Read Biblia Mixe de Quetzaltepec Números 9 Bible Online

Números 9 - Biblia Mixe de Quetzaltepec bible

Números 9

¹Kom jëmëjt ma ënäty yë Israel ja'ayëty të tsyoontën jap Egiptë, ma y'änyën yë mëtu'kpo'opë. Ko jëmëjt tsyo'ontä'äky, jää ojts yë Tios tmëkäjpxy yë Moisés jam kopkkëjxm ma txëëwatyën Sinaí ets t'ënëmaay:

²Yë Israel ja'ayëty jää mëpaat nixëëwtuntë yë ëmaayxyëëw,

³ma myajkmajkts'anyën ya'atë po'o, jënäkxyëëw, jëtu'un mëpaat xytyuntë tääjës të ni'ënä'ämën.

⁴Paaty ojts ja Moisés tni'ënä'ämë ets ja Israel ja'ayëty tuntëty ja ëmaayxyëëw.

⁵Yë'ëjëty ojts jëtu'un tjanty xyëëwtuntë ja ëmaayxyëëw ma ja po'o myajkmajkts'anyën jënäkxyëëw, jam wintë'ëtstum ma txëëwatyën ja kopk Sinaí. Jëtu'un ojts mëtëy tuntë tä ënäty ja Moisés ja Tios të tyuk'ëne'emyën.

⁶E tam ënäty ja ja'ayëty mëti'ipë ëxëëkëtyën, mëët ko të tontë ja o'kpë ka'ap tjëkyejpy tuntëty ja ëmaayxyëëw; ënät ojts tninëjkxtë ja Moisés ets ja Aarón jä'ä xëëw,

⁷ets t'ënëmaaytyë: Tëës ntontë yë o'kpë, paaty ëxëëk nyajpaatës. E yë'ë ëëts nyajtëwantëp: ¿Tii këtii ënät tjëkyäpëty nyaktëtyës ja n'ayajk n'ako'onën ma Wintsën yajnixëëwtunyën tä ja wiinkëtypë ja Israel ja'ayëtyënë?

⁸Ënät ja Moisés y'ëtsoowëtë: M'ëwxitëp ënät. Tyamës yë Tios n'ëkyajtëwëty wi'ix y'ëtsoy ets miits ntuk'ëwaanëtëty.

⁹Ënät ja Tios ojts tmëkäjpxy ja Moisés ets t'ënëmaay: Jëtu'un xy'ënëëmëty yë Israel ja'ayëty:

¹⁰tëkokyë miitsëty ets näjyëtu'un yë m'u'unk m'ëna'këty, kopkpëky ko xynyixëëwtuntëty yë ëmaayxyëëw maas ëjts xymyëjjawëtëtyën. E ja mëti'ipë ëxëëk yajpatëpën, mëët ko ënäty ja o'kpë të tontë, ëkë mëti'ipë jam muum jëtijtëpën,

¹¹jä'ä nëjkx txëëwtuntë ja ëmaayxyëëw ko myajkmajkts'anëty ja mëmäjtskpo'opë, ma jyënäkxyëëw'atyën. Ja kupixyny mëti'ipë të tyaj'ooktën, yë'ë mëët tukkaytyëty yë ujts ta'ampë ets ja tsajpkääky ka'apë tsyooymyëëtëtyën.

¹²Ni xykyayajwë'ëmtëty ma ja komjëpompën. Ja pajk këtii jëtu'unyë muum xynyaska'atsëtëty ets ni xykyatëjtëty. Ja ëmaayxyëëw jëtu'un xynyixëëwtuntëty tääjës të ni'ënä'ämën.

¹³E pën ka'ap tmëjjawë yë ëmaayxyëëw ets ka'ap maa të nyijkxy ets jyanija'ap ko mëpaat tnixëëwtuny ja ëmaayxyëëw, kopkpëky ko nëjkx yajjo'otsy ma myëkunaax myëkukajpnën ets näjyëtu'un pën ka'ap të tyäky ja ayajk ako'onën ma ja Tiosën mëti'ipë paat'ajtëpën ma tnixëëwëtyën, nëjkxëp näjyëtu'un tkumëtoy.

¹⁴Ja jaaypyaat jaaypyo'kxyëty mëti'ipë tsënaaytyëpën ma ja mnaax mkajpnëtyën, kopkpëky ko näjyëtu'un tmëjjawëtëty yë ëmaayxyëëw maas ëjts ja nxëëw mëj nyäxyën, jëtu'un tääjës të ni'ënä'ämën. Ja ënä'ämën mëti'ipës të nyajwë'ëmyën, tunëp näjyëtu'un ma jaaypyaat jaaypyo'kxëtyën ets ma kunaax kukajpnëtyën.

¹⁵Jä'ä xëëw ma ojts tkojtën ja Tios ja jyëën tyëjk, ja wit tëjk mëti'ipë myë'ijtypyën ja käjpxytyu'unën. Ënät ojts jam nyäpyëjktä'äkyë ja yoots tëjknëkëjxy ets jëtu'un tyim xëëwnajxy. E ko tsyu'ujënë jëtu'un yaj'ijxy tä jëënën ets jëtu'un ojts tyimkuxëënyë.

¹⁶Jëtu'un ënäty xëmë yaj'ixy ko xyiiny'äty tä tu'uk yë yootsën. E ko kyoots'aty tä tu'uk yë jëënën.

¹⁷Ko ja yoots ijty pyëti'iky ja Israel ja'ayëty ënätyë ijty tsyoontë. E ma ja yoots ënäty nyäpyëjktä'äkyën, ja Israel ja'ayëty jam tsyënaaytyaknpëktë.

¹⁸Ko ja Tios ijty y'ënë'ëmxëtë ets tsyoontëty, yë Israel ja'ayëty ënätyë ijty tsyoontë. Ëkë ko ijty yë'ë tuknipëjktaakë ets muum tsyënaaytyaknpëktëty. Jam ijty tsyënaaytyaknpëktë. Ets jam pyo'oxtë tä ënäty ja yoots jam pyo'oxyën tëjknëkëjxy ma ja Tios ja wyittëjkën.

¹⁹Pën ja yoots poxp jam ma ja Tios ja wyittëjkën, ja Israel ja'ayëty näjyëtu'un jam jeky y'itë. Jëtu'un'äämpy jä'ä tuntë mëti'ipë ja Tios tuk'ënä'ämëtëpën.

²⁰E pën ja yoots je'eyë jam mäjtsk tëkëëk xëëwë y'ity tëjknëkëjxm ma ja Tios ja jyëën tyëjkën. Ko ja Wintsën ënäty y'ënä'ämëtë ets tsyoontëty, ënät tsyoontë; e ko ja Wintsën ënäty y'ënä'ämëtë ets wyë'ëmtëty, ënät wyë'ëmtë.

²¹Jëna'ajëty ja yoots je'eyë tsyuunaxy, komjëpom tä pyëtë'kojnë. E ja Israel ja'ayëty ënätyë tyu'upëktë. Näyjyëtu'un jëna'ajëty je'eyë xyëëwnaxy, ko kyootsënyë tääts pyëtë'kojnë, e ja Israel ja'ayëty näjyëtu'un ënätyë tsyo'onta'atë.

²²Pën ja yoots ijtp jam tëjknëkëjxm ma ja Tios ja wyittëjkën kanaak xëëw, tu'kpo'o, ëkë tu'kjëmëjt, ja Israel ja'ayëty jëtu'un tna'itë ets ka'ap maa nyëjkxtë. E ko ja yoots jam pyëti'iky, ënätyë ijty tsyo'onta'atë.

²³Ja Wintsën ënäty nyi'ënä'ämëp ets muum tsyënaaytyaknpëktëty ets Wintsën nyi'ënä'ämëp ets tyu'uye'eytyëty. Jëtu'un ijty winë tuntë tä ja Wintsën tni'ënä'ämën mëti'ipë ja Moisés nyikäjpxypën.