Read Biblia Mixe de Quetzaltepec Habacuc 2 Bible Online

Habacuc 2 - Biblia Mixe de Quetzaltepec bible

Habacuc 2

¹Jëjp'ixyës ntimy'ita'any ets ixaamp tunäämpës yam, jëtu'un tä yë këwent'ajtpë jam kyu'ijxnaxyën ma potsyën ets nijawëja'anyës wi'ixës yë Wintsën xy'ënëëmë ets wi'ixës xy'ëtsoowinpity koos ntuknijawëty yë njotmayës.

²Tëës yë Wintsën xy'ëtsoy ets të xy'ënëëmës: Jam këxjaaytya'a mëti'ipë yam ntuk'ënëëmëjäämpyën ma naaxmajën tëëpë tyëkäjkë'ëkyën ets jyëkyäpëp yajwinpakajpxëty.

³Ka'anëm tpaaty ja nyixëëw ets y'atëwëty ya'atë wiinkëma'ay; yë'ë koonëm yë y'atëwa'any. Mijts ëwxit oy pyo'oxëty, jä'ä ko jää y'atëwa'any ko ënäty yajxon të tpaaty ja nyixëëw.

⁴Jëtu'un xykyëxja'ajëty, ko yë ëxëëkja'aytyëjk amëj akëjxm nyäyjyawëtë e yë wa'ats ja'aytyëjk juuky wyë'ëma'antë ets juuky'atantëp mëët ko Tios oy tmëtuntë.

⁵Yë ja'ayëty mëti'ipë nämyëjja'aw näjyääntyjya'awëtëpën yë'ë tyäty tsyojkën'ajtëp wi'ix y'ënä'ämtëtyën; yajxon tjanty xy'ixta'atë ets ka'ap pyo'kxtë, ni'ikyë tpa'o'kta'aktë, oy tjanijawëtë ko ëxëëk ja'ay tmëjaty tmëkëpety yë kutujkën ets ënä'ämën. Jëtu'un yë y'aaw tyajwa'kxtë o'kpëjutën; jëtu'un ka'ap kyu'uxëtë tä o'kënën, paaty tpajëtitë ja naax kajpn ets tjä'äniwa'ana'antë.

⁶E ja naax kajpn mëti'ipë të yajmëmëta'aktën nëjkxëp tnëxi'ik tukxi'iktë ja kajpn mëti'ipë ënäty të myëmëta'akëtën ets jëtu'un nëjkx tkuuy'ëwtë: Mon tuk mijts myajpaaty ko mnäyajkumeenytyä'äkyë mëët mëti'ipë ka'ap xyjyä'äjëtyën. ¿Jëna'apaat xynyipëjkpäta'any ja wit meeny mëti'ipë nu'kx m'amëtoowën?

⁷Ma ënäty ka'ap tii xymyäy xytsyäjyën jää nëjkx jya'të ja mëti'ipë ënäty mënu'kxy'äjtypyën ets mnipëtë'ëkanëp ja mëti'ipë myaj'ëyoowëpën ets mpëjkëtya'aja'anyë mëti'ipë mmëët'ajtypyën.

⁸Nëjkxëp yë naax kajpn nyäkyäjpxyë ets myajnimay myajnitajë wi'ix ëxëëk myajtunëtyën, näjyëtu'un nëjkx myajmä'tsta'ay tä ënäty të meetsyën. Nëjkxëp myajtukëpäjta'ay jënu'un ënäty ja'ay të xyaj'ookyën ets wi'ix ënäty ëxëëk të m'ëtë'ëtsyën ma ja naax kajpnën ets ma ja ja'ayëtyën mëti'ipë ënäty jam tsënaaytyëpën ma naax kajpnën.

⁹Janty mon janty tuk mijts myajpaaty, ko ja mjëën mtëjk të xyaj'uty mëët yë mëti'ipë të xymyeetsyën ets mjanäyajtso'oka'anyë ma atsë'ëkëtuuy m'ityën.

¹⁰Tääts jëtu'un tpaaty ijxtëm jeexyë ja mjëën mtëjk të xyajnitujkta'ayën mëët ja tsëtyu'un ets kë'ëm të myajkutëkoyë ko wiinkëtypë naax kajpn të xyajkutëkoy.

¹¹Yë'ëpaat yë tsaa mëti'ipë yajtukpojtspën ets witsë kepy nëjkxëp mtukyä'äxy mtukjokyë.

¹²Janty mon janty tuk mijts myajpaaty jä'ä ko yë'ë mëët ja mnaax mkajpn të xykyojy ja ëxëëkajtën ets ma ka'ap tii mëtëy të xypyaye'eyën.

¹³Yë Wintsën mëti'ipë maaytyääyëpën winë ka'ap tmëjpëjkta'aka'any yë mtuunk ets oy jënu'un tii të xyjyayajnimëjaawtä'äky, jä'ä ko nitooytya'ajaanp ja mëti'ipë të xyapëjktä'äkyën.

¹⁴Ets nëjkx ja naaxwiinyëtë tyuktujkta'ay mëët ja Wintsën ja myëj'ajt y'oyajtën, jëtu'un tä yë mëjnëë kyomyën.

¹⁵Janty mon janty tuk mijts myajpaaty, jä'ä ko yë'ë mtuk'a'ukëp yë mëj jëën mëtëjk yë nëë mëti'ipë xëpinyën mëët yë tsooy mëti'ipë yajwinma'anytyëkoopyën ets xynyëxi'ika'any xytyukxi'ika'any ko ënäty niwa'ats ëxwa'ats yajpaaty.

¹⁶Jëtu'un tä jeexyë mëj'äämpy mnaxyën, ni'ikyë nëjkx wintsëtyu'un jëjptsëtyu'un mjajnë, jä'ä ko yë Wintsën jëtu'un mtuna'anyë tä jeexyë tii ta'am myajtuk'uukyën ets ënät mwinma'any tyëkoyëty ets niwa'ats ëxwa'ats mjëtijnëty, jëtu'unts ja mmëj'ajt m'oyajtën nëjkx jaamteeny naaxteeny jyajnë.

¹⁷Jëtu'un tä ëxëëk të xytyunyën yë Líbano ja'ayëty nëjkxëp näjyëtu'un ëxëëk mjaty mkëpety ets nëjkxëp mtsë'ëkë ko ënäty ja jëyujk të xyaj'ooky. Yë'ë nëjkx jëtu'unpë ëyo'on xypyääty ko ënäty ëxëëk të m'ëtë'ëtsy ets ko ënäty ëxëëk ja naax kajpn të xytyuny.

¹⁸¿Tii nyawa'anëty tu'uk yë awinax mëti'ipë tëë jyaa'apatëtyä'äyën? ¿Tii nyawa'anëty mëti'ipë ja'ay je'eyë tyuk'antäkpyën? Yë awinax ka'ap yë kyäjpxy; ¿wi'ix yë ja'ay tukjotkujk'atëty tääpë awinax mëti'ipë ja'ay tsyejtsypyën?

¹⁹Janty mon janty tuk mijts myajpaaty, jä'ä ko yë'ë awinax m'ënëmääpy ets wyijëty, tsaa m'ënëmääpy ets wya'kukëty. ¿Wä'än jëtää tii xy'ëktuk'ëwa'anëmëtyë? ¿Ka'ap tii xytyuk'ëwa'anëmëty jä'ä ko ka'ap jyuukyëtyë? oy jënu'un pu'ts pujxn ëkë poop pujxn tjaniwits'aty.

²⁰E yë Wintsën jap yajpaaty ma tsyajptëjkën wa'atspë, amonyë mëpaat yë naax kajpn jap yajpaaty yë'ë wyintuuy naaxwiinyëtë apëtsëmy.