Read Biblia Mixe de Quetzaltepec Números 12 Bible Online

Números 12 - Biblia Mixe de Quetzaltepec bible

Números 12

¹Ënät yë Maria ets Aarón ojts tyëkëtë kajpxpë, yë'ë Moisés nyi'ojëtyëp, mëët jä'ä ko ënäty yë'ë mëët të pyiky yë to'oxytyëjk mëti'ipë Etiopíë tso'onpën.

²Ënät näjyëtu'un y'ënantë: Yë Tios ka'ap yi'iyëty mëët yë Moisés tyimmëtyä'äky, mëtyakp näjyëtu'un mëët ëëts'ajtëmë. Ya'atë jëtu'unpë aaw ayuk myëtoow yë Tios.

³Yaa naaxwiiny ni pën ënäty jëtu'un kyatëtä'äkyëty tä Moisésën.

⁴Paaty yë Tios t'ënëmaay yë Moisés, Aarón ets Maria: Jam nëjkxtë nitëkëëk ma wit tëjkën ma näpyaatë y'ityën mëët ja Tios. Ënät ojts jam nitëkëëk nyëjkxtë.

⁵Yë Tios yootsjoty ojts kyëtä'äky ets nyäpyëjktakë jam ma ja wit tëjk yajnitëkën ma näpyaatë y'ityën, tääts ojts tmëkäjpxy ja Aarón ets ja Maria. E ko ojts jam nyäwya'këxë'ëkëtë.

⁶Ënät ja Tios y'ënëmaayëtë: Mëtoow'itë mëti'ipë yam ntuk'ënëëmëjantëpën: Ko tu'uk yë nkäjpxynyajxpës yajpaaty ma miitsëtyën, ëjts mëtyakpës mëët kuma'ayjoty ets ntuk'ijxypyës oytyiijëty tä ja'ay y'ijxën myä'ätyën.

⁷E yë ntuunpës Moisés ka'apës jëtu'un nmëkäjpxy. Yë'ë oy yë winë tuny këtiinëm jyëtu'unëty yë myëku'uktëjk.

⁸Wiinxë jëjpxës mëët nmëtyä'äky, jëtu'un tä mëpaat yajwinjawën. ¿Pën yë'ë wa'ats xytyim'ixyës wiinxë jëjpxë, tii ko miitsëty xynyi'ojëtë?

⁹Tios ojts jyoot'anpëky mëët yë'ëjëty ets ojts jam tsyo'onkojnë.

¹⁰Ko ja yoots jam jyëwä'ky ma ja wit tëjkën ma ja Tios kyëtä'äkyën. Ënät ja Maria ojts ja leprë pu'uts tyukpëtsëëmta'ayë, poop ja nyini'kx ojts y'awinpity. Ko ja Aarón y'ijxwinpijty, ënät t'ijxy ko tëëtëm ja pu'uts pa'am ja Maria nyatukpëtsëëmtaayënë.

¹¹Ënät ja Aarón t'ënëmaay ja Moisés: Wintsën tun yë mëyajtën, këtii ëëts xytyiytyuntëty mëët ko ja nëë poky të ntuntës, mëët ko ja tsuu'at të nyajmëta'aktës.

¹²Këtii xyajkutukëty ets jëtu'un wyë'ëmëty tä u'unk maayën ka'apë oy myëxu'unk'atyën ets piw nuuk yë nyini'kx jyaak yajpaatëty.

¹³Ënät ja Moisés ojts ja Tios tmënu'kxtä'äky ets t'ënëmaay: Wintsën, tun yë mëyajtën yajtso'ok yaj'akëta'ak ya'atë to'oxytyëjk.

¹⁴Ënät ja Tios y'ëtsooy: kooxyëpy yë tyeety jeexyë wyinkutsujëty, ëxëëk jeexyë wyi'imy wëxtujk xëëw. E paaty yam n'ënëëmë, ko yë'ë nitëjkëyëp wëxtujk xëëw tyëkoy'itëty ma ja naax kajpnën ets nëjkx muum jëkäm jyëtity, ko ënäty wëxtujk xëëw të nyäxy jyëkyäpëp jatëkok wyimpitëty.

¹⁵Jëtu'un'äämpy ja Maria ojts yajjuuty kajpnjoty ets wëxtujk xëëw jam jëkämy y'ijty. E ja naax kajpn ojts jam pyo'oxy ma ënäty jam yajpaatyën.

¹⁶Ko ja Maria ojts tyajkä'pxy wëxtujk xëëw ma mëpaat ka'ap yajpaatyën kajpnjoty. Ënät jatëkok wyimpijty ets jyä'äjty jam kajpnjotm. Je'eyë jyä'äjty tääts ja naax kajpn nyäpyatso'onë ets jam jyajtë ma ja Parán të'ëts'itjotmën.