu'ixëtyën.

⁸Jëtu'un yë Efraín y'ënä'äny: Ëjts koos të nkumeenytyä'äky, jotkujk'ajtënës të npaaty; ka'ap tjëkyepy pën xytyuk'ojëtyës ets xy'ënëëmëtyës ko tëkatsyës winë të ntuny.

⁹Ëjts, mëti'ipë Wintsën'ajtpën, mëti'ipë mijts mTios'ajtypyën maju'unëm jap Egiptë myajpaatyën, nyajkutukäämpyës jatëkok ets wit tëjk xytyuktsëënëty, jëtu'un tä jam ojts näpyatëmën wintë'ëtstum.

¹⁰Ëjts ojtsës nmëkäjpxy yë käjpxynyajxpëtëjkëty etsës nyajkëjääjëy mëti'ipë y'ixtëpën kuma'ayjoty ets ojts winë ntuknimëtya'aktë mëët yë ijxpäjtën.

¹¹Jam Galaad tam wiink tios jyätyë, je'eyëp ko yë'ë mëti'ipë ka'ap myëtëyëtyën. Jam Guilgal yë'ë jam wintsë'kën'ajtp yë tsajpkaa; ets yë'ë jam wintsë'këntyakn'ajtp yë tsaanipiy ma të t'awitstën yë kam tu'u.

¹²Ojts yë Jacob jam nyaskääkë Aram ets jam tnituuny yë tyo'oxytyëjk, kupixyny këwent'ajtk jam tyuunk'ajt.

¹³Tu'uk yë käjpxynyajxpë ojts yë Wintsën tukjuuty yë Israel kajpn jap Egiptë ets tu'uk käjpxynyajxpë ojts kyëwent'atëtë.

¹⁴Yë Efraín ja'ayëty tëë yë Wintsën tyajjoot'anpëktë, tëë ma'atë. Paatykyëjxm yë Wintsën tyukumëtowa'anëtë mëët ko mëjpoky të tuntë ets kyë'ëmpoky ëxëëk tunanëtëp.