Read Biblia Mixe de Quetzaltepec Números 14 Bible Online

Números 14 - Biblia Mixe de Quetzaltepec bible

Números 14

¹Ënät ja Israel ja'ayëty tyëjkëtyë jëëpyë yaxpë, jëtu'un ja tsuu tyajnajxtë.

²Ets tyëjkëtyë ëëpë kajpxpë. Jä'ä ja Moisés ets ja Aarón wiinkjaty nyimëtyaktëp, tyaa y'ëna'antë: Ni'ik tëë jeexyë y'oyë, ko jeexyë jap Egiptë ëkë yaa të'ëts'ituuy ntimy'o'këmë.

³¿Tii ko Tios të xy'ëkyajmi'inëmpë ma ya'atë naax kamën? ¿Paatykyëjxmën të xyajmi'inëmë ets ënät tsipjoty n'o'kmëtyë? ¿Ets ja nto'oxytyëjk'ajtëmë ets u'unk ëna'k jä'ä ja mëtsip tmëwë'ëmtëtyë? Nikë wä'än y'oypyëtsëmëty ko jatëkok nwinpijtmëty jap Egiptë.

⁴Ets nyäy'ënëmaayëtë: Tsojk tu'uk yë kutuunk npëjktakëmë, mëti'ipë xywyinye'eymyëpën ets nwinpijtmëty Egiptë.

⁵Ënät ja Moisés mëët ja Aarón nyäjyijtakëtë jam mayjyä'äyjotm.

⁶E ja Josué ets ja Caleb mëti'ipë ënäty ojts ja naaxwiinyëtë të t'ixtën, ja wyitëty mëti'ipë ënäty myëët'ajtëpën yajxon tukë'tsëtyääytyë, mëët ko ëxëëk nyäyjyawëtë,

⁷Ënät t'ënëmaaytyë ja Israel ja'ayëty: Ja naaxwiinyëtë mëti'ipës ojts të n'ixtën, janty'oy jä'ä.

⁸Ko yë Tios xypyutëjkëmëty, xymyo'omyëp tääpë it naaxwiinyëtë. Ma tääpë it naaxwiinyëtën ka'ap jam yë jë'kxy pëky y'ëmaaytyä'äky. Jëtu'un jam yë jë'kxy pëky xyit kyo'oy, tä yë nëë pyëyi'ikyën.

⁹E këtii xykyäjpxy kumëtoownaxtë yë Wintsën. Këtii xytyimtsë'ëkëtëty tääpë ja'ayëty, mëti'ipë jam tsënaaytyëpën. Jä'ä ko yë'ëjëty jëtu'un yë nyaxa'antë tä jeexyë yë tsajpkääky nka'ayëmën. Yë'ëjëty ka'ap tmëët'atë pën putëkëtëpën. E ëëtsajtëm yë Tios yë'ë mëët nyajpatëmë. Paaty myaj'ënëëmëtë ets këtii mtsë'ëkëtëty.

¹⁰Ko jëtu'un y'ënantë, ja yi'inëm ja ja'ay kyakuka'tsëtë. Ënät ja Tios ja myëj'ajt y'oyajtën ojts nyänyikëxë'ëkyë, ma ja tsajptëjkkopkën, mëti'ipë wit tëjkën ets ja Israel ja'ayëty ojts t'ixtë.

¹¹Ënät ja Wintsën t'ënëmaay ja Moisés: ¿Jëna'a t'ëxmatsa'antë yë y'ëxëëk winma'anyëty, ko ka'apës xymyëpëktë, oyës yë nmëjajtën njayaj'ixyë?

¹²Nkäxäämpyës yam yë mëk pa'am, mëti'ipë yë'ë yaj'o'kta'ajëtëpën, këtiipë tjä'ä'atëty ja naax kam. E mëët mijts nyajkojäämpyës tu'uk yë mëj kajpn, mëti'ipë jotmëk itëpën.

¹³Ënät yë Moisés t'ëtsooy yë Wintsën: Mijts, mëët tu'uk yë mëk'ajtën të xyjyuuty ya'atë naax kajpn jap Egiptë. E ko yë Egiptë ja'ayëty nijawëtëty, mëti'ipë mijts mtunäämpyën.

¹⁴Ënät nëjkx tukmëmëtya'aktë yë ja'ayëty, mëti'ipë Canaán tsënaaytyëpën. Yë'ëjëty tëë tnijawëtë ko mijts itkujky myajpaaty ma ya'atë naax kajpnën ets ko mijts Wintsën, wiinxë jëjpxë mtimnyänyikëxë'ëkyë. Yë mjok myoots yë'ë mtukniju'uxyp xëëny ets jëtu'un xytyu'uwinwoy. E ko kyoots'aty, jëënmëët xytyu'uwinwoy.

¹⁵Pën myaj'o'kpy ya'atë mayjyä'äy tu'ktsojk, yë wiink naax wiink kajpnëty nëjkxëp y'ëna'antë.

¹⁶Yë Wintsën ka'ap të myäyë ets ya'atë ja'ay tyajja'tëty jam ma ja it naaxwiinyëtën ma ojts tukwinwanën, paaty je'eyë të tim yaj'o'kta'ay jam të'ëts'itjotm.

¹⁷Paaty yam npëjktsoyës ma mijtsën Wintsën ets xyaj'ixëtëty yë mmëkajtën m'oyajtën, jëtu'un tä të xywyinwanën. Mijts jëtu'un të m'ëna'any,

¹⁸ko ka'ap tsojkyë mjoot'anpëky, ko mëj këjää mtsoky mjawë ets mnime'kxyp ja nëë poky ets ja käjpxy kumëtoownajxën. Näyjyëtu'un të m'ëna'any, ko ja pokytyuunpë kë'ëm tkumëtoy ja y'ëxëëk'ajtën ma y'u'unk y'ëna'kën.

¹⁹E komë yajnija'ap, ko mijts mëj këjää mtsoky mjawë, paaty pokymyä'kx ya'atë naax kajpn. Mijts këjää yë mä'kxtujkën të xymyëët'aty mëët yë'ëjëty ixnu'un të myintë, të tyimtsoontë jap Egiptë ets të jya'të yaa.

²⁰Ënät ja Wintsën y'ëtsooy: Oy, oy'atëp tyamës npokymyä'kxtëty jëtu'un tääjës yam xy'amëtoyën.

²¹E yë'ë tëy yajxon nyijawëtëp, ko jëtu'un tääjës njuukyëtyën ets jëtu'un tääjës yë nmëj'ajt n'oyajtën y'ityën naaxwiiny naaxkëjxy.

²²Yë ja'ayëty mëti'ipë tëë tja'ixtën yë nmëj'ajt n'oyajtënës ets mëti'ipës të nyaj'ixyën jap Egiptë ets yaa të'ëts'ituuy. Ets je'eyë janaam jatsojk xywyinma'any'ixtës ets ka'ap tuntë mëti'ipës njani'ënä'ämëpën.

²³Nitu'uk nëjkx kyaja'të jam ma ja naax kamën mëti'ipës ntukwinwa'anëyën ja y'ap y'okëty. Nitu'uk nëjkx tka'ixy ja it naaxwiinyëtë, mëti'ipës ka'ap të xymyëj'ixy të xymyëjpëjktä'äkyën.

²⁴Yi'iyë yë ntuunpës Caleb mëti'ipë oy ja jyot wyinma'anyën ets tëë xymyëmëtoyës, jëtu'un ijxtëmës ntukjotkëtä'äkyën. Paaty yë'ë ntuk'ixäämpyës ja it naaxwiinyëtë, mëti'ipë ojts të t'ixy të tunyën ets ja y'u'unk y'ok jam nëjkx tsyënaaytyaknpëktë.

²⁵Yë Canaán ja'ayëty ets Amalec ja'ayëty jam yë tsyëënëtë joyjyotm. Jëpom mwinpitëty ets xypyanëjkxtëty ja tu'u mëti'ipë jam të'ëts'itjotm najxpën ets jyä'ty ma Tsaptsmejyën.

²⁶Ënät ja Wintsën ojts tmëkäjpxy ja Moisés ets ja Aarón ets t'ënëmaay:

²⁷¿Mapaatës ënät nmä'kxtukëty mëët ijxtëm ya'atë Israel ja'ayëty tyim'ëw tyimkajpxtën? Xëmës nmëtoownë je'eyë wiinkjaty xynyikajpx xynyimëtyaknëtës.

²⁸Nëjkx ënëëmëtë ko ëjts yam ënaanp: Ëjts, mëti'ipë Wintsën'ajtpën, njuukyajtënës yam kë'ëm ntukajpxpejtyp ets jëtu'un mjatëty mkëpätëty tääjës të nmëtoyën mkajpxtën mmëtya'aktën.

²⁹Tëkokyë yë ye'etyëjktëjk jënu'un të yajjaaypyëtsëmtën ma ja jaaymyujkën ets i'px yë jyëmëjtëty etsës wiinkjaty të xynyimëtya'aktë. O'kta'atëp ënätëty ets ja nyini'kxëty jëtu'unyë kujy jëpipy wyë'ëma'antë yaa të'ëts'itjoty.

³⁰Yi'iyë yë Josué ets Caleb jam nëjkx jya'të ets miitsëty nitu'uk nëjkx jam nkatëkëtë ma ja itjotmën mëti'ipë ntukwinwa'anëtyën mëët ja oyajtën xoontakën.

³¹E ja y'u'unk y'ëna'këty mëti'ipë të xynyikajpxtën, ko nëjkxëp ja mëtsip ëxëëk tyunëtë, nikë nyajnëjkxantëpës ma ja itjotmën mëti'ipë miitsëty të xy'ixtijtën ets yë'ë tukxontëty.

³²Miits yë mnini'kxëty jëtu'unyë yaa kujy jëpipy wyë'ëma'antë të'ëts'ituuy.

³³Ma ja m'u'unk m'ëna'këty jyuuky'ata'antën wëxtyikxy jëmëjt, yë'ë tyuunk'atëp yë jëyujk këwent'ajtk tsajppax këwent'ajtk. Jëtu'un'äämpy tkëpätëty, mëët ko ka'ap mkäjpxyjyä'äkyukëtë, koonëm m'o'kta'atëty yaa të'ëts'ituuy.

³⁴Wëxytyikxy xyëëw jam m'ijtë joyjyotm ets xy'ijxtë xytyuuntë. E jëtu'un ënät wëxtyikxy jëmëjt xykyëpätëty ja mpokyëty: tu'kjëmëjt xykyukëpätëty ja tu'kxëëwpë mtuuntëkooytyën. Jëtu'un'äämpy xynyijawëtëty wi'ix ja ja'ay jyäty kyëpetyën mëti'ipës xykyamëjpëjktakpën.

³⁵Ëjts mëti'ipë Wintsën'ajtpën, ëjts ënaanp: Jëtu'unës ntuna'any ya'atë kajpn, mëët ko të nyämyukëtë etsës të xynyipëtë'ëktë. Yaa të'ëts'ituuy kyëxtëty nyaxtëty. Ets yaa ënät y'o'kta'atëty.

³⁶Ja ja'ayëty mëti'ipë ënäty ja Moisés të tkexyën ets nëjkx ja naax kajpn t'ixtë tuntë ets wyimpijnëtë. Ojts ja naax kajpn t'ëxëëkwinkajpxëtë ets ojts wiinkjaty ja Tios tijtë. Ja Wintsën ajotkumonë ojts yaj'o'kta'ajëtë.

³⁷

³⁸Yi'iyë ja Josué ets ja Caleb ojts wyë'ëmtë juuky.

³⁹Ko ja Moisés tukmëmëtyaktaay ja Israel ja'ayëty, wi'ix ënäty ja Tios të y'ënä'änyën. Ënät ojts tyëkëtë moonpë tujkpë.

⁴⁰Komjopyëp janty tsojk ojts pyëtë'kojtë ojts jam nyëjkxtë kopkkëjxm ets nyäy'ënanëtë: Tëë yam niye'eypyäjtëmë. Tsojk nja'amënë ma ja itjotmën mëti'ipë ja Tios të xytyukwinwa'anëmën. Janty tëy ko tëë njanty pyoky tyu'unëmë.

⁴¹Ënät ja Moisés y'ënëmaayëtë: ¿Tii ko xykyäjpxy kumëtoownaxtë yë Tios yë y'ënä'ämën tyiyajtën? Tääpë xytyuknipëjktaakëtën ka'ap oy wyimpëtsëma'any.

⁴²Këtii mnëjkxtë. Jä'ä ko yë Tios ka'ap yë mputëkëja'anëtë. Yë mëtsipëty ka'ap ënät myajmëta'akëtëty.

⁴³Jëjp'ixy jam yë Amalec ja'ayëty mtim'ëwxitëtë ets Canaán ja'ayëty ets tsyiptuna'antë mëët miitsëty. Jëtu'un myaj'ooka'an myajtëkoya'anëtë. Miitsëty mnija'awëtyëp ko tëë yë Tios xymyëtëkoytyë, paaty tyam ka'ap yajpaaty ma miitsëtyën.

⁴⁴Yë'ëjëty ka'ap jyä'äkyujkëtë, ojts nyëjkxtë ma ja kopkjotmën. Ni yë'ë ojts tkamënëjkxtë ja kaaxë ma ja käjpxytyu'unën y'ityën mëët ja Tios, ja Moisés ojts jam wyi'imy ma ja y'ijtaknëtyën.

⁴⁵Ënät ja Amalec ja'ayëty ets ja Canaán ja'ayëty nyipëtsëëmëtë, mëti'ipë ënäty jam tsënaaytyëpën ma jampë ja itjotmën. Ets pyapooyëtë tyimpaja'ajtëtë jam ma Hormá y'itjotën, jëtu'un'äämpy ka'ap yajmëtakëtë.