Read Biblia Mixe de Quetzaltepec Mateo 10 Bible Online

Mateo 10 - Biblia Mixe de Quetzaltepec bible

Mateo 10

¹Tä ja Jesús twoowtsooy ja nimajkmäjtskpë y'ijxpëjkpëtëjk ets tmooy ja kutujkën ets t'ixkäxtëty ja ku'oypyë ets tyajtso'oktëty oymyëti'ipë pa'amëty ets pëjkën ato'onën.

²Tyaa xyëëw myintë ja majkmäjtskpë Jesús y'ijxpëjkpëtëjk: Simón, mëti'ipë näjyëtu'un yajtijpën Pedro ets ja y'uty Andrés; näjyëtu'un ja Santiago ets ja y'uty Juan, mëti'ipë Zebedeo tyeety'ajtëpën;

³Felipe, Bartolomé, Tomás, Mateo yajkukëpäjtpë, Santiago, mëti'ipë Alfeo y'u'unk'ajtypyën ets ja Tadeo,

⁴Ja Simón mëti'ipë Celote ets Judas Iscariote, mëti'ipë ok ja Jesús kyë'ëyajkën.

⁵Jëtu'un ja Jesús ojts t'ëne'emy ja y'ijxpëjkpëtëjk nimajkmäjtskpë ko ojts tkexy Tios y'aaw y'ayuk kajpxwa'kxpë: Ka'ap mnëjkxtëty ma ja'ayëtyën mëti'ipë ka'ap jyutiiyësëty, ni mkanëjkxtëty ma ja Samaria y'itjotmën;

⁶jam mnëjkxtëty ma Israel ja'ay y'itjotmën. Yë'ë jëtu'un ijtëp ijxtëm ja kupixyny tyëkoy'ityën.

⁷Ko jam mnëjkxtëty nikajpx nimëtya'aktë ko tää ja tsajpjotmëpë kutujkën wyinkony.

⁸Yajtso'oktë ja pa'amja'ay ets mëti'ipë pu'uts mëëtën, yajjuukpyëktë ja o'kpë ets ixkäxtë ja ku'oypyë. Namëyajtën miitsëty të myajmo'otë ya'atë kutujkën, këtii xynyipëktëty ko pën xyajtso'oktëty.

⁹Ka'ap tii meeny xykyontëty, ijxtëm yë pu'ts pujxnën, poop pujxnën ets yëk pujxnën,

¹⁰yë'ëpaat yë jë'kxy pëky këtii nëkoo xymyënëjkxtëty mëti'ipë mëtu'uye'eytyëpën. Këtii ëpëky xymyënëjkxtëty yë mwitëty, mkë'ëkëty ets mtajkëty, jä'ä ko ja tuunpë patëp ets nitëjkëyëp oy kyäyëty y'uukëty.

¹¹Ko jam mja'tëty ma tu'uk ja kajpnën, yë'ë m'ixta'atëp tu'uk ja ja'ay mëti'ipë mtëjkmo'ojëtëpën. Jam mja'ajta'aktëty koonëm mtsoontëty.

¹²Ko mtëkëtëty tëkoty, mkajpxpo'kxtëp ja ja'ay mëti'ipë jap tsënaaytyëpën.

¹³Pën m'ëtsoowëtëp ja ja'ay oy, amëtowtë ja Tios ets kyënu'kxëtëty. Pën ka'ap oy m'ëtsowëtë miitsëty ka'ap tiijotmay xyjyawëtëty.

¹⁴Pën ka'ap m'ëxajëtë ets ka'ap tmëtoow'ita'antë mëti'ipë mjanimëtyaktëpën, pëtsëmtë ma tëjkën ëkë ma kajpnën ets winxitë ja mtekyëty wä'än ja naaxway tjënäky.

¹⁵Tëy miits n'ënëëmëtë, ko nëjkx tpaaty ja paye'eyën, wäänë këjää tääpë kajpn ja ëyo'on yajmo'otëty këtiinëm ja Sodomë ets Gomorra itjot.

¹⁶Ëk'ixtë. Jëtu'un yam miits nkäxtë ijxtëm ja kupixyny nyëjkxtën pa'uk'akujky. Wijy kejy mnäpyëjkta'akëtëty ijxtëm ja tsa'anyën. Yujy mnäpyëjkta'akëtëty ijxtëm ja pakën.

¹⁷Näkyëwent'atëtë, jä'ä ko nëjkxëp myajkë'ëyaktë ma kutuunkëtyën ets nëjkxëp myajwoptë tsajptëkoty.

¹⁸Ëjtskyëjxm nëjkx myajmënëjkxtë ma ja yajkutujkpën ets ma ja kutuunkëtyën. Jëtu'un nëjkx xyaj'ixëtë ja tëyajtën ëjtskyëjxm ma yë'ëjëtyën ets ma ja ka'apë jyutiiyësëty.

¹⁹Ko myajkë'ëyaktëty ma ja yajkutujkpëtëjkën ëkë ma ja kutuunkën, ka'ap xymyëmay xymyëtajtëty wi'ix m'ëna'antëty ëkë pën tii mkajpxtëp, ma ënäty miits mtimkyajpxa'antën jää nëjkx myajmo'otë ja aaw ayuk mëti'ipë mkajpxtëpën,

²⁰jä'ä ko ka'ap yë'ëjëty xykyajpxa'antë mëti'ipë kë'ëm mmaay mtajtëpën, ja Tios Teety ja jya'awën miits myajkajpxanëtëp.

²¹Nëjkxëp ja ja'ay ja y'uty ëkë ja y'äjty tkë'ëyäky o'këntum, näjyëtu'un ja teety taak, nëjkxëp ja y'u'unk y'ëna'k tkë'ëyäky ets ja u'unk ëna'k myëtsiptsoonäämpy ja tyeety tyaak ets nëjkxëp tyaj'ooky.

²²Aak mmëtsip'atanëtëp ja ja'ay mëët ëjtskyëjxm; pën myëtënääpy mapaat kyukëxën, jä'ä nëjkx tsyo'oky.

²³Ko myajpajëtijta'aktëty ma tu'uk ja kajpnën, käknëjkxtë wiink kajpn. Tëy miits n'ënëëmëtë ko minëpës naamka'anëm ënäty miits ja Israel it xye'ey'apëtsëmtë; ëjts, naaxwiinyëtë ja'ay y'U'unk.

²⁴Ka'ap pën ijxpëjkpë ni'ik mëj'äämpy yajpëjktä'äky ijxtëm ja yaj'ijxpëjkpën, ets ka'ap pën mëtuunpë ni'ik mëj'äämpy nyäxy ijxtëm ja wyintsënën.

²⁵Yë ijxpëjkpë yë'ë tyukjotkujk'atëp ko jëtu'un jya'ta'any tä ja yaj'ijxpëjkpën ets ja mëtuunpë tä wyintsënën. Pën Beelzebú yajtijy ja u'unkteety, ¿tii ko näjyëtu'un kyayajtijtëty ja y'u'unk y'ëna'k?

²⁶Ka'ap ja'ay xytsyë'ëkëtëty. Ka'ap tii niwitsy nijuuxy y'ity ka'apë nijëna'a yajniwijtstu'utëtyën, ets ka'ap tii yu'utsy kë'ëy y'ity mëti'ipë ka'ap yajnijawëtyën.

²⁷Mëti'ipë akootstuuy ntukmëmëtyaktëpën, nikajpx nimëtya'aktë xëëny ma jyäjy tyi'kxyën; mëti'ipë ame'tsyë ntukmëmëtyaktëpën, tukyaax tukjokëtë jam tëjkëjxm.

²⁸Këtii xytsyë'ëkëtëty mëti'ipë nini'kx yaj'o'kpyën, ka'ap myäyëtëty tyaj'ookëty yë anëmë; yë'ë Tios mtsë'ëkëtëp, jä'ä ko yë'ë myëët'ajtyp yë mëk'ajtën ets tyaj'atëkoyëty yë ja'ay ja y'anëmë mëët ja jyot nyini'kx jap ëyoowtaknjoty.

²⁹¿Ka'ap jëtää tu'ukpë ja meeny wyäkx yajtukujuy mäjtsk ja joonë? ets nitu'uk tääpë joon kyaka'ay naaxwiiny pën ka'ap ja Tios tyajkutuky.

³⁰E miitsëty ënät, yë'ëpaat yë mwaayëty mkëpajkëjxypyë, mëtyoy tyaj'ity tu'uktu'uk.

³¹Jëtu'unts miitsëty ka'ap mtsë'ëkëtëty. Wäänëni'ik miits mtsoowpaatë këtiinëm ja may joon.

³²Pën xynyikajpxpës ma ja'ayën, näjyëtu'unës nikajpxa'any maas ja nTeetyën tsajpjotmëpë.

³³Pën xykyuyu'tspës ma ja'ayën, näjyëtu'unës nkuyu'utsëty maas yë nTeetyën tsajpjotmëpë.

³⁴Ka'ap miits mmaytyëty mtajtëty ko yë'ëjës ja jotkujk'ajtën të nmëminy yaa naaxwiiny, ja tsipës të nyajminy.

³⁵Yë'ëjës të niminy ets ja ye'etyëjk tmëtsiptsoonëty ja tyeety, ja nëëx tmëtsiptsoonëty ja tyaak ets ja xäkxy tmëtsiptsoonëty ja tyaak më't,

³⁶ja ja'ay kyë'ëm jëëky kyë'ëm mëku'uk nëjkx myëtsiptsoonyë.

³⁷Pën ja tyaak tyeety wäänëni'ik tsyojkpy këtiinëm ëjts, ka'ap pyaat'atyë etsës nja'ay'atëty; ets pën ja nyëëx ets ja myaank ni'ik tsyojkpy këtiinëm ëjts, ka'ap pyaat'atyë etsës nja'ay'atëty.

³⁸Ka'apës xypyaat'aty n'ijxpëjkpë'atëty yë ja'ay mëti'ipë ka'ap ja wyinma'any mëk tpëjktä'äkyën ets y'ëyowëty ijxtëm tu'uk ja ja'ay jeexyë ja kyëruuts tpatsëmyën.

³⁹Jä'ä ko pën ka'ap wi'ix jyata'any, tëkoyaanp ja jyuukyajtën; e pën y'ëxmatsyp ja nyaaxwiinyëtë juukyajtën mëët ëjtskyëjxm, jä'ä pyaatäämpy ja juukyajtën xëmëkyëjxmëpë.

⁴⁰Pën miits mkupëjkëtëp, nän xykyupëjkpës ënäty ëjts; ets pën xykyupëjkpës, nän kyupëjkpy ënäty mëti'ipës xykyäjxpën.

⁴¹Pën ja Tios ja kyäjpxynyajxpë kyupëjkpy jä'ä ko kyäjpxynyajxpëty, nän yajmo'ojëp ja kuma'ayën mëti'ipë ja Tios kyäjpxynyajxpë ënäty yajmoopyën; ets pën ja oyjyä'äy kyupëjkpy jä'äkyëjxm ko y'oyjyä'äyëty, nän yajmo'ojëp ja kuma'ayën mëti'ipë ënäty ja oyjyä'äy yajmoopyën.

⁴²Pën myoopy ja nëë tu'ktsim ja pi'k ëna'k mëti'ipës xymyëpëjkpën, tëyës n'ëna'any ko y'ëxajëjäämpy ja kyuma'ayën.