Read Biblia Mixe de Quetzaltepec Números 25 Bible Online

Números 25 - Biblia Mixe de Quetzaltepec bible

Números 25

¹Ko yë Israel ja'ayëty jam jyajtë Sitim ets jam tsyënaaytyaknpëjktë, ja ye'etyëjktëjk ojts tmëët'ijt tmëëtsënaaynyëtë ja to'oxytyëjkëty mëti'ipë Moab ja'ayëtyën.

²Jëtu'un ko ja to'oxytyëjkëty tii wintsë'kën tmo'otë ja tyiosëty wyoowtëp näjyëtu'un ja nyiye'etyëjkëty, Israel ja'ayëty. Jëtu'un'äämpy ja Israel ja'ayëty mëët kyääymyujk y'ukmujknëtë ets t'ëwtajnëtë näjyëtu'un ja Moab ja'ay ja tyiosëty,

³jëtu'un ojts mëj'äämpy tjëkyäjpnëtë ja Baal-peor. Paaty yë Wintsën tukjoot'anpëky yë Israel ja'ayëty,

⁴ets t'ënëmaay yë Moisés: Yajmujkta'a yë mëjja'aytyëjk mëti'ipë mëj'äämpy ijtëpën ma naax kajpnën ets xyo'ktëëytya'ajëty ëjts nwintuuyës ets ja'ay t'ixtëty. Jëtu'un xyäämëty yë n'äkës mëti'ipës nmëët'ajtypyën mëët yë Israel ja'ayëty.

⁵Ënät ja Moisés ojts tuk'ëne'emy ja kutuunktëjkëty: Nitu'ukjaty miitsëty kopkpëky ko këëktu'uk xyaj'ooktëty yë mja'ayëty, mëët ko të t'ëwtatë yë Baal-peor.

⁶E tu'uk yë Israel ja'ay ijxnë kä'äxnë ojts yajxon tu'uk yë to'oxytyëjk, Madián ja'ay, timwyoownëjkxy ma tyëjkën. Ojts yë Moisés t'ixy ets Israel ja'ayëty, mëti'ipë ënäty jam të ye'eymyuktën, tam ënaty jyi'iytyë ya'axtë ma yajnitëkën yë wit tëjk ma ja näpyaatë y'ityën.

⁷Ko jëtu'un t'ijxy yë Finees, yë Eleazar yë myaank, yë Aarón yë y'ok'u'unk, ënät ojts y'ëpëkywyä'äky ma ënäty yë Israel yajpaatën tu'ukmukyë ets tkajpë'ky yë kyu'umën.

⁸Tä ojts tpanëjkxy ja Israel ja'ay, mëti'ipë ënäty të twoownëjkxyën ma ja myaapäjnën ets tukmoxmëtijëy ja kyu'umën, ja ye'etyëjk ets ja to'oxytyëjk. Jëtu'un'äämpy ojts ja ëyo'on jotmay jyëjpkëxy, mëti'ipë may ja Israel ja'ayëty kyu'o'këtyën.

⁹Yë ja'ayëty tëë ënäty nimay nya'o'knëtë, i'px majktaxk milën.

¹⁰Ënät ja Wintsën ojts tmëkäjpxy yë Moisés ets t'ënëmaay:

¹¹Finees yë'ë të tuny mëti'ipës ntukjotkëtäkpyën etsës yë n'äkë të xyeemy, jä'ä ko yë'ë näjyëtu'un të tukjoot'anpëky tä ëjtsën. Paatykyëjxm ka'apës yë n'äkë të nätyuk'ëne'emyë ets ka'ap të nyajkutëkooytya'atës.

¹²Paaty ënëëmë tyamës ntuna'any tu'uk yë käjpxytyu'unën mëët yë'ë ets jotkujk xëmë jyuuky'atëty,

¹³Ëjts yam ënaanp, ko yë'ë ets y'u'unk y'ok nmoopyës yë tuunk ets tyeety'atëty xëmëkyëjxm. Jä'ä ko yë'ë tëë jëtu'unpë äkë tyajkëxë'ëky, tääjës ëjts nmëët'atyën ma Israel ja'ayëtyën.

¹⁴Ja Israel ja'ay mëti'ipë yajtukuumnajxën mëët ja ku'umën ets näjyëtu'un ja to'oxytyëjk, mëti'ipë Madián ja'ayën, jä'ä ijty xyëëwajtyp Zimri, yë'ë Salu yë myaank ets mëj'äämpy ënäty y'ity ma ja Simeón ja'ayëtyën.

¹⁵Ja to'oxytyëjk mëti'ipë Madián ja'ayën, jä'ä xyëëwajtyp Cozbí, yë'ë nyëëx yë Sur, mëj'äämpy ënäty y'ity yë Sur jam ma Madián ja'ayëtyën.

¹⁶Tä yë Wintsën ojts tmëkäjpxy yë Moisés ets t'ënëmaay:

¹⁷Nëjkx mtsiptuntë mëët yë Madián ja'ayëty ets xytyimyaj'o'kta'atëty.

¹⁸Jëtu'un tä yë'ëjëty të mtunëtën mëët ja y'ëxëëkjot y'ëxëëk winma'anyëty ko të mtuk'ëwtatëtë ja Baal-peor. Näyjyëtu'un tä të y'ëti'itsyën yë Cozbí, ja Madián ja'ay ja nyëëx, mëti'ipë ojts ja ku'umën mëët yajtukjë'pnaxyën. Koos nkejxy ja ëyo'on jotmay, mëët ko ënäty ja Israel ja'ayëty të t'ëwtatë ja Baal-peor.

¹⁹Tëë ënäty nyäxy ja ëyo'on,