Read Biblia Mixe de Quetzaltepec Números 16 Bible Online

Números 16 - Biblia Mixe de Quetzaltepec bible

Números 16

¹Tu'uk yë Leví ja'ay, Quehat yë y'u'unk y'ok, jä'ä xyëëwajtyp Coré yë'ë myaank yë Ishar; ëpëky nitëkëëk ja Rubén yë jyä'äy, jä'ä xyëëwajtëp Datán ets Abiram, Eliab yë myaank nimäjtskëty ets On, Pelet yë myaank,

²ojts ja Moisés tmëtsiptsoontë. May ja ja'ay pyuwa'akëtë, mäjtsk mëko'px ja wëxtyikxy myajkën ja Israel ja'ayëty mëti'ipë ënäty mëj'äämpy ijtëpën ma ja naax kajpnën. Yë'ë tyuk'ijtëtyëp ja ja'ayëty mëti'ipë ëëwij kajpxwijtëpën ets mëj yajjëkyäptë.

³Ënät ojts nyäwyoowmukëtë ets tninëjkxtë ja Moisés ets ja Aarón, tääts tyëjkëtyë kajpxpë. Jä'ä ja Moisés ets ja Aarón yajxon jyänty'ojtëp ets t'ënëmaaytyë. Wi'ix ko miitsëty nimäjtsk janty'oy janty kënu'kxy mtimnyäyajnaxëtë. Pën tëkokyë yë Israel ja'ayëty tëë yë Tios kyënu'kxta'ajëtë ets Wintsën yë'ë yajpatp ma ëëtsajtëmën ni'ëmukë. ¿E paaty ëëtsëty yë'ëjës oy nkawinja'awëtyëp tiikyëjxm ko miitsëty nimäjtsk janty mëj ënä'ämpë mtimnyäyajnaxëtë ets mtimy'ënä'ämantëp ma Wintsën yë nyaax kyajpnën?

⁴Ko yë Moisés jëtu'un tmëtooy, ënät wyintäky ets nyäkyoxtënaaytyakë,

⁵ets t'ënëmaay ja Coré mëët tëkokyë mëti'ipë ënäty mëët të nyäpyikyën: Jopy tsojts yajnijawëty pën yë Tios të tkënu'kxy ets pën jyëkyejpy myo'ojëtëty ja wyintsë'kën. Yi'iyë mëpaat tyäky ja wintsë'kën mëti'ipë ënäty yë'ë kë'ëm wyin'ijxypyën.

⁶Ya'atë mtuntëp, yë'ë mëmintëp yë jëëntsijtk ma pyoom tno'oktën yë Coré ets myëku'uktëjk,

⁷ets jap xy'apëkëtëty yë jëënpajk ets poom ets jam jopy xypyëjkta'aktëty Tios wintum. Ja ja'ay mëti'ipë ënäty ja Tios wyin'ijxypyën yë'ë ënäty kënu'kxy yajpatp ets këtii nëkoo m'ëk'nä'ämnëtë miitsëty Leví ja'ayëty.

⁸Ënät ja Moisés näjyëtu'un t'ënëmaay ja Coré: Mëtowtë yajxon miits Leví ja'ayëty.

⁹Miitsëty, ¿wi'ix, namaa natiijën xyjyawëtë ko yë Tios të mwin'ixëtë ma Israel ja'ayëtyën, ets winkon myajpaatëty ma yë'ëjën ets mtuntëty jap ma ja tsyajptëjkën, ma ja naax kajpn xymyëtuntëtyënë?

¹⁰Yë Tios të tsojkën'aty ets mijts mëët yë mja'ay winkon myajpaatëty ma yë'ëjën. ¿E miitsëty tääts näjyëtu'un xytsyojkën'ajnëtë ja teety'ajtkë?

¹¹Yë Aarón nitii mëj'ajtën tkamëëtëty ets miitsëty wiinkjaty xynyi'ëw xynyikajpxtëty; yë Wintsën yë'ë jëtu'un të xykyäjpxy kumëtoownaxtë mijts ets mëët yë mëku'uktëjk.

¹²Ënät ja Moisés ojts tyaxtsoy ja Datán ets ja Abiram yë myaank Eliab, e yë'ëjëty tyaa ojts y'ëtsowtë: Ëëtsëty ka'apës nëjkxa'antë.

¹³¿Wi'ix namaa natiijën xy'ixy xyjyawë, koos jap të xyajpëtsëmtë ma ja jë'kxy pëky ka'ap y'ëmaaytyä'äkyën, etsës yaa xyaj'ooka'antë të'ëts'ituuy, ma näjyëtu'un mijts wintsënën mnäyaj'ita'anyë ma ëëtsëtyënë?

¹⁴Mijts ka'apës maa të xyajnëjkxtë ma xynyikäjpxyën yë jë'kxy pëky ka'ap y'ëmaaytyä'äkyën. Ni nkam ni ntu'ujës të xykyamo'otë maas jeexyë npäntë nkojtën ja jë'kxy pëky. ¿Ëkë jä'äjën xytsyoky ets janty jëtu'un winë ntuunkojtëtyësë tä jeexyë ëëts nwiints'atënë? Ëëts ka'apës yam nëjkxa'antë ma jam mijts myajpaatyën.

¹⁵Ënät yë Moisés ojts mëk jyoot'anpëky ets t'ënëmaay yë Tios: Wintsën këtii xykyupëjkëty yë y'ayajk y'ako'onënëty. Ëjts nitu'ukënës yë krukts të nkapëjkëtë ets ka'ap ma wi'ix ntuntës.

¹⁶Ënät ja Moisés ok t'ënëmaay ja Coré: Jopy mnäywya'këxë'ëkëtëty mëët yë mëku'uktëjk jënu'un mëët mnäpyikyën, jam ma Tiosën. Yë Aarón yajpaataanp jam näjyëtu'un.

¹⁷Mënëjkxtëp nitu'ukjaty yë mjëëntsijtkëty ets jap xynyo'oktëty yë poom. Mijts mëët yë Aarón mënëjkxtëp näjyëtu'un yë mjëëntsijtkëty. Ets tu'ukyë xypyëjkta'aktëty ma ja nimäjtsk mëko'px ja wëxtyikxy myajkpë ja jyëëntsijtk yajpaatën jam Wintsën wintum.

¹⁸Ënät ojts nitu'ukjaty ja jyëëntsijtk tpëjkë'kta'atë ets ja jëënpajk ets ja pyoom t'apëjkëtyë ets tpuwa'këtyë ja Moisés ets ja Aarón, jam tëjk'ëkë'ëm ma ja wit tëjkën ma ja näpyaatë y'ityën, jä'ä jëtu'un ja tëjk mëti'ipë witnikojyën.

¹⁹Ja Coré tëë ënäty tyajtu'ukmujkta'ay ja ja'ay jam ma ja wit tëjkën ma ja näpyaatë y'ityën mëët yë Tios. Ënät ja Tios ojts ja myëj'ajt y'oyajtën jam nyänyikëxë'ëkyë ma ja mayjyä'äy yajpaatën.

²⁰Tä ja Tios t'ënëmaay ja Moisés ets ja Aarón:

²¹Puwa'ktu'utë tääpë ja'ayëty, ëjts tëëjës ntuknipëjktaakë koos nyajkutëkoya'antë.

²²E yë'ëjëty koxtänë kyëtaktë ets tmënu'kxtaktë ja Tios, t'ënëmaaytyë: Tios mijts mëti'ipë juukyajtën myäjkpyën ets xymyooytyä'äy yë ja'ay, ¿tii tëkokyë yë ja'ay xytyimtukjoot'anpëjkta'ay ets tu'uk je'eyë mëti'ipë pokytyuunpën?

²³Ënät ja Tios t'ëtsooy ja Moisés:

²⁴Ënëëmë tëkokyë yë Israel ja'ayëty ets tnawa'ktuta'atëty yë Coré, Datán ets Abiram yë wyittëjkëty.

²⁵Ënät yë Moisés ojts nyijkxy mëët yë mëjja'aytyëjkëty jam ma ënäty yajpaatën yë Datán ets Abiram,

²⁶ets t'ënëmaay ja naax kajpn: Jëwa'kta'atë jam miitsëty ninu'un xymyëwinkon'atën yë tsyënaaytyaknëty tääpë ëxëëkja'aytyëjkëty ets nitii xykyatoonëtëty mëti'ipë yë'ë jyä'ä'ajtëpën, këtiipë näjyëtu'un xykyu'ookëtëty ja nyëë pyokyëty.

²⁷Ënät ja ja'ayëty ojts tnawa'ktuta'atë ja Coré, Datán ets Abiram ja wyittëjkëty. E ja Datán ets ja Abiram jämyë wya'ak'o'oyëtyë tyëjk'ëkë'ëmëty mëët ja tyo'oxytyëjkëty ets ja y'u'unk y'ëna'këty.

²⁸Tä ja Moisés tjaaknikäjpxy ets y'ënaan'ëtëtsy: Ya'atë mëët yajnijawëty ko Tios të xytyuk'ëne'emy ets ntunëtyës tëkokyë ya'atë ets ko ka'apës kë'ëmwinma'any tii ntuny.

²⁹Pën ya'atë ja'ayëty jotkujk y'ooktë, tä yë o'kën y'ityën, yë'ë yajtuknija'awëp, ko ka'apës ënäty Wyintsënëty të xykyexy.

³⁰E pën yë'ë yë Wintsën tu'uk yë mëj'ajtën tyuunpy ets ya'atë naaxwiinyëtë y'ëwa'atsëty ets jap kyuka'anajxta'atëty mëët tëkokyë mëti'ipë myëët'ajtëpën. Jëtu'un xynyijawëtëty ko ya'atë ja'ayëty tëë poky tmëtëkëtë, mëët ko Tios të t'ixtijtë.

³¹Tim je'eyë yë Moisés kyajpxtaay, ënät ja naaxwiinyëtë y'ëwatsy ma ënäty tsyëënëtën.

³²Ets ajuuky kyuka'anajxtaaytyë tsajpkëkjoty ni'ëmukë jënu'un ënäty ja Coré tmëjwa'kpätën mëët tëkokyë ja y'u'unk y'ëna'këty ets ja mëti'ipë myëët'ajtëpën.

³³Ajuuky jap kyuka'anajxtaaytyë naaxjutjoty mëët tëkokyë mëti'ipë ënäty myëët'ajtëpën ets jatëkok ja naax y'ëtujky. Jëtu'un'äämpy ojts yajjo'otstë ma myëkunaax myëkukajpnëtyën.

³⁴Ko tmëtoowtë ja ja'ay yujkya'axtë, ënät ja Israel ja'ayëty pëyi'ikyë pyëtsëëmtaaytyë ma ja tsyënaaytyaknëtyën, mëti'ipë ënäty jam winkon yajpatëpën ets y'ënantë: Ijxkëm tëy yë naaxwiinyëtë näjyëtu'un xy'ëkjë'ënta'ayënë.

³⁵Ojts yë Tios näjyëtu'un tkukäjxnaxy yë jëën mëti'ipë yaj'o'ktaayën nimäjtsk mëko'px ja wëxtyikxy majkpë ja ja'ay, mëti'ipë ënäty të tno'oktën ja poom.

³⁶Ënät ja Tios ojts tmëkäjpxy ja Moisés ets t'ënëmaay:

³⁷Ënëëmë yë Eleazar, yë myaank yë Aarón ets tju'ta'ajëty yë jëëntsijtk ma të nyitooytyä'äyën winë ets nëjkx jëkäm t'ixko'owta'ay ja jëënpajk, mëti'ipë të wyi'imyën.

³⁸Tääpë ja'ayëty yë jyëëntsijtkëty, mëti'ipë të y'ooktën, wa'ats yë'ë. Jä'ä ko yë poom mëti'ipë të tno'oktën, ëjts të xytyukwino'oktës. Paaty yam n'ëna'anyës ets xyaj'awinpitëty tä yë pujxnwojptëypyën ets yë'ë wintsë'këntyakn xytyukwinwopëtëty, yë'ëts yë Israel ja'ayëty ijxpäjtën wya'antëp.

³⁹Ja teety Eleazar ojts tpëjkmujkta'ay ja jëëntsijtk mëti'ipë mëët y'oytyunyëtyën ja tsuxkpujxn. Jä'ä ja jyä'äjëty ja mëti'ipë ënäty të y'ooktën mëët ja jëën. Ënät ni'ënä'ämëy wä'än tyaj'awinpitë pujxnwojptëy ets yë'ë yajtukniwopëty ja wintsë'këntyakn.

⁴⁰Ya'atë ijxpäjtën ojts wyi'imy ma Israel ja'ayëtyën, ko ni pën mëpaat ëpëky yë kë'ëmwinma'any tkamëwinkony yë wintsë'këntyakn ets Tios tukwinno'okaanpëty yë poom. Yi'iyë patëtëp yë Aarón yë y'u'unk y'ok. Jä'ä ko pën jëtu'un tyuunpyën tsojk jyatëty tä jyäjtyën yë Coré mëët yë myëku'uktëjk. Tëkokyë, ojts jëtu'un yajtuunta'ay mëti'ipë ënäty ja Wintsën të tuk'ëne'emyën ja Eleazar mëti'ipë kyajpxnajxën yë Moisés.

⁴¹Komjëpom, ënät ojts ja mayjyä'äy tyëkëtë ëëpë kajpxpë. Yë Moisés ets Aarón, yë'ë tyätynyi'ojëtyëp ets y'ëna'antë: Miitsëty je'eyë nëkoo Tios yë nyaax kyajpn xyaj'o'këtë.

⁴²Yajxon yë Moisés ets Aarón tjantynyapikëtë. E yë'ëjëty jam ojts nyëjkxtë ma ja wit tëjkën ma ja näpyaatë y'ityën mëët ja Tios. Ënät ojts ja yoots jam kyëtä'äky wit tëjknëkëjxm ets ja Tios ja myëj'ajt y'oyajtën nyänyikëxë'kë.

⁴³Tä ja Moisés mëët ja Aarón ojts nyëjkxtë jam tëjkwinm ma ja wit tëjkën ma ja näpyaatë y'ityën mëët yë Tios,

⁴⁴ets ja Wintsën t'ënëmaay ja Moisés:

⁴⁵Näjyëpëkëtë ma tääpë ja'ayëtyën, jä'ä ko nyajkutëkoyäämpyës yam ajotkumonë. Tä ja Moisés ets ja Aarón ënätyë nyäkyoxtënaaytyakëtë,

⁴⁶ets ja Moisés t'ënëmaay ja Aarón: Yajmin yë mjëëntsijtk ets xy'apëkëty yë jëënpajk mëti'ipë jamën ma wintsë'këntyaknën ets xytyukkupëkëty yë poom ets pëyi'ikyë mnëjkxëty ma jam yë ja'ayëtyën ets amëtow yë Tios yë pokymyä'kxën, wä'än yë naax kajpn tpokymye'kxy. Jä'ä ko yë'ë mëk'äämpy të jyoot'anpëky ets ja ëyo'on tëë jam nyatso'ontaknë.

⁴⁷Ënät ja Aarón jëtu'un tuuny tä ojts ja Moisés y'ënë'ëmxëtën. Pëyi'ikyë ojts nyijkxy ma ënäty ja ja'ay jam ni'ëmukë yajpaatën. Ja ëyo'on mëti'ipë ja Tios ënäty të tkexyën, tëë ënäty ëka'any nyatuuntëkooynyë ma ja kajpnën. Ënät ja Aarón ojts ja poom poj'am tjëënkupëky ets t'amëtooy ja Tios ja pokymyä'kxën ma ja naax kajpnën.

⁴⁸Tääts itkujky nyäpyëjktakë, ma ja mëti'ipë ënäty të nya'o'knëtën ets mëti'ipë jaakjuukyëtyën, täänëm ja ëyo'on wya'ak'a'awëy.

⁴⁹Jä'ä ënäty yë ja'ayëty të nya'o'knëtë majkmajkts mil ja wëxtujk mëko'px. Yi'iyë mëti'ipë ënäty tsojk'am të y'ooktën, ëpëky ja mëti'ipë të y'o'ktëpën ma ja Coré ojts ja Moisés tmëtsiptsoonyën.

⁵⁰Ko ja ëyo'on kyijxy, ënät ja Aarón ojts wyimpity ets ojts nyijkxy ma ja wit tëjkën ma näpyaatë y'ityën mëët yë Tios ets ja Moisés mëët jatëkok nyäpyatë.