Read Biblia Mixe de Quetzaltepec Jonás 2 Bible Online

Jonás 2 - Biblia Mixe de Quetzaltepec bible

Jonás 2

¹Ënät ja Jonás tyëjkëy Tios mëkajpxpë nëë jëyujk jootjoty,

²ets y'ënä'äny: Maas nyajpaatyën jotmayjoty jää mëk të nmëkäjpxy mijts Wintsën, e mijts ojtsës xy'ëtsoy. Jap tsajpkëkjoty ma o'kën tëko'oyën y'ityën jap ojts nmëkäjpxy, e mijts ojts xymyëtoow'ity.

³Jap këkmejyjoty ojts xykyujëpipës ets ja nëë o'pky xynyijä'tstëkooyës. Nëkooyë ja nëë o'pky pyëtë'knë maas ëjtsën mëti'ipë mkäjxën.

⁴Jëtu'unës ojts näjyawëty tëëjës yowë xy'ëxwa'any ma m'ityën; etsës ojts nmay ntajy ka'apën ntij nijëna'a yë mtsajptëjk n'ëk'ijxnëtyës.

⁵Xynya'ëwtijtaayës yë nëë; xynyijä'tstëkooyës jap këknëëjoty; jëtu'unyë yë tsuuts nyäjyo'pë maas yë nkuwaayën.

⁶Jäppaatës të nkëtä'äky mejypya'tkë'p ma mëët yë naax nyäpyäätyë; jëtu'unës näjya'awëy tääjës jeexyë mijts xyaj'ityën jeky tsumy matsy. E mijts Wintsën, nTiosës, o'këntujpës të xyajtso'oky.

⁷Koos ojts näjyawëty tim ookanëpës, tääts nja'amyejtsy Wintsën; ojts ja nnu'kxtakënës jam jyä'ty ma wa'atspë mtsajptëjkën.

⁸Mëti'ipë wiink tios pyanëjkxtëpën, yajtëkooynyëtëp ja wiinkutsë'kën ma mijtsën.

⁹E ëjts nyajnaxäämpyës ja kukajpxën ja'awëkyëtakën ma mijtsën ets nmo'ojäämpy yë mwintsë'kën. Mijts tu'ukyë maayëp wi'ix yë ja'ay xyaj'ëwaatsëpëtsëmëtyën.

¹⁰Ënät ja Wintsën ojts ja nëë jëyujk tyajnëjkxy jam nëëpë'am ets ja Jonás yaj'ix'ë'tsy.