Read Biblia Mixe de Quetzaltepec Números 18 Bible Online

Números 18 - Biblia Mixe de Quetzaltepec bible

Números 18

¹Ënät yë Wintsën t'ënëmaay yë Aarón: Mijts ets mmaank'ëna'k ets Leví ja'ayëty, mëti'ipë mijts näjyëtu'un mtuk'ijtëpën, mijts jëtu'un mtukëtakpätëtëp ja nëë poky ko pën tii poky tuuntëkoyëty ma Tios yë wyittëjkën. E ko miitsëty tii xykya'oytyuuntëpëty, mkë'ëmpoky nëjkx xykyumëtowtë.

²E m'ënëëmëp yë Leví ja'ayëty, mëti'ipë mijts mtuk'ijtëpën ets mputëkëtëty ets näjyëtu'un yajputëkëtëty yë m'u'unk m'ëna'këty ma tuunk tyu'uye'eyën, ma ja wit tëjkën mëti'ipë myë'ijtypyën ja käjpxytyu'unën.

³Yë'ëjëty jëjp'ixy nëjkx tyim'itëty ma ja tuunkën, mëti'ipë jap tu'uye'epyën ma ja wit tëjkën. Këtii tii tontëty, mëti'ipë japën ma wit tëjkën ma näpyaatë y'ityën ets ni tkamëwinkontëty yë wintsë'këntyakn. Jä'ä ko pën tyoontëp winë nëjkxëp y'ooktë ets näjyëtu'un miitsëty.

⁴Yë'ëjëty xëmë jyap'atëty mëët mijts ma ja wit tëjkën ma näpyaatë y'ityën mëët yë Tios. Ko jap tiituunk xyajtu'uye'eytyëty, oy tyimtiijëty mëti'ipë jap tuunk'ajtpën. E ka'ap ënät oypyënëty, mëwinkonëtëty, yi'iyë jëtu'un mëti'ipë paat'ajtëpën.

⁵Miits jëtu'un mpatëtëp ya'atë tuunk xyajtu'uye'eytyëty, mëti'ipë jap ma ja Tios ja wyittëjkën ets näjyëtu'un ma wintsë'këntyakn yajkëwentë'atyën. Jëtu'un'äämpy ka'ap n'ëktukjoot'anpëjknëtyës yë Israel ja'ayëty.

⁶Ëjts kë'ëm ëpëky të npëjktä'äkyës yë Leví ja'ayëty ets mijts nmo'oy. Yë'ë mputëkëtëp ets jap tyuntëty ma ja wit tëjkën ma näpyaatë y'ityën mëët yë Tios.

⁷Mëti'ipës tëy ntsojkpyën, mijts ets mmaank, tyam ntuknipëktë ets ja teety'ajtk xytyuntëty. Miits ja wintsë'këntyakn mkë'ë'am'atëp ets miits jap winë myajwintu'upëktëp jëxkë'p'äämpy ma wit mëët y'atëëytyukyëtyën. Ya'atë tuunk miits mpatëtëp. Jä'ä ko miits të nmo'otë ya'atë kutujkën ets ya'atë tuunk xyajtu'uye'eytyëty, mëti'ipë teetytyëjkëty mëpaat tuntën. Pën tii winë tyuunpy kë'ëmwinma'any, tä yë teetyëjk winë tuntën. Nëjkxëp yajni'ënä'ämë ets y'ookëty.

⁸Ënät ja Tios t'ënëmaay ja Aarón: Mijts të ntuknipëky ets xykyëwentëpëjkta'ajëty yë ayajk ako'onën mëti'ipës yajmoopyën. Tëkokyë yë ayajk ako'onën mëti'ipë yë Israel ja'ayëty yajktëpën, kënu'kxy yë nyajxnë. E paaty, mijts ets m'u'unk n'ëna'k yam nmooytyëp, jä'ä ko mpatëtëp jëtu'un. Ya'atë ënä'ämën yë'ë xëmë itëp.

⁹Tëkokyë yë wintsë'kën, mëti'ipë yë Israel ja'ayëty yajktëpën nino'oky, tä yë aaypyajk ujts pajkën, mijts mjä'ä'ajta'atëp ets näjyëtu'un yë wintsë'kën, mëti'ipë yë ja'ayëty nyëë pyoky tyukunajxtëpën ko tii tuuntëkoytyë, tëkokyë ya'atë ayajk ako'onën mëti'ipë tëë yajkënu'kxyën, aak miits nëjkx xyjyä'ä'atë mëët yë m'u'unk m'ëna'k.

¹⁰Tëkokyë ye'etyëjktëjk mëti'ipë yajpatëpën ma miitsëtyën, jyëkyäptëp tjë'kxtëty ya'atë ayajk ako'onën, jä'ä tëy, jam mëpaat tsu'utstë ma tu'uk yë itjotmën mëti'ipë kënu'kxyën ets yë'ë Wintsën jyä'ä'ajtyp, jä'ä ko ya'atë tsu'utsy ëmaay yë oy.

¹¹Mijts yam näjyëtu'un nmoopy yë ayajk ako'onën mëti'ipë yë Israel ja'ayëty ëpëky xymyooytyëpës ets mijts xyjyä'ä'atëty mëët yë m'u'unk m'ëna'k yä'äy ëna'kpë to'oxy ëna'kpë, mëti'ipë yajpatëpën mëët mijts. Ya'atë aaw ayuk ënä'ämën jëtu'un yam nyajwë'ëmpyës xëmëkyëjxm. Oypyënëty, mëti'ipë ënäty mku'ijtëyëpën ma mjëën mtëjkën, jyëkyäpëp tsu'utsëty ya'atë tsu'utsy, pën näjya'awëyëp kë'ëm ko wa'ats yajpaaty Tios wintum.

¹²Mijts yam näjyëtu'un nmoopy ja aaytyëëm ujtstëëm mëti'ipë ëka'any tëëm'ajtë'kpën, mëti'ipë yë Israel ja'ayëty xytyuknimiintëpës winjëmëjt: tä yë olivë onën, tsatym nyëë mëti'ipë tëë nyimaanaxyën ets tsajpmok, tëkokyë aakyë'ë oyjyätyëtypë.

¹³Näyjyëtu'un ma ja pëjktä'äky ëka'any yajpëjkë'ëky yajtuunë'ëkyën, mijts yam näjyëtu'un nmoopy mëti'ipës ja Israel ja'ayëty xytyuknimiintëpën. Oypyënëty, pën ënäty jap tsënääpyën ma mjëën mtëjkëty, pën wa'ats yajpaaty jyëkyäpëp tjë'kxëty.

¹⁴Tëkokyë yë ayajk ako'onën mëti'ipë yë Israel ja'ayëty ëjts xymyooytyëpën, mijts mjä'ä'atëp.

¹⁵Tëkokyë yë Israel ja'ay yë kyä'äxkopkëty ets jëyujk kä'äxkopk, mëti'ipës xymyooytyëpën, mijts mjä'ä'atëp. Yë ja'ay yë kyä'äxkopkëty, ka'ap tjëkyepy wyintsë'kën'atëty. Näyjyëtu'un ja jëyujk, mëti'ipë ëxëëkën, yë m'amëtowëp, mëti'ipë tyukniyajktu'utëpën.

¹⁶Jää nëjkx tjuuypyëtsimy ma ënäty të nyäxyën tu'kpo'o ma të myëxu'unk'atyën ets mëkoxk ja poop pujxn meeny tukukëpätëty mëti'ipë je'emtyën majktu'uk nikonë, yë'ë ja kyijpxën tunëp mëti'ipë jap ijtpën tsajptëkoty witnikojpyë.

¹⁷E pën yë'ë yë tsajpkaa yë kyä'äxkopk, këtii xy'ëwa'atsëty ets pën tjuuypyëtsëmëty, oy yë'ëjëty yë tsajppax ëkë kupixyny. Jä'ä ko yë'ëjëty ëjts yë xypyatp, paaty kopkpëky yë'ë ets xyaj'ookëty. Yë nye'pny jam xyijkxjëtijtëty ma wintsë'këntyaknën, yë y'on mnino'okëp ets yë'ë y'ayajkën'at y'ako'onën'atëty mëti'ipë oy xuukëpën jokëpën ëjts nwintuuyës.

¹⁸Jëkyejpy mijts xymyëwë'ëmëty yë tsu'utsy, yë kyäty ets pyuuy a'oy'äämpyë mëti'ipë ëpëky yajtukniyajkëpën.

¹⁹Tëkokyë mëti'ipë yë Israel ja'ayëty ëjts xytyukniyajkëtëpën mijts yam nmoopy ets näjyëtu'un ja m'u'unk m'ëna'k ye'etyëjk to'oxytyëjk, mëti'ipë tsënaaytyëpën ma mjëën mtëjkën. Ya'atë ënä'ämën xëmë jëtu'un mëpaat y'ity. Ya'atë yë'ë tu'uk yë käjpxytyu'unën, mëti'ipës yam ntuunpyën mëët mijts ets m'u'unk m'ëna'k. Ets ka'ap tjëkyepy pën tyajtëkatsëty.

²⁰Ënät ja Tios t'ënëmaay yë Aarón: Mijts ka'ap nëjkx xymyëët'aty yë mkë'ëmnaax mkë'ëmkam, jëtu'un tä yë Israel ja'ayëtyën. Ëjts nëjkx jëtu'un xyjyawë tä jeexyë mnaax mkam xymyëët'atyën ets jëtu'un tä jeexyë mkuma'ayën xypyikyën.

²¹E yë Leví ja'ayëty, yë'ëjës yam nmoopy ets yë'ë tjä'ä'atëty mëti'ipë yë Israel ja'ayëty yajktëpën, tu'kpëky ma ja majk pëkpyën ko winë tpaatë t'ijxtë. Yë'ë myëju'uny'atëp, mëët ko jap tyuntë ma wit tëjkën ma näpyaatë y'ityën mëët yë Tios.

²²Ka'ap tjëkyepy oy pën Israel ja'ay tmëwinkonëty ya'atë wit tëjk ma näpyaatë y'ityën mëët yë Tios. Jä'ä ko jëtu'un tunëty, mëjpoky ënäty tyuunpy ets yë'ë kyu'ookëp.

²³Yë Leví ja'ayëty yi'iyë patëtëp jap tyuntëty ma wit tëjkën ma näpyaatë y'ityën mëët yë Tios. Yë'ë nëjkx kë'ëm tpoky'atë ko tii tka'oytyuntëty. Ya'atë ënä'ämën xëmëkyëjxm y'itëty ets u'unk ok nëjkx xypyatuntë. Yë Leví ja'ayëty ka'ap nëjkx tmëët'atë kyë'ëm naax kyë'ëmkamëty.

²⁴Yë'ëjës të nmo'otë mëti'ipës xymyooytyëpën yë Israel ja'ayëty ma tu'kpëky yajëpëkyën ja majk pëkpyë. Patyës të n'ënëëmëtë ko ka'ap tmëët'atëty nyaax kyamëty ma Israel ja'ayëty it naaxwiinyëtë tnitänëtën.

²⁵Ënät ja Tios ojts tmëkäjpxy ja Moisés ets t'ënëmaay:

²⁶Jëtu'un xy'ënëëmëty yë Leví ja'ayëty: ko t'ëxajëtëty ja tu'kpëkpyë yajëpëkyën ma ja majk pëkpyën mëti'ipë yë Israel ja'ayëty yajktëpën. Nëjkxëp näjyëtu'un ëpëky tyajktëpë tu'kpëky ma ja majk pëkpyën.

²⁷Ya'atë jëtu'un ënäty ja Leví ja'ayëty nätyukuyajkëtëp tä jeexyë ja Israel ja'ayëty jä'ä tukyaktën ja tsyajpmookway ets tsatym nyëë.

²⁸Jëtu'un'äämpy ëpëky tpëjkta'aktëty ja Leví ja'ayëty mëti'ipë ja Israel ja'ayëty nätyukuyajkëtëpën ets nëjkx tukë'ëtëkëtë ja teety Aarón mëti'ipë ja Tios tyukwintsë'ëkëpën.

²⁹Oy tyimtiijëty tii mtimmyooyëtëpën, ëpëky xypyëjkta'aktëty mëti'ipës njä'ä'atëpën. Ja mëti'ipës ënäty ëjts xytyukniwë'ëmtëpën jä'ä mwin'ixtëp ja ni'ik oypyë.

³⁰M'ënëëmëtëp näjyëtu'un ko ja mëti'ipës ënäty ëjts të xytyukniwë'ëmtën. Jä'ä mëti'ipë wäänë oyën, ja mëti'ipë natëjkëpën, jyëkyejpy xyajnajxnëtëty tä jeexyë miits xyjyä'ä'atën, yë tsajpmok ëkë tsatym nyëë.

³¹Ets oymyaajëty xyjyë'kxanëtëty mëët yë mtaak mteety ets m'u'unk m'ëna'këty. Yë'ë mëju'uyën'atëp, mëët ko ënäty jap mtuntë ma ja wit tëjkën ma näpyaatë y'ityën.

³²Ma ënäty ëpëky të xypyëjktaknëtën ja mëti'ipë wäänë oyën, mëti'ipës njä'ä'atëpën. Jyëkyäpëp xyjyë'kxnëtëty oy myëti'ipëty ets ka'ap ënäty tii poky xytyuntë. Jëtu'un ka'ap xyaj'ëxëëkëtëty ja Israel ja'ayëty ja y'ayajk y'ako'onënëty ets ka'ap tii xykyu'ookëtëty.