Read Biblia Mixe de Quetzaltepec Habacuc 3 Bible Online

Habacuc 3 - Biblia Mixe de Quetzaltepec bible

Habacuc 3

¹Tsajpkäjpxy mëti'ipë Habacuc jyä'ä'ajtypyën.

²Tëkokyë yë m'aaw m'ayuk mëti'ipës të nmëtoyën, Wintsën ets mëti'ipë të xytyunyën, nmëjja'ap nkënu'kxyjya'apës mëjwiin këjää. Näyjyëtu'un ënät tyam winë tun maas yë njuukyajtënëtyën, jëtu'un tä tëëyëp winë xytyuunyën ets nijawëtëtyës. Tuk'ijxtëk ëëtsëty ko mijts mëët'ajtyp yë pa'ëyo'owën najts'ëyo'owën oy jënu'un mjajoot'anpëky.

³Jamtsow yë Wintsën tsyoony ma Temán ets Parán y'itjotmën jamtsow yë Tios wa'atspë myiny. Yë myëj'ajt y'oyajtën jëtu'unyë jam tsajpkëjxm jyajwä'kxy ets ja naaxwiinyëtë ja'ay y'ëwtatyë ets wyin'ëw wyinyä'äxyë.

⁴Wimpity myiny të'kxp jajp, jap kyë'ëjootjoty të'kxp jap jyajpëtsëmy ets yaj'ixy ko tap yu'utsy tmëëtëty yë kutujkën

⁵Yë'ë winye'eyëp mëkëtypë ëyo'on jotmay ets yë'ë ix'am panëjkxëp mëk jëënpa'am.

⁶Jëtu'un yë naaxwiinyëtë jyänty yu'kxy ko wya'akwë'ëmy; tsë'këp yë naax kajpn ko muum tku'ijxkëtä'äky; tim jijtääpy yë tun kopk, tim ma'tääpy yë kopk mëti'ipë jääyëmën; e yë Wintsën yë nyë'ë tyu'u ijtëëp yë xëmë.

⁷Tëës n'ixy yë Cusán ja'ayëty o'ktëy jyajta'atë ets Madián ja'ayëty tëë je'eyë të wyintakta'atë mëët ja tsë'ëkë.

⁸¿Wi'ix Wintsën, tëë yë mëjnëë xytyukjoot'anpëkyë? ¿Ti tëë yë mejy myaj'ëwa'antä'äkyë? ¿paaty yë mkwaay të xytyukwa'tspety ets të mpety jam ma mkepy wyintëkäämpën tëëpë myëtä'äkyën tsipjotmë?

⁹Jëjp'ixy yë mti'pxn xytyim yaj'ijtnë ets tëë xywyo'onë'knë. Tëë yë naaxwiinyëtë xyaj'ëwatsta'ay mëët yë mëk komnëë.

¹⁰Tim yu'kxtakp yë tun kopk ko m'ixyë; jam tsajpjotm mëk komtuu jam të tsyoony ets y'iitsy kyomy yë nëë o'pyky, mejyjoty ko nëkooyë jyänty pyëti'iky.

¹¹Yë xëëw ets po'o ka'ap jap pyëtsëmtë ma yu'utsy y'itën ko t'ixtë ja mëkpë ja mtë'kxën mjajën mëti'ipë ja mti'pxn myëët'ajtypyën ets ko t'ixtë ja mku'umën y'atë'kxy y'ajajy.

¹²Ets ënät xytyukjëtijtëtyä'äy yë naaxwiinyëtë mëët yë joot'an; xy'ateeny xytyukteeny yë naax kajpn mëët ja mtsip m'äkë.

¹³Tëë xypyutëkë ja mnaax mkajpn ets ja yajkutujkpë mëti'ipë kë'ëm mwin'ijxën. Tëë xyajjitsy ja ëxëëk ja'ay ja jyëën tyëjk ets tëë jap xytyim jijtë'ëky ma ja potsy'ëjxën.

¹⁴Myaj'o'k yë kyopktëjk mëët yë kyë'ëmti'pxn, ko ja kyëwaay'ënyääpyë amëjaaw jyamiintë tä tuupojën ets tjayajkutëkoyantë yu'utsy me'ty ja mëti'ipë ka'ap nyäkyuwa'anëtën.

¹⁵Mëët yë mkwaay të xyo'oy'apëtsëëmta'ay yë juukymyejy, maajaty y'ëwtityën yë këk mejy.

¹⁶Koos të nmëtoowta'ay tu'kë'ëyë ya'atë, tëëjës ntsë'ëkë. Jëtu'unës yë n'atääm të y'ëktsëyuuypyëjknë, jëtu'unës yë nteky të njawë tëë yowë yu'unkëtyääynyë ets ka'apës oy n'ëktuktënaaynyë, ka'apës ja njot nini'kx të xy'ëkmaaynyë. E oy y'ëkjëtu'unëty ëjts je'eyëmës n'a'ixa'any njëjp'ixa'any jëna'a yë Wintsën tyaj'ëyo'onpaata'any yë mëtsip mëti'ipë yaj'ëyoopën.

¹⁷Ënätës ntukxoonta'aka'any ja Wintsën mëti'ipë yajnitsokpën. Je'eyëmës nmëjjawëja'any nkënu'kxyjyawëja'any yë higo kepy, tsatym kyepy ets olivë'aats oy ka'ap yë pyijy t'ëk pëjktaknëty ets kya'ëktëëmpäjnëty; oy jam kamjotm tii kya'ëkwintëëwnëty; oy kya'ëknimayënëty yë kupixyny ets tsajpkaa ma ku'ëkemy yajpaatën.

¹⁹Jä'ä ko yë Wintsën yë'ëjës xyjyotmëkmoopy; jëtu'unës yë nteky tyajyu'unkë tä yë jëtyu'ujën mëti'ipë pe'tym ye'epyën ets jam xyajnëjkxyës maas ka'ap tii xyjyatëtyën.