Read Biblia Mixe de Quetzaltepec Nahúm 3 Bible Online

Nahúm 3 - Biblia Mixe de Quetzaltepec bible

Nahúm 3

¹Mon tuk myajpaaty mijts naax kajpn ko ëxëëk m'ëtë'ëtstë; mëti'ipë je'eyë win'ë'ëntëpën ets tsiptuuntëpën; ka'ap jyëjpkëxy ja m'ëxëëk'ajtën.

²Xuxp yajmëtoy yë wojpn, amuup yajmëtoy yë wintëkäämpë. Kwaayën yajmëtoy pyëkaxy, pujxn wintëkäämpën yajmëtoy pyëyi'iky.

³Nëkooyë myiinëtë këwaaytyuk'ënyääpyë. Je'eyë y'atë'kx y'ajajnë tyiypyujxnëty ets kyu'umënëty. Yajxon ja'ay may tsyëtyujnëtë ets may y'o'knëtë. Xii yaa aak o'kpë yaj'ijxnëp. Aakyë'ë ja'ay y'anäjpënëp o'kpë.

⁴Ets yë'ë poky myëët'ajtëp yë to'oxytyëjkëty mëti'ipë jyot nyini'kx tyo'ktëpën, ja to'oxytyëjk oypyë yaj'ixyën ets tsujpë kyëxë'ëkyën, mëti'ipë nyiwintaj'ajtypyën ja patooy panajxën, mëti'ipë ëxëëk ja naax kajpn të tyaj'ëtë'ëtsyën ko të tpatoy tpanaxy.

⁵Yë Wintsën mëti'ipë maaytyääyëpën winë jëtu'un y'ënä'äny: Tyaajës nyajpaaty ets mijts ëxëëk ntuna'any: Yë'ëjës yam yë m'ëxmuk nyujkwitsäämpy jampaat ma mwiin mjëjpën ets ja'ayëty mëti'ipë wiink naax wiink kajpn tso'ontëpën ëxwa'ats m'ixku'ixëtëty ets mtsëtyu'unpaatëty ma ja yajkutujkpëtëjkën.

⁶Ets të'ëny ntukujäjtë'ëkäämypy: Ëxëëk nyajata'any ets je'eyë myajnëxi'ik myajtukxi'ikëty.

⁷Pënjaty ënäty m'ijxëpën je'eyë mkukä'äka'anyë ets y'ëna'ana'any: Tëë yë Nínive kajpn kyutëkoy. ¿Pën pa'ëyowanëp? ¿Ma n'ëkpatmëty yë ja'ay mëti'ipë yajjotkujkta'akëtëpën?

⁸¿Wä'än jëtää mijts ni'ik mtimmyëjëtyë këtiinëm jyëtu'unëty yë Tebas kajpnë, mëti'ipë yajpatpën winkon ma Nilë mëjnëëjën, mëti'ipë mëjnëë nanajxëpën ets yë'ë majts'ijtëpë?

⁹Yë Etiopíë ets Egiptë jëtu'un ijty mjëkyejpyë tä yë naax kajpnën ta'tspëkpyë ets kuwa'anypë; yë Fut ja'ayëty ets Libië ja'ayëty yë'ë ijty mëët tu'ukyë mnäyaj'ityë.

¹⁰E yë Tebas kajpn ojts tsumy matsy wiink naax wiink kajpn yajmënëjkxnë; yë y'u'unk y'ëna'këty jam yajmëjjëpijptaaytyë ma potsy tyäkyën; mëti'ipë ënäty wyintsën'ajtypyën je'eyë ojts yaj'ijxpëtsëëmnëtë ets tsyiptuunpëtëjk aak kë'ëtsumy ojts yajmënëjkxnëtë mëët yë pujxn jo'oky.

¹¹Näyjyëtu'un mijts, nëjkxëp myaj'a'uukë ets muktëkoyëtëty; tsuu poj nëjkx mnäyu'utsyë, jam xy'ixta'aja'any yë tsoktakn ma mmëtsipën.

¹²Tëkokyë yë mkëwent'ajtakn jëtu'un yajpaaty tä tu'uk yë higo kepyën mëti'ipë tyëëmën u'unkjatyëty ets ko yajwinxity poj'am nyëka'ata'ay ets jap kyuka'ajë y'aawjoty ma mëti'ipë jë'kxanëpën.

¹³Yë mtsiptuunpëtëjk jëtu'un yaj'ixy aak to'oxytyëjk yowë; ma kajpn yajnitëkën ëwa'ats yajpaaty oy yë mëtsip jap tyëkëjanëtëty; jä'ä ko yë nyi'akaj tëë nyëtooytyä'äy mëët yë jëën.

¹⁴Kom yë nëë xyajnikoompätëty ets xymyëmëta'akëty yë jëën; may pëjkta'ak yë ja'ay mëti'ipë kuwa'anëpën. Jap mo'ontsjoty tëkë, tuktään yë mo'onts, këëyë'ëk yë kepy mëti'ipë yë muutsy mtukyajkojpyën.

¹⁵Tääts jam mnitoyëty ets kupuxy mjaak ookëty. Jëtu'un mnimayëty tä mu'u ets tä pujtpë myäyëtyën.

¹⁶Yë mjuupyë mto'kpë nëkooyë të nyimayënëtë tä mëtsa'ajën tsajpkëjxmëpë. Yë mu'u je'eyë nyäjyi'tstëkatsyë ets kyääkë'ëky.

¹⁷Yë mkëwent'ajtpë jëtu'un yë'ëjëty tä mu'ujën; mëti'ipë yajmujktëpën yë tsiptuunpëtëjk jëtu'un yaj'ixtë yëmën: Ko tyityky'äty jam kyëxkäkta'atë potsywinm; ko xëëw pyëtsimy tääts jam tsyo'onta'atë, ka'ap yajnijawëtë maa nyëjkxtë.

¹⁸Nëkooyë myaanëtë mëti'ipë myajkupixyny kyëwent'ajtypyën, mijts Asiria yajkutujkpë mijts n'ënëmääpy. Yë mtsiptuunpë wintsëntëjk tam tyam pyo'kxtë, yë mtsiptuunpëtëjk yë'ë jam jëtijtëp kopkkëjxm tä jeexyë ka'ap tmëët'atën pën yajtu'ukmukëtëpën.

¹⁹Ka'ap tii tsooy mëti'ipë myajtso'okëtëpën; yë mpu'uts ka'ap maa nyitsooy. Mëti'ipë nyija'awëtëpën ko ëxëëk mjajnë mkëpäjnë yajxon xyoontaknëtë, jä'ä ko yë'ë jyä'ämyäjtstëp wi'ix ojts ëxëëk xytyunyën.