Read Biblia Mixe de Quetzaltepec Oseas 8 Bible Online

Oseas 8 - Biblia Mixe de Quetzaltepec bible

Oseas 8

¹Tukxu'ux yë mxuxn tä tukxu'uxyën mëti'ipë këwent'ajtpën ma Wintsën yë kyajpnën. Jä'ä ko tëë ja käjpxytyu'unën tjëënaxy ets tëë tkäjpxykyumëtoownaxy ja n'ijxpëjkënës.

²E yë'ëjëty xynyimiitëpës ënät jëëpyë yaxpë ets y'ëna'antë nëkoo: Mijts myaj'ijxkajp ko yë Israel mTios'atyë.

³E yë Israel tëë t'ixtijy mëti'ipë oyën, paatykyëjxm yë myëtsip y'ëxjëtita'any pyajëtita'anyë.

⁴Ëjts ka'apës tii të xyajtëwtë ko tpëjkta'aktë yë kyutujkpëtëjkëty ets të tnikajpxpätë yë wyintsëntëjkëty maas ka'ap të nijawën. Tëë twinpëjkmuk twintuunmuktë yë pyoop pujxnëty pyu'tspujxnëty ets y'awinax të t'oytyuntë ets kë'ëm nyäyajkutëkoya'anëtë.

⁵Ëxëëk n'ixyës yë Samaria ja'ayëty ko yë y'awinax të tyajkojtë, mëti'ipë tsajpkaajën kyëxë'ëkyën ets yë'ë t'ëwtatë. Tëës yë ntsip n'äkë myëjë ma yë'ëjëtyën. ¿Jeky jëtää y'ita'anyë ets jatëkok y'oyëtëty yë Israel ja'ayëtyë?

⁶Tääpë Samaria ja'ay y'awinaxëty mëti'ipë y'ëwtajtëpën, ka'ap yë Tyiosëty, tsäjtspë ja'ay të yajkojyë ets ma'ataanp yë'ë.

⁷Ojts tni'iptë poj ets yë'ë yajpëtë'ëkantëp tuupoj; ka'ap nëjkx tyajpëtë'ëktë pyëjktä'äkyëty ma kyam tyu'ujëtyën, ka'ap nëjkx tmëët'atë yë tsyajpmokëty; e ko tjapaatëty wiink ja'ay nëjkx tjë'kxtë tpëktë.

⁸Israel jëtu'un të jyäty tä jeexyë të yajjëënyën. Wiinkëtypë naax kajpn ka'ap mëj tyim'ixëtë,

⁹Mëët ko yë Asiria kajpn të t'amëtowtë yë näypyutëkë ets të jyatë tä tu'uk jëyujk mëj ja'ayën ka'apë y'ëkja'akyujkënën. Yë Efraín tëë tyajkwä'kxy yë näynyamo'ojë ets ja'ay pyutëkëtëty.

¹⁰E oy tjäyajkwä'kxy yë näynyamo'ojë ma naax kajpnëtyën, ëjts nwojpwä'kxantëpës yam ets ka'ap jyam'ata'any yë yajkutujkpë ets wintsëntëjkëty.

¹¹Jä'ä ko yë Efraín kyojpy may yë wintsë'këntyakn, mëti'ipë je'eyë yajpokytyuunëpën.

¹²Oyës të njatuknijayë may yë n'ijxpëjkënës, yë'ë jëtu'un të tmëët'aty tä jeexyë ka'ap tjä'äjëtyën.

¹³Yi'iyë tsyojkën'ajtëp yë wintsë'kën ets tyaktë yë wintsë'kën ets tsu'utstë yë tsu'utsy mëti'ipë të tukwintsë'ëkëtën ja y'awinaxëty; e ëjts Wintsën ka'apës jotkujk näjyawëty: Nja'amyätsäämpyës yë y'ëxëëktu'un y'ëxëëk kajpxënëty ets ntuktëytyunäämpyës yë nyëë pyokyëty, nyajwinpitäämpyës jap jatëkok Egiptë.

¹⁴Yë Israel ja'ayëty kyojtëp yë kyutujkëntëjkëty, je'eyëp ko jyä'äytyëkooytyëp mëti'ipë winë yajkojpyën. Judá may tkojy yë naax kajpn mëti'ipë ta'tspëky yajpatpën ets këwent'atypë y'ityën, e ëjts nyajkutukäämpyës ets kyutujkëntëjk jëën yajtooytyëkoyëtëty.