Read Biblia Mixe de Quetzaltepec Sofonías 1 Bible Online

Sofonías 1 - Biblia Mixe de Quetzaltepec bible

Sofonías 1

¹Ya'atë aaw ayuk ojts yë Wintsën tuknikexy yë Sofonías, ma ënäty yajkutukyën yë Josías, yë Amón yë myaank, mëti'ipë jam Judá ënä'ämpën. Yë Sofonías yë'ë yë Cusi yë myaank, e yë Cusi yë'ë Guedalías yë myaank, e yë Guedalías yë'ë Amarías yë myaank, e yë Amarías yë'ë Ezequías yë myaank.

²Jëtu'un yë Wintsën të tnikäjpxy: Nyajkutëkooyäämpyës yam tëkokyë mëti'ipë naaxwiiny naaxkëjxy yajpatpën.

³Nyajkutëkoyäämpyës yë naaxwiinyëtë ja'ay, joon jëyujk ets nëë jëyujk, npëjkta'akäämpyës mëti'ipë yë ëxëëkja'aytyëjk yajkëtaw yajkëpipëtëpën ets nyajkutëkoyä'änyës yë naaxwiinyëtë ja'ay.

⁴Nnixajë'ëkäämpyës yë Judá kajpn ets ja'ayëty mëti'ipë jam tsënaaytyëpën ma Jerusalén kajpnën. Njëpëjkta'ajäämpyës yë Baal y'awinax ets myëpëjkpëtëjk ma ya'atë itjotmën ets yë'ëpaat yë nyiteetytyëjkëty.

⁵Nyajkutëkoyäämpyës pënjaty jap tëjkkëjxy päjtëpën mëti'ipë y'ëwtajtëpën yë mëtsa'a, mëti'ipë näkyoxtënaaytyakëtëpën ets tkajpxpaatë yë nxëëwës, näjyëtu'un tkajpxpaatë yë tios Milcom yë xyëëw.

⁶Nyajkutëkoyäämpyës näjyëtu'un mëti'ipës xynyawa'ktutpën, mëti'ipës ka'ap xy'ixta'ayën ets mëti'ipës ka'ap tii xyajtëyën.

⁷Amonyë m'itëty Wintsën wyintum, jä'ä ko tää ja Wintsën ja xyëëw wyinkony. Yë Wintsën tëë tuknipëjktaakë tu'uk yë wintsë'kën ets tëë tkënu'kxta'ay mëti'ipë të twoy të twitsyën.

⁸Jëtu'un yë Wintsën y'ënä'äny: Ma ënäty ja wintsë'kën yajyäkyën jääjës ntëytyuna'any ja wintsëntëjk, yë yajkutujkpë y'u'unk y'ëna'k ets tëkokyë mëti'ipë tëkatsyjyäty yë wyit pyëjktaktëpën

⁹Ntëytyunäämpyës näjyëtu'un jä'ä xëëw mëti'ipë tëjk'apu'uy nyiwa'knajxypyën ets mëti'ipë tëë tyajtuktuktën ja jëën tëjk mëti'ipë ja wyintsëntëjkëty jyä'ä'ajtëpën mëët ja näwyin'ë'ënën ets mëët ja tsiptuunk tsip käjpxy.

¹⁰Jëtu'un yë Wintsën y'ënä'äny: Jä'ä xëëw, nëjkxëp may yë ja'ay näypyutëkë tja'amëtoy jam ma Nëë Jëyujk Majtspë Tyëjk'aawëtyën. Nëjkxëp yë ja'ay mëk jyë'ëtë ya'axtë ma ja mëmäjtskpëkpyë ja kajpnën ko ënäty ja ja'aw jam kyutëkë kopkkëjxm.

¹¹Jë'ëtë ya'axtë miitsëty mëti'ipë jam Kajpnpë'am tsënaaytyëpën, ma kumeenyjyä'äytyëjk tsyëënëtën, jä'ä ko o'kta'ajantëp yë ja'ayëty mëti'ipë ajuuy ato'ktëpën ets y'o'kta'aja'antë yë ja'ayëty mëti'ipë wit meeny tsyoontëpën myajtstëpën.

¹²Jä'ä xëëw jëtu'unës yë Jerusalén kajpn ntuk'ixëja'any ntukwoonëja'any tä ja'ay kutë'kxy akootstuuy y'ixy wyoonyën. Etsës ntëytyuna'any mëti'ipë jotkujk'ajtëpën ets tu'k'ityë yajpaatë tä yë tsatym nyëë nyimaanaxyën ets mëti'ipë kë'ëm nämyä'äy nätyajëpën: Yë Wintsën oy ka'oy winë tuny.

¹³Paaty yë'ëjëty wa'ats yajmä'tsta'aja'antë ma tyaj'itën yu'utsy kë'ëy yë wyit myeenyëty, yë jyëën tyëjkëty nëjkxëp kyutëkooytya'atë. Oy nëjkx jyatëjkkojtë, ka'ap nëjkx yë'ë tuktsëënëtë; oy nëjkx ja tsatsym kam tjanipëjktaakëtë, ka'ap nëjkx yë tsatym nyëë t'uuktë.

¹⁴Tëë tyimwiinkony yë Wintsën yë xyëëw. Tim winkon, pe'tym wyinkony. Ta'amëm nëjkx yë ja'ay tjawëtë ko ënäty ja Wintsën ja ëyo'on tyaj'ity: Yë'ëpaat yë ja'ayëty mëti'ipë jotmëkëtyën nëjkxëp y'ayaxtu'utë.

¹⁵Tëë ënäty yajxon jyoot'anpëky, mo'onën tujkën ets jë'ëyën yaxën itaanp, axit ako'owë ets kujy ye'epy ja'ay jää yajpaata'antë; tsu'um koots ënäty jää kyëxë'ëky, yootsjotypyën nëë ma'ajotypyën;

¹⁶pujxnxuxn jää nä'ämaanp, yë'ë ënäty jää mëk yajni'ënä'ämëp jëën tsip ets yajnitëkëty ja naax kajpn mëti'ipë këwent'atyën ets ta'tspëky yajpatpën ets mëti'ipë myëët'ajtypyën yë kyëjxmpotsy.

¹⁷Jëtu'un yë Wintsën y'ënä'äny: Jotmayjyotyës yë ja'ay nyaj'ita'any. Jëtu'un yaj'ixa'antë wiints yowëty, jä'ä ko tëëjës xymyëtëkoytyë. Tä naaxwayën yaj'ixa'any ja nye'pnyëty ets tä tsajpkaatë'ënyën yaj'ixa'any ja xyixyëty pyajkëty.

¹⁸Ma ënäty ja Wintsën të y'ëwa'antä'äkyën ka'ap nëjkx ni pën tsyo'oky ets yë'ëpaat yë pu'ts pujxn poop pujxn wa'ats kyutëkooytya'aja'any, jä'ä ko ja Wintsën ja tsyip y'äkë jëtu'un nëjkx jyëtity jëënën ets nëjkxëp ja naax kajpn nyitooytyä'äy. Tu'kë'ëyë ja ja'ayëty mëti'ipë ënäty kajpnjoty tsënaaytyëpën poj'am y'o'kta'aja'antë.