Read Biblia Mixe de Quetzaltepec Números 21 Bible Online

Números 21 - Biblia Mixe de Quetzaltepec bible

Números 21

¹Ja yajkutujkpë mëti'ipë Canaán ja'ayën jampë y'ëne'emyën Arad ets jam tsyëënë Négueb. Ko tmëtoowpaty ko tää ja Israel ja'ayëty wyinkontë ma yajtijyën Atarim. Ënät ojts tnitsoony ja Israel ja'ayëty ets may tmajtstë.

²Tä ja Israel ja'ayëty t'ënëmaaytyë ja Tios, ko pën yë'ë putëkëtëp, yajkutëkooytya'atëp ja naax kajpn ets mëët tëkokyë jënu'un jam yajpaatyën.

³Tios ojts tmo'oy ja Israel ja'ayëty mëti'ipë ënäty y'amëtoowtëpën. Ojts tputëkë ets ka'ap tyajmëtaktë ja Canaán ja'ayëty. Yë Israel ja'ayëty wa'ats tyajkutëkooytyääytyë ja Canaán ja'ayëty mëët tëkokyë ja nyaax kyajpnëty, paaty txëëwmooytyë Hormá.

⁴Ënät ja Israel ja'ayëty jam tsyo'ontë ma ja Hor kopkën ets nyëjkxtë ma ja mëjnëëjën mëti'ipë yajtijpën Ookpyë Mejy. Paatykyëjxm jamtsow y'ëwtijtë, jä'ä këtiipë nyaxtëty Edom. E jam tu'ujotm jam ojts ja mayjyä'äy ja myä'kxtujkën kyëjxnëtë.

⁵Ënät tyëjkëtyë kajpxpë, jä'ä ja Tios nyi'ojëtyëp ets ja Moisés, jëtu'un y'ëna'antë: ¿Tiijën koos të xy'ëkyajpëtsëëmtëpë jap Egiptë? ¿Jä'äkyëjxm të xyjyuutës ets yaa të'ëts'ituuy n'ooktëtyësë? Ni kääky ni uuky yaa kya'ity, ya'atë jë'kxy tëëjës xynyatsyijpnëtë.

⁶Ënät yë Tios ojts janty nimay tkexy yë tsa'any, mëti'ipë tsu'tstëpën ets may yë Israel ja'ayëty y'o'ktë.

⁷Tä ja Moisés ojts ënätyë tninëjkxtë ets t'ënëmaaytyë: Poky ëëts të ntuntë, ko yë Tios ets mijts wiinkjaty myajnikäjpxy myajnimëtya'aktë. Paaty ënëëmë Tios wä'än tyajjëwä'äky yë tsa'any. Ënät yë Moisés ojts tmënu'kxtä'äky yë Tios ets tpokmyä'kxëty yë Israel ja'ayëty.

⁸Tios ojts t'ëtsoowinpity yë Moisés: Yajnikojtu'ut tu'uk yë tsa'any ets jam këjxm xykyëxpëkëty ma tu'uk yë kepyjyëjpën. Ko pën tsyu'utsëtëty ja tsa'any, yë'ë y'ixëp ja tsa'any jampë kepykyëjxmën mëti'ipë të nyikojtu'utyën ets tsyo'okëty.

⁹Ojts ja Moisés tu'uk ja tsuxkpujxntsa'any tjantyajkojy ets tkëxpëjky ma tu'uk yë kepyjyëjpën; e jëtu'un ko ijty pën tsyu'utsyë ja tsa'any, jam ënätyë kyëx'ixy ma ja pujxntsa'anyën ets tsyo'oky.

¹⁰Yë Israel ja'ayëty ojts nyëjkxtë ets jyajtë ma tu'uk yë itjotmën mëti'ipë xyëëwajtypyën Obot.

¹¹Ko jam Obot tsyo'ontë jam jyajtë Ije-abarim, ma ja itjotmën tëëtsë'ëkpë, yë'ë mëët yë Moab nyäwyinku'ixëty, jäätsow wyi'imy ma xëëw pyëtsimyën.

¹²E jam tsyo'ontë ets jyajtë ma tu'uk ja nëëwokën mëti'ipë jam yajpatpën Zored.

¹³E ko jam tsyo'ontë jam jyajtë ma Arnón mëjnëëjën. Ya'atë mëjnëë jam tyimnaxy ma ja të'ëts itën mëti'ipë yë Amor ja'ayëty nyitënaaytyëpën ets yë'ë tsëpa'an'ajtp ma mëët nyäpyaatëtën yë Moab.

¹⁴Yë'ë jëtu'un nyikäjpxy yë noky ma myinyën këxja'ay mëti'ipë yë Tios nyitsiptuumpyën, ko y'ënä'äny: Jam ojts najxëmë Vaheb, ma ja Sufá itën, ojts najxëmë wokjoty ets ma ja Arnón mëjnëëjën,

¹⁵ets najxtës näjyëtu'un jam wokpë'am, mëti'ipë jam najxpën Ar itjotm ets tyimja'ty ma mëët yë Moab nyätyu'kmëtsëpa'an'atyën.

¹⁶Ko jam tsyo'ontë ma ja Arnón mëjnëëjën, jam jyajtë ma Beer y'itjotmën. Jam tu'uk ja nëëjut yajpaaty ma ja Wintsën t'ënëmaayën ja Moisés: yajtu'ukmuk yë naax kajpn, jä'ä ko nëëjës yam nmo'ojäämpy.

¹⁷Ënät ja Israel ja'ayëty ojts t'ëwtë ya'atë ëy: Ja nëë mëti'ipë mu'tpën, naaxjotypë pyëtsimyën. Ni'ëmukë, win'ëw winya'axtë ja nëë, mëti'ipë pëtsëëmpën naaxjoty.

¹⁸Ja tu'uwinye'epyë ojts tnitajëtë ja nëë mëët ja kepy, mëti'ipë myëët'ajtypyën ja kutujkën; ja wintsëntëjkëty jampë yajpaatën ma ja naax kajpnën ojts tyajni'ëwa'atstë ja nëë mëët ja tyajkëty mëti'ipë yajmëjnajxpën. Jam të'ëts'itum jam tsyo'ontë yë Israel ja'ayëty ets jyajtë Mataná.

¹⁹Jam tsyo'ontë Mataná ets jyajtë Nahaliel, Nahaliel tsyo'ontë ets jyajtë Bamot,

²⁰e ko jam Bamot tsyo'ontë jam jyajtë ma ja mëj joyën, mëti'ipë nyitënääpyën yë Moab; jamtëkë yajpaaty ma jyëjpkëxyën yë Pisgá y'it nyaaxwiinyëtë ets jam yaj'ijxnëp ja të'ëts'itjotm.

²¹Ënät ja Israel ja'ayëty ojts tkäxtë ja myëku'ukëty ets nëjkx kyukäjpxy'atë jam ma Sihón yajkutujkpën, mëti'ipë ënä'ämpën ma Amor ja'ayëtyën ets t'ënëëmëtëty.

²²Jamës njanaxa'antë ma miits yë mnaaxjotëtyën, ma ja mkam mtu'ujëtyën ka'apës jam ntëkëja'antë ets ma winë të xynyi'ip të xykyojtën, ni yë'ëjës nkatona'antë ja nëë mëti'ipë mjä'ä'ajtëpën, yi'iyë ja mëjtu'u ntimpyanëjkxantëpës.

²³E ja Sihón ka'ap ojts t'a'ixë ets ja Israel ja'ayëty nyaxtëty ma ja nyaaxjotmën. Ni'ikyë ojts yajxon nimay tyajtu'ukmujkta'ay ja tsyiptuunpëtëjk ets tnitso'ontë ja Israel ja'ayëty, jam ojts tukja'të ma txëëwatyën Jahas, jam të'ëts'itjotm.

²⁴E ja Israel ja'ayëty ojts näjyëtu'un pyëtë'ëktë ets nyäkyuwanëtë. Ka'ap tyajmëtaktë ja yajkutujkpë Sihón, ëxëëk tuuntë; jëtu'un'äämpy ojts tniwa'aktë ja nyaax kyam, mëti'ipë jampaat najxpën ma ja mëjnëëjën mëti'ipë xyëëwajtypyën Arnón ets jyä'ty jam Jaboc. Jam ma ja Amón ja'ay mëët nyäpyäätyë ja nyaaxjotëty. Tääpë naax kam napotsy ënäty tmëët'atë.

²⁵Jëtu'un ojts yë Israel ja'ayëty tniwa'kta'atë ja naax kajpn ma ijty ja Amor ja'ayëty tsyëënëtën, tä ja kajpn mëti'ipë xyëëwajtypyën Hesbón ets ja mëti'ipë jam näkyumajtsëtëpën ma yë'ëjën; yë Israel ja'ayëty jam ojts tsyënaaytyaknpëktë.

²⁶Ma ja kajpn txëëwatyën Hesbón, jam ijty yë Sihón tsyëënë mëti'ipë ja Amor ja'ayëty yajkutujkpë'ajtëpën. Yë Sihón jeky ënäty mëët të nyäyaj'ityë tsipjoty ja yajkutujkpë mëti'ipë jam Moab ënä'ämpën. Ets tëë ënäty tpëjkëtyä'äy ja y'it nyaaxwiinyëtë jampaat ma nyäxyën ja Arnón mëjnëë.

²⁷Paaty y'ënantë ja ja'ay mëti'ipë jaaytyëpën ets oy mëtyaktëpën: Mintë ni'ëmukë ma ja Hesbón kajpnën mëti'ipë kyajpn'ajtypyën yë Sihón. Koj'oyëtë ets yajta'tspëktë.

²⁸Jam Hesbón, yë kyajpn yë Sihón. Jam tu'uk yë mëjpatoyë të tsyo'ontä'äky, mëti'ipë të tyajkutëkoyën yë naax kajpn Ar, mëti'ipë yë Moab nyitënääpyën, ets tëë wyintooytyuta'atë ja tunjot kopkjot, mëti'ipë nyitënääpyën yë Arnón.

²⁹Janty mon janty tuk myajpaaty mijts Moab. Wi'ix njatkëmëty tëë mtëkooynyë ma tyios'ajtyën yë Quemós. Yë'ë të t'a'ixë ets mja'ay kyä'äktëty pyutëty, ets ja yajkutujkpë Sihón, jä'ä tjä'ä'atëty ja mto'oxytyëjkëty.

³⁰Ojts kyutëkooynyë ja y'ënä'ämën kyutujkën yë Hesbón. O'ktëy ojts jyajta'atë yë Dibón kajpn ets Nofa kajpn, yajxon tsyooytyëkooytyääy jampaat Medebá.

³¹Jëtu'un'äämpy yë Israel ja'ay ojts tjä'ä'aty ja Amor ja'ayëty ja y'it nyaaxwiinyëtëty.

³²Ojts näjyëtu'un yë Moisés tkexy yë ja'ay nimäjtsk nitëkëëk ets nëjkx t'ixtë tuntë ja Jézer kajpn. Yë Israel ja'ayëty ojts tmëmëtakta'atë tääpë ja'ayëty, mëti'ipë ënäty jam tsënaaytyëpën. Wa'ats tyajkäkpëtsëëmtaaytyë yë Amor ja'ayëty ma ja nyaax kyajpnëtyën.

³³Ko ojts wyimpijnëtë jamtsow ojts nyëjkxtë ma ja Basán ja nyaaxjotën. E ja yajkutujkpë mëti'ipë ënäty jam ënä'ämpën Basán jä'ä xyëëwajtyp Ok, ojts nyitsoonëtë mëët ja myäytsyiptuunpë ets jam tyu'u'ëtuka'anëtë ma txëëwatyën Edrei.

³⁴Ënät ja Tios t'ënëmaay ja Moisés: Këtii tääpë ja'ay xytsyë'ëkëty, ëjts tëëjës ntuknipëjktaakë, ko mijts nyajmëtaka'any ets ntukë'ëtëkëja'any tääpë yajkutujkpë mëët tëkokyë yë tsyiptuunpëtëjk ets nyaax kyajpn, timjëtu'un xytyunëty tä ojts jyäty kyëpetyën yë yajkutujkpë Sihón, mëti'ipë ënäty yë Amor ja'ayëty yajkutujkpë'ajtëpën jampë tsyëënëtën Hesbón.

³⁵Yë Israel ja'ayëty ojts tyaj'ooktë ja Ok mëët yë y'u'unk y'ëna'k ets tsyiptuunpëtëjk. Nitu'uk ojts tkayajwë'ëmtë juuky, jëtu'un'äämpy tniwa'ktaaytyë ja nyaax kyamëty.