Read Biblia Mixe de Quetzaltepec Miqueas 1 Bible Online

Miqueas 1 - Biblia Mixe de Quetzaltepec bible

Miqueas 1

¹Ya'atë aaw'ajtp ayuk'ajtp, mëti'ipë ojts yë Wintsën tuknikexyën yë Miqueas mëti'ipë jam Moréset kukajpn'ajtpën ets mëti'ipë ojts tuknijawën kuma'ayjoty wi'ix jyata'any kyëpäta'anyën yë Samaria kajpn ets Jerusalén kajpn, ma ënäty yajkutuktë ja Jotam, Ahaz ets Ezequías jam Judá.

²Ni'ëmukë yë naax kajpn, mëtoow'itë ya'atë; ninu'un yë ja'ay tsyëënëtën ma wiinkëtypë naax kajpnën, mëmay mëtajtë ya'atë: Yë Wintsën, yë'ë mtukwinmëtowanëp ja mtëko'oyën jam ma wa'atspë tsyajptëjkën.

³Tsoonaanp yë Wintsën jam ma y'ityën ets ye'epy myina'any jam tunkëjxm kopkkëjxm.

⁴Jëtu'un yë tun kopk jyiiywya'kxa'any ma tyekpya'tkën tä yë cerë jyiiywyä'kxyën ko yajjëënkupëky ets joy it jëtu'un mäjtskpëky wya'kxa'any tä jeexyë mëj komnëë të nyäwyä'kxyën.

⁵Tëkokyë ya'atë ëyo'on mëti'ipë tunan jatanëpën yë'ëkyëjxm jëtu'un jyata'any ko yë Jacob yë y'u'unk y'ok je'eyë kyäjpxykyumëtoownaxtë, mëët ko ja nëë poky të tmëtëkëtë ja Israel ja kyutujkën. ¿Ma jëtää ënät ja Jacob mëti'ipë käjpxy kyumëtoownajxpën? Tam ja Samaria. ¿Ma jëtää ënät ja wyintsë'këntyaknëty ja Judá ja'ayëty ma t'ëwtatën ja ka'apë tiosëtyën? Näy jam ja Jerusalén.

⁶Paaty yë Wintsën y'ënä'äny: Kujy jityës yë jëën tëjk nyaj'awinpita'any jam Samaria ets tä yë kam tu'ujën winwa'atspë ma yajkojëtyën yë tsatym. Jamës yë tsaa nko'owtëwa'any joyjotm mëti'ipë jamën kajpnjotm ets yaj'ixëty wi'ix kyëxë'ëkyën ja potsy ëjx.

⁷Wa'ats pyu'utakta'aja'any yë y'awinaxëty ets tsyooytyëkoyä'äny yë kyepy'apujxtukyëty mëti'ipë kyënu'kxyja'awëtyëpën. Jä'ä ko yë wit meeny mëti'ipë myëët'ajtëpën yë'ë to'oxytyëjktëjkëty të tnituntë mëti'ipë jyot nyini'kx tyo'ktëpën yajktëpën, yë'ë jatëkok nmo'ojäämpyës yë to'oxytyëjkëty mëti'ipë jyot nyini'kx tyo'ktëpën.

⁸Paatyës nya'axa'any mon tuk; tekywya'atsës njëtita'any, koos nya'axëty jëtu'un yajmëtowa'any wax yowë yaxp ëkë jëtu'un tä yë pakëtsey yä'äxyën.

⁹Jä'ä ko yë Samaria tsyëtyut ka'ap tsyo'oka'any: Jampaat të jyä'ty Judá ets Samaria, ma yajpaatyën yë nkajpnës.

¹⁰Këtii ya'atë aaw ayuk xytyuk'ëwaanëtëty yë Gad ja'ayëty; këtii mtëkëtëty yaxpë. Mëyäts mëpojtë yë mpëjkënëty m'ijxënëty jam naaxwayjotm ma Bet-le-afran y'itjotmën.

¹¹Miitsëty Zafir ja'ayëty, nëjkxta'atë tsumy matsy wiink naax wiink kajpn niwa'ats ëxwa'ats ets wintsëtyu'un jëjptsëtyu'un. Mëti'ipë jam tsënaaytyëpën Zaanán ka'ap nëjkx tsyoontë. Tam'ajtp ja jë'ëyëm yaxën Bet-ésel, e miitsëty ka'ap xypyaata'antë ja näypyutëkë ma yë'ëjëtyën.

¹²Mëti'ipë ja'ay jam tsënaaytyëpën Marot yajxon nyäwyi't nyäxya'tsënëtë yë'ë jyatsojktëp ets jeexyë myony yë pyëjkënëty y'ijxënëty, jä'ä ko yë Wintsën tëë tuknipëjktaakë ets ja ëyo'on jam kyëta'akëty ma Jerusalén kajpnën.

¹³Miitsëty Laquis ja'ayëty, mëti'ipë je'eyë të kyäjpxykyumëtoownaxtën tä yë Israel ja'ayëtyën, mëti'ipë ojts ëxëëk tyajjat tyajkëpätën ja Sión kajpn, ko tuk'ixtsumëtë yë mkëwaayëty yë kepy wintëkäämpë.

¹⁴Näyjyëkajpxëtë jam ma Moréset-gad kajpnën ets m'ëna'antëty ko ka'ap m'ëk winpitanëtë. Yë Aczib kajpn yë'ë nëjkx tyaj'anäp tyaj'atä'pxë yë Israel yajkutujkpëtëjk.

¹⁵Jëtu'un yë Wintsën y'ënä'äny: Miitsëty Maresá ja'ayëty, ntuknikäxantëp jatëkok tu'uk yë ja'ay mëti'ipë nëjkx mëmëta'akëtën, ja ja'ay mëti'ipë ënäty ja Israel kajpn mëj'äämpy jyëkyejpyën yë'ëpaat je'eyë nëjkx jyaak näyyu'utsyë jam Aankjotm ma Adulam y'itjotmën.

¹⁶E mijts Sión kajpn, nëkä'pta'a yë mkuwaay ets xyaj'ixëtëty ko ëxëëk mjaty mkëpety, mëët ko të m'ëxëëktunyë yë m'u'unk m'ëna'k mëkpë xytsyokyën. Jëtu'un mnäkyukääpëtëty tä majkwejkxyën, jä'ä ko yë m'u'unk m'ëna'k wiink naax wiink kajpn tsumy matsy yajmënëjkxa'antë.