Read Biblia Mixe de Quetzaltepec Números 19 Bible Online

Números 19 - Biblia Mixe de Quetzaltepec bible

Números 19

¹Ënät ja Tios ojts tmëkäjpxy ja Moisés ets ja Aarón, tä t'ënëmaay:

²Ëjts mëti'ipë Wintsën'ajtpën, ya'atë ënä'ämënës yam nyäjkpy: Ënëëmë yë Israel ja'ayëty ets tu'uk tmëmintëty yë tsajpkaato'oxy mëti'ipë natsapts yë y'ujkën, mëti'ipë oy mëkën ets ka'ap yajtukuwëënyëm tyuunpäjn.

³Ets xytyukkë'ëtëkëtëty yë teety Eleazar, yë'ëts jam kajpnpë'am myënëjkxëp ets yë'ë wyintum xyaj'ooktëty.

⁴Ënät yë teety Eleazar, mëët yë kyë'ëwa'axy wäänë yë ne'pny tpaxajë'ëkëty ets wëxtujk'ok tnajtsxijkxëty ma ja wit tëjkën ma ja näpyaatë y'ityën mëët yë Tios.

⁵Tääts xynyino'oktëty ja tsajpkaato'oxy yë'ë wyintuuy. Wa'ats xynyino'kta'atëty tëkokyë ja nyini'kx, ja nyitsu'uty, ja nyipo'o, ja nyine'pny ets ja tyi'iny.

⁶Tääts ënät ok ja teety t'ixëty tu'uk ja ajë kepy ets tu'kxe'enty yë hisopo ujts ets tu'kwitsy yë tsaptswit ets tu'kë'ëyë tjëënkupëjkta'ajëty jap ma tsajpkaato'oxy nyitoyën.

⁷Ko ënäty jëtu'un të tuunta'ay tääts ja wyit tpujëty ets tsyi'iwëty xyëtsëty wa'ats. Täänëm tyëkëty kajpnjoty oy ëxëëk y'ëkwë'ëmëty, tyimkootsëty jëtu'un.

⁸E ja ja'ay mëti'ipë ënäty ja tsajpkaato'oxy të tnino'okyën, nëjkxëp ja wyit tpujy ets tsyi'iwëty, mëët ja nëë mëti'ipë winë yajtukkënu'kxpën ets ëxëëk nëjkx wyi'imy tsuupaat Tios wintum.

⁹Ënät wiinkpë ja ja'ay mëti'ipë wa'ats yajpatpën Tios wintum, nëjkx tyajmuky ja jaam mëti'ipë të wyintooykyëtä'äkyën ma ja tsajpkaa të nyitoyën ets jam kajpnpë'am tpëjkta'akëty ma tu'uk itjotmën wa'atspë. Tääpë jaam yë'ë yë Israel ja'ay yajtuntëp, ko ja nëë tyaj'oyëtëty mëti'ipë yajtukkënu'kxpën tii winë. Tëkokyë ya'atë, yë'ë jëtu'un wintsë'kën'ajtp, mëët ko ja tuuntëko'oyën y'ity.

¹⁰Pën ja kuyjaam ënäty të tyajmuky nëjkxëp ja wyit tpujy ets ëxëëk wyë'ëmëty tyimkutsu'ujëty jëtu'un. Ya'atë ënä'ämën kë'ëyxyëëw kë'ëyjyëmëjt y'itëty ma miitsëtyën ets ma jaaypyaat jaaypyo'kxëtyën, mëti'ipë yajpatëp ma miitsëtyën.

¹¹Pën tyoompy yë o'kpë, ëxëëk nëjkx wyi'imy wëxtujk xëëw.

¹²Kom tëkëëk xëëw ets kom wëxtujk xëëw nëjkx nyäpyujy nyäjye'etsyë mëët yë kënu'kxynyëë ets wa'ats wyë'ëmëty. Pën ka'ap nyäpyujy nyäjye'etsyë kom tëkëëk xëëw ets kom wëxtujk xëëw, ka'ap nëjkx wa'ats wyi'imy.

¹³Pën tyoompy yë o'kpë ets ka'ap ja wa'atsajtën tpaaty Tios wintum, yë Tios yë wyittëjk yaj'ëxëëktëjkëp, e paaty nëjkxëp yajjo'otsy ja xyëëw ma ja Israel kajpnën, jä'ä ko ka'ap ja kënu'kxynyëë të yajtuknixijkxy.

¹⁴Ko pën y'ookëty ma tu'uk yë wit tëjkën, tyaa myiny yë ënä'ämën tii mëpaat yajtunyën: tëkokyë yë ja'ayëty, mëti'ipë ënäty jap yajpatëpën ma ja wit tëjkën ets näjyëtu'un pën jap tëjkëpën, ëxëëk nëjkx wyë'ëmta'atë jam Tios wintum, wëxtujk xëëw ëxëëk yajpaatëty.

¹⁵Näyjyëtu'un yë apëjk atu'unën mëti'ipë kuwa'atsën ëkë mëti'ipë ka'ap oy y'akë'ëyëtyën, ëxëëk nëjkx wyë'ëmtë.

¹⁶Ko muum yajpaatëty yë o'kpë, mëti'ipë ja'ay të yaj'ookyën, ëkë pa'am, ëkë oy yë'ëjëty yë o'kpëpajk, ëkë o'kpë jut; ko pën tonëty ëxëëk wyë'ëmëty ets wëxtujk xëëw y'itëty.

¹⁷Ko jëtu'unpë ja ëxëëkajtën pën pyaatëtëty, yë'ë nëjkx wäänë twooky ja kuyjyaam ma ja tsajpkaato'oxy ënäty të wyintooykyëtä'äkyën, mëti'ipë ja nëë poky të yajtukunaxyën. Jap yaj'ako'owëty ma tu'uk yë apëjkënën ma ja nëëwooky yajtukutämëtyën.

¹⁸Ënät tu'uk yë ja'ay mëti'ipë wa'ats yajpatpën Wintsën wintum. Tpëjkë'ëkëty tu'uk yë hisopo ujts ets tukpapëkëty yë nëë, tääts tuknixijkxëty ja wit tëjk ets ja apëjk atu'unën, tä yë tsim texyën, nëëtu'ts nëëtsiiyën. Ets näjyëtu'un ja ja'ayëty mëti'ipë ënäty jap të yajpaatën, mëti'ipë ja o'kpë të tonyën, wä'än tyë'ëjëty ja o'kpë mëti'ipë pa'am të yaj'ookyën ëkë ja'ay të yaj'ookyën.

¹⁹Ja ja'ay mëti'ipë ënäty wa'ats yajpatpën, yë'ë mëpaat tuknixijkxy ja kënu'kxynyëë, ja mëti'ipë ëxëëk yajpatpën, ko kyomtëkëëk xëëwpätëty ets ko wyëxtujkxëëwpätëty. Kom wëxtujk xëëw tëë ënäty wa'ats wyi'imy. Ënät ja ja'ay wyit tpujëty mëti'ipë ënäty ëxëëk të yajpaatyën ets näjyëtu'un tsyi'iwëty xyëtsëty, ëxëëk jyaak wë'ëmëty jëtu'un kyutsu'ujëty.

²⁰Pën ja ja'ay mëti'ipë ëxëëkën ka'ap nyäpyujy nyäjye'etsyë, nëjkxëp yajjo'otsy ma ja kyajpnën. Jä'ä ko ja Wintsën ja tyëjk yaj'ëxëëktëjkëyëp. Mëëtkyëjxm ko ja kënu'kxynyëë ka'ap të yajtuknixijkxy, paaty yë'ë ëxëëk yajpaaty.

²¹Ya'atë ënä'ämën xëmëkyëjxm y'itëty. Pën ënäty ja myëku'uk ja kënu'kxynyëë tyuknixijkxyp kopkpëky ko ja wyit tpujëty. Pën ja kënu'kxynyëë ënäty të tony ëxëëk nëjkx wyi'imy ets jëtu'un tyimkutsu'ujëty.

²²Pën yë ja'ay ëxëëk yajpaaty Tios wintum ets tii tnixajëty ëkë tonëty, näjyëtu'un ënäty winë tyaj'ëxëëkë. E pën tu'uk yë ja'ay wa'ats yajpaaty ets tonëty yë myëku'uk, mëti'ipë ëxëëk yajpatpën, nëjkxëp y'ëxëëktëkë ets tsuupaat wyë'ëmëty ëxëëk.