Read Biblia Mixe de Quetzaltepec Números 31 Bible Online

Números 31 - Biblia Mixe de Quetzaltepec bible

Números 31

¹Ënät yë Wintsën ojts tmëkäjpxy yë Moisés ets t'ënëmaay:

²Yajkutëkoy yë Madián ja'ayëty, mëët yë Israel ja'ayëty xyëëwkëjxm, ko jëtu'un tyuunta'a jyajta'ajëtëty tääts nëjkx mijts m'o'knë.

³Ënät ja Moisés ja naax kajpn t'ënëmaay: Nänyipëjktaakëtë ets nëjkx mtsiptuntë. Nëjkx yaj'o'kta'atë yë ja'ayëty jampë tsyëënëtën Madián jëtu'un yajnitsiptunëty ja Tios ja xyëëw.

⁴Tu'kja'ayjyäty ma ja Israel ja y'u'unk y'ëna'kën tu'uk mil mëpaat yë jyä'ä tkexy tsiptuunpë.

⁵E paaty ja tu'kja'ayjyätypë, mil ojts ja tsyiptuunpë twin'ixy, jä'ä nyiwinë'ajtë nimajkmäjtsk mil, yajxon nyäjyëjp'ijxëtë ets nyëjkxa'antë tsiptuunpë.

⁶Yë Moisés yë'ë ojts tukpakexy yë Finees ja tsyiptuunpëtëjkëty, yë myaank yë teety Eleazar mëti'ipë myënëjkxën winë mëti'ipë ja Tios jyä'ä'ajtypyën ets ja pujxnxuxn mëti'ipë yajtukxuxpën ets ja Israel ja'ayëty tsyiptuntëty.

⁷Ets ojts tsyiptuntë mëët ja Madián ja'ayëty ets tyaj'o'ktaaytyë jëtu'un tä ja Wintsën ënäty të tuk'ëne'emyën ja Moisés.

⁸Ojts tyaj'ooktë ja Eví, Réquem, Zur, Hur ets Reba, jä'ä ja nimëkoxpë ja yajkutujkpëty mëti'ipë jam ënä'ämtëpën ma Madián ja'ayëtyën. Näyjyëtu'un ja Balaam ojts tyaj'ooktë, ja myaank ja Beor.

⁹Ja Israel ja'ayëty ka'ap tyaj'o'ktë ja to'oxytyëjkëty ets ja pi'k'ëna'këty. Tsumy ojts je'eyë tyajnëjkxtë. Ojts tpëjkëtya'atë ja jyëyujkëty, tsyajpkaajëty ets tëkokyë mëti'ipë ja wit meeny nyëkëjxm'ajtypyën.

¹⁰Ëpëky ojts näjyëtu'un tno'kta'atë ja nyaaxëty kyajpnëty ja Madián ja'ayëty ets ja tsyënaaytyaknëty.

¹¹Ets tëkokyë mëti'ipë pyëjkëtyën wä'än yë'ëjëty yë ja'ay ets jëyujk,

¹²ojts tukninëjkxtë ja Moisés, ja teety Eleazar ets ja naax kajpn, ma ënäty jam tsyëënëtën ja'ayjyotm, mëti'ipë Moab ja'ay nyitënääpyën, winkon ma ja Jordán mëjnëëjën, mëti'ipë wintuuytsyow wë'ëmpën ma Jericó kajpnën.

¹³Yë Moisés yë teety Eleazar ets ja naax kajpn ojts tsyoontë, jam ma ënäty yajpaatën ets ojts nyëjkxtë kajpnpë'am ma tjëjppaatë'ktën, mëti'ipë ënäty ojts të tsyiptuntën.

¹⁴E ja Moisés ojts tukjoot'anpëky ja mëti'ipë nyiwintsën'ajtëpën ja tsiptuunpëtëjkëty tu'kmilpë ets ma tu'kmëko'pxpën,

¹⁵ets t'ënëmaay: ¿Tii tëë yë to'oxytyëjkëty xyajwë'ëmtëpë?

¹⁶Wi'ix ko të xyajwë'ëmtë, tii këtiijën xyjyä'ämyätstë ko yë'ë ojts yë Balaam kyajpxwijëtë wi'ix yë Israel ja'ayëty tkäjpxykyumëtoownaxtëty ja Wintsën ets t'ëwtatëty ja Baal-peor. Paatykyëjxm ja Wintsën tyaj'o'ky ja mayjyä'äy.

¹⁷Paaty yaj'o'kta'atë timtyämyë yë pi'k'ëna'ktëjkëty ye'etyëjkpë ets ja to'oxytyëjkëty mëti'ipë ka'ap y'ëkto'oxy'ëna'k'ajnëtën.

¹⁸E mëti'ipë to'oxy'ëna'këtyën, yajwë'ëmtë ets miits jä'ä'atë.

¹⁹E tëkokyë pën të yaja'ay'ookyën ets pën yë o'kpë të tonyën, wë'ëmtë jam kajpnpë'am. Wëxtujk xëëw jam m'itëty. Jëtu'un tä miitsëtyën ets näjyëtu'un ja tsumjyä'äytyëjkëty nëjkxëp ja näyajwatsën tpaatë kom tëkëëk xëëw ets ja kom wëxtujk xëëw.

²⁰Yajwatsta'atë yë mwitëty yë po'ojëty ets kepyëty.

²¹Ënät ja teety Eleazar ojts t'ënëëmë ja tsiptuunpëtëjkëty, mëti'ipë ënäty jam tsipjëjp'am të yajpaatën: Ya'atë ënä'ämën yë'ë yë Wintsën të tuk'ëne'emy yë Moisés:

²²Tëkokyë mëti'ipë oytyunyën mëët yë pu'ts pujxn, poop pujxn, tsuxkpujxn, juunpujxn, ëtëyë pujxn ets yu'unk pujxn,

²³tëkokyë mëti'ipë myëtënaaytyääpyën yë jëën, nëjkxëp xyajtooywya'atstë jap jëënjoty, ok xypyujtëty mëët yë kënu'kxynyëë mëti'ipë winë yajtukkënu'kxpën. E mëti'ipë ka'ap tjëkyepy tyooywya'atsëty, kopkpëky nëjkx mëët yë nëë xypyujtë.

²⁴E kom wëxtujk xëëw jää nëjkx yë mwit xypyujtë ets wa'ats mwë'ëmtëty. Täänëm mtëkëtëty kajpnjoty.

²⁵Ënät ja Wintsën t'ënëmaay ja Moisés:

²⁶Mëët yë teety Eleazar ets ja'ayëty mëti'ipë nyikopk'ajtëpën yë myëku'ukëty, mëtyoowta'a yë ja'ay ets jëyujk, mëti'ipë të yajpëjkëtën yë Madián ja'ayëty.

²⁷Mäjtskpëky tu'knax xyajwa'kxëty, kujkwä'kxy xymyo'otëty ja ja'ayëty mëti'ipë ojts të tsyiptuntën ets kujkwä'kxy xymyo'otëty ja ja'ayëty mëti'ipë kajpnjoty të wyë'ëmtën.

²⁸Xytyukniwë'ëmtëpës ëjts näjyëtu'un ëpëky yë njä'ä: mëti'ipë yë tsiptuunpëtëjk tuka'ajëtëpën, yë ja'ayëty, jëyujkëty, tsajpkaajëty, kruktsëty, kupixynyëty. E tu'ukjaty nëjkx xywyinjuutë ja mëti'ipë të yajnikäjpxyën ma ja mëkoxk mëko'pxjatypyën.

²⁹Ets nëjkx xymyo'oy yë teety Eleazar, mëti'ipës yajtukmëyoxëpën.

³⁰E ja kujkwä'kxy mëti'ipë ja naax kajpn patëtëpën, jëtu'un tä ja'ayën, jëyujkën, tsajpkaajën, kruktsën, kupixynyën, tu'ukjaty xyjyëpëkëty winë ma ja wëxtyikxy majkjatypën. Ets ja Leví ja'ay jä'ä xymyo'otëty mëti'ipë jap tuunpën maas nwittëjkën.

³¹Moisés ets Eleazar ojts jëtu'un tuntë tä ënäty ja Wintsën të tyuk'ënä'ämëtën.

³²Tëkokyë mëti'ipë ojts ja mëtsiptëjk yajpëjkëtën, ëpëky ja mëti'ipë ojts ja tsiptuunpëtëjkëty kë'ëmwinma'any tpëjkpëtën, tä wyinë'ajty tëtujk mëko'px ja tëkë'px majkmokx mil ja kupixyny,

³³tëkë'px majkmäjtsk mil ja tsajpkaa,

³⁴tëkë'px tu'uk mil ja krukts,

³⁵ets i'px majkmäjtsk mil ja to'oxy'ëna'këty.

³⁶E paaty kujkwä'kxy ja mëti'ipë ojts ja tsiptuunpëtëjk nyikääkëtën, jä'ä ojts wyinë'aty ja kupixyny tëkëëk mëko'px ja i'px majkmokx mäjtsk mil.

³⁷E ja mëti'ipë ja Wintsën ojts yajmo'oyën, jä'ä wyinë'ajty tëtujk mëko'px ja tëkë'px majkmokx.

³⁸Ma ja i'px majkmokx tu'uk milpën ja tsajpkaa, jä'ä ja Wintsën ojts yajmo'oy tëkë'px mäjtsk ja tsajpkaa.

³⁹Ma ja i'px majk mil ja mëkoxk mëko'px ja kruktsën, jä'ä ja Wintsën ojts yajmo'oy tëkë'px tu'uk ja krukts.

⁴⁰E ma ja majkmokx tu'uk milpën ja to'oxy'ëna'këty, jä'ä ojts ja Tios yajmo'oy i'px majkmäjtsk.

⁴¹Moisés yë'ë kyë'ëmooytyääy ja teety Eleazar, tëkokyë winë mëti'ipë ja Wintsën yajmoopyën, jëtu'un tä ënäty ja Wintsën të tni'ënä'ämën.

⁴²Ja kujkwä'kxypyë mëti'ipë ja kajpn tuka'ajëtëpën, mëti'ipë ja Moisés të tyajwä'kxyën tu'knax mëët ja tsiptuunpëtëjk.

⁴³Näyjyëtu'un ojts yajmo'otë, tëkëëk mëko'px ja i'px majkmokx mäjtsk mil ja mëkoxk mëko'px ja kupixyny,

⁴⁴i'px majkmokx tu'uk mil ja tsajpkaa,

⁴⁵i'px majk mil ja mëkoxk mëko'px ja krukts,

⁴⁶ets majkmokx tu'uk mil ja to'oxy'ëna'k.

⁴⁷Ma ya'atë kujkwä'kxypyën, Moisés tu'ukjaty ojts tpujuuty ma ja wëxtyikxy myajkjatypyën, tä ja ja'ayëtyën ets ja jëyujkëty. Tää ja Moisés ojts tukkë'ëtëjkëtyä'äy ja Leví ja'ayëty, mëti'ipë ënäty jap tuuntëpën ma ja Tios ja wyittëjkën. Jä'ä ko jëtu'un ënäty ja Wintsën të tyuk'ëne'emyë.

⁴⁸Ënät ja ja'ayëty mëti'ipë nyikopk'ajtëpën ja tsiptuunpëtëjk tu'uk mil ets nitu'kmëko'pxpë, ojts tninëjkxtë ja Moisés.

⁴⁹Ets t'ënëmaaytyë: Tëës nmëtyoowta'atë ja tsiptuunpëtëjk mëti'ipës nyikopk'ajtëpën ets ka'ap nitu'uk tyëkoy'äty.

⁵⁰E tyaajës nmëmintë ya'atë pu'ts pujxn, mëti'ipës të npaatën jam tsipjotm. Pënëty të tpaaty yë kë'ëjän, kë'ëjiits, tatsktëy, yo'knantsëm ets wiinkëtypë mëti'ipë ja'ay nätyuk'oytyuunëpën. Yë Wintsënës yam nmooytyëp, mëti'ipës nätyukuyajkëtëpën.

⁵¹Ënät yë Moisés ets Eleazar t'ëxajëtyääytyë winë mëti'ipë oytyunyën mëët yë pu'ts pujxn.

⁵²Ja pu'ts pujxn mëti'ipë ojts ja ja'ayëty tyaktën, mëti'ipë nyikopk'ajtëpën ja tsiptuunpë tu'kmilpë ets tu'kmëko'pxpë. Jä'ä ojts ja pu'ts pujxn jye'emty'äty ko ojts yajkijpxy, naxy mëko'px ja majkta'px taxk tsim

⁵³Jä'ä ko ja tsiptuunpëtëjkëty nitu'ukjaty ojts winë tpëjkë ja myëtsip ets tmëmiintë.

⁵⁴Jëtu'un'äämpy yë Moisés ets Eleazar t'ëxajëtyë ya'atë pu'ts pujxn mëti'ipë myëmiintën yë tsiptuunpë wintsënëty ets ojts tmënëjkxtë ma ja wit tëjkën ma ja näpyaatë y'ityën mëët yë Tios. Jëtu'un'äämpy jyä'ämyätsëtëty ets kyëwent'atëtëty oy tyimjëna'ajëty.