Read Biblia Mixe de Quetzaltepec Zacarías 4 Bible Online

Zacarías 4 - Biblia Mixe de Quetzaltepec bible

Zacarías 4

¹Ënät jatëkok ja tsajpjotmëtë kukäjpxy xynyimiinyës, mëti'ipës mëët nmëtyä'äkyën etsës xyujxy tä ja'ay ma'ayjoty yajyuxyën. Ets xyajtëëyës:

²¿Tii m'ijxyp? Ets n'ëtsooyës: Yë'ëjës n'ijxyp yë jëëntooytyakn mëti'ipë oytyunyën mëët yë pu'ts pujxn, tam tmëëtëty nëkëjxy ma yaj'atämën yë olivë on. Jam këjxm wëxtujk jam tmëët'aty yë kutë'kxn, jam jyä'ty ja on ma wëxtujk tmëëtëtyën ja nyitu'u.

³Jän ma jëëntooytyaknën mäjtsk yë olivë kepy yajpaaty, tu'uk a'oytsyow ets tu'uk anajnytsyow.

⁴Ënätës nyajtëëy ja tsajpjotmëtë kukäjpxy mëti'ipës ënäty mëët nmëtyä'äkyën: ¿wi'ix tääpë nyiwija'any?

⁵Tääts ja tsajpjotmëtë kukäjpxy xy'ëtsooyës: ¿Ti këtiijën xynyijawë tii tyijpyënë? Täätsës n'ëtsooy: Ka'apës nijawë.

⁶Ets y'ënäny: Jëtu'un ja Wintsën t'ënëmaay ja Zorobabel: Ka'ap yë'ëkyëjxmëty ko may jyääjëty yë tsiptuunpëtëjk ëkë ko ja'ay jyotmëkëty, yë'ë tuunp ëjts yë nmëjaaw nmëk'ajtën, jëtu'un y'ënä'äny yë Wintsën mëti'ipë maaytyääyëpën winë.

⁷¿Mpën mijts mëjkopk? Joyjyot mkawinpita'any Zorobabel wyintuuy. Yë'ë yajpëtsëmäämpy ja mëjtsaa mëti'ipë myëtënääpyën ja je'emtyajtën ets ja ja'ay mëk yujk'ëna'antë: Ix janty'oy kyëxë'ëky. Oy yaj'ijxy.

⁸Ënät ja Wintsën wiinkpë ja aaw ayuk xymyooyës:

⁹Yë Zorobabel yë'ë të tyajtso'ontä'äky ya'atë tuunk ma ja tsajptëjk kyojyën ets nän yë'ë nëjkx tyajwintu'upëky. Jëtu'un xynyijawëtëty ko yë Wintsën mëti'ipë maaytyääyëpën winë yë'ëjës të xykyexy.

¹⁰Ja ja'ayëty mëti'ipë ka'ap të tmëjpëjkta'aktën ko wäänaty ja tuunk të tyu'uye'ey, nëjkxëp ok tukxoonta'aktë ko ënäty ja Zorobabel tyajjëjpëtsëmy ja tuunk. Ënät ja tsajpjotmëtë kukäjpxy xyjyaak ënëmaayës: Ya'atë wëxtujkpë kutë'kxn yë'ë Wintsën yë wyiin jyëjp mëti'ipë tyukjëtijtëtyëpën yë naaxwiinyëtë.

¹¹Ënätës näjyëtu'un të nyajtëy: ¿Tiitën jyanikäjpxyp tääpë mäjtskpë olivë kepy, mëti'ipë pya'atënaaytyëpën yë jëëntooytyakn?

¹²Ojtsës näjyëtu'un nyajtëy: ¿Tiitën jyanikäjpxyp tääpë mäjtskpë olivë xe'enty mëti'ipë jam këxajpën ma on yë nyitu'ujën jampë ma kutë'kxnën?

¹³Tääts ja tsajpjotmëtë kukäjpxy të xy'ëtsoyës: ¿Ti këtii xynyijawë wi'ix nyiwijyënë? Ënätës n'ëtsooy ko ka'ap.

¹⁴Ets xy'ënëmaayës: Yë'ë nyikäjpxyp, ko nimäjtsk mëti'ipë të yajkënu'kxtën ets Wintsën tmëtuntëty naaxwiinyëtë apëtsëmy.