Read Biblia Mixe de Quetzaltepec Mateo 12 Bible Online

Mateo 12 - Biblia Mixe de Quetzaltepec bible

Mateo 12

¹Tëkok yë Jesús nyäjxy säpëtë xëëw ma tu'uk yë tsajpmok kamën. Yuu'o'këtëp ënäty ja y'ijxpëjkpëtëjk, paaty ojts tniwa'aktë ja tsajpmok yon ets tnëtujktë ja tyëëm ets ojts tkääptë ja tsajpmokpajk.

²Ko ja fariseë ja'ayëty jëtu'un t'ijxtë, ënät t'ënëmaaytyë ja Jesús: Ix yë m'ijxpëjkpëtëjk y'ëtë'ëtstë, yë'ë tyuuntëp ka'apë mëpaat säpëtë xëëw yajtunyën.

³Ets ja Jesús y'ëtsooy: ¿Ka'anëm miits xykyajpxtë mëti'ipë ja David tyuunën ko ja yuu pyatëtë mëët ja myëku'uktëjkë?

⁴Tios tyëkoty ojts tyëkë ets tkaaytyë ja tsajpkääky mëti'ipë ënäty ja Tios të yajtuknipëjktaakën, ka'apë kyutukyëtyën David tkayëty ets ni myëku'uktëjk; yi'iyë ja teetytyëjkëty patëtëp tkaytyëty.

⁵Ëkë ¿këtiinëm xykyajpxtë ja Moisés ja y'ënä'ämën tyiy'ajtënë? ma y'ënä'änyën: ko yë teetytyëjkëty ka'ap pyokyëty tuntë, oy kyapo'kxtë säpëtë xëëw jap tsajptëkoty.

⁶Tëy miits n'ënëëmëtë ko tää yaa wäänë mëjpë tu'uk, këtiinëm ja mëjtsajptëjk.

⁷Jëtu'un ja Tios ja y'aaw y'ayuk y'ënä'äny: Yë'ëjës ntsojkpy ets xymyëët'atëty ja pa'ëyo'owën, ka'ap yë'ëjëty koos xytyukwintsë'ëkëtëty ja jëyujk tsajpkaa. Ko jeexyë xy'ëkwinmëtowtë pën wi'ix jëtu'un tijy, ka'ap jeexyë xypoky'ixtë mëti'ipë ka'ap tii poky tuntën.

⁸E jëtu'un, yë Naaxwiinyëtë ja'ay y'u'unk myëët'ajtyp ja kutujkën ma säpëtë xëëwën.

⁹Ënät ja Jesús jam tsyo'ony ets ojts tyëkë ma tu'uk ijxpëjktaknën.

¹⁰Tap ënäty tu'uk ja ye'etyëjk mëti'ipë ja kyë'ë të'ëtsën tu'k'atu'um; ja ja'ayëty mëti'ipë myëtsip'ajtëpën ja Jesús ënätyë ojts wyinma'any'ixta'atë wi'ix t'ëkyajka'atëty ja Jesús, paaty t'ënëmaaytyë: ¿Mëpaat'ajtp tu'uk yë pa'amja'ay tsyo'oky säpëtë xëëwë?

¹¹Tääts ja Jesús y'ëtsooy: ¿M'ëxmatstëp jëtää miits ja mkupixynyë ko ënäty të kyënaxy jutjoty po'kxënxëëwjotyë? ¿ka'ap jëtää xynyinëjkxtëty ets xyjyuutëtyë?

¹²Wäänëni'ik ja ja'ay tsyowpaaty këtiinëm ja kupixyny. Jëtu'unts kyutuky ko mëpaat yë oypyë ntu'unmëty säpëtë xëëw.

¹³Ënät ja Jesús ja ye'etyëjk t'ënëmaay: Xajtëw. Tääts ja ye'etyëjk xyajtëëy ets ja kyë'ë oy mëk ojts wyi'imy ijxtëm ja oypyën.

¹⁴Ënät ja fariseë ja'ayëty tsyo'ontë ets tkäjpxy'ajtë wi'ix ja Jesús tyaj'ooka'antën.

¹⁵Ko ja Jesús tnija'awëy, tääts jam tsyo'ony. Nimay ja ja'ay pyatso'onë. Jesús yajtsoktaay ja pa'amja'ay,

¹⁶ets ojts tni'ënä'ämë ets ka'ap yajnikajpx yajnimëtya'akëty.

¹⁷Jëtu'un tyuunë jyajtë ets y'atëwëty ja aaw ayuk mëti'ipë ja käjpxynyajxpë Jeséas ojts tnikäjpxyën, ko y'ënäny:

¹⁸Tyaajës ja ntuunpë mëti'ipës të nwin'ixyën, mëti'ipës oy ntsojkpy ets jotkujkës mëët yë'ë, jamës ja nJa'awën mpëjkta'aka'any ma yë'ëjën, yë'ë kyajpxwa'kxëp pën wi'ixës ja naaxwiinyëtë ja'ay npaye'eyä'äny ijxtëm pyaat'atyë.

¹⁹Ka'ap tsyiptuna'any, ni kyaya'axa'any kyajjoka'any, ka'ap pën tmëtowëty në'ëjoty tu'ujoty.

²⁰Jëtu'un yë'ë ijxtëm tu'uk ja ja'ayën mëti'ipë ka'ap tëjyën ja tsajpkäpyny mëti'ipë tëjjanëpën, ets ijxtëm tu'uk ja ja'ayën mëti'ipë kyayajpi'tsypyën ja jëën mëti'ipë pi'itsanëpën, koonëm tyajmëta'akëty ja oypyë ja nipaye'eyën,

²¹ets oymyaajëty ja ja'ay myëpëkëtëty.

²²Ojts ja Jesús tukninëjkxtë tu'uk ja ja'ay wiintspë ets uumpë, mëti'ipë myëët'ajtyp yë ku'oypyë. Ënät ja Jesús tyaj'ijxë'ky, tyajkajpxë'ky ets jëtu'un tjëpëjky ja ku'oypyë.

²³Janty mëk ja ja'ay tja'awëtyë ets jaxim jayam tyajtëëwtë: ¿Jä'ä jëtää ya'atë David tyëëm y'aatsë?

²⁴Ko ja fariseë ja'ayëty jëtu'un tmëtoowtë, ënät y'ënantë: Yë ku'oypyë wintsën ya'atë ja'ay mooyëp yë myëk'ajtën, paaty yë ku'oypyë t'ixkexy.

²⁵Nyija'awëy ja Jesús wi'ix ja ja'ay myäytyën tyajtën, paaty t'ënëmaay: Tu'kë'ëyë naax kajpn mëti'ipë kanaakpëky të nyäwyä'kxyën aak mëtsip nye'ixëtë, tääts kë'ëm nyäyajkutëkoyë; näjyëtu'un ja kajpn ëkë ja'ay tu'kjëën tu'ktëjkpë të nyäwya'kxëtën ¿wi'ix ja myëk'ajtën kyutujkën t'ëkmëët'atëty?

²⁶Näyjyëtu'un ja ku'oypyë, pën y'ixkejxyp ja myëku'oypyë, tëë ënäty kë'ëm nyäyajwä'kxyë; ¿wi'ixtsën ja myëk'ajtën kyutujkën tmëët'ata'any?

²⁷Miitsëty, jëtu'un m'ëna'antë koos paatyës yë ku'oypyë n'ixkexy jä'ä ko yë'ëjës yë ku'oypyë wintsën xymyoopy yë mëk'ajtën; e pën jëtu'un, ¿pën miits ja mja'ay mooyëtëp ja myëk'ajtën ko ja ku'oypyë t'ixkäxtë? Paatykyëjxm, yë'ë kë'ëm yajwinkëxë'ktëp ko miitsëty ma'at ja mwinma'anyëty.

²⁸Jä'ä koos pën yë'ëjës mëët yë Tios yë myëk'ajtën n'ixkejx yë ku'oypyë, tääpë jä'ä yajja'akyukë ko tëëjën jyä'ty ja tsajpjotmëpë kutujkën ma miitsëtyën.

²⁹¿Wi'ix jap pën tyëkëty tëkoty ja mä'tspë ma ja'ay tsyëënën mëti'ipë mëkën? ënät tëy ko jëyëjp ja mëkja'ay yajkë'ëtsum yajtekytsyumëty, jyëkyejpy jap jyänty myäätsëty.

³⁰Mëti'ipës ja'ay ka'ap xypyukajpxën xymyëtsip'ajtpës yë'ë; mëti'ipë ka'ap tii tpëjkmukyën mëët ëjts, jëtu'unyë winë tko'owtë.

³¹Paaty miits n'ënëëmëtë ko yë Tios pyokynyimä'kxäämpy yë ja'ay ma winë t'ëëwtëkoy tkajpxtëkoyën; yë'ë tëy ka'ap tnimä'kxa'any mëti'ipë ja Kënu'kxymyëkajtën myëkajpxtëkoopyën.

³²Nyimä'kxäämpy yë Tios ja ja'ay mëti'ipë myëkajpxtëkoopyën ja Naaxwiinyëtë ja'ay y'U'unk; yë'ë tëy pën myëkajpxtëkoopy ja Tios ja kyënu'kxymyëk'ajtën ka'ap yajnimä'kxa'any tyam ma naaxwiiny jyuuky'ätyën ets ni jää ma ënäty y'ookyën.

³³Pën oy ja kepy, oy tyëëm'aty; e pën ka'ap y'oyëty, ka'ap oy tyëëm'aty. Tyëëm ja kepy yajtuk'ijxkajp.

³⁴Tsa'any miits mteety'ajt m'ap'ajtëp, ¿wi'ix tii oy xy'ëkkajpxtëty pën ëxëëk ja mjot mwinma'anyëty?, jä'ä ko aawjoty jootjoty ja ayuk pyëtsimy mëti'ipë yajkajpxpën.

³⁵Ja oyjyä'äy, oy ja kyäjpxy myëtyä'äky, jä'äkyëjxm ko oy ja jyot wyinma'any; e ja ëxëëk ja'ay, ëxëëk ja kyäjpxy myëtyä'äky, jä'äkyëjxm ko ëxëëk ja jyot wyinma'any.

³⁶E ëjts, jëtu'un yam miits n'ënëëmëtë, ko ja paye'eyën tyunëtëty, nëjkxëp xynyikajpxta'atë ja ëxëëk aaw ëxëëk ayuk mëti'ipë ënäty të xykyajpxtën.

³⁷Jä'ä ko mkë'ëm'aaw mkë'ëm ayuk nëjkx myajtukpaye'eytyë; oytyuuy mwë'ëma'antë pën oy ënäty winë të xytyuntë; ëxëëktum pën ëxëëk ënäty winë të xytyuntë.

³⁸Tam ja fariseë ja'ayëty ets ja tsajptëkotyëtë yaj'ijxpëjkpëtëjk mëti'ipë ja Jesús y'ënëmaaytyën: Wintsën, yë'ëjës yë mëj'ajtën ntsojktëp ets xyaj'ixëtëty.

³⁹Ënät ja Jesús y'ëtsoowëtë: Ya'atë ëxëëkja'aytyëjkëty ka'apë tmëët'atën yë'ë y'amëtoowtëp ets ja mëj'ajtën nyaj'ixëtëtyës; je'eyëp ko ka'ap tii mëj'ajtën y'ëkyajtuk'ixanëtë yi'iyë yajtuk'ixantëp mëti'ipë käjpxynyajxpë Jonás ojts tjuuky'ätyën.

⁴⁰Jëtu'un ijxtëm ja Jonás ojts tëkëëk xëëw tëkëëk tsuu y'ijtyën jap ajkx jootjoty, näjyëtu'unës tëkëëk xëëw tëkëëk tsuujës n'itëtä'any naaxjoty. Ëjts, naaxwiinyëtë ja'ay y'U'unk.

⁴¹Ko nëjkx ja naaxwiinyëtë ja'ay yajpaye'eytyë ja nyëë pyokyëty, tso'onkantëp ja Nínive ja'ayëty, jä'ä ko yë'ëjëty ojts yë Tios tmëpëktë ko ja Jonás ojts tyukmëmëtya'akëtë ja Tios ja y'aaw y'ayuk, ets mëti'ipë tyam yaa yajpatpën mëj'äämpy ni'ik këtiinëm ja Jonás.

⁴²Näyjyëtu'un ko nëjkx ja naaxwiinyëtë ja'ay yajpaye'ey, tso'okaanp ja To'oxytyëjk yajkutujkpë jampë y'ëne'emyën ëpa'tkë'ëmtsow; jä'äkyëjxm ko jëkäm tsyo'ony ets ja Salomón tnimiiny ets tmëtoow'ita'any ja ëëwij kajpxwijën mëti'ipë wijy Salomón nyimëtyäkpyën ets mëti'ipë tyam yaa yajpatpën mëj'äämpy ni'ik këtiinëm jyëtu'unëty ja Salomón.

⁴³Ko tu'uk ja ku'oypyë t'ëxmatsy ja ja'ay ets nëjkx jyëtity të'ëts'itjotm, t'ixta'ay ja po'kxtakn, ets ko tkapaaty tä myäy tyäjy:

⁴⁴Wimpitëpës ënät jatëkok maas të ntsoonyën. Ko wyimpity jëtu'un ja ja'ay tpaaty tä tu'uk yë tëjkën tukwa'atspë, päätë'ëky ja'axë'ëky.

⁴⁵Ënät tsyoony ets nëjkx tjaakwoy niwëxtujk ja myëku'oypyë ets jap tyëkëtë ma ja ja'ayën tsënääpyë; ja ja'ay ni'ik o'ktëy y'awinpity këtiinëm ënäty jëtu'un të y'ity. Näyjyëtu'un jyata'antë ja ëxëëkja'aytyëjkëty mëti'ipë tyam juuky'ajtëpën.

⁴⁶Tamnëm ënäty ja Jesús ja mayjyä'äy tmëëtmëtyä'äky ko myiintë ja tyaak ets ja myëkä'äxtëjk. Jäpyë tëjk ëkë'p ojts wyë'ëmtë, Jesús myëkajpxantëp.

⁴⁷Jap tëkoty ja Jesús ojts pën tyuk'ëwaanëty: Tap tëjk ëkë'p yë mtaak ets mmëkä'äxtëjk tyänëtë, mijtsëk mmëkajpxanëtëp.

⁴⁸Tääts ja Jesús y'ëtsooy: ¿Pës ntaak'ajtypës ets pën nmëkä'äx'ajtypës?

⁴⁹Ënät ja y'ijxpëjkpëtëjk tni''ijxëy ets y'ënäny: Ya'atës ntaak'ajtyp ets ya'atës nmëkä'äx'ajtyp.

⁵⁰Jä'ä ko pën tyuunpy mëti'ipës yë nTeety tsajpjotmëpë tsyojkpyën, yë'ëjës nmëkä'äx'ajtyp ets yë'ëjës ntaak'ajtyp.