Read Biblia Mixe de Quetzaltepec Números 30 Bible Online

Números 30 - Biblia Mixe de Quetzaltepec bible

Números 30

¹Ënät ja Moisés ojts tmëkäjpxy ja mëjja'aytyëjkëty mëti'ipë nyikopk'ajtëpën ja Israel ja'ayëty ets t'ënëmaay: Jëtu'un yë Wintsën të tni'ënä'ämë.

²Ko tii ja'ay twaanta'akëty ets Tios tuknijawëty ko winë tyaka'any nëjkxëp tkuuytyuny ets tyakëty mëti'ipë ënäty të twaantä'äkyën.

³Ko tu'uk yë to'oxy'ëna'k tii twaanta'akëty ma Wintsënën ëkë tuna'anëty tii winë ma ja tyeety yë'ë myëët'atyënëm.

⁴Ets tyeety tnijawëty ko tëëtëm tii winë twaantä'äky ets tuna'any winë. Pën ka'ap wi'ix y'ënë'ëmxëty kopkpëky ko tkuuytyunëty ets tyakëty ja mëti'ipë ënäty të twaantä'äkyën.

⁵E pën ja tyeety kajts t'a'ixë ja jëtu'unpë tunëty ets tyakëty. Yë ka'ap kyopkpëkyëty atsip tyakëty ets tunëty, ja mëti'ipë ënäty të twaantä'äkyën ëkë të twinwanën. Jä'ä ko ja tyeety ka'ap jëtu'un t'a'ixë, yë Wintsën ka'ap y'atsip'atëtëty.

⁶Ko tu'uk yë to'oxytyëjk tii twaanta'akëty ma Wintsënën ets tii tukwinwanëty. E jä'ä jëtu'unpë tuny mäjtsk aaw mäjtsk jot ets ok pyëjknë.

⁷Pën ja nyiye'etyëjk nyija'ap ets ka'ap wi'ix y'ënë'ëmxëty, nëjkxëp jëtu'un tyäky ets tkuuytyunëty mëti'ipë ënäty të twaantä'äkyën ets ja Tios të tukwinwanën.

⁸E pën ja nyiye'etyëjk nyija'ap ets ka'ap tkupëkëty ja jëtu'unpë ja waantakën, ka'ap y'atsipëty nëjkx tyäky ets tkuuytyunëty mëti'ipë wyaantakën. Yë Wintsën ka'ap nëjkx atsip y'amëtoyë ets tpatunëty ëkë tyakëty ja wyaantakën.

⁹Pën ja to'oxytyëjk ku'ooky, ëkë tëë nyäy'ëxmajtsënë mëët ja nyiye'etyëjk, yë'ë tëy kopkpëky ko nëjkx tkuuytyuunta'ay tëkokyë mëti'ipë ënäty të tukwinwanën ja Tios.

¹⁰Ko tu'uk yë to'oxytyëjk mëti'ipë pëkyën twaanta'akëty tii winë ma Tiosën ets tukwinwanëty tii tuna'any ets jam yajpaaty ma ja nyiye'etyëjk ja jyëën tyëjkën,

¹¹ets ja nyiye'etyëjk tnijawëty ja mëti'ipë ënäty të tunyën ets ka'ap wi'ix y'ënä'äny. Yë'ë kopkpëky ko nëjkx tpatuny ja mëti'ipë ënäty ja Wintsën të tukwinwanën ets mëti'ipë ënäty të twaantä'äkyën.

¹²E ko ja nyiye'etyëjk tnijawëty ets ka'ap ja jëtu'unpë tkupëky, ja to'oxytyëjk ka'ap nëjkx atsip tyäky ja mëti'ipë ënäty ja Wintsën të tukwinwanën; jä'ä ko ja nyiye'etyëjk ka'ap të tkupëky, yë Wintsën ka'ap nëjkx atsip y'amëtoyë.

¹³Yë ye'etyëjk jyëkyäpëp jëtu'unpë waantakën tkupëkëty ëkë tyaj'atëkoyëty ets oytyiiwaantakënëty mëti'ipë ënäty ja tyo'oxytyëjk të tunyën.

¹⁴Pën yë'ë ka'ap wi'ix y'ënä'äny, je'eyë amonyë y'ity, mëët ja wyaantakën ets mëti'ipë ja Tios të tukwinwanën ets nyäxy jëtu'un mäjtsk tëkëëk xëëw, jëtu'un'äämpy yajnijawëty, ko yë'ë y'a'ijxëp ënäty.

¹⁵E pën tëë nyajxnë këjää ja xëëw po'o ets ok jya'ënanë ko ka'ap t'a'ixë ets ja to'oxytyëjk tunëty ja mëti'ipë të twaantä'äkyën ets mëti'ipë ënäty të tukwinwanën ja Tios, yë'ë nëjkx tpoky'äty ko ënäty ja tyo'oxytyëjk ja wyaantakën tka'ëkpatuunë.

¹⁶Ya'atë jëtu'un ënä'ämën'ajtp mëti'ipë ja Wintsën myooyën ja Moisés mëët ja ye'etyëjk ma mëët ja tyo'oxytyëjk y'ityën tsyëënën ets ma tu'uk ja u'unkteety tmëët'atynyëmën ja nyëëx ko y'atu'uk'atynyëm.