Read Biblia Mixe de Quetzaltepec Jonás 4 Bible Online

Jonás 4 - Biblia Mixe de Quetzaltepec bible

Jonás 4

¹Yë Jonás wiink ojts t'ixy mëti'ipë ënäty ja Tios të tunyën, paaty ojts nëkooyë jyoot'anpëjknë.

²Tä ja Tios ojts tmëkäjpxy ets t'ënëmaay: Ëk'ix Tios, ëjts tim ënaanpës jëtu'un, ko ënäty jëtu'un jyata'any kyëpäta'any, ka'anëm ënäty jam ntsoonyës nkajpnjotmës. Paaty ojts jam n'ëknëjkxpës Tarsis, jä'ä ko nija'apës ko mijts yu'unk naxym mTios'aty ets poj'am mpa'ëyoy; mijts ka'ap pojën mjoot'anpëky, ni'ik yë mtsojkën mja'awën kyëjääjëty; oy ja tëytyu'unën të xyanikäjpxy mpa'ëyoopy jatëkok ja pokyjyä'äy.

³Paatykyëjxm yam n'ënëëmë mijts Wintsën, ko xypyëjkëtyës yë njuukyajtënës. Tsoopaatëp ni'ik koos n'ookëty këtii koos njuuky'atëty.

⁴E ja Wintsën jëtu'un y'ëtsooy: ¿Wi'ix? ¿Oyën mnäjyawëty ko mjoot'anpëkyë?

⁵Ënät ja Jonás tsyo'ony ma ja naax kajpnën ets ojts nyijkxy jam xëëwpëtsëmtsyow; jam yë tyëjkxo'omy t'oytyuuny ets nyaaxwe'tsy jap niktujp, jä'ä y'ijx'ijtyp wi'ix ja naax kajpn jyäty.

⁶Yë Wintsën ojts jam tyajyonë'ëky tu'uk yë tsi'iw aats, jam kyëxyony ma ja Jonás ja tyëjkxo'omyën, japts ja Jonás y'ity niktujkp akujk jotkujk.

⁷Komjëpom nän Tios ojts kë'ëm tuknipëjktaakë ets tu'uk yë tënë'k tkä'äpë'ëkëty ja tsi'iw aats ets tsyë'ëtsëty.

⁸Ko ja xëëw pyëtsiimy, ënät ja Tios ja jëënpoj tyajmiiny, jamtsow pëtë'ëktsow, yajxon ja xëëw'an jam tyimkëxjajy ma ja Jonás ja wyiin jyëjpën, tääts nyäjya'awëy tim ookaanp yowë. Ets myäy tyäjy: Nikë oyës ntimy'ookëty.

⁹E ja Tios, ojts y'ëtsoyë: ¿Oyëtën mnäjyawëty ko mjoot'anpëkyë ko të tsyi'itsy ja tsi'iw aatsë? Tääts y'ëtsooy ja Jonás. Jëtu'un, oyës näjyawëty. ¿Ti këtii xy'ixyë? Ko mëpaatëpës n'o'knë.

¹⁰Ënät ja Wintsën y'ënëmaayë: Ka'ap myijtsëty yë tsi'iw aats të xykyojy ets ka'ap myijtsëty të xyajyony; yë'ë tu'ktsuuyë je'eyë yoony ets komjëpom të tyëtskojnë. E mijts ni'ikyë xypya'ëyoy.

¹¹E pën jëtu'unts, nän oy, je'eyëp ko yë'ë mja'akyukëp ko jëtu'un ijxtëm tääpë tsi'iw'aats xypya'ëyoyën ko të tsyi'itsy, näjyëtu'unës yë Nínive kajpn mpa'ëyoy. Ma tääpë kajpnën naxy jam mëko'px ja i'px yë pi'k ëna'k mëti'ipë ka'ap tii poky tmëëtëtyën ets näjyëtu'un yë aayjëyujk ujtsjëyujk.