Read Biblia Mixe de Quetzaltepec Números 23 Bible Online

Números 23 - Biblia Mixe de Quetzaltepec bible

Números 23

¹Ënät ja Balaam t'ënëmaay ja Balac: Oytyun yaa wëxtujk yë potsy ma wintsë'kën yajyäkyën, nipëjktaakë jam xytyimyaj'itëty mëët wëxtujk yë tsajpkaa ëna'k ets wëxtujk yë kupixyny ëna'k.

²Balac ojts tuny tä ja Balaam y'ënëmaayën, nimäjtsk ojts ja wintsë'kën tyaktë ma tu'ukjaty ja wintsë'këntyaknën, tu'ukjaty ja tsajpkaayä'äy mëët tu'uk ja kupixyny yä'äy tëëpë yä'kpetyën.

³Tääts yë Balaam t'ënëmaay yë Balac: Yaa këwent'at ya'atë wintsë'kën, ëjts nëjkxës n'ëk'ixy wi'ix yë Wintsën y'ënä'äny. Tääts yam ok ntukwinjawëty wi'ixës xy'ënëëmën. Ënät ojts yë Balaam nyijkxy ma tu'uk yë mutsk kopkën, jampë yajpaatyën të'ëts'itjotm.

⁴Ma ojts ja Tios mëët nyäpyäätyë ets t'ënëmaay: Tëës nyaj'oyë wëxtujk yë potsy ma mijts të ntukwintsë'ëkën tu'ukjaty yë tsajpkaa ets tu'ukjaty yë kupixyny ayääkë ma tu'ukjaty yë potsyën ma ja wintsë'kën yajyäkyën.

⁵Ënät ja Wintsën tuk'ëwa'anëtyääy ja Balaam tii mëpaat tkäjpxyën ets t'ënëmaay: Wimpit ma jam yajpaatyën yë Balac ets xytyuk'ëwaanëty tä yam të n'ënëëmën.

⁶Ënät ja Balaam wyimpijty ets jam jyä'äjty ma ja Balac ënäty tkëwent'atyën ja wintsë'kën mëët ja mëjja'aytyëjk, mëti'ipë mëj'äämpy ijtëpën jam Moab.

⁷Ënät ja Balaam ojts ya'atë aaw ayuk t'akäjpxy: Jam tunjotm matsow yë xëëw pyëtsimyën, jam Aram, maas të ntsoonyën etsës Balac yaa xyajminy mëti'ipë yajkutujkpën yaa ma Moab tnitänën. Tëë xy'ënëëmës min ets xypyokëty yë Israel ja'ayëty. Tuknikajpx yë ëxëëkpë yë Jacob yë nyaax kyajpn.

⁸E ëjts, ¿Wi'ixës n'ëkpokëty mëti'ipë Tios ka'ap tpokyën? ¿Wi'ixës ja ëxëëkpë ntuknikajpxëty mëti'ipë Wintsën ka'ap ëxëëkpë të tuknikäjpxyën?

⁹Yaapaat maas yaa ntänën kopkëjxy n'ijxypyës ko tääpë naax kajpn ëpëky nyäyaj'ityë ets tëkatsy, ka'ap jyëtu'unëty tä muumëty yë kajpnën.

¹⁰Jëtu'un yë'ëjëty tä naaxwayën. ¿Pën y'ëkmëtyowëp? ¿Pën ëkmayëtëp tnijawëty jënu'un nyimay'atë? Jëtu'unës njatsoky, jeexyë n'ookyës ntëkoyës tä yë'ëjëtyën. Wa'ats, nitii tuuntëko'oyën tkamëët'atë etsës jeexyë jëtu'un nkëxy nnaxy, tä yë'ëjëtyën.

¹¹Ënät ja Balac ojts t'ojy ja Balaam ets t'ënëmaay: ¿Tii mtuumpy? Mijts jä'äkyëjxm të nmëkäjpxy ets xypyokëty yë nmëtsipës. E mijts ni'ikë tääpë yë naax kajpn xykyënu'kxnë.

¹²Ënät ja Balaam y'ëtsooy: Ëëts'ajtëm tyaa të näy'ëna'anëmë, ko yi'iyës nikajpxëp mëti'ipës yë Wintsën xytyuk'ëwa'anëpën.

¹³Ja Balac ni'ikyë kyajpx'ëtë'ëtsy: Pamiinkës yaatsow ets yi'iyë xy'ixëty ja kajpnpa'a, këtiipë tu'ukyë xy'ijxta'ajëty ja kajpn, jam xyajtso'onta'akëty ets xypyokëty.

¹⁴Ënät ja Balac ojts ja Balaam jam twoownëjkxy Zofim ets tyajpejty ma ja Pisgá kopk kupi'tykyën. Jamts t'oytyuuny wëxtujk yë potsy ma ja wintsë'kën yajyäkyën ets tu'ukjaty yë tsajpkaa ets kupixyny yä'äy mëti'ipë tëë yä'kpetyën, tä tyäjky ma tu'uk ja potsyën ma ja wintsë'kën yajyäkyën.

¹⁵Ënät yë Balaam t'ënëmaay yë Balac: Yaa ëwxit ma ya'atë wintsë'kën yaa y'ityën, ëjts nëjkxës mëët yë Wintsën n'ëknäpyäätyë.

¹⁶Ënät yë Tios ojts nyänyikëxë'ëkyë ma Balaamën ets tyuk'ëwa'anëyë tii mëpaat tkäjpxyën. Ojts t'ënëëmë: Nëjkx jam ma Balac yajpaatyën ets xytyukmëmëtya'akëty mëti'ipë yam të ntuk'ëwaanën.

¹⁷Ënät ja Balaam ojts wyimpity ma ja Balac ënäty jamën. Ko jam jyä'äjty, ja Balac tënääpy ënäty jam, ja wintsë'kën kyëwent'ajtyp; tam näjyëtu'un yajpaatë ja mëjja'aytyëjkëty mëti'ipë mëj'äämpy ijtëpën ma ja naax kajpnën. Ënät ja Balac ojts tyajtëy ja Balaam. ¿Wi'ix yë Tios të m'ënë'ëmxëty?

¹⁸Tä ja Balaam tyëjkëy kajpxpë. Ya'atë ayuk të tkäjpxy: Mijts Balac, yë Zipor yë myaank, tun yë mëyajtën, mëtoow'it tyaapës nikajpxa'anyën.

¹⁹Yë Tios kajëna'a yë kya'ooky kyatëkoy, yë'ë ka'ap wyin'ëëny ets ka'ap yë y'aaw y'ayuk tukxi'iky. Ko tii tnikäjpxy pyatuumpy, ets ko tii twinwanë yäjkpy.

²⁰Ëjts nmëët'ajtypyës yë ënä'ämën, ets tääpë kajpn nkënu'kxëtyës. Pën yë Tios yë'ë tääpë kajpn kyënu'kxyp, ëjts ka'apës njëkyepy tëkatsy yë njä'ä nmëtëkëty.

²¹Ni pën kya'ëna'any, ko yë Israel win'ë'ëmp antakp. Ko yë Israel ëxëëk jyuuky'äty, mëti'ipë yë Jacob kyajpn'ajtën, yë Wyintsënëty, mëti'ipë Tyios'ajtëpën, yë'ë tim yajpatp ma yë'ëjëtyën, ets yë'ë tyijtëp ënä'ämpë yajkutujkpë.

²²Yë Tios mëti'ipë jap yajpëtsëëmëtën Egiptë, yë'ë tyimtukjotmëk'ajtëp ets timjyawëtë tä yë tsajpkaa in yë wyaj tjawën.

²³Yë Jacob ka'ap tjëkyepy wi'ix n'ëkpojkmëty ets npato'oy npanajxmëty, tyam yë'ë kopkpëky ets n'ënëmä'ämyëty yë Israel. Ix yë Tios janty mëj janty këjää të tyaj'ixyë yë myëj'ajtën ma mijtsën.

²⁴Ya'atë naax kajpn jëtu'un pyëti'iky tä tu'uk yë kaa jëyujkën ets ka'ap pyo'kxa'any, koonëm tmatsëty ja mëti'ipë y'ixtääpyën ets t'uuka'any tjë'kxa'any ja jyot nye'pyny.

²⁵Tä yë Balac t'ënëmaay yë Balaam. Jä'ä ko ka'ap tjëkyepy xypyokëty tääpë kajpn, këtii näjyëtu'un xykyënu'kxëty.

²⁶Tä ja Balaam ojts y'ëtsoy: ¿Tii këtii xyjyä'ämetsyë, ko të n'ënëëmë, ëjts yi'iyës ntuunpy mëti'ipës Tios xytyuk'ënä'ämpën?

²⁷Ënät yë Balac jatëkok y'ënäny: Min yaatsow, wä'änxyëp yë Tios ka'ap wi'ix tjawëty ko yamtsow xypyokëty yë Israel kajpn.

²⁸Jëtu'un'äämpy yë Balac ojts jam tyajnëjkxy yë Balaam ma Beor kopkën. Wa'ats jam yajtuk'ixë ja të'ëts'it të'ëtsjotm.

²⁹Tääts yë Balaam t'ënëmaay jam jatëkok yë Balac: Oytyun yaa wëxtujk yë potsy ma ja wintsë'kën yajyäkyën ets jää jëjp'ixy xytyimyaj'itëty wëxtujk yë tsajpkaa ets wëxtujk yë kupixyny.

³⁰Balac ojts jëtu'un tuny tä Balaam y'ënëmaayën ets ma tu'ukjaty ja wintsë'këntyaknën, tu'ukjaty ja tsajpkaayä'äy ojts jam tyaj'ooky ets näjyëtu'un ja kupixyny yä'äy mëti'ipë të yä'kpetyën.