Read Biblia Mixe de Quetzaltepec Números 28 Bible Online

Números 28 - Biblia Mixe de Quetzaltepec bible

Números 28

¹Ënät ja Wintsën ojts tmëkäjpxy yë Moisés ets t'ënëmaay:

²Ko këtii tja'atyëkoytyëty ets tmëmintëty xëmë yë y'ayajk y'ako'onënëty, tä yë tsajpkääkyën. Ko xëëw tpaatëty jää tyaktëty yë y'ayajk y'ako'onën nino'okpyë, mëti'ipë ja'tëpën ëjts nwintuuyës tä yë xu'kën jojkën janty oypyë.

³Ënëëmëtë näjyëtu'un ko ya'atë ayajk ako'onën mëpaat tyaktë nino'oky mëti'ipës xytyukmëjjawëtëpën xëmë winjëpom, nitu'kxëëw kyaninaxëty, mäjtskëty yë kupixyny ayääkë mëti'ipë tu'ukëty yë jyëmëjtën ets oypyë mëkpë.

⁴Tu'uk jopyëp yajyakëty ets tu'uk jënäkyxyëëw.

⁵E ja aaytyëëm ujtstëëm mëti'ipë ayajkën'at ako'onën'atëpën, yë'ë tsajpmookjëtsy mäjtsk tsim wo'okjëtity mëët yë olivë on.

⁶Ya'atë wintsë'kën mëti'ipë oy xu'kp jojkpën, yë'ë jëtu'un ojts ja Wintsën xëmë yajtukwintsë'ëkë jam ma ja Sinaí kopkën ets jam ojts më''ëka'any jëtu'unpë tsyo'ontä'äky.

⁷Ja tsatym nyëë jä'ä nëjkx yajyäky tu'ktsim mëti'ipë mëët yajtukmëyakëtyën ja kupixyny tu'ukpë. Ya'atë tsatym nyëë jap yajpikëty tëkoty ma ja Tios ja wyittëjkën, mëti'ipë ja Wintsën yajtukmëjjawëpën.

⁸Ja mëmäjtskpë ja kupixyny, jënäkyxyëëw nëjkx yajyäky. Nëjkxëp näjyëtu'un ëpëky yajyäky yë aaypyajk ujtspajk ets ja tsatym nyëë; näjyëtu'un tä ënäty jopyëp të yajyäkyën. Ya'atë ayajk ako'onën yë'ë mëti'ipë yajnino'kpën ets oy ja xu'kën jojkën jam jyä'ty Wintsën wintum.

⁹Ma ja po'kxënxëëwën yë'ë nëjkx jää xyaktë, mäjtsk yë kupixyny mëti'ipë tu'uk yë jyëmëjtën ets oy mëk ets kä'pxy, mëët taxk tsim yë tsajpmookjëtsy mëti'ipë wo'okjëtityën mëët yë on. Yë'ë ayajkën'at ako'onën'atëp ma aaypyajk ujtspajk yajyäkyën, mëët ëpëky ja nyi'tsatym nyëë mëti'ipë mëët tu'ukyë y'ayajkën'at y'ako'onën'atyën.

¹⁰Ya'atë ayajk ako'onën nino'okpyë yë'ë jää yajyakëp po'kxënxëëwëtë, mëët ja nyi'tsatym nëë. Ëpëky mëti'ipë xëmë winjëpom yajyajkpën.

¹¹Ma ëka'any y'anë'ëkyën oymyëti'ipë po'ojëty, mäjtsk yë tsajpkaayä'äy ayääkë xytyukwintsë'ëkëtëty yë Wintsën, tu'uk yë kupixyny yä'äy mëti'ipë të yä'kpetyën ets wëxtujk yë kupixyny yä'äy mëti'ipë tu'ukjaty yë jyëmëjtën ets oyëty mëkëty,

¹²ma tu'ukjaty ja tsajpkaayä'äy ayääkën, ëpëky xytyukmëyakëtëty tëtujk tsim yë tsajpmookjëtsy mëti'ipë mëët yë on tyukmëwookëtyën, e ja kupixyny yä'äy mëti'ipë të yä'kpetyën, ëpëky mëët yajtukmëyakëty yë tsajpmokway taxk tsim, wo'okjëtity mëët yë on.

¹³E ja tu'ukjatypë ja kupixyny yä'äy, yë'ë nëjkx xytyukmëyakë mäjtsk tsim yë tsajpmokway, mëti'ipë wo'okjëtityën mëët yë on. Ets nëjkx yajnino'oky, yë'ë ja Tios yajtukwino'okëp ets oy xyuukëty jyokëty.

¹⁴E nëjkxëp ja tsatym nyëë näjyëtu'un yajtukmëyakë mäjtsk tsim ma ja tu'ukpë ja tsajpkaa yä'äyën, tu'ktsim ja kujkm ma tu'ukjatypë ja kupixyny yä'äy mëti'ipë tëë yä'kpetyën ets tu'ktsimjaty ma ja tu'ukpë ja kupixyny yä'äy ayääkën. Ya'atë mëpaat xyaktë nino'oky ma Tiosën winpo'ojëty.

¹⁵Ëpëky ja wintsë'kën mëti'ipë myajktëpën nino'oky, nëjkxëp tu'uk ja tsajppax xyaktë, mëti'ipë ja Wintsën mtukwintsë'ëkëtëpën ets ja mpokyëty jä'ä tkunaxëty mëët ja tsatym nyëë.

¹⁶Ma myajkmajkts anyën yë mëtu'kpo'opë jää nëjkx xyëëwtuntë yë ëmaayxyëëw ma ja Tios jää xymyëjjawëtëtyën.

¹⁷E ma myajkmokx'anyën mëj xëëw ënäty jää najxp. Wëxtujk xëëw nëjkx xykyäytyë yë tsajpkääky ka'apë tsyooymyëëtëtyën.

¹⁸Ma tim ëka'any ja xëëw tsyo'ontä'äkyën, jää nëjkx mye'eymyuktë ets ja Tios xy'ëwtatëtyën. Jä'ä xëëw nitiituunk mëpaat jä'ä xykyatuntë.

¹⁹Mäjtsk yë tsajpkaayä'äy ayääkë, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny yä'äy ayääkë oyëty mëkëty ets mëët näjyëtu'un xytyukmëyakëtëty yë tsatym nyëë. Yë'ë nëjkx xynyino'oktë ets ja Tios jä'ä xytyukwintsë'ëkëtëty.

²⁰Mëët ya'atë wintsë'kën ëpëky nëjkx xytyukmëyakëtë ja ayajk ako'onën mëti'ipë aaypyajk ujts pajkën. Tëtujk tsim nëjkx xytyukmëyakëtë ja tsajpmookway mëti'ipë wo'okëtityën mëët yë on ma tu'ukpë ja tsajpkaayä'äy ayääkën ets taxk tsim ma tu'ukpë ja kupixyny yä'äy tëëpë yä'kpetyën.

²¹Mäjtsk tsim tu'ukpë ja kupixyny ayääkë.

²²Nëjkxëp näjyëtu'un ëpëky xyaktë tu'uk yë tsajppax mëti'ipë ja nëë poky mtukuyaktëpën.

²³Tëkokyë ya'atë të yajnikäjpxyën, nëjkxëp jëtu'un xyaktë, ëpëky ja mëti'ipë Tios xëmë winjëpom yajtukwintsë'këpën.

²⁴Jëtu'un nëjkx xytyuntë ko tii xëëw tpaatëty ma ëka'any tsyo'ontä'äkyën ja mëtu'kxëëwpë, ma ënäty wëxtujk xëëw jëtu'un ja xëëw y'ita'anyën. Ya'atë ayajk ako'onën yë'ë nëjkx jam jyä'ty Wintsën wintum, tä tu'uk yë xu'kën jojkën janty oypyë. Ya'atë ayajk ako'onën nëjkxëp näjyëtu'un mëët yajyäky ja nyi'tsatym nyëë, ëpëky ja wintsë'kën xëmëpë winjëpom yajyäkyën.

²⁵Ma ënäty wyëxtujk xëëwpetyën, jää nëjkx jatëkok mye'eymyujkta'atë ets ja Tios mëj xyajnaxtëty. Nitiituunk nëjkx jää xykyatuntë.

²⁶Ma yajnixëëwtunyën ja pëjktä'äky ma më''ëka'any pyëti'ikyën, ko ja Wintsën xymyo'otëty ja jemypyë ja aaytyëëm ujtstëëm, jää ma ënäty yajnixëëwtunyën ja wëxtujk xëëwpë. Nëjkxëp jää mye'eymyuktë ma ja Tios mëj'äämpy xypyëjkta'aktëtyën. Jä'ä xëëw nitiituunk mëpaat jää xykyatuntë.

²⁷Yë'ë nëjkx yë Wintsën xytyukwintsë'ëkëtë nino'oky ets jam jya'tëty ma yë'ëjën tä tu'uk yë xu'kën jojkën oypyë, mäjtsk yë tsajpkaayä'äy ayääkë, tu'uk yë kupixyny yä'äy mëti'ipë tëë yä'kpetyën ets ëpëky wëxtujk yë kupixyny ayääkë mëti'ipë yë jyëmëjtëtyën tu'uk.

²⁸Ja tsajpmookway mëti'ipë wo'okëtityën mëët yë on, jä'ä nëjkx xytyukmëyakëtë ja tsajpkaayä'äy ayääkë, tu'ukjatypë, tëtujk tsim ets taxk tsim mëët ja kupixyny yä'äy mëti'ipë tëë yä'kpetyën,

²⁹ets mäjtsk tsimjaty ma tu'ukjatypë ja kupixynyën.

³⁰Nëjkxëp ëpëky xyaktë yë tsajppax yä'äy tu'uk mëti'ipë yë mnëë mpokyëty mtukunaxtëpën.

³¹Ya'atë wintsë'kën mëti'ipë nino'okyën mëët ja nyi'ayajk nyi'ako'onën, mëti'ipë aaypyajk ujts pajkën ets ja nyi'tsatym nyëë. Yë'ë nëjkx xyaktë, ëpëky ja mëti'ipë winjëpom yajyajktëpën. Ja jëyujk tsajpkaa, yë'ë mëpaat xyaktë mëti'ipë oy mëkën.