Read Biblia Mixe de Quetzaltepec Zacarías 9 Bible Online

Zacarías 9 - Biblia Mixe de Quetzaltepec bible

Zacarías 9

¹Ya'atë ojts tkäjpxy yë Wintsën, yë'ë yajtuknikäjxtë ja aaw ayuk yë Hadrac kajpn ets naax kajpnëty mëti'ipë yë Damasco nyitënääpyën: Yë naax kajpnëty mëti'ipë yë Sirië nyitënääpyën yë'ë yë Wintsën kyajpn niwäämpy, jëtu'un tä yë Israel kajpnën.

²Näyjyëtu'un yë Hamat kajpn, mëti'ipë mëët nyäpyaatëtën, yë Tirë kajpn ets Sidón kajpn mëët tu'kë'ëyë mëti'ipë tyukjuuky'ajtëpën ets wyinma'any'ajtëpën.

³Tirë tëë tkojy yë naax kajpn ta'tspëkpyë ets mëti'ipë këwent'aty ijtpën, tëë tnipëjkpety yë pu'ts pujxn ets poop pujxn tä ja'ay mo'onts tnijä'ppetyën.

⁴Je'eyëp ko pëjkëjanëyëp yë Wintsën tu'kë'ëyë ets nëjkx nëëkuko'owta'ay ja wyit myeeny ets tno'ktëkoyä'äny ja naax kajpn.

⁵Ko ënäty ja Ascalón kajpn jëtu'unpë t'ixy, nëjkxëp yë tsë'ëkë tyuktëkëty. Ëxëëk y'ëyowa'any yë Gaza kajpn, mëti'ipë ënäty ja Ecrón kajpn jyëjp'ijxypyën jëtu'unyë nëjkx tyëkooytyä'äy. Yë Gaza kajpn tukwa'ats nëjkx wyi'imy ets Ascalón kajpn tukwa'ats nëjkx y'awinpity, ni pën jam kyatsëënëja'any.

⁶Jam Asdod xëpiny nëjkx ja'ay jam tsyëënëtë, këtiipë yë filistejë ja'ayëty nyämyëjawëtëty.

⁷Ntuk'awo'ontu'utäämpyës ja tsu'utsy ne'pnymyëëtpë ets tyëtsjoty nëjkx nwo'onpëtsëëmës ja jë'kxy mëti'ipë mëpaat ka'ap yajjë'kxyën. Je'eyëp ko nëjkxëp jam yë ja'ay yajpaatë mëti'ipës oy xymyëtuntëpën ets nëjkx jyuuky'atë mëët yë Judá ja'ayëty; yë Ecrón ja'ayëty jëtu'un nëjkx jyuuky'atë tä Jebús ja'ayëtyën.

⁸E ëjts a'ijxp jëjp'ijxp nyajpaata'anyës ets nkuwa'ana'anyës mëti'ipës njä'ä'ajtypyën, ka'apës yaa pën nyajnaxa'any. Yë ja'ay mëti'ipë tëytyunaanpën ka'ap nëjkx y'ëktëytyuunë, jä'ä ko ëjts nkëwent'atanëpës yë nja'aynyë.

⁹Xoonta'ak mëjwiin këjää mijts Sión kajpn. Akujk jotkujk m'ëwëty mya'axëty, mijts Jerusalén kajpn. Jä'ä ko tää mniminyë mëti'ipë mkutujkpë'atäämpyën, oypyë jyä'äy'ätyën ets mëti'ipë xëmë mëtakpën; je'eyëp ko yu'unk naxym myiny, krukts tyuk'ënyääpy, kyërukts këjxy myiny, yë'ë krukts mëti'ipë nän krukts të yajmëxu'unk'atyën.

¹⁰Yë'ë yajkutëkoyäämpy yë Efraín yë pyujxnwintëkäämpë, yë kyëwaay yë Jerusalén kajpn ets ti'pxn mëti'ipë myëtsiptuuntëpën. Yë'ë nyikajpxäämpy ja jotkujk'ajtën ma tu'kë'ëyë ja naax kajpnën ets yajkutuka'any naaxwiinyëtë apëtsëmy, tyimtso'ontä'äky jam Éufrates ets tyimja'ty ma naaxwiinyëtë jyëjpkëxyën.

¹¹Jëtu'un yë Wintsën y'ënä'äny: Jerusalén, mëët ja käjpxytyu'unën mëti'ipë ja ne'pny myë'ijtypyën, njuutäämpyës jap nëëjutjoty yë ja'ayëty mëti'ipë jap tsumy matsy ijtëpën.

¹²Miitsëty jënu'un tsumy matsy myajpaatën, mëti'ipë ka'ap të xyjyä'äytyëkoytyën ja jotkujk'ajtën, winpitë jatëkok jam ma ja kajpnën mëti'ipë ta'tspëky ets këwent'atyën yajpatpën. Jëtu'un miits n'ënëëmëtë ko mäjtsk'oknipety nmo'oja'antë yë kënu'kxën ko të m'ëyowtë.

¹³Tëës yë nti'pxn nwo'onë'ëky, yë'ëjës yë Judá kajpn ntijpy, ets tëëjës ntuknikäpy yë nyiku'umën, yë'ëjës yë Efraín ntijpy. E mijts Sión, jëtu'un mpëjkta'aka'any tä tu'uk yë tëypyujxnën ets ntuknipëka'anyës yë m'u'unk ëna'k ets tnipëtë'ëktëty yë Grecië ja'ayëty.

¹⁴Yë Tios yë'ë nänyikëxë'ëkanëp ma nyaax kyajpnën; jëtu'un ti'pxë'ëka'any yë tyi'pxn wëtsukën. Tios mëti'ipë Wintsën'ajtpën yë'ë tyukxu'uxäämpy yë xyuxn ets mëët yë mëkpoj tyu'uye'eyä'äny mëti'ipë ëpa'tkë'ëytsyow tso'onpën.

¹⁵Yë Wintsën mëti'ipë maaytyääyëpën winë yë'ë kyuwa'anäämpy mëti'ipë jyä'ä'ajtypyën ets yë'ëjëty jëtu'unyë t'atääna'an tuktääna'antë yë tsaa mëti'ipë jayajtuka'tstëpën ets myëtsip ëxëëk tuna'antë; y'uukanëtëp yë myëtsip yë jyot nye'pnyëty tä yë tsatsymnyëëjën, jëtu'un tä muum tsimjoty yaj'atämën yë ne'pny; jëtu'un tä jam yajkëxtemyën yë ne'pny ma wintsë'këntyakn yë wyajën.

¹⁶Jä'ä xëëw jëtu'un nëjkx yë Wintsën tyajtso'oky yë nyaax kyajpn tä yë ja'ay tyajtso'okyën yë kyupixyny mëti'ipë kupixyny këwent'ajtpën ets nëjkx jëtu'un tä tsaajën oypyë y'atë'kx y'ajajtë ma kyë'ëm naax kyë'ëmkajpnëtyën.

¹⁷Janty oy janty tsuj nëjkx yaj'ixy yë naax kajpn. Tam'ataanp may yë tsajpmok ets tsatym nyëë; yë n'u'unk'ajt n'ëna'k'ajtëm ye'etyëjkpë to'oxytyëjkpë, oy tsuj nëjkx yääktë pyätë.