Read Biblia Mixe de Quetzaltepec Números 10 Bible Online

Números 10 - Biblia Mixe de Quetzaltepec bible

Números 10

¹Ënät ja Tios ojts ja Moisés tmëkäjpxy ets t'ënëmaay:

²Oytyun mäjtsk yë pujxnxuxn aak poop pujxn myajtunëp ets yë'ë mtuk'oytyunëp yë pujxnkuwojpën. Yë'ë ja'ay yajtukxuxmuktëp ets ye'eymyuktëty, yë'ë myëtowtëp ko ja tso'onën y'ita'anëty.

³Ko mäjtsk ja pujxnxuxn yajtukxu'uxëty, tëkokyë ja ja'ay myujkta'atëty ma mijtsën jam ma yajnitëkën ja wit tëjk ma näpyaatë y'ityën mëët yë Tios.

⁴Ko je'eyë tu'ukyë yë pujxnxuxn yajtukxu'uxëty, yi'iyë nëjkx ye'eymyuktë mëjja'aytyëjkëty.

⁵Ko yajtukxu'uxëty ja pujxnxuxn ets ja ja'ay ya'axtëty jyoktëty, ënätyë tsyo'onta'atëty ja ja'ay mëti'ipë ënäty tsënaaytyëpën a'oytsyow.

⁶Ko mäjtsk'ok xyu'uxëty yë pujxnxuxn, ënät tsyoontëty mëti'ipë yajpatëpë ëpa'tkë'ëytsyow. Ko yë pujxnxuxn xyu'uxëty ets xymyëtowtëty, näjyëtu'un yë ja'ayëty ya'axtëty jyoktëty, yë'ë ënäty nyikäjpxyp ets mtso'onta'atëty.

⁷E ko yi'iyë pujxnxuxn atu'uk xyu'uxëty, yë'ë ënäty nyikäjpxyp ets je'eyë ja'ay ye'eymyuktëty.

⁸Yë Aarón yë myaankëty mëti'ipë teety'ajtëpën yë'ë pujxnxuxn tyukxu'uxtëp.

⁹Ko yë mëtsiptëjkëty mtukmin mtukja'tëtëty ma ënäty m'itën mtsëënëtën ets miitsëty mnäkyuwa'anëtëty, mëk nëjkx mya'axtë mjoktë ets xyajxuxkä'äktëty näjyëtu'un ja pujxnxuxn. Jëtu'un'äämpy nja'amyätstëty, ëjts mWintsën Tiosëty ets nyajtso'oktëty ma ja mëtsiptëjkëtyën.

¹⁰Myajxu'uxtëp näjyëtu'un yë pujxnxuxn ma xoontakën y'ityën, ijxtëm ko yë xëëw tyunyën ets ko yë po'o pyi'k'aty. Näyjyëtu'un ko yë wintsë'kën xyaktëty nino'okpyë ets ko yë wintsë'kën xyaktëty ma ja nay'ëëw'oy näykyajpx'oyë y'ityën. Jëtu'un'äämpy miitsëty nja'amyätstëty. Ëjts mWintsën Tiosëty.

¹¹Ma y'i'px anyën ja mëmäjtskpë ja po'o, mëmäjtskjëmëjtpë ma tsyo'ontën jap Egiptë. Ënät ojts jam ja yoots jyëwä'äky ma ja wit tëjkën, mëti'ipë myë'ijtypyën ja käjpxytyu'unën.

¹²Tä ja Israel ja'ayëty tsyo'ontaaytyë ma ja të'ëts'it txëëwatyën Sinaí. Ja yoots jam ojts tyiiy'awë ma ja Parán të'ëts'itën.

¹³Jëtu'un tä ënäty ja Tios ja y'ënä'ämën të tyäkyën ma Moisésën.

¹⁴Yë'ë jëyëjp nëjkxtëp ja tsiptuunpëtëjkëty mëti'ipë myëët'ajtëpën ja Judá ja myëjwit wintëy ets yë'ë tsiptuunpë wintsën'atëp ma yë'ëjëtyën yë Nahasón, myaank yë Aminadab.

¹⁵Ma tsiptuunpëtëjkëtyën mëti'ipë yë Isacar jyä'äy'äjtypyën, yë'ë ënäty jam tsiptuunpë wintsën'ajtp yë Natanael, yë Zoar yë myaank.

¹⁶Ma tsiptuunpëtëjkëtyën mëti'ipë Zabulón jyä'äy'äjtypyën yë'ë ënäty jam tsiptuunpë wintsën'ajtp yë Eliab, Helón yë myaank.

¹⁷Ënät ojts tkäjta'atë ja Tios ja wyittëjk, tääts ja Guersón ja y'u'unk y'ok ets ja Merarí y'u'unk y'ok tmëtu'utëjkëtyë tëkokyë winë jënu'un ënäty mëët tyunyën. Jä'ä ko yë'ë ënäty të yajtuknipëktë ets yë'ë muum tmënëjkxtëty.

¹⁸Ënät ojts näjyëtu'un tyu'utëkëtë ja tsiptuunpëtëjkëty mëti'ipë myëët'ajtëpën ja Rubén ja myëjwit wintëy ets yë'ë jam tsiptuunpë wintsën'ajtp yë Elisur, myaank yë Sedeur.

¹⁹Ma tsiptuunpëtëjkëtyën mëti'ipë yë Simeón jyä'äy'äjtypyën yë'ë ënäty jam tsiptuunpë wintsën'ajtp yë Selumiel, myaank yë Zurisadai.

²⁰Ma ja tsiptuunpëtëjkëtyën mëti'ipë yë Gad jyä'äy'äjtypyën, yë ënäty jam tsiptuunpë wintsën'ajtp yë Eliasaf, myaank yë Reuel.

²¹Ënät ojts näjyëtu'un tsyoontë mëti'ipë yë Quehat jyä'äy'äjtypyën, mëti'ipë myënëjkxtëpën ja apëjk atu'unën jënu'un jap tyunyën ma Tios ja wyittëjkën mëti'ipë ëmaayëtyën. Ko ijty jam jya'të ma ënäty jya'ta'antë, kojy tukja'anëtë ja Tios ja wyittëjk.

²²Ënät ojts näjyëtu'un tsyoontë ja tsiptuunpëtëjkëty mëti'ipë myëët'ajtëpën ja Efraín ja myëjwit wintëy ets yë'ë jam tsiptuunpë wintsën'ajtp yë Elisamá, myaank yë Amiud.

²³Ma ja tsiptuunpëtëjkëtyën mëti'ipë Manasés jyä'äy'äjtypyën, yë'ë ënäty jam tsiptuunpë wintsën'ajtp yë Gamaliel, myaank yë Pedasur.

²⁴Ma ja tsiptuunpëtëjkëtyën mëti'ipë yë Benjamín jyä'äy'äjtypyën yë'ë ënäty jam tsiptuunpë wintsën'ajtp yë Abidán, yë myaank yë Guidoní.

²⁵E jam tim ix'amnë ma ja tsiptuunpëtëjkëtyën, yë'ë ojts jam nyäwyaapëtë ja tsiptuunpëtëjkëty mëti'ipë jyä'äy'äjtypyën yë Dan ets yë'ë tsiptuunpë wintsën'ajtp yë Ahiézer, yë myaank yë Amisadai.

²⁶Ma tsiptuunpëtëjkëtyën mëti'ipë yë Aser jyä'äy'äjtypyën, yë'ë jam tsiptuunpë wintsën'ajtp yë Paguiel, yë myaank yë Ocran.

²⁷Ma tsiptuunpëtëjkëtyën mëti'ipë yë Neftalí jyä'äy'äjtypyën yë'ë jam tsiptuunpë wintsën'ajtp yë Ahirá, yë myaank yë Enán.

²⁸Jëtu'un ijty nyäwyaapëtë ja tsiptuunpëtëjkëty mëti'ipë jam tsiptuunpë'ajtëpën ma ja Israel ja'ayëtyën, ko ënäty muum nyëjkxtë.

²⁹Ënät ojts yë Moisés tëkok yë jyiy t'ënëëmë mëti'ipë xyëëwajtypyën Hobab, yë myaank yë Reuel mëti'ipë Madián ja'ayën: Ëëtsëty jamës nëjkxtë ma it naaxwiinyëtën mëti'ipës ja Tios të xytyukwinwanëtën. Min mëët ëëtsëty ets jëëky mëku'uk myajjawëty, jëtu'un tä Tios ëëts oy xymyëët'atën, maas n'Israel ja'ay'atën.

³⁰E ja Hobab tyaa y'ëtsooy: Ka'ap yowë. Jamës jatëkok nwinpita'any maas yë nnaax nkajpnën ma tsyëënëtën ja njëëky nmëku'ukës.

³¹Këtii mnëjkxy, ni'ikyë ja Moisés jëtu'un t'ënëëmë. Mijts wa'ats xynyijawë maa mëpaat yë tsënaaytyakn yajpaaty oypyë jam të'ëts'itjotm, jyëkyejpy mijts xytyu'uwinwowtëtyës.

³²Pën mijts miimp mëët ëëtsëty, tëkokyë jënu'un ëëts yë Tios winë xymyo'otën xykyäxtën, nëjkxëp näjyëtu'un mijts myajmo'oy.

³³Ënät jam tsyo'ontë ma ja Wintsën ja kyopkën ets ojts tyu'uye'eytyë tëkëëk xëëw. Ja kaaxë mëti'ipë myë'ijtypyën ja käjpxytyu'unën mëët ja Wintsën, jëjp'am ënäty nyijkxy. T'ixta'ay yë'ë jëyëjp ja it naaxwiinyëtë ma jëtu'un pyo'kxtëtyën ja ja'ayëty.

³⁴Ko ijty xyiiny'äty je'eyë tsyu'utsoontë tääts ja yoots nyäpyëjktä'äkyë ma yë'ëjëtyën mëti'ipë ja Tios jyä'ä'ajtypyën.

³⁵Ko yajkëëytsyoony ja kaaxë ënät ja Moisés ijty y'ënä'äny: Pëtë'ëk, Wintsën. Wä'än tkäkta'atë yë ja'ayëty mëti'ipë mëtsip'ajtëpën. Je'eyë mna'ixëtëty tääts tsyo'onta'atëty.

³⁶E ko ja kaaxë muum wyi'imy, tyaa ja Moisés y'ënä'äny: Wimpit, Wintsën, ma ja mayjyä'äyën mëti'ipë Israel ja'ayëtyën.