Read Biblia Mixe de Quetzaltepec Zacarías 1 Bible Online

Zacarías 1 - Biblia Mixe de Quetzaltepec bible

Zacarías 1

¹Ma mëtuktujk po'o y'änyën ja mëmäjtskjëmëjtpë, ma ja Darío yajkutukyën, jää ojts yë Tios tmëkäjpxy yë Zacarías käjpxynyajxpë, yë Berequías yë myaank, yë Idó y'ok'u'unk. Ets t'ënëmaay:

²Ëjts Wintsën, mëti'ipë maaytyääyëpën winë, mëkës ojts ntukjoot'anpëky yë m'ap m'okëty, paaty xy'ënëëmëty tyam yë naax kajpn, ko ëjts ënaanp: Wimpitë ma ëjtsën, etsës miitsëty niwinpittëty, Ëjts Wintsën, ëjts ënaanp.

⁴Këtii jëtu'un m'ëtë'ëtstë tä ja m'ap m'okëtyën, mëti'ipë ojts ja nkäjpxynyajxpës jya'ënë'ëmxëtën ets t'ëxmatstëty ja y'ëxëëktu'un y'ëxëëk kajpxënëty ets ja y'ëxëëk winma'anyëty, yë'ëjëty ka'ap kyäjpxymyëtoowtë ets ka'ap kyäjpxyjyä'äykyujkëtyë. Ëjts Wintsën, ëjts ënaanp.

⁵E tyam, ¿maa ënät ja m'ap m'okëty? ¿wä'än jëtää yë käjpxynyajxpëtëjk xëmë jyuuky'atë?

⁶E yë n'ayukës ets n'ënä'ämënës, mëti'ipës ënäty të ntuknipëktën ja nkäjpxynyajxpëtëjkës, ojts pyaatëtë yë m'ap m'okëty. Yë'ëjëty ojtsës xynyiwinpitë ets ojts tja'akyukëtë ko paatyës ënäty o'ktëy të nyajjat të nyajkëpätë jä'ä ko jëtu'unëtën ënäty nyitëkëtë ja y'ëxëëktu'un y'ëxëëkkajpxënëty, ko ka'ap ënäty tii oy të tuntë.

⁷Ya'atë aaw ayuk ojts yë Wintsën xymyo'oyës, ëjts Zacarías, Berequías yë myaank, Idó yë y'ok'u'unk. Ma y'i'px taxk anyën yë mëmajktu'ukpë po'o, mëti'ipë tyijtëpën Sabat, ma mëtëkëëk jëmëjt yajkutukyën yë Darío.

⁸Kootsës nwinkumaay: Nwin'ijxyës tu'uk yë ja'ay, kwaay tyuk'ënyääpy. Jam joyjotm tyänë, ujtsjoty, jëtu'un yaj'ixy ja ujts xunpoxën ets jam ix'am kanaak kwaay nyatänëty, tam mëti'ipë tsaptsën, naje'eyë yëkën ets poopën.

⁹Etsës nyajtëëy: Wintsën, ¿pën ja'ay tääpëty mëti'ipë kwaay tyuk'u'unyääytyëpën? E tsajpjotmëtë kukäjpxy mëti'ipë ënäty jam mëët nmëtyä'äkyënës, xy'ëtsooyës: Tyam ntuk'ixëty pën yë'ëjëty.

¹⁰Ënät xy'ënëmaayës mëti'ipë xim yajpatëpën ujtsjotm: Yë'ë Wintsën të kyäxëtë ets tukjëtitëtëty yë naaxwiinyëtë.

¹¹Ja ja'ayëty mëti'ipë ja kwaay tyuk'u'unyääytyëpën, mëti'ipë jam ujtsjotmëtyën, ënät t'ënëmaaytyë ja tsajpjotmëtë kukäjpxy: Tëës ntukjëtijtëtya'atë ja naaxwiinyëtë, jotkujk ja'ay yajpaatë ets ka'ap tiijotmay tmëët'atë.

¹²Ënät ja Wintsën ja tyäjpjotmëtë kukäjpxy y'ënäny: Wintsën mëti'ipë maaytyääyëpën winë, tëkë'px majk jëmëjt tyam nyëjkxnë ma mijts xymyëtsipë'atyën yë Jerusalén kajpn ets tëkokyë yë Judá kajpn. ¿Jënaak jëmëjt jyaak naxa'any etsës xymyëët'atëty ja pa'ëyo'ow mnajts'ëyo'owën?

¹³Ënät ja Wintsën t'ëtsooy mëët tu'uk yë aaw ayuk oypyë mëti'ipë yajjotkujkëpën, ja tsajpjotmëtë kukäjpxy mëti'ipës ënäty xymyëmëtyakpën,

¹⁴ets ja tsajpjotmëtë kukäjpxy xytyuknipëjkyës ets nimëtya'akëtyës ja aaw ayuk: Jëtu'un yë Wintsën y'ënä'äny, mëti'ipë maaytyääyëpën winë: Ëjts nëkooyës ntsojknë nja'awënë yë Jerusalén kajpn ets Sión kopk.

¹⁵Paatyës të ntukjoot'anpëky tääpë naax kajpn mëti'ipë ka'ap tii tmaytyën tajtën, mëti'ipë ojts ni'ikyë ja jotmay t'ixkukëtën maas ënäty ëjts të njoot'anpëkyën.

¹⁶E paaty n'ëna'anyës, ëjts Wintsën: Mpa'ëyoopyës ja Jerusalén kajpn, paatyës yam nyajkutukäämpy ets ja tsajptëjk ets ja naax kajpn jatëkok yajkoj o'oyëtya'atëty.

¹⁷Ojtsës näjyëtu'un ja tsajpjotmëtë kukäjpxy xy'ënëëmë: Nikajpx ya'atë aaw ayuk: Yë Wintsën mëti'ipë maaytyääyëpën winë, jëtu'un y'ënä'äny: Ëjts nyajkutukäämpyës ets nnaax nkajpnës jyotkujkta'akëty jatëkok; njotmëkmo'ojäämpyës jatëkok yë Sión kajpn etsës nikajpxa'any ma ja naax kajpnën ko yë Jerusalén kajpn yë'ëjës jatëkok të nwin'ixy.

¹⁸Ojtsës näjyëtu'un jatëkok nkumaakojnëpë, yë'ëjës yë tsajpkaawaj taxk n'ijxyp.

¹⁹Ënätës nyajtëëy ja tsajpjotmëtë kukäjpxy wi'ix nyiwija'any tääpë taxkpë tsajpkaawaj, etsës xy'ëtsooy: Ya'atë tsajpkaawaj taxkpë xy'ixyën yë'ë nyikäjpxyp yë yajkutujkpëtëjk mëti'ipë ojts t'ëxwoptën ja Judá ja'ayëty, Israel ja'ayëty ets Jerusalén ja'ayëty ets tnajtswojpëtyë ma wiinkëtypë naax kajpnën.

²⁰Ënät ja Wintsën näjyëtu'un xytyuk'ijxyës taxk ja ja'ayëty mëti'ipë pujxn'atsaaymyujktëpën.

²¹Etsës nyajtëëy ja tsajpjotmëtë kukäjpxy: Tyaapë ja'ayëty mëti'ipë pujxn atsaaymyujktëpën ¿tii të tnimintë? Etsës xy'ëtsooy: yë'ë të tmëmintë ets tpëjkëja'antë yë kyutujkën yë naax kajpn, mëti'ipë ëxëëk yë Judá ja'ayëty të tuntën, jëtu'un tä yë pujxn atsaaymyujkpë tjë'tuktën yë tsajpkaawaj.