Read Biblia Mixe de Quetzaltepec Números 20 Bible Online

Números 20 - Biblia Mixe de Quetzaltepec bible

Números 20

¹Ma mëtu'kpo'o tsyo'ontä'äkyën jajëmëjt, yë Israel ja'ayëty jam jyajtë ma ja it naaxwiinyëtë aanë'ëk tëëtsë'ëkpë Zin itjotm ets jam tsyënaaytyaknpëjktë Cadés, ma y'o'kyën ets nyaaxtëjkëyën yë Maria.

²Ka'ap ënäty jam maa nëë, ënät ja ja'ayëty tyu'ukmujktaaytyë ets ja Moisés mëët ja Aarón tukmëkajpxa'antë,

³tää t'ënëmaaytyë ja Moisés: Nikë tëë jeexyë tyim'oy'äty ko jeexyë të n'o'kta'ayëmë ma ja wintsën tyaj'o'kyën ja may Israel ja'ayëty.

⁴¿Tii ko Tios yë nyaax kyajpn të xyajmiintëpë yaa ma y'anë'ëk tyëëtsë'ëkëtyën? ¿Ëkë yë'ëjën mtsojktëp etsës näjyëtu'un n'ooktëty yaa mëët yë njëyujk ntsajpkaajëtyësë.

⁵Tii ko ojts jap xy'ëkyajtso'ontëpës Egiptë ets të xyajmintës yaa, ma ja it naaxwiinyëtë atsë'ëk ajawëpë? Yaa ka'ap tjëkyepy wi'ix nipmëty nkojmëty ets wi'ix pën tpëjkta'akëty ujtskam jë'kxykyam, yë'ëpaat yë nëë ka'ap yaa npatmëty.

⁶Ja Moisés ets ja Aarón ojts twintso'ontu'utë ja naax kajpn ets ojts nyëjkxtë ma ja wit tëjkën ma ja näpyaatë y'ityën ets nyäkyoxtënaaytyakëtë. Jam yë wyimpokëty naaxkëjxy tim yajja'të. Ënät ja Tios ja myëj'ajt y'oyajtën ojts jam nyänyikëxë'ëkyë.

⁷Tä ja Wintsën t'ënëmaay ja Moisés:

⁸Kajpë'ëk ja mtajk ets mnäypyutëkëtëty mëët yë m'ajty Aarón ma ja naax kajpn xyajtu'ukmuktëtyën. Ma ënäty jam jëtu'un të tyu'ukmujkta'atën. Ënät ja mëjtsaa xymyëkajpxëty ets jap ja nëë myuutëty ets nyëë'uuktëty ja mayjyä'äy ets ja jyëyujkëty.

⁹Tää ja Moisés ja tyajk tjantykyajpë'ky, mëti'ipë ënäty jam yajpatpën Tios wintum, jëtu'un tä të tyuk'ëne'emyën.

¹⁰Ënät ja Moisés mëët ja Aarón ojts ja naax kajpn tyajtu'ukmujkta'atë jam ma ja mëjtsaajën ets ja Moisés t'ënëmaay ja naax kajpn: Mëtowtë yajxon miitsëty, käjpxy kumëtoownajxpë. ¿Yë'ë mtsojktëp ets ëëts yë nëë nyajpëtsëmtëty jap tsaajoty ets mnëë'uuktëtyë?

¹¹Ko ja Moisés jëtu'un y'ënäny, ënät ja kyë'ë txajë'ky ets ojts mäjtsk'ok twopy ja tsaa mëët ja tyajk. Tääts ja komnëë pyëtsiimy. Jëtu'un ja nyëë tpatë mëti'ipë y'uktën ja ja'ayëty ets ja jëyujk tsajpkaajëty.

¹²E ja Wintsën tyaa t'ënëmaay ja Moisés ets ja Aarón: Jä'ä ko miitsëty ka'ap tu'ukyë ja mjot mwinma'any të xypyëjkta'aktë maas ëjtsën. Ets ka'apës yë nxëëw të xyajmëjnajxëtë ma Israel ja'ayëtyën. Paaty miitsëty ka'ap nëjkx mtëkëtë mëët ya'atë ja'ayëty ma ja naax kamën mëti'ipë të nmo'otën.

¹³Tääpë nëë mëti'ipë tsaajoty pëtsëëmën, yë'ë Meribá yajtijy ma ja Israel ja'ayëty ojts mëktä'äky t'amëtowtën ja nëë, yë Tios ojts yë myëj'ajt y'oyajtën jyänty tyuk'ixëtë.

¹⁴Jam Cadés jam ënäty yajpaaty yë Moisés, ko tkejxy nimäjtsk nitëkëëk yë kukäjpxy jam ma yajkutujkpën, mëti'ipë jam ënä'ämpën Edom ets t'ënëëmëtëty: Yë mjëëky mëku'uk yë'ë ya'atë aaw ayuk mtuknikäjxëtëp ets m'ënë'ëmxëty: Ko mijts wa'ats xy'ixy xynyijawë, wi'ix ëëts ja ëyo'on jotmay nmënax nyajnaxtën.

¹⁵Yë n'ap n'okëtyës jap ojts Egiptë nyëjkxtë ets jap jeky tsyënaaytyë. E yë Egiptë ja'ayëty mëk ëëts të xyaj'ëyowtë, tä näjyëtu'un tuuntën ja n'ap n'okëtyës.

¹⁶Ënät ojts n'amëtowtës yë Wintsën yë putëjk pupäjtën. Tääts tkejxy tu'uk yë Wintsën kyukäjpxy mëti'ipës xyajpëtsëëmtën jap Egiptë. E tyam, yam ëëts nyajpaatë ma ja it naaxwiinyëtë txëëwatyën Cadés, winkon ma mtsëpa'an nyaxtën.

¹⁷E paaty yam n'amëtow npëjktsowtë yë mëyajtën etsës xyajnaxtëty ma mnaaxjotmën. Ma ja mkam mtu'ujëtyën ma ja mpëjktä'äky xyaj'itën, ka'apës jam naxtëty ets ni yë'ë nëë nkatontëtyës ma mnëëjut xyaj'itën. Ja mëjtu'u yi'iyës npanëjkxantëp koonëm ntuknajxta'atëtyës ja m'it mnaaxjot.

¹⁸E ja yajkutujkpë mëti'ipë jam ënä'ämpën Edom tyaa y'ëtsoowëtë: Ka'apës yam n'ëwa'atsy ets mnaxtëty maajës yë nnaaxjotmën. E pën kë'ëmwinma'any mtimnyaxa'antë maajës yë nnaaxjotmën, ëjts tsoonëpës yaa mëët yë ntsiptuunpëtëjk ets n'ëwa'ktuktëty.

¹⁹Ja Israel ja'ayëty yajxon tjamëmëtyaktë ets tjatukwinja'awëtyë ja yajkutujkpë. Yi'iyë ëëts yë tu'u npanëjkxantëp, e pën ëëtsëty ets ja njëyujk ntsajpkaajëtyës ntoontëpës ja mnëëjëty ma ja mnëëjutëtyën, nkujuytyëpës yë'ë. Ëëts yi'iyës mpëjktsoowtëp ets xy'ëwa'atsëty etsës naxtëty tekyye'epy mnaaxjoty.

²⁰E ja yajkutujkpë mëti'ipë jam Edom ënä'ämpën jëtu'un ojts tyim'ëtsoowkojy: Ka'ap mnaxtëty. Ënät ojts may tyajmuky ja tsyiptuunpëtëjk ets tnitso'ontë ja Israel ja'ayëty,

²¹yajxon ënäty të timtyuknipëjktaakë ets ka'ap tyajnaxa'any ma nyaaxjotmën ja Israel ja'ayëty. Paaty yë Israel ja'ayëty ojts wiink tu'u tpëktë.

²²Tëkokyë ja Israel ja'ayëty jam tsyo'ontaaytyë Cadés ets nyëjkxtë jam ma Hor kopkën.

²³Jam mapaat ja tsëpa'an nyäxyën ma ja itjotmën mëti'ipë yë Edom nyitënääpyën. Ënät yë Wintsën t'ënëmaay yë Moisés ets Aarón:

²⁴Tëë yë xëëw po'o tpaaty ma Aarón y'o'knëtyën. Yë'ë ka'ap nëjkx tyëkë ma ja naaxwiinyëtën mëti'ipës yë Israel ja'ayëty të nmo'otën. Jä'ä ko miitsëty ojtsës ja n'aaw n'ayuk xyjyënajxëtë jam ma ja nëë pyëtsiimyën tsaajoty, mëti'ipë xyëëwajtypyën Meribá.

²⁵Mijts Moisés, woownëjkx yë Aarón mëët yë myaank Eleazar jam kopkëjxm ma txëëwatyën Hor.

²⁶Jam ja Aarón ja wyit xytyuknijääntutnëty mëti'ipë myëteety'äjtypyën ets yë'ë xytyukxoxëty yë Eleazar. Jä'ä ko yë Aarón jam y'ookanë.

²⁷Yë Moisés ojts jëtu'un tuny, tä ënäty ja Wintsën të tyuk'ëne'emyën. Tam ja mayjyä'äy t'ixtë, ko ojts jam nitëkëëk pyäjnëtë kopkkëjxm ma txëëwatyën Hor.

²⁸Jam ojts yë Moisés tuknijääntutnë ja Aarón ja wyit mëti'ipë myëteety'äjtypyën ets jä'ä tukxojxy ja Eleazar. Jam kopkkëjxm jämyë ja Aarón y'o'ky ets ojts je'eyë nimäjtsk jyënajknëtë, yë Moisés mëët Eleazar.

²⁹Ko ja Israel ja'ayëty t'ijxtë ko ka'ap maa ja Aarón y'ëkkëxë'knë. Ënät ojts tnijawëtë ko tëë ënäty nya'o'knë ets jä'ä tniyaxtë i'px majk xëëw.