Read Biblia Mixe de Quetzaltepec Números 4 Bible Online

Números 4 - Biblia Mixe de Quetzaltepec bible

Números 4

¹Ënät ja Tios ojts tmëkäjpxy ja Moisés ets ja Aarón ets t'ënëmaay:

²Yajpëtë'ëk tu'uk jaaymyujkën ma xykyëxja'ajëtyën yë xyëëwëty yë y'u'unk y'ëna'këty yë Quehat, mëti'ipë Leví ja'ayëtyën aakmëët yë y'u'unk tyo'oxytyëjkëty, y'u'unk y'ëna'këty,

³mëti'ipë jyëmëjtëtyën i'px majk ets wëxtyikxy majk jëmëjtpaat, mëti'ipë jyëkyäjptëpën tyuntëty jap ma ja wit tëjkën ma ja näpyaatë y'ityën mëët yë Tios.

⁴Yë tyuunkëty mëti'ipë tyuunk'atantëpën yë y'u'unkëty y'ëna'këty yë Quehat ëmaay yë oy ets yë'ë ya'atë.

⁵Ko ja naax kajpn tyu'utëkëtëty, yë Aarón mëët yë y'u'unk y'ëna'k yë'ë nëjkx tyajënaktë ja wit'atëëytyuk, mëti'ipë ja Tios ja wyittëjk mëët yajtuk'atëëytyukyën ma yajnitëkën ets yë'ë tuknipä'äntëty ja kaaxë mëti'ipë ja käjpxytyu'unën myë'ijtypyën.

⁶Ets ëpëky nëkëjxy tukniyä'äptëty yë po'o mëti'ipë oytyunyën, tääts tukniyä'äptëty näjyëtu'un yë ukywyit nëkëjxy, tääts ënät tukjëëptëty ja nyikepy mëti'ipë yajtukëëyë'ëkëpën.

⁷E ja kaaypyäjn ma jam winë yajkëxpëkyën, yë'ë nëjkx mëët yajtukwinyä'äpë tu'uk yë ukywyit ets nëkëjxy nëjkx tkëxpëjkta'atë ja texyëty, a'ukënëty, mëj jä'pnëty mutsk jä'pnëty, ja uukytsyu'tsëty ma ja tsatym nyëë yaj'apëkën, mëti'ipë tëë nyimaanaxyën ets näjyëtu'un ja tsajpkääky mëti'ipë yajyajkpën winjëpom.

⁸Ëpëky tuknipä'äntëty ja tsaptswit, e nëkëjxy nëjkx ëpëky tukniwijtstëpë yë po'o, mëti'ipë oytyunyën ets tpëjktakëtëty ja nyikepy mëti'ipë yajtukëëyë'ëkëpën ko muum yajmënëjkxa'anëty.

⁹E ja jëëntooytyakn yë'ë nëjkx tukniwitstë tu'uk ja ukywyit ets jap näjyëtu'un niwitsy y'itëty yë pujxnmä'tn, ayä'äptexy, kutë'kxn ets tëkokyë ja nyi'a'ukën ma yajpëjkta'aktën yë on.

¹⁰Tëkokyë ya'atë yë'ë nëjkx tukwinpitë yë po'o'ak mëti'ipë pejyëtyën ets ja nyikepy tpëjktakëtëty mëti'ipë muum tyukmënëjkxtëpën.

¹¹E ma ja wintsë'këntyaknën mëti'ipë pu'ts pujxn mëët y'oytyunyëtyën, yë'ë nëjkx tukniyä'äptë tu'uk yë ukywyit. Nëjkxëp xytyukwinpitë ëpëky yë po'o'ak mëti'ipë pëjyën ets xypyëjkta'aktëty yë nyikepy, mëti'ipë muum yajtukëëynyëjkxëpën.

¹²Ënät nëjkx tpëjkmujkta'atë jënu'un jap winë tyunyën ma ja Tios ja wyittëjkën ets tukwinpitëty yë ukywyit, ëpëky tukwinpitëty yë po'o'ak ets tpëjkta'aktëty ma kepyën mëti'ipë muum tyukmënëjkxtëpën.

¹³E ja wintsë'këntyakn ma ja teetytyëjkëty ijty ja jëyujk tyaj'ooktën, yajxon nëjkx tyajwa'atstë, nyëpujta'atëp ja on ets ja kuyjaam, tääts nëjkx xytyuknipä'äntë ja tsu'unk wit.

¹⁴E jam nëjkx tëkokyë tpëjktakta'atë jënu'un winë tyunyën ko tii wintsë'kën yajyäky, tä yë jëënpajk ka'pnën, mä'ätë'knën, jä'pnën, mëj a'ukënën; tëkokyë jënu'un winë tyuunta'ayën ma wintsë'këntyaknën. Tëkokyë ya'atë yë'ë nëjkx tukwinpitë yë po'o'ak ets tpëjktakëtëty ja nyikepy mëti'ipë muum tyukmënëjkxtëpën.

¹⁵Ko ja Aarón mëët ja myaank'ëna'k ënäty të twinpijta'atë tëkokyë winë mëti'ipë ëmaayëtyën ets jyëkyäjpnëp yajmëtu'utëkëty. Ënät nëjkx myintë ja Quehat ja y'u'unk y'ok, yë'ëts myënëjkxtëp jam ma ënäty jya'ta'antën. Këtii tëy nitii tontëty mëti'ipë ëmaayën këtiipë y'ooktëty, tëkokyë ya'atë apëjk atu'unën ets mëti'ipë jap tuunpën ma ja wit tëjkën ma ja näpyaatë y'ityën mëët yë Tios, yë Quehat yë y'u'unk y'ok yë'ë muum myënëjkxtëp.

¹⁶Yë Eleazar, yë myaank yë Aarón, yë'ë nëjkx tkëwentëpëky ja kutë'kxn ja nyi'on, ja poom mëti'ipë pa'kxu'kpën, ja aaypyajk ujtspajk mëti'ipës xymyo'otëpën ets ja on mëti'ipë winë mëët yajkënu'kxyën. Yë'ë nëjkx näjyëtu'un t'ixy tuny ja Tios ja wyittëjk ets näjyëtu'un jënu'un jap winëjaty yajpaatyën mëti'ipë ëmaayëtyën.

¹⁷Ënät yë Tios ojts tmëkäjpxy yë Moisés ets Aarón ets t'ënëmaay:

¹⁸Këtii xy'ëwa'atstëty nijëna'a ets Quehat yë myëkunaax myëkukajpn y'atëkoytyëty ma Leví ja'ayëtyën.

¹⁹Këtiipë y'ooktëty, ko toontëpëty ja mëti'ipë wa'ats ets kënu'kxy yajpatëpën, mëti'ipë tëy tyuntëp. Yë Aarón mëët yë myaank ëna'k yë'ë mëpaat tuk'ëwaanëtë tii tyuntëpën ets mëti'ipë myënëjkxtëpën ko ënäty muum nyëjkxtë.

²⁰Këtiipë jap xëmë tyëkëtëty tsajptëkoty ets t'ixtëty ja mëti'ipë wa'atsën ets kënu'kxyën ets jëtu'un ka'ap y'ooktëty.

²¹Ënät ja Tios ojts tmëkäjpxy ja Moisés ets t'ënëmaay:

²²Yajpëtë'ëk tu'uk yë jaaymyujkën ma xykyëxja'ajëtyën yë ja'ayxyëëw tu'kjëëky tu'kmëku'ukëty, tu'k'u'unk tu'k'ëna'këty, ma y'u'unk y'okën yë Guersón.

²³Mëti'ipë jyëmëjtëtyën i'px majk ets wëxtyikxy majk jëmëjt, mëti'ipë jyëkyäptëpën jap tyuntëty ma ja wit tëjkën ma näpyaatë y'ityën mëët yë Tios.

²⁴Tyaapë jëtu'un nëjkx tuunk'atë yë Guersón yë y'u'unk y'ok:

²⁵Yë'ë nëjkx tmënëjkxtë ja wit'atëëytyuk, mëti'ipë tuunpën ma ja Tios ja wyittëjkën, ja wit tëjk ma ja näpyaatë y'ityën mëët yë Tios ets ja po'o'ak mëti'ipë nyipëk'ajtypyën ja tëjk ets ja wit'atëëytyuk mëti'ipë yajtuk'atëëytyujkpën ja najxtakn. Jä'ä ja najxtakn jampë jyä'tyën ma ja wit tëjkën ma näpyaatë y'ityën mëët yë Tios.

²⁶Ja wit'atëëytyuk mëti'ipë nyatëy'äjtypyën ja tëja'aw, ja wit'atëëytyuk mëti'ipë y'atëëytyujkypyën ja tëjkëtyakn, mëti'ipë ja'ajtpën ma tëja'awën. Ja tëja'aw mëti'ipë na'ëwtity yajpatpën ma ja Tios ja wyittëjkën ets ja wintsë'këntyakn, ja nyitejpxyëty mëti'ipë mëët yajtuktsuumë'ëktën ets tëkokyë jënu'un mëët tyunyën ets mëti'ipë jap yajpatpën.

²⁷Yë Aarón mëët yë myaank yë'ë nëjkx tuk'ëwaanëtë yë Guersón yë y'u'unk y'ok tii mëpaat tuntën ets tii mëpaat tmënëjkxtën.

²⁸Ya'atë tuunk nëjkx tyajtu'uye'eytyë yë ja'ayëty jënu'un tyu'kunaax'at tyu'kukajpn'atën, mëti'ipë y'u'unk'ajtyp y'ok'ajtypyën yë Guersón jap ma ja wit tëjkën, ma ja näpyaatë y'ityën mëët yë Tios, mëti'ipë nëjkx twintsën'atën yë Itamar, yë Aarón yë myaank.

²⁹Yajpëtë'ëk näjyëtu'un tu'uk yë jaaymyujkën ma y'u'unk y'okën yë Merarí, tu'ukjaty aakmëët yë y'u'unk tyo'oxytyëjk.

³⁰Yë nëjkx xyjyääypyëtsimy ja ye'etyëjktëjk pënjaty ja xyëëw jyëmëjtën i'px majk ets wëxtyikxy majk jëmëjtpaat ets jyëkyäptëp tyuntëty jap ma ja wit tëjkën ma ja näpyaatë y'ityën mëët yë Tios.

³¹Ja tyuunkëty mëti'ipë ënäty yë'ë tuka'ajëtëpën ma yajmëtsoona'anyën winë mëti'ipë yajpatpën ma ja wit tëjkën, ma näpyaatë y'ityën mëët yë Tios. Yë'ë nëjkx tmënëjkxtë ja kepyjyiity mëti'ipë jap tuunpën tsajptëkoty, ja kepy mëti'ipë winë mëët yajjëëpyën ets yajtukëëyi'ikyën ets ja xeny mëët ja nyi'ëjx.

³²Ja xeny mëti'ipë nyikupë'ajtëpën ja tëja'aw, mëti'ipë na'ëwtity yajpatëpën ma tsajptëjkën mëët ja nyi'ëjx, nyipa'tkonë, nyikupë nyitejpxy ets tëkokyë jënu'un mëët tyunyën. Mijts nëjkx kë'ëm xy'ënëëmë tii mëpaat tmënëjkxtën.

³³Ya'atë tuunk jëtu'un myëët'atëp ja ja'ayëty mëti'ipë ënäty të tyuka'ajëtën ets tyajpëtë'ëktëty ja wit tëjk ma ja näpyaatë y'ityën mëët yë Tios, mëti'ipë y'u'unk'ajtyp y'ok'ajtypyën yë Merarí ets yë'ë nëjkx twintsën'atë yë Itamar, yë myaank yë teety Aarón.

³⁴Yë Moisés mëët yë Aarón ets ja ja'ayëty mëti'ipë mëj'äämpy ijtëpën ma ja naax kajpnëtyën ojts ja jaaymyujkën tjantyyajpëtë'ëktë, tu'ukjaty ja ja'ayëty aakmëët ja y'u'unk tyo'oxytyëjk ets ja jyä'äyëty ma ja Quehat ja y'u'unk y'okën.

³⁵Mëti'ipë ënäty ja jyëmëjtëtyën i'px majk ets wëxtyikxy majk jëmëjtpaat ets jyëkyäjptëp jap tyuntëty ma ja wit tëjkën ma ja näpyaatë y'ityën mëët yë Tios.

³⁶Jä'ä nyiwinë'ajtë ja ye'etyëjk mäjtsk mil ja wëxtujk mëko'px ja wëxtyikxy majk.

³⁷Jëtu'un ojts yajjaaypyëtsëmtë ja ja'ayëty mëti'ipë ënäty tunantëpën ma ja wit tëjkën ma ja näpyaatë y'ityën mëët yë Tios, ma ja jaaymyujkën mëti'ipë ojts ja Moisés ets Aarón tyajpëtë'ëktën, tä ënäty ja Tios të tni'ënä'ämën.

³⁸Yë y'u'unk y'ok yë Guersón aakmëët yë y'u'unk tyo'oxytyëjk ets jyä'äyëty,

³⁹mëti'ipë ënäty ja jyëmëjtëtyën i'px majk ets wëxtyikxy jyëmëjt ets jyëkyäjpnëtëp jap tyuntëty ma ja wit tëjkën ma ja näpyaatë y'ityën mëët yë Tios.

⁴⁰Jä'ä nyiwinë'ajtë mäjtsk mil ja tëtujk mëko'px ja i'px majk.

⁴¹Jëtu'un ojts nyimay'atë ja ye'etyëjktëjk ma ja Guersón ja y'u'unk y'okën, mëti'ipë jyëkyäptëpën tyuntëty ma ja wit tëjkën ma ja näpyaatë y'ityën mëët ja Tios, mëti'ipë ojts ja nyijaaymyujkën pyëtë'ëktën, mëti'ipë ja Moisés ets ja Aarón tyuunk'ajtën jëtu'un tä ënäty ja Tios të tyuk'ënä'ämëtën.

⁴²Ja y'u'unk y'ok ja Merarí tu'ukjaty aakmëët ja y'u'unk tyo'oxytyëjk ets ja jyä'äyëty.

⁴³Mëti'ipë ënäty ja jyëmëjtëtyën i'px majk ets wëxtyikxy majk jëmëjt ets jyëkyäjpnëtëp tyuntëty jap ma ja wit tëjkën ma ja näpyaatë y'ityën mëët yë Tios.

⁴⁴Jä'ä nyiwinë'ajtë tëkëëk mil ja mäjtsk mëko'px.

⁴⁵Jëtu'un ojts nyimay'atë ja Merarí ja y'u'unk y'ok, mëti'ipë jyëkyäjptëpën jap tyuntëty ma ja wit tëjkën ma ja näpyaatë y'ityën mëët yë Tios. Jëtu'un jap myiny ma ja jaaymyujkën mëti'ipë ja Moisés yajpëtë'ktën mëët yë Aarón, ko ojts jëtu'un ja Tios tyuk'ënä'ämëtë.

⁴⁶Jap ma jaaymyujkën mëti'ipë ja Moisés mëët yë Aarón yajpëtë'kën, jä'ä jap tnikäjpxy nyimay'atë yë Leví ja'ayëty mëët tëkokyë yë y'u'unk y'ëna'këty, y'u'unk tyo'oxytyëjkëty,

⁴⁷mëti'ipë ja jyëmëjtëtyën i'px majk ets wëxtyikxy majk ets jyëkyäjptëp tyuntëty ma ja wit tëjkën ma ja näpyaatë y'ityën mëët yë Tios.

⁴⁸Jä'ä nyiwinë'ajtë tuktujk mil ja mëkoxk mëko'px ja majkta'px.

⁴⁹Ya'atë jaaymyujkën jëtu'un ojts pyëti'iky tä ënäty yë Tios të tuk'ëne'emyën yë Moisés. Tu'uktu'uk ja ja'ayëty ojts yajtuk'ëwa'anëtya'atë tii mëpaat tuntën ets tii mëpaat tpapëktën, jëtu'un tä ja Wintsën ënäty të tuk'ëne'emyën ja Moisés.