Read Biblia Mixe de Quetzaltepec Números 22 Bible Online

Números 22 - Biblia Mixe de Quetzaltepec bible

Números 22

¹Yë Israel ja'ayëty ojts tyu'uye'ey'ëtë'ëtstë ets jam jyajtë Moab. Joy jot ijty jam, jamts tsyënaaytyaknpëjktë awinmtsow ma ja Jordán mëjnëëjën, yë'ë mëët nyäwyinku'ixëty yë Jericó.

²Yë Balac yë myaank yë Zipor ko tnija'awëy, wi'ix ënäty yë Israel ja'ayëty të tyajkutëkoytyën yë Amor ja'ayëty.

³Ënät ja ja'ayëty ojts ja tsë'ëkë tyuktëjkëtya'ajëtë, mëti'ipë jam kukajpnajtëpën Moab, ko t'ijxtë, ko ja Israel ja'ayëty nimay oyëty.

⁴Ënät ja Moab ja'ayëty ojts tmëkajpxtë ja mëjja'aytyëjkëty jampë yajpaatën Madián ets t'ënëmaaytyë: Tääpë ja'ayëty jëtu'un ënät tyajkëxa'antë yë nnaax'ajt nkam'ajtëmë, tä yë tsajpkaa tku'ojkta'ayën yë mëëy'u'unk kamjotm tu'ujotm. Jä'ä xëëw jä'ä jëmëjt ma jëtu'un tyuunën jyajtën, Balac ënäty jam ënä'ämp ma ja Moab kajpnën.

⁵Ënät ojts tnikäxë yë Balaam, yë'ë myaank yë Beor, jampë tsyëënën Petor, winkon ma ja Éufrates mëjnëëjën, ma ja Amav kajpnën. Tä ja Balac t'ënëmaay ja käjpxynyajxpë ets t'ënëëmëtëty ja Balaam: Jap Egiptë tu'kkajpn yë ja'ay të tsyoontë ets të jya'të yam winkon maas ëjts nyajpaatyën.

⁶Paaty yam npëjktsoyës ets minëty poj'am, tääts ya'atë kajpn xypyokëty. Jä'ä ko jëtu'unës n'ixy njawë, ka'apës yowë xyajmëta'akëty. E ko xypyokëty wä'änës ëjts nmëta'akëty etsës n'ixwojpta'atëty maas n'itjotmën. Ëjts wa'atsës nijawë, ko pën xykyënu'kxy ets ko pën xypyoky atëëp.

⁷Ënät ja mëjja'aytyëjkëty ojts jyänty tyoontë ets tninëkxtë ja Balaam. May ojts ja wit meeny tmënëjkxtë ets tmëjuya'antë ja Balaam, ko tpokëty ja Israel ja'ayëty. Ko jam jyajtë ënät tukmëmëtyaktë jëtu'un tä ënäty ja Balac të tyukmëkäxëtën ja aaw ayuk.

⁸Tä ja Balaam y'ënëmaayëtë: Kwanë ënät mwë'ëmtëty, jä'ä ko jëyëjpës yë Wintsën yam n'ëkyajtëwëty ets miits n'ëtsoowinpitëty jopy. Jëtu'un'äämpy ja mëjja'aytyëjkëty ojts jyänty wyë'ëmtë tu'ktsuu.

⁹Ënät ja Tios jä'ä tsuum nyänyikëxë'kë ma ja Balaam ets yajtëëwë: ¿Pën ja'ay tääpëty, mëti'ipë të myaawë'ëmtën ma mtëjkën?

¹⁰Tä ja Balaam y'ëtsooy: Yë Balac, Zipor yë myaank, mëti'ipë yajkutujkpë'ajtpën jam Moab, yë'ë të tkexy etsës xy'ënëëmëtëty,

¹¹ko tu'uk yë kajpn jap të tsyoony Egiptë ets të jya'të ma Balac y'itjotmën. E yë'ë tsyojkpy etsës nëjkx npoky tääpë kajpn ets yaj'ixëty pën jëtu'un'äämpy myëtä'äky ets t'ëxwojpta'aja'any jam ma ja y'itjotmën.

¹²Ënät ja Tios t'ënëmaay ja Balaam: Këtii xypyanëjkxëty ets ni mka'ëna'anëty ënät ets xypyokaanpëty tääpë naax kajpn. Jä'ä ko tääpë kajpn ëjtsës të nkënu'kxy.

¹³Komjëpom ko ja Balaam myä'äypyëti'ky, ënät t'ënëmaay ja mëjja'aytyëjkëty mëti'ipë Balac të kyäxëtën: Nëjkxtë ma mnaax mkajpnëtyën, jä'ä ko yë Wintsën ka'ap t'a'ixë ets miits npanëjkxtëty.

¹⁴Ënät ja mëjja'aytyëjkëty, mëti'ipë jam tso'ontëpën Moab, ojts jatëkok wyimpijnëtë ma ja Balac yajpaatyën ets t'ënëmaaytyë: Balaam ka'apës xypyamina'antë.

¹⁵Balac kä'äpyëm ninu'un jyotkujk'aty, ënät ojts wiinkpë kukajpxpë tkäjxkojnëpë, aakyë'ë mëti'ipë mëj'äämpy yajëkyäjptëpën naaxjoty kajpnjoty ets wäänë nimay tkejxy.

¹⁶Tä ojts tninëjkxkojnëtëpë ja Balaam ets t'ënëmaaytyë: Balac, Zipor yë myaank, tpëjktsoy tu'uk yë mëjmëyajtën ets mkäjpxynyikexyë: Tun yë mëyajtën ets minëty maajës yaa nyajpaatyën.

¹⁷Ëjts nmo'ojäämpy yam mijts winë mëj këjää ets nmo'ojëp tii mtimtsyojkpy. E min jëtu'un ets xytyunëty tu'uk yë mëyajtën xypyokëty tääpë naax kajpn.

¹⁸Ënät ja Balaam y'ëtsoowëtë: Oyxyëpës yë Balac xyjyatimmyooytyääpyë yë pu'ts pujxn ëkë poop pujxn mëti'ipë japën ma kyutujktaknën, ëjts ka'apës njëkyepy tii ntunëty kë'ëmwinma'any mëj'äämpyë ëkë yiinpë wäänpë, pën yë Wintsën mëti'ipës nTios'ajtypyën ka'ap t'a'ixë.

¹⁹Oy mwë'ëmtëty yaa tu'ktsuu etsës n'ëknijawëty wi'ix yë Wintsën y'ënä'äny ya'atë tsu'um.

²⁰Yë Balaam tap ënäty myaanë, ko ojts yë Wintsën koots nyänyikëxë'ëkyë ma yë'ëjën ets y'ënëmaayë: Pën tääpë ja'ayëty mijts të mniminyë, pëtë'ëk ets panëjkx. Jä'ä tëy, mijts yi'iyë mtunëp mëti'ipë ënäty ntuk'ënëmääpyën xytyunëty.

²¹Komjëpom, tä yë Balaam myä'äypyëti'iky ets tniwë'ëny ja kyërukts, tääts tsyo'ontë mëët ja mëjja'aytyëjkëty, mëti'ipë ënäty jam tso'ontëpën Moab.

²²Balaam yë'ë tyuk'ënyääpy ja kyërukts ets nimäjtsk ja tyuunpë pyanëjkxyë. Ja Tios wiink tja'awëy ko ja Balaam kë'ëmwinma'any tsyo'ony. Paaty ojts tu'uk ja Wintsën kyukäjpxy tyu'u'ëtukyë ma ënäty nyaxa'anyën.

²³Ko ja jëyujk t'ijxy ja Wintsën kyukäjpxy jam tu'u itkujky mëët tu'uk yë tëypyujxn. Ënät ojts t'ëwa'ktu'uty ets äämjyoty kyupëyë'këy. Ënät ja Balaam yajxon ja jyëyujk tukju'pxëy ets atsip tyajwinpita'any.

²⁴Ja Balaam jam ojts yë jyëyujk tyajnëjkxy ma tu'uk yë tu'ujën xu'utspë ets mäjtskpa'ajëty tsaawääpy jää najxp. Jam ojts ja Wintsën kyukäjpxy ja tu'u t'ëwa'ktujkojnëpë.

²⁵Ko ja jëyujk t'ijxy ja Wintsën ja kyukäjpxy, ënät wya'ak'o'oyëy ets jam nyäkyëxmëtakë ma tu'uk ja tsaawääpy nyäxyën ets ja Balaam ja tyeky ojts yajtukëtakpety. Tä ja Balaam ja jyëyujk tniwa'këy yajxon tjantywyopy.

²⁶E ja Wintsën ja kyukäjpxy jëjp'am nyäjxy, ënät ja tu'u t'ëwa'ktujky ma y'axu'utsëtyën, nimaa tkajëkyepy ets ja jëyujk y'ëwa'ktu'utëty.

²⁷E ko ja jëyujk t'ijxy ja Wintsën ja kyukäjpxy, ënät je'eyë tyimnäkyo'kë. Ënät ja Balaam ja jyëyujk yajxon twojpnë mëët tu'uk yë kepy.

²⁸Ënät ja Wintsën ojts tuknipëjktaakë ets ja krukts kyajpxëty ets t'ënëmaay ja Balaam: ¿Maa të nmëtëkoy? tyam mëtëkëëk'ok xywyopyës.

²⁹Je'eyës mijts xynyëxi'iky xytyukxi'iky ¿këtiijë? jëtu'un ja Balaam y'ëtsooy. Kooxyëp yë tsujkn jeexyë nmëëtëtyës timtyämyë jeexyë nyaj'ooky.

³⁰Ënät ja jëyujk y'ëtsooy: Mapaat mijts mjuuky'ätyën ëjtsës xëmë xytyuk'ënyääpy ets ka'apës jëtu'un n'ëtë'ëtsy, ka'apës nyajkëxë'ëky ja näymyëjkaxëjot ma mijtsën.

³¹Tä ja Wintsën tyajkutujky ets ja Balaam t'ixëty ja Wintsën ja tsyajpjotmëtë kukäjpxy, mëti'ipë ënäty jam tënääpyën tu'ujoty, mëët tu'uk yë tëypyujxn kyë'ëjotm. Tä ja Balaam pojën nyäkyoxtënaaytyakë ets nyaaxkooy.

³²Tä ja Wintsën ja kyukäjpxy y'ënëmaayë: ¿Tii ko mjëyujk të xywyopy tëkëëk'ok? Ëjts mijts ntu'u'ëtujkpy, jä'ä ko ma mnëjkxyën, ëjts ka'apës n'oyjyawë.

³³Yë mkrukts tëkëëk'okës të xy'ixy, paaty të y'ëwa'ktu'uty. Kooxyëp yë'ë të kya'ëwa'ktu'uty, wä'änxyëp jeexyë mijts të nyaj'ooky ets mjëyujk juuky të wyi'imy.

³⁴Ets ja Balaam t'ëtsooy ja Wintsën ja kyukäjpxy: Pokyës të ntuny, ëjts nkanija'apës ënäty ko mijts ja ntu'ujës të xy'ëtujkë. Pën mijts ka'ap xy'oyjyawë koos nëjkxy, jyëkyejpyës nwinpitëty.

³⁵Tä ja Wintsën ja kyukäjpxy y'ëtsooy: Oy xypyanëjkxëty tääpë ja'ayëty, e yi'iyë tëy mnikajpxëp mëti'ipë ntuk'ënëëmëjäämpyën. Balaam ojts tpanëjkxy ja mëjja'aytyëjkëty, mëti'ipë ënäty ja Balac të tkexyën.

³⁶Ko ja Balac tnija'awëy ko tää ja Balaam wyinkony, ënät ojts tnitsoony. Ets tjëjpye'eyë'ëka'any, jam ma tu'uk ja kajpnën mëti'ipë yajpatpën Moab naaxjoty. Winkon ma ja mëjnëë jyënäkyën mëti'ipë xyëëwajtypyën Arnón, ma ja tsëpa'an nyäxyën.

³⁷Ets t'ënëmaay: Janty mëktä'äky mijts të nikäxë; ¿Wi'ix ko ka'ap të mjamina'any? ¿Jä'ä të mmay të mtajy, ko tii mijts n'ëknamo'ojëp?

³⁸Ënät ja Balaam ojts y'ëtsoy: Tyaajës të nminy, mijts nimiimpy. Yë'ë ntuk'ëwaanëjäämpy koos ka'apës njëkyepy tii kë'ëmwinma'any nkajpxëty. Yi'iyë nkajpxäämpyës mëti'ipës yë Tios të xytyuk'ëne'emyën.

³⁹Tä yë Balaam mëët yë Balac tsyo'ony ets ojts nyëjkxtë jam Quiriat-huzot,

⁴⁰Ko jam jyä'äjty, ënät yë Balac ni'ënä'ämëy ets tyaj'ooktëty kanaak ja tsajpkaa ets kupixynyëty, tääts yë Balaam tukkaytyëty mëët ja ja'ayëty mëti'ipë ënäty mëët të myinyën.

⁴¹Komjëpom ënät ojts ja Balac tnimiinkojy ja Balaam ets jam twoowpejty ma ja Banot-baal kopkën, ma yajxon wa'ats kyëxë'ëkyën ma ja Israel ja'ayëty të tsyënaaytyaknpëktën.