Read Biblia Mixe de Quetzaltepec Sofonías 3 Bible Online

Sofonías 3 - Biblia Mixe de Quetzaltepec bible

Sofonías 3

¹Janty mon janty tuk yë Jerusalén kajpn yajpaaty, mëët ko je'eyë kyäjpxykyutëjy, ko je'eyë ëxëëkpë tuny tkäjpxy ets ko o'ktëy tuny ja ëyoopëja'aytyëjk.

²Ka'ap tmëtoy wi'ix ja Wintsën jya'ëna'anyën ets ka'ap të tkupëky ets yaj'awijtsë'ëkëty; ka'ap yë Wintsën të tuk'ijxpety ets ka'ap të t'ëwtaty.

³Jëtu'un yë kopktëjkëty ya'axtë jyoktë kaajën ets nyipaye'epyëtëjkëty myu'utë nyiitstë waxën mëti'ipë të'ëts'itjotm yajpatpën, mëti'ipë ka'ap tyajwë'ëmyën yë waay pajk komjëpom.

⁴Në'ë'ix pa'at'ix yë kyäjpxynyajxpëtëjk nyaxtë tyëkëtë, ka'ap tmëjpëjkta'aktë pën ëxëëkjaty y'ëtëtsnëtë y'ënanëtë ja tyeetyëjkëty jap ma tsajptëjkën ets nyinajxnëtëp ja Wintsën ja tyiyajtën.

⁵E ja Wintsën tamts ja yajpaaty kajpntum, ja oypyë jam tyuunpy ka'ap y'ëxëëkpëty. Jopy jopy tpaye'eykyojy ja mëtëypyë. Ja'ay mëti'ipë ëxëëk ja'ay'ajtpën ka'ap tmëmay tmëtajy yë tsëtyu'un.

⁶Jëtu'un yë Wintsën y'ënä'äny: Ëjts tëëjës nyajkutëkoy yë naax kajpn, tëëjës njity mëjëtypë potsy ets këjxmëtypë ets aanë'ëk tëëtsë'ëk të ntuuntaayës yë nyë'ë tyu'u, ma ka'ap yë ja'ay y'ëknajxnëtyën. Ma nyaax kyajpnëtyën mëti'ipë tukwa'ats të wyi'imyën nitu'uk kya'ëkyajpatnë.

⁷Ënät të nmay të ntajyës: Ko ënät yë Jerusalén tsyë'ëkëty ets ënät tkupëkëty yë pyoky ets y'oyëty; jëtu'un ka'ap kyutëkoyëty yë jyëën tyëjk ko ënäty të ntukumëtoyës ja pyoky. E yë'ëjëty poj'am winë të tuuntëkoytyë.

⁸Paaty miitsëty ëwxitë, pyatyp ja xëëw maas nikajpxanën yë pyokyëty. Ëjts Wintsën, ëjts ënaanp: Tëës ntuknipëjktaakë koos nyajtu'ukmujkta'aja'any yë naax kajpn ets yajkutujkpëtëjk etsës nyajnaxa'any yë ntsip n'äkë ets njoot'anës. Tu'kë'ëyë yë naax kajpn kyutëkooytya'aja'any mëët yë ntsip n'äkës mëti'ipë jëënmëët minaanpën.

⁹Ko ënäty jëtu'un tpaaty ja xëëw jëmëjt, jääjës nëjkx nyajwatsta'ay ja naax kajpn ja y'aaw y'ayuk ets nitëkokyë xymyëkajpxtëtyës ets xymyëtuntëtyës.

¹⁰Jam Etiopíë winnaxy jam yë nkajpnës xynyitsoona'any etsës xytyuknimina'any ja wyaantakën mëët ja nu'kxtakën.

¹¹Jä'ä xëëw mijts naax kajpn, mëti'ipës nkajpn'ajtypyën ka'ap nëjkx xy'ëkmëtsëtyuunë ja naax kajpn ma ënäty mijts të xykyäjpxykyumëtoownaxyësën, jä'ä ko tëëjës ënäty nyajjëwa'kta'ay ja ja'ayëty mëti'ipë amëj akëjxm ja'ay'ajtëpën ets mëti'ipë yaj'ijxtëpën këtii pën myëjëty, e mijts ka'ap nëjkx amëj akëjxm m'ëk näjya'awënë maas ja ntun nkopkën.

¹²Yë'ëjës nyaj'itäämpy ma mijtsën yë ja'ay mëti'ipë yu'unk naxym ja'ay'ajtpën, mëti'ipë nëjkx ëjts xytyuk'ijxpetyën.

¹³Ja Israel ja'ayëty mëti'ipë ënäty juuky të wyë'ëmtën ka'ap nëjkx ja tëyajtën t'ëkninajxnëtë, ka'ap nëjkx y'ëkwin'ë'ënëtë ets ka'ap nëjkx y'ëk'ëxëëk kajpxnëtë. Jotkujk kyäya'an y'uuka'antë ets pyo'kxa'an pyëka'antë, ka'ap nitii tsë'ëkëja'antë.

¹⁴Mijts Sión kajpn xoontä'äky yajpaat. Mijts Jerusalén kajpn ëw ya'ax akujk jotkujk. Xoontä'äky yajpaat, akujk jotkujk näjyawët.

¹⁵Tëë yë Wintsën tjëpëky ja tëytyu'unën ma mijtsën ets tëë ja mmëtsip tyajjëwa'kta'ay. Yë Wintsën, mëti'ipë jam Israel yajkutujkpën, itkujky yajpaaty ma mijtsën: Mijts ka'ap tii ëxëëkpë xy'ëktsë'kënëty.

¹⁶Jä'ä xëëw nëjkx yë Jerusalén kajpn yaj'ënëëmë: Këtii mtsë'ëkë mijts Sión kajpn ets këtii xykyupëkëty ets mkë'ë m'aaw y'ënu'kxëty.

¹⁷Yë Wintsën, mëti'ipë mTios'ajtypyën, itkujky yajpaaty ma mijtsën, yë'ë maaytyääyëp winë ets myajtso'okanëp. Mtukxoontakëp yë Wintsën. Yë tsyojkën jya'awën yë'ë mjuukyajtën yaj'ajämëjäämpy; ets tyukxoonta'akäämpy ko ënäty jotkujk yajpaaty

¹⁸jëtu'un tä ja'ay jotkujk nyäjyawëtyën ko xëëw tyunyë jyätyë. Jëtu'un yë Wintsën y'ënä'äny: Ëjts mijts nyaj'ëwaatsëpëtsëmäämpy ëyo'onjoty jotmayjoty, ma ënäty mtsëtyuny mjaaypyetyën.

¹⁹Jä'ä xëëw nëjkxëpës jää winë ntuny ko ënäty pën mtëytyuna'anyës. Jëtu'unës ja n'u'unk n'ëna'k mputëkëja'any tä yajputëkën yë kupixyny mëti'ipë të tyekytyijyën ets mëti'ipë tëkoy'ijtpën; mëj'äämpy ets akäjpxy nëjkx miitsëty nyajnaxtë ma ënäty o'ktëy të mjat të mkëpätën.

²⁰Jä'ä xëëw miitsëty nyajmiina'antë ets nyajmuka'antë; ëjts nëjkx nyaj'oyës yë mjuukyajtënëty ets mëj'äämpy nyajnaxa'antë; nëjkxëp myaj'oyjyawëtë oymyaakajpnëty naaxwiinyëtë apëtsëmy.