Read Biblia Mixe de Quetzaltepec Zacarías 8 Bible Online

Zacarías 8 - Biblia Mixe de Quetzaltepec bible

Zacarías 8

¹Yë Wintsën mëti'ipë maaytyääyëpën winë, jëtu'unës të xy'ënëëmë:

²Yë'ëjës ya'atë aaw ayuk nikäjpxyp, ëjts Wintsën mëti'ipë maaytyääyëpën winë, jëtu'unës n'ëna'any: Äjkëpës, mëj këjääjës ni'akë'aty yë Sión kajpn, nëkooyës n'äjkënë.

³Wimpitaanpës jam Jerusalén, etsës jam ntsëënëja'any. Ënät nëjkx yë Jerusalén kajpn yajtijy kajpn mëti'ipë wyintsë'këpën ja Tios, e ja kopk mëti'ipë jyä'ä'ajtypyën ja Wintsën mëti'ipë maaytyääyëpën winë, jä'ä nëjkx txëëwaty wa'ats kopk.

⁴Nëjkxëp ja mëjja'aytyëjk ye'etyëjkpë to'oxytyëjkpë jatëkok pyo'kxtë pyëktë jam kajpnjotm ma Jerusalén kajpnën, nitu'ukatsy aaktam ja tyajkëty jä'ä ko tëë myëj ja'ayënëtë.

⁵Nëjkxëp ja pi'k ëna'këty y'ëyë'ëktë kyëyätë kajpnjoty.

⁶Jä'ä xëëw tsip yë ja'ay t'ixtëty mëti'ipë ënäty të jyaakwë'ëmtën maas yë nnaax nkajpnën; e ëjts ka'apës tsip n'ixa'any. Ëjts Wintsën, mëti'ipë maaytyääyëpën winë, ëjts ënaanp:

⁷Nyaj'ëwaatsëpëtsëmäämpyës yë nnaax nkajpn ma ënäty yajpaatën tsumy matsy jamtsow ma xëëw pyëtsimyën ets jamtsow ma xëëw kyëtä'äkyën,

⁸etsës nyajmina'any jam Jerusalén ets jam tsyëënëty. Yë'ë nëjkx nkajpn'atës etsës nëjkx xyTyios'atë, mëti'ipë xëmë mëët'atanëtëpën ets mëti'ipë tëyajtënpë tii nyipaye'epyën.

⁹Jëtu'un yë Wintsën y'ënä'äny mëti'ipë maaytyääyëpën winë: Jotmëk näjyawëtë, jä'ä ko miitsëty tëë xymyëtowtë wi'ix kyajpxtë myëtya'aktën ja käjpxynyajxpëtëjkëty, maju'unëm tsyo'ontä'äkyën ja tuunk ma yajkoj'oyën ja tsajptëjk, mëti'ipë yë Wintsën, mëti'ipë maaytyääyëpën tsyajptëjk'ajtypyën.

¹⁰Jä'ä ko tëëyëp ka'ap ijty yajmëjuytyë yë ja'ayëty ets jëyujkëty. Ets mëtsip nän ka'ap të y'ity tyajjotkujk'atë yë naax kajpn; tëëjës n'ëwa'atsy ets nixim niyam ja'ay nyämyëtsip'atëtëty.

¹¹E tyam, mëti'ipë të jyaakwë'ëmtën ma naax kajpnën, ka'apës o'ktëy n'ëktunanëtë jëtu'un tä të y'ityën. Ëjts Wintsën, mëti'ipë maaytyääyëpën winë, ëjts ënaanp.

¹²Jä'ä ko yajpaataanp ja jotkujk'ajtën ma yë'ëjëtyën. Nëjkxëp tyëëm'aty ja tsatym; nëjkxëp y'ity wyintëy winë kamwinm; ets nëjkxëp myaaniky. Ets nmooytya'aja'antës ya'atë naax kam ja ja'ayëty mëti'ipë ënäty të jyaakwë'ëmtën.

¹³Jëtu'un tä ojts miitsëty Judá ja'ayëty ets Israel ja'ayëty akäjpxy m'itën wiink naax wiink kajpn ko pën yajpoky, tyam jëtu'un miitsëty nyajtso'oka'antë ets akäjpxy m'ita'antë ko ënäty pën yajkënu'kxy. Këtii mtsë'ëkëtë. Jotmëk näpyëjkta'akëtë.

¹⁴Jëtu'un yë Wintsën y'ënä'äny mëti'ipë maaytyääyëpën winë: Ëjts tëëjës ënäty ntuknipëjktaakë koos ntëytyuna'antë yë m'ap m'okëty mëët koos xyajjoot'anpëjktë ets jekyës ojts jëtu'unpë winma'any nmëët'aty.

¹⁵E tyam, tëëjës ntuknipëjktaakë ko yë Jerusalén ja'ayëty ets Judá ja'ayëty mpa'ëyowa'antës, paaty miitsëty këtii mtsë'ëkëtëty.

¹⁶Ya'atë mëpaat xëmë xytyuntë: Mëtëy winë xynyikajpx xynyimëtya'aktëty ma miitsëtyën nixim niyam, mëtëy tii xynyipaye'eytyëty ets yë'ë xëmë mmaytyëp mtajtëp yë oyajtën jotkujk'ajtën miitsëty yajkutujkpëtëjkëty;

¹⁷këtii ëxëëk mnäytyun mnäy'ënë'ëmxëtëty nixim niyam ets këtii nëkoo Tios je'eyë ëëwpäjn kajpxpäjn xywya'antëty. Jä'ä ko ëxëëkës yë jëtu'unpë n'ixy. Ëjts Wintsën, ëjts ënaanp.

¹⁸Ënät ja Wintsën mëti'ipë maaytyääyëpën winë ojts xymyëkäjpxyës, etsës xy'ënëmaay:

¹⁹Ko ja ayuu'ajtën y'itëty ma ja mëmajktaxk po'opën, mëmëkoxk po'opën, mëwëxtujk po'opën ets ja mëmajkpo'opë, jä'ä nëjkx y'awinpity tu'uk xoontakën, tu'uk yë xëëw ma y'itëtyën ja jotkujk'ajtën ets xyi'iktëty y'ëwë'ëktëty ja Judá ja'ayëty. Miitsëty yë'ë mtsoktëp mjawëtëp yë mëtëypyë ets jotkujk'ajtën.

²⁰Jëtu'un yë Wintsën y'ënä'äny mëti'ipë maaytyääyëpën winë: Jaakminaanp yë ja'ayëty mëti'ipë wiink naax wiink kajpn tsoonantëpën.

²¹Nëjkx ja naax kajpn ja jyiiky myëku'uk tniye'eyë ets nëjkx t'ënëëmë: Ja'am yë Wintsën n'ixta'ayëmë yë pyutëjkën ets xykyënu'kxmëty. Ets nëjkx myëku'uktëjk y'ëtsowtë, nän nëjkxantëp ëëtsëty.

²²E nëjkxëp ja ja'ay may myintë ma Jerusalén kajpnën, yë'ë y'amëtowantëp yë Wintsën mëti'ipë maaytyääyëpën winë ets kyënu'kxëtëty.

²³Jä'ä xëëw, majk nëjkx yë jaaypyo'kxyjyä'äy tmatsy wyitkëjxy yë jutië ja'ay ets t'ënëëmëja'antë: Jamës nëjkxa'antë ma miitsëtyën, jä'ä ko tëëjës nnijawëtë ko tam yë Tios yajpaaty ma miitsëtyën.