Read Biblia Mixe de Quetzaltepec Números 1 Bible Online

Números 1 - Biblia Mixe de Quetzaltepec bible

Números 1

¹Ma tyu'uk'anyën yë mëmäjtskpo'opë, ma jajëmëjt ja mëmäjtskpë tsyo'ontä'äkyën. Tëë jëtää ënäty nyäxy tu'kjëmëjtnaxyën, ma Israel ja'ayëty jap tsyoontën Egiptë. Ënät ja Tios ojts tmëkäjpxy ja Moisés, jam ma ja të'ëts'it të'ëtsnaaxwiinyëtë txëëwatyën Sinaí. Jap ënäty yajpaaty ma wit tëjkën ma ja Tios mëët ja näpyaatë y'ityën, ko ojts y'ënë'ëmxëty:

²Yajpëtë'ëk tu'uk yë jaaymyujkën, ma xykyëxjaaytya'ajëtyën yë xyëëwëty yë Israel ja'ayëty aak tu'kmënaax tu'kmëkajpnëty ets tu'kjëëky tu'kmëku'ukëty. Jëtu'un'äämpy yajnijawëty ninu'un nyiwinë'atën yë ye'etyëjktëjk.

³Wa'ats xyajnokytyëjkëtya'atëty yë ye'etyëjktëjk mëti'ipë jyëmëjtëtyën i'px. Ets jyëkyäjpnëtëp nyëjkxtëty tsiptuunpë, tyimja'tëty jëtu'un mëjja'aytyëjkpaat. Ets xytyuknija'awëtya'atëty ma tyuka'ajëtën nitu'ukjaty, ko wya'kta'aktëty. Ya'atë yam ntuk'ëne'emyën yë'ë mëët xytyuunk'atëty yë Aarón.

⁴Ets tu'ukjaty ma ja tu'ktëjkpën,

⁵E tsyaats jëtu'un ja xyëëw myintë ja ja'ayëty, mëti'ipë nyikopk'atëpën ja jyiiky myëku'ukëty ets tputëkëtëty: Ma ja Rubén ja jyä'äyën yë'ë jam nyikopk'atëp yë myëku'uktëjk yë Elisur, yë Sedeúr yë myaank.

⁶Ma ja Simeón ja jyä'äyën yë'ë jam nyikopk'atëp yë myëku'uktëjk yë Selumiel, yë Zurisadai yë myaank.

⁷Ma ja Judá ja jyä'äyën yë'ë jam nikopk'atëp yë myëku'uk yë Nahasón, yë Aminadab yë myaank.

⁸Ma ja Isacar ja jyä'äyën yë'ë jam nikopk'atëp yë myëku'uktëjk yë Natanael, yë myaank yë Zuar.

⁹Ma ja Zabulón ja jyä'äyën yë'ë jam nikopk'atëp yë myëku'uktëjk yë Eliab, yë myaank yë Helón.

¹⁰Ma ja José ja y'u'unk y'ëna'k ja jyä'äyëtyën, ijxtëm yë Efrainkën yë'ë nëjkx jam tnikopk'aty myëku'uktëjk yë Elisamá, yë Amiud yë myaank. E ma ja Manasés ja jyä'äyën yë nëjkx jam tnikopk'aty yë myëku'uktëjk yë Gamaliel, yë myaank yë Pedasur.

¹¹Ma ja Benjamín ja jyä'äyën, yë'ë nëjkx jam tnikopk'aty yë myëku'uktëjk yë Abidán, yë myaank yë Guidoní.

¹²Ma ja Dan ja jyä'äyën yë'ë nëjkx jam tnikopk'aty yë myëku'uktëjk yë Ahiézer, yë myaank yë Amisadai.

¹³Ma ja Aser ja jyä'äyën yë'ë nëjkx jam tnikop'aty yë myëku'uktëjk yë Paguiel yë myaank yë Ocran.

¹⁴Ma ja Gad ja jyä'äyën yë'ë nëjkx jam tnikopk'aty yë myëku'uktëjk yë Eliasaf, yë myaank yë Reuel.

¹⁵Ma ja Neftalí ja jyä'äyën yë'ë nëjkx jam tnikopk'aty yë myëku'uktëjk yë Ahirá, yë myaank yë Enán.

¹⁶Ya'atë jëtu'un ojts yajnikajpxpätë ma Israel kajpnën ets ja myëku'uktëjk tnikopk'atëty ets yë'ë muum tkutänëtëty.

¹⁷Ma tyu'uk'anyën ja mëmäjtskpo'opë, tääpë jëmëjtpë. Ënät yë Moisés mëët yë Aarón ojts tmëkajpxmujkta'atë ya'atë ja'ayëty, mëti'ipë ja Tios të tyuknipëkëtën ja tuunk ets tnikopk'atëty ja myëku'uktëjk ets näjyëtu'un tyajtu'ukmujktaaytyë ja naax kajpn. Tääts ojts ja jaaymyujkën tyajpëtë'ëktë. Ojts tkëxjaaytya'atë nokykyijxy ja Israel ja'ay ja xyëëwëty, aakyë'ë ye'etyëjktëjk jënu'un tyu'kja'ay'atën. Ets tjaaypyëtsëmtaaytyë ja ye'etyëjktëjkëty ninu'un ënäty nyiwinë'atën, mëti'ipë ja jyëmëjtëtyën i'px ets ni'ik.

¹⁹Jëtu'un tä ënäty ja Tios të tni'ënä'ämën. Ya'atë jaaymyujkën jam ojts pyëti'iky ma ja të'ëts'it të'ëtsnaax txëëwatyën Sinaí.

²⁰Ko ja ja'ay yajjaamyujktaaytyë, nokyjoty, jëtu'un tä ënäty tyu'kja'ay'atën, tyu'kjëëky'at tyu'kmëku'uk'atën ets tyu'kmënaax'at tyu'kmëkajpn'atën, ja ye'etyëjktëjk mëti'ipë ja jyëmëjtëtyën i'px ets mëjja'aytyëjkpaat jä'ä ojts nyiwinë'atë. Ma jyä'äyën yë Rubén, yë myëtu'uk u'unk yë Israel, jä'ä ojts yajmëtyoowpëtsëmtë, mëti'ipë jyëkyäjpnëtëp nyëjkxtëty tsiptuunpë, wëxtyikxy tëtujk mil ja mëkoxk mëko'px.

²²Ma Simeón yë jyä'äyën, jä'ä ojts yajmëtyoowpëtsëmtë wëxtyikxy majkmokx majktaxk mil ja tëkëëk mëko'px.

²⁴Ma Gad yë jyä'äyën, jä'ä ojts yajmëtyoowpëtsëmtë wëxtyikxy mëkoxk mil ja tëtujk mëko'px ja wëxtyikxy majk.

²⁶Ma Judá yë jyä'äyën, jä'ä ojts yajmëtyoowpëtsëmtë tëkë'px majkmajkts mil ja tëtujk mëko'px.

²⁸Ma Isacar yë jyä'äyën, jä'ä ojts yajmëtyoowpëtsëmtë wëxtyikxy majkmajkts mil ja taxk mëko'px.

³⁰Ma Zabulón yë jyä'äyën, jä'ä ojts yajmëtyoowpëtsëmtë wëxtyikxy majkmokx mäjtsk mil ja taxk mëko'px.

³²Ma y'u'unk y'okën yë José, jä'ä ojts yajmëtyoowpëtsëmtë wëxtyikxy mil ja mëkoxk mëko'px ma Efraín yë jyä'äyën ets i'px majkmäjtsk mil ja mäjtsk mëko'px ma Manasés yë jyä'äyën.

³⁶Ma Benjamín yë jyä'äyën, jä'ä ojts yajmëtyoowpëtsëmtë i'px majkmokx mil ja taxk mëko'px.

³⁸Ma jyä'äyën yë Dan, jä'ä ojts yajmëtyoowpëtsëmtë tëkë'px mäjtsk mil ja wëxtujk mëko'px.

⁴⁰Ma jyä'äyën yë Aser, jä'ä ojts yajmëtyoowpëtsëmtë wëxtyikxy tu'uk mil ja mëkoxk mëko'px.

⁴²Ma jyä'äyën yë Neftalí, jä'ä ojts yajmëtyoowpëtsëmtë wëxtyikxy majktëkëëk mil ja taxk mëko'px.

⁴⁴Ma ja jaaymyujkën mëti'ipë ojts tyajpëtë'ëktën yë Moisés ets Aarón mëët ja nimajkmäjtskpë ja ja'ayëty, mëti'ipë ojts tnikopk'atën ja jyä'äyëty ets ja jyiiky myëku'ukëty ma ja Israel ja'ayëtyën. Jä'ä ojts nyiwinë'atë,

⁴⁵ja ye'etyëjktëjk Israel ja'ayëty mëti'ipë naxy ja jyëmëjtëtyën i'px ets jyëkyäjpnëtëp nyëjkxtëty tsiptuunpë,

⁴⁶tëkokyë ya'atë ja'ayëty jä'ä ojts nyiwinë'atë tëtujk mëko'px ja tëkëëk mil ja mëkoxk mëko'px ja kujkm.

⁴⁷Yë Leví ja'ayëty ka'ap jap yë xyëëw yajkëxjaaytyë ma jaaymyujkën, mëti'ipë ojts pyëti'ikyën, ma myëku'uktëjkëty yë xyëëw pyäjtën, yë'ë jëtu'un yë Israel ja'ayëty.

⁴⁸Jä'ä ko yë Tios tyaa ënäty të t'ënëëmë yë Moisés:

⁴⁹Ko ënäty yë jaaymyujkën xyajpëtë'ëky ma Israel ja'ayëtyën, këtii yë Leví y'u'unk y'ëna'k xyajnokytyëkëty.

⁵⁰Jä'ä ko yë Leví ja'ayëty yë'ë mëpaat jap xypyëjktä'äky ma wit tëjkën, mëti'ipë myë'ijtypyën yë käjpxytyu'unën. Ets yë'ë tkëwent'atëty tëkokyë mëti'ipë jap tuunpën ets mëti'ipë jap yajpatpën ma Tios yë wyittëjkën. Ko muum tääpë Tios yë wyittëjk yajmënëjkxëty, yë'ë nëjkx tyajpëtë'ëktë ets tmënëjkxta'atëty tëkokyë jënu'un jap tyunyën. Yë'ë jam tyimna'ittëp ya'atë Tios yë wyittëjk.

⁵¹Ko muum yajmënëjkxa'anëty, yë'ë jyittëp ets jatëkok tkojtëkatstëty ma ënäty të tmëja'tën. Pën nëkoo kë'ëmwinma'any myëwinkoonpy ya'atë tsajptëjk nëjkxëp y'ooky.

⁵²E yë nimaypyë Israel ja'ayëty tu'ukyë mëpaat tsyëënëtë jëtu'un tjëkyäpëty wi'ix mëpaat ënätyë tsyoontën, ko muum yë tsip tpaatëty, tu'kkëëyi'ikpyë ja ja'ayëty aakmëët ja wyitwintëyëty.

⁵³E yë Leví ja'ayëty yë'ë nëjkx tnatsëënëtë yë Tios yë wyittëjk ets yë'ë kyëwent'attëp, këtiipë yë Tios tukjoot'anpëkëty yë Israel ja'ayëty.

⁵⁴Yë Israel ja'ayëty jëtu'un ojts winë tuntë, tä ja Tios ënäty të tuk'ëne'emyën ja Moisés.