Read Biblia Mixe de Quetzaltepec Números 29 Bible Online

Números 29 - Biblia Mixe de Quetzaltepec bible

Números 29

¹Ma tyu'uk anyën ja mëwëxtujkpo'opë jää nëjkx mye'eymyuktë ets ja Tios jää xymyëjjawëtëty. Ma jëtu'unpë ja xëëw tpaatyën, nitiituunk mëpaat jää xykyatuntë ets xypyëjkta'aktëty ja mëto'owën jä'ä xëëw, yë'ë ja pujxnxuxn mtukxu'uxtëp.

²Ja wintsë'kën mëti'ipë yë Tios mtukwinno'oktëpën ets jya'tëty ma yë'ëjën tä tu'uk yë xu'kën jojkën. Yë'ë myaktëp tu'uk yë tsajpkaa ayääkë, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny ayääkë mëti'ipë jyëmëjtëtyën tu'ukjaty ets oyëty mëkëty.

³Ja tsajpmokway mëti'ipë xëpinyën mëët yë on, jä'ä xytyukmëyakëtëty tu'ukpë ja tsajpkaayä'äy ayääkë tëtujk tsim ets taxk ja tu'ukpë ja kupixyny yä'äy, mëti'ipë tëë yä'kpetyën,

⁴ets mäjtsk tsimjaty tu'ukpë ja kupixyny.

⁵Nëjkxëp näjyëtu'un ëpëky tu'uk xyajktëpë yë tsajppax yä'äy mëti'ipë ja mpokyëty kyunaxëpën,

⁶ëpëky ja jëyujk mëti'ipë yajnino'kpën winpo'ojëty ets ëpëky mëti'ipë yajnino'kpën winjëpom. Ets jä'ä mëti'ipë ëpëky yajtukmëyajkëpën ja aaypyajk ujtspajk ets ja tsatym nyëë mëti'ipë ayajkën'ajtp ako'onën'ajtpën, jëtu'un tä yë Tios të tni'ënä'ämën. Tëkokyë ya'atë ayajk ako'onën nëjkxëp yajnino'oky ets jam jya'tëty Wintsën wintum, tä tu'uk yë xu'kën jojkënën oypyë tsujpë.

⁷Ma myajk anyën ja mëwëxtujkpë ja po'o, jä'ä nëjkx mye'eymyuktë ets ja Wintsën mëj'äämpy xyajnaxtëty. Nëjkxëp jää m'ayuu'atë ets nitiituunk xykyatuntëty.

⁸Mëti'ipë yajnino'okëpën ets ja Wintsën jä'ä yajtukwinjokëty: tu'uk yë tsajpkaa u'unk, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny mëti'ipë tu'ukjaty yë jyëmëjtëtyën ets yë'ë mëti'ipë oyëty mëkëtyën.

⁹Ja ayajk ako'onën mëti'ipë myaktëpën: ma tu'ukpë ja tsajpkaayä'äy ayääkën, jä'ä xytyukmëyakëtëty tëtujk tsim yë tsajpmokjëtsy mëti'ipë tijjëtityën mëët yë on ets taxk tsim xytyukmëyakëtëty ja tu'ukpë ja kupixyny yä'äy mëti'ipë të yä'kpetyën,

¹⁰mäjtsk tsim ma tu'ukpë ja kupixyny ayääkën.

¹¹Nëjkxëp näjyëtu'un xyaktë tu'uk yë tsajppax, mëti'ipë ja mpokyëty mtukunaxtëpën. Ëpëky ja mëti'ipë yajyakëpën mëët ja pokykyëjxmëpë ma ja pokymyä'kxën xëëwën. Ëpëky ja wintsë'kën mëti'ipë yajnino'kpën winjëpom, mëët ja nyi'ayajk nyi'ako'onën mëti'ipë aaypyajk ujts pajkën ets ja nyi'tsatym nyëë.

¹²Ma myajkmokx'anyën ja mëwëxtujkpo'opë, jää mye'eymyuktëty ets nëjkx xymyëjjawëtë ja Tios. Jä'ä xëëw nitituunk jää xykyatuntëty. Wëxtujk xëëw nëjkx mxëëwtuntë, ma yi'iyë ja Wintsën xy'ëwtatëtyën.

¹³Ma ëka'any tsyo'ontä'äkyën ja mëët tu'kxëëwpë. Yë'ë nëjkx xyaktë yë tsajpkaa majktëkëëk, mäjtsk yë tsajpkaa u'unk ets majkmajkts yë kupixyny mëti'ipë ja jyëmëjtëtyën tu'uk ets oyëty mëkëty, yë'ë nëjkx ja Wintsën xytyukwino'ok xytyukwinxamtë ets jya'tëty yë'ë wyintuuy tä tu'uk yë xu'kën jojkën janty oypyë.

¹⁴Ja tsajpmookjëtsy mëti'ipë tijjëtityën mëët yë on ets jä'ä mëët xyaktëty ja tsajpkaa tu'uk, jä'ä xyaktëty tëtujk tsim ets taxk tsim ma tu'ukpë ja tsajpkaa u'unkën,

¹⁵ets mäjtsk tsimjaty ma tu'ukpë ja kupixyny'u'unkën.

¹⁶Nëjkxëp näjyëtu'un tu'uk xyaktë yë tsajppax, mëti'ipë ja mpokyëty mtukunaxtëpën. Ëpëky ja jëyujk mëti'ipë xëmë winjëpom yajnino'kpën mëët ja nyi'ayajk nyi'ako'onën ets ja nyi'tsatym nyëë.

¹⁷E ma ja mëmäjtsk xëëwpën yë'ë nëjkx jää wyintsë'kën'atë: majkmäjtsk yë tsajpkaa u'unk, mäjtsk yë kupixyny mëti'ipë yä'kpetyën ets majkmajkts yë kupixyny mëti'ipë tu'ukjaty yë jyëmëjtëtyën ets oyëty mëkëty.

¹⁸Nëjkxëp näjyëtu'un ja nyi'ayajk nyi'ako'onën ëpëky xyajkëtë, mëti'ipë aaypyajk ujts pajkën ets tsatym nyëë näjyëtu'un ma tu'ukjatypë ja tsajpkaa u'unkën, ja tsajpkaa u'unk ets ja kupixyny jëtu'un tä ja Tios të tni'ënä'ämën.

¹⁹Nëjkxëp tu'uk yë tsajppax näjyëtu'un xyaktë mëti'ipë yë mnëë mpokyëty mtukunaxtëpën. Ëpëky ja jëyujk mëti'ipë yajnino'kpën winjëpom mëët ja nyi'ayajk nyi'ako'onën, mëti'ipë aaypyajk ujts pajkën ets nyi'tsatym nyëë.

²⁰E ma ja mëtëkëëkxëëwpën jä'ä nëjkx xyaktë ma ja Tiosën; majktu'uk yë tsajpkaa, mäjtsk yë tsajpkaa u'unk ets majkmajkts yë kupixyny, mëti'ipë yë jyëmëjtëtyën tu'uk ets oyëty mëkëty.

²¹Nëjkxëp näjyëtu'un yajyajkpë ja ayajk ako'onën mëti'ipë aaypyajk ujts pajkën ets ja tsatym nyëë, jëtu'un tä ënäty ja tsajpkaa u'unk yajyäkyën ets ja tsajppax u'unk ets ja kupixynyëty. Jä'ä ko jëtu'un ja Tios të tni'ënä'ämë.

²²Nëjkxëp näjyëtu'un tu'uk ja tsajppax yajyäky mëti'ipë ja nëë poky mtukunaxëpën, ëpëky ja jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkë mëët ja nyi'ayajk nyi'ako'onën ets ja nyi'uuky.

²³Kom majktaxk xëëw nëjkx xyaktë majk yë tsajpkaa, mäjtsk yë tsajppax, majkmajkts yë kupixyny, mëti'ipë jyëmëjtëtyën tu'uk ets oyëty mëkëty.

²⁴Nëjkxëp näjyëtu'un ja ayajk ako'onën yajyajkpë mëti'ipë aaypyajk ujts pajkën ets ja tsatym nyëë, jëtu'un tä ënäty ja tsajpkaa u'unk yajyäkyën, tä ja Tios të tni'ënä'ämën.

²⁵Nëjkxëp näjyëtu'un tu'uk yë tsajppax yajyäky mëti'ipë ja nëë poky kyunaxëpën. Ëpëky ja jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkëty, mëët ja nyi'ayajk nyi'ako'onën mëti'ipë aaypyajk ujts pajkën ets ja nyi'tsatym nyëë.

²⁶Ma myëkoxk xëëpetyën taxtujk nëjkx yë tsajpkaa u'unk xyaktë, mäjtsk yë tsajppax ets majkmajkts yë kupixyny mëti'ipë jyëmëjtëtyën tu'uk ets oyëty mëkëty.

²⁷Nëjkxëp näjyëtu'un ja ayajk ako'onën yajyajkpë mëti'ipë aaypyajk ujts pajkën ets näjyëtu'un ja tsatym nyëë, jëtu'un tä ënäty ja tsajpkaa u'unk yajyäkyën, näjyëtu'un tä ja tsajpkaa u'unk ets ja kupixynyëty mëti'ipë ja Tios të tni'ënä'ämën.

²⁸Nëjkxëp näjyëtu'un yajyäky tu'uk ja tsajppax, mëti'ipë yë poky kyunaxëpën, ëpëky ja jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkëty, mëët ja nyi'ayajk nyi'ako'onën mëti'ipë aaypyajk ujts pajkën ets ja nyi'tsatym nyëë.

²⁹Komtëtujk xëëw, jää nëjkx yajyäky tuktujk yë tsajpkaa u'unk ets mäjtsk yë kupixyny mëti'ipë yä'kpetyëtyën ets ëpëky ja majkmäjtsk ja kupixyny, mëti'ipë jyëmëjtëtyën tu'ukjaty ets oyëty mëkëtypë.

³⁰Nëjkxëp näjyëtu'un yajyajkpë ja ayajk ako'onën mëti'ipë aaypyajk ujts pajkën ets ja tsatym nyëë, jëtu'un tä ënäty ja tsajpkaa u'unk yajyäkyën ets tä ja tsajppax u'unk ets ja kupixynyëty mëti'ipë ja Tios të tni'ënä'ämën.

³¹Nëjkxëp näjyëtu'un yajyäky yë tsajppax mëti'ipë yë nëë poky kyunaxëpën, ëpëky yë jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkë mëët ja nyi'ayajk nyi'ako'onën mëti'ipë aaypyajk ujts pajkën ets nyi'tsatym nyëë.

³²Kom wëxtujk xëëw, wëxtujk nëjkx xyaktë yë tsajpkaa u'unk, majkmäjtsk yë tsajppax ets majkmajkts yë kupixyny, mëti'ipë jyëmëjtëtyën tu'uk ets oyëty mëkëty.

³³Nëjkxëp yajyajkpë ja ayajk ako'onën mëti'ipë aaypyajk ujts pajkën ets ja tsatym nyëë, jëtu'un tä ënäty ja tsajpkaa u'unk yajyäkyën ets tä ja tsajppax u'unk ets ja kupixynyëty mëti'ipë ja Tios të tni'ënä'ämën.

³⁴Nëjkxëp näjyëtu'un yajyäky tu'uk yë tsajppax mëti'ipë yë nëë poky kyunaxëpën, ëpëky ja jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkë, mëët ja nyi'ayajk nyi'ako'onën mëti'ipë aaypyajk ujtspajk ets ja nyi'tsatym nyëë.

³⁵Nëjkxëp ni'ëmukë mye'eymyujkta'atë ets mëj nëjkx tääpë xëëw xyjyawëtë, nitiituunk jää xykyatuntëty.

³⁶Tu'uk nëjkx xynyino'oktë yë tsajpkaayä'äy, tu'uk yë kupixyny yä'äy mëti'ipë të yä'kpetyën ets wëxtujk yë kupixyny ayääkë mëti'ipë oyëty mëkëtyën ets tu'uk yë jyëmëjt, yë'ëts jam ja'tëp Wintsën wintum tä tu'uk yë xu'kën jojkën oypyë tsujpë.

³⁷Nëjkxëp yajyajkpë ja ayajk ako'onën mëti'ipë aaypyajk ujts pajkën ets ja tsatym nyëë mëët ja tsajpkaayä'äy, ja kupixyny yä'äy yä'kpetypë ets ja kupixyny ayääkë mëti'ipë ja Tios të tni'ënä'ämën.

³⁸Nëjkxëp näjyëtu'un yajyäky tu'uk yë tsajppax mëti'ipë yë nëë poky kyunaxëpën, ëpëky ja jëyujk mëti'ipë xëmë winjëpom yajnino'kpën ets ja Tios jä'ä yajtukwintsë'ëkë mëët ja nyi'ayajk nyi'ako'onën mëti'ipë aaypyajk ujts pajkën ets ja nyi'tsatym nyëë.

³⁹Ya'atë wintsë'kën'atëp mëti'ipë Wintsën yajmo'ojëpën ma tu'uktu'uk ja xëëw nyaxëtyën, ëpëky ja ayajk ako'onën mëti'ipë nitu'ukjaty mëpaat ja ja'ay tyaktën ets ja tsojkënkyëjxmëpë tyajkpëtën, jä'ä jëtu'un ja mëti'ipë yajnino'kpën ets ja aaypyajk ujtspajk mëti'ipë ayajkën'ajtp ako'onën'ajtpën ets ja tsatym nyëë ets ja Tios jä'ä yajtukwintsë'ëkëty, mëët ko ja nay'ëëw'oy näykyajpx'oyë y'ity mëët yë'ë.

⁴⁰Yë Moisés ojts tuk'ëwa'anëtyä'äy ya'atë aaw ayuk tëkokyë yë Israel ja'ayëty, mëti'ipë ënäty ja Wintsën të tyuk'ëne'emyën.