Read Biblia Mixe de Quetzaltepec Zacarías 10 Bible Online

Zacarías 10 - Biblia Mixe de Quetzaltepec bible

Zacarías 10

¹Amëtowtë yë Wintsën ets tyajtu'ujëty xëkopkjoty, yë Wintsën mëti'ipë yajëtsujkpyën nëjkxëp tkexy yë nëë tuu mëjwiin këjää ets tmo'oja'any yë aay ujts oypyënëty jam kamjotm tu'ujotm.

²Tä yë ja'ay mëti'ipë ënantëpën ko tëë yë awinax myëkajpxëtë nëkoopë yë'ëjëty nëkoopë wyin'ëëntë, ka'ap myëtëyëty y'ëna'antë yë najtsja'apëtëjkëty ko winë t'ixtë. Ko tii t'akajpxtë nëkoopë je'eyë wyinkuma'atë, yë y'aaw y'ayukëty ka'ap tii jotkujk'ajtën tyäky. Paaty yë naax kajpn jëtu'un yajpaaty tä tu'uk yë kupixynyën ka'apë wyinye'epyën ets o'ktëy jyäty kyëpety mëët ko ka'ap pën tmëët'aty mëti'ipë tu'uwinwowëtëpën.

³Paaty yë Wintsën y'ënä'äny: Tëës ntukjoot'anpëky yë kupixyny këwent'ajtpë, ntukumëtowantëpës yam yë ja'ayëty yë nyëë pyokyëty mëti'ipë tyu'uwinwoowtëpën yë nnaax nkajpnës. Yë Wintsën mëti'ipë maaytyääyëpën winë, mëti'ipë kyëwent'ajtypyën yë kyupixyny, yë Judá yë y'u'unk y'ok, yë'ë yaj'awinpitäämpy tä tu'uk mëk kwaayën mëti'ipë tsiptuunpën.

⁴Jam pyëtsëma'any ja tsaa mëti'ipë potsy myëtänëjäämpyën. Ja Kepy kyupë mëti'ipë ja wit tëjk nyikupë'atäämpyën ets ja ti'pxn mëti'ipë yajmëtsiptunäämpën. Jam pyëtsëma'any tu'kë'ëyë ja ja'ayëty mëti'ipë yaj'ëwaatsëpëtsëëmtëpën.

⁵Jëtu'un nëjkx nyaxtë tä yë tsiptuunpëtëjkëtyën mëti'ipë mo'onts y'atä'än tyuktä'äntëpën tu'ujoty; tsiptunantëp yë'ëjëty jä'ä ko Wintsën mëët yajpaatë ets tsëtyu'unmëët tyajwë'ëma'antë ja këwaaytyuk'u'unyääpyëty.

⁶Jëtu'un yë Wintsën y'ënä'äny: Ëjts nmëjaaw mo'ojäämpy yë Judá ja'ayëty ets nyajtso'oka'antës yë José y'u'unk y'okëty. Nwoownëjkxäämpyës jatëkok ma nyaax kyajpnëtyën, jä'ä ko npa'ëyoowtëpës yë'ëjëty. Jëtu'unës jatëkok nyaj'ita'antë tä jeexyë ka'ap nijëna'a të ntukjoot'anpëktënës, jä'ä ko ëjts Wintsën mëti'ipë Tios'ajtpën, nmëtoow'ijtypyës wi'ixës pën xymyëkäjpxyën.

⁷Yë Efraín jëtu'un tä tsiptuunpën nyaxa'any. Jotkujk yë jyot wyinma'any tjawëja'any tä jeexyë tsatym nyëë t'uukyën ets ko ënäty ja y'u'unk y'ëna'k y'ixyë tääts näjyëtu'un jotkujk yajpaata'antë. Jotkujk yë jyot wyinma'any tjawëja'antë jä'ä ko yë Wintsën tsyokyë jyawëty.

⁸Nëjkxëpës nyaxtsowtë ets nyajtu'ukmuka'antës, jä'ä ko ëjtsës të nyajtso'oktë. Nimay nëjkx y'itë tä ijty tëëyëpën.

⁹Ojtsës nyajye'eywya'kxtë ma wiinkëtypë naax kajpnën, je'eyëp ko oy ënäty muum jëkäm yajpaatë, nëjkxëpës xyjyä'ämyätstë ets nëjkx wyimpitë jatëkok mëët yë y'u'unk y'ëna'këty ma nyaax kyajpnëtyën.

¹⁰Nëjkxëpës jap Egiptë, jam Asiria nyajtsoontë ets nëjkx jam Galaad ets Líbano nyajnëjkxtës; yajxon nëjkx nyimayëtë, ka'ap ja it naaxwiinyëtë nyipaatëja'any mëët yë'ëjëty.

¹¹Nëjkxëp tuknaxtë yë Egiptë juukymyejy, ko ënäty ja nëë o'pky n'apëjktukyës. Nyajtë'ëtsäämpyës yë Nilë nëë këkpaat; nyajma'atäämpyës tëkokyë mëti'ipë yë Asiria ja'ayëty nätyukmëjja'awëtëpën ets nyajkutëkooytya'aja'anyës yë Egiptë kyutujkën.

¹²Ëjts nëjkx nmo'otë yë jot mëjaaw ets tyu'uye'eytyëty mëët yë nxëëwës, ëjts Wintsën, ëjts ënaanp.