Read Biblia Mixe de Quetzaltepec Mateo 13 Bible Online

Mateo 13 - Biblia Mixe de Quetzaltepec bible

Mateo 13

¹Näy jä'ä xëëw ja Jesús pyëtsiimy tëkoty ets ojts nyijkxy mejypyë'am ets jam nyaaxwe'tsy.

²Jä'ä ko janty nimay ja ja'ay myujktë, paaty ja Jesús ojts tyëkë kepy nëëwinye'epyëjoty. Jamts nyaaxwe'tsy ets ja mayjyä'äy jam tyänëtë jinjotm.

³Tääts yaj'ijxpëjktso'ony, kanaakpëky ja winma'any ojts tkäjpxy aakmëët yë nyi''ijxpäjtën ets y'ënëmaayëtë: Tu'uk ja ja'ay tsyo'ony tsajpmok wëjpë.

⁴Ets ko ja tyëëmp twëjjëtijty, tääts tu'kpëky ja tëëmt ojts kyä'äy tu'ujotm. Ënät ja joon myiintë ets tpiiwmujktë.

⁵Jatu'kpëky ja tëëmt ojts kyä'äy tsaajoty, ma ja naax ka'ap myäjpxyëtyën. Tsojk myujxy, jä'ä ko ka'ap ja naax myäjpxyëty.

⁶Ko ja xëëw pyejty, tääts xyo'tstaay ets tyitsy, jä'ä ko ka'ap ja tyikts.

⁷Jatu'kpëky ja tëëmt ojts kyä'äy äpny akujky. Ko ja äpny yoony, tääts nyi'a'ampejty ets tyitsy.

⁸E jatu'kpëky ja tëëmt ojts kyä'äy jë'kxynyaaxjoty. Ojts ja tyëëm'aty. Tam ja tëëmt mëti'ipë pajk'ajtën mëko'px, tam mëti'ipë pajk'ajtën tëkë'px ets tam mëti'ipë i'px majkën.

⁹Pën ja tyatsk mëtoop, wä'än tmëtoowkukë.

¹⁰Tääts ja Jesús ja y'ijxpëjkpëtëjk nyimiinëtë ets yajtëëwëtë pën tii ko ja ja'ay tyaj'ijxpëky mëët ja ijxpäjtën.

¹¹Tääts ja Jesús y'ëtsoowëtë: Miitsëty tëë ja Tios mtuknijawëtë mëti'ipë yu'utsy myëët'ajtypyën jam ma tsajpjotmëpë kutujkënën, e yë ja'ayëty ka'ap tnijawëtë.

¹²Pën tii myëët'ajtyp, wäänëni'ik jyaak timyajmo'oja'any; ets pën yiin wäänë myëët'ajtyp, jaaktimyajpëjkëjäämp tu'kë'ëyë mëti'ipë myëët'ajtypyën.

¹³Paatyës nmëmëtya'aktë mëët ja ijxpäjtën, jä'ä ko tja'ixtë ka'ap tja'akyukëtë ets ko tjamëtowtë ka'ap tmëtoowkukëtë.

¹⁴Jëtu'un yë'ë jyatë ijxtëm ja Tios ja kyäjpxynyajxpë y'ënänyën: Oy miits jënu'un xyjyamëtowtë, ka'ap xymyëtoowkukëtë; oy miits jënu'un xyjya'ixtë, ka'ap xyjyä'äkyukëtë,

¹⁵Jä'ä ko tëë ya'atë ja'ay jyot wyinma'any juun y'awinpitë, ëtuky yë tyatskëty, ets ëtuky yë wyiinëty, këtiipë y'ixtëty ets këtiipë myëtowtëty, këtiipë jyä'äkyukëtëty ets këtiipë xynyiwinpitëtyës, ets jëtu'un ka'ap tjëkyepy nyajtso'oktëtyës.

¹⁶E miitsëty akujk jotkujk myajpaatë, jä'äkyëjxm ko ja mwiin xytyuk'ixtë ets ko ja mtatsk xytyukmëtowtë.

¹⁷Tëy miits n'ënëëmëtë ko nimay ja Tios ja kyäjpxynyajxpë ets ja wa'ats ja'aytyëjkëty tja'ixantë mëti'ipë miits tyam m'ijxtëpën ets ka'ap ojts t'ixtë; ojts tjamëtowa'antë mëti'ipë miits tyam mmëtoowtëp ets ka'ap ojts tmëtowtë.

¹⁸Mëtoow'itë yajxon tii nyimëtyäkpyën ja ijxpäjtën ko ja'ay tsyajpmok wëjy.

¹⁹Ja tëëmt mëti'ipë ojts kyä'äyën tu'ujotm, jëtu'un jä'ä ijxtëm ja ja'ayëtyën mëti'ipë të t'amëtoow'itën ja Tios ja y'aaw y'ayuk ets ka'ap tja'akyukëtë; ënät myiiny ja mëjku'u ets pyëjkxëtë ja Tios ja y'aaw y'ayuk mëti'ipë të jyayajni'ipyën ma jyot wyinma'anyën.

²⁰Ja tëëmt mëti'ipë ojts kyä'äyën tsaajotm, jëtu'un jä'ä ijxtëm ja'ay tmëtoow'itën yë Tios y'aaw y'ayuk ets akujk jotkujk tkupëktë.

²¹Je'eyëp ko ka'ap ja tyikts kyëkëty, ka'ap mëk yajpaatë. Ko ënät yajpajëtijta'aktë ënätyë t'ëxmatstë mëti'ipë të tja'amëtoow'itën.

²²Ja tëëmt mëti'ipë ojts kyä'äyën äpny akujk, jëtu'un jä'ä ijxtëm ja ja'ay Tios y'aaw y'ayuk t'amëtoow'ijtëtën, je'eyëp ko yë'ë myëmaay myëtajtëp ja ajuuy ato'k ets mëk tsojkën'atë ja wit meeny ets yë'ë nyätyukwin'ëënëtë. Tu'kë'ëyë ya'atë, yë'ë yajkumo'onëtyääpy ja Tios ja y'aaw y'ayuk mëti'ipë të tjamëtoow'ityën ets ka'ap maa wyinkëxë'ëky.

²³E ja tëëmt mëti'ipë ojts kyä'äyën jë'kxynyaaxjoty, jëtu'un jä'ä ijxtëm ja ja'ay ja Tios ja y'aaw y'ayuk t'amëtoow'ijtëtën ets tmëtoowkukëtë ets tyajwinkëxë'ëktë. Jëtu'un jä'äjëty ijxtëm ja tëëmt mëti'ipë pajk'ajtpën mëko'px, tam mëti'ipë pajk'ajtpën tëkë'px ets mëti'ipë pajk'ajtpën i'px majk.

²⁴Tääts ja Jesús tnimëtyäky wiinkpë ja ijxpäjtën: Yë tsajpjotmëtë kutujkën jëtu'un yë'ë ijxtëm ja ja'ay twëjyën yë oytyëëmp kyamjotm.

²⁵Ko ënäty jap ni'ëmukë mya'atë, ënät ja kukam ja myëtsip të tkuniipë ja ëxëëk ujts jap kamjoty ma ja tsajpmok kamën.

²⁶Ko ja tsajpmok yoony ets tyëëm'ajtë'ky, ënät ojts näjyëtu'un ja ëxëëk ujts yoonpëtsëmy.

²⁷Ënät ja tuunpëtëjk tninëjkxtë ja wyintsën ets t'ënëmaaytyë: Wintsën, aak oytyëëmp ojts xywyijy jam mkamjotm, ¿këtiijë? ¿E wi'ix ko ëxëëk ujts jam?

²⁸Tääts ja wyintsën y'ëtsoowëtë: Mëtsip jëtu'un të y'ëti'itsy. Tääts ja tuunpëtëjk tyajtëëwtë: ¿Mtsojkpy etsës nëjkx ja ëxëëk ujts nwijxmuktë?

²⁹Tääts ja wintsën y'ëtsoowëtë: Ka'ap, ko nëjkx xywyixtë ja ëxëëk ujts, tsojk nëjkx näjyëtu'un xywyixtë ja tsajpmok.

³⁰Nikë oy ko n'ëxmajtsmëty, wä'än mëët tu'ukyë tyony ja pëjktä'äky. Jäänëm yajwixëty ko ja pëjktä'äky pyëtë'ëkëty. Ënätës ni'ënä'ämëty ets jëwyiin ëpëky tpëjkta'aktëty ja ëxëëk ujts atsuumtä'äkyäty ets yajnino'okëty, ok yajpëjkë'ëkëty jap tëkoty ja tsajpmok.

³¹Ojts näjyëtu'un yë Jesús tnimëtyä'äky ya'atë ijxpäjtën: Jëtu'un ja tsajpjotmëpë kutujkën ijxtëm ja mostasë pajkën mëti'ipë tu'uk ja ja'ay nyipën kyamjotm.

³²Yë mostasë tëëmt yi'inëm yë'ë, këtiinëm wiinkpë ujtspajk; je'eyëp ko yony wäänë këjxm yony këtiinëm jëtu'un ja wiink ujtsëty kamjotypë, ets ja joon myintë jam ma xye'entyën, jam pyo'kxtë.

³³Ojts näjyëtu'un tyukmëmëtya'akëtë ya'atë ijxpäjtën: Jëtu'un ja tsajpjotmëpë kutujkën ijxtëm ja levadura, mëti'ipë ja to'oxytyëjk tëkëëk kijpxn tyukmëtijëyën ja tsajpmokway. Ënät ja levadura tuktëjkëtyääy ja jësty.

³⁴Aakmëët ja ijxpät ojts ja Jesús myëtyä'äky ets jëtu'un ja ja'ay tyaj'ijxpëjky, nijëna'a ojts kyamëtyä'äky ijxpäjtëntuk.

³⁵Paaty ya'atë tyuunë jyajtë ets y'atëwëty mëti'ipë Tios tyukkajpxnajxën ja kyäjpxynyajxpëtëjkëty: Mëëtës yë Ijxpät nmëtya'aka'any; nikajpxëpës mëti'ipë ka'anëm yajnijawën ko naaxwiinyëtë tsyo'ontäky ets tyampaat.

³⁶Tääts ja Jesús ojts nyäjyëkäjpxyë ma ja mayjyä'äyën ets tyëjkëy tëkoty, jap ja y'ijxpëjkpëtëjk y'ënëmaayëtë ets ja ëxëëk ujts nyi''ijxpät tkajpxtë'kxëty.

³⁷Tääts ja Jesús y'ëtsooy: Yë naaxwiinyëtë ja'ay y'U'unk, yë'ë ja oytyëëmp nyipy,

³⁸e yë naaxwiinyëtë, yë'ë kam'ajtp. Ja oypyë tëëmt yë'ë ja ja'ayëty mëti'ipë yajpatëpën ma tsajpjotmëtë kutujkën, e ja ëxëëk ujts yë'ë ja ja'ayëty mëti'ipë ja mëjku'u jä'ä'ajtëtëpën.

³⁹Ja mëtsip yë'ë ja mëjku'u mëti'ipë nyipën ja ëxëëk ujts. Ko ja pëjktä'äky pyëti'iky yë'ë tyijpy ko ja naaxwiinyëtë kyukëxëja'any; e mëti'ipë ja pëjktä'äky yajpëtë'ktëpën yë'ë ja anklëstëjkëty.

⁴⁰Jëtu'un ijxtëm ja ëxëëk ujts yajwijxmukyën ets yajjëënkupëky ets jap nyitoy, näjyëtu'un jyata'any ko ënäty ja naaxwiinyëtë kyukëxë.

⁴¹Yë naaxwiinyëtë ja'ay y'U'unk kyäxäämpy ja y'anklëstëjk ets twoowmujkta'aja'any ma kyutujktaknën mëti'ipë ja myëku'uk yajpokytyuuntëpën ets mëti'ipë ja ëxëëkpë tyuunk'ajtëpën.

⁴²Jap yajpëjkta'aka'antë ma ja jëën mëj tyoyën, ma jyë'ëtëty ya'axtëty ets tyipkä'äxtëtyën.

⁴³Ets nëjkx ja wa'ats ja'aytyëjk jyajtë tyë'kxtë tä xëëwën ma ja Tyeety ja kyutujktaknën. Mëti'ipë mëtoowtëpën wä'än tmëtoow'itë.

⁴⁴Jëtu'un ja tsajpjotmëpë kutujkën tä wit meenyën mëti'ipë yu'utsy ijtpën ma tu'uk ja kamën. Tu'uk ja ye'etyëjk tpaaty ets jatëkok nän jam tyu'utsy; akujk jotkujk nyijkxy ets tooky tiijaty myëët'ajtypyën ets tjuy ja naax ma ja wit meeny të tpaatyën yu'utsy.

⁴⁵Näyjyëtu'un ja tsajpjotmëpë kutujkën ijxtëm tu'uk ja ajuupyë ato'kpën mëti'ipë ja perla oypyë y'ixtääpyën.

⁴⁶Ko tpaaty tu'uk mëti'ipë janty tsowën, ënät nyijkxy ets to'kta'ay tiijëty myëët'ajtypyën ets tjuy ja perlas.

⁴⁷Yë tsajpjotmëpë kutujkën tsojk jëtu'un mpëjktakmëty tä tu'uk yë tsaay ajkxmajtsn mëti'ipë yajnëëkujëpijpën ets tkujëpipy kanaakjëjp ja ajkx.

⁴⁸Ko ja tsaay y'utsy tääts tjuutë ets tpëjkta'aktë jam nëëpë'am. Jamts twinpiwtë ja ajkx. Mëti'ipë oyën jä'ä pyëjkë'ktëp e mëti'ipë ka'ap y'oyëtyën jä'ä y'ëxwëjtëp.

⁴⁹Näyjyëtu'un jyata'any ko ënäty ja naaxwiinyëtë kyukëxë. Minantëp ja anklëstëjk ets twinwitsa'antë ja oyjyä'äy ka'oyjyä'äy.

⁵⁰Jëtu'un yajpëjkta'aka'antë ja ka'oyjyä'äytyëjk jap jëënjoty ets nëjkx tyëkëtë jëëpyë yaxpë ets tyipkä'äxtëty.

⁵¹Tääts ja Jesús tyajtëëy: ¿Mwinmëtoowtëp tu'kë'ëyë ya'atë? Ets y'ëtsoowtë: Jëtu'un, Wintsën. Nwinmëtoowtëpës.

⁵²Ënät ja Jesús y'ënëmaayëtë: Ko tu'uk tsajptëkotyëtë yaj'ijxpëjkpë yajtukni''ixë ja tsajpjotmëpë kutujkën, jëtu'un tä tu'uk ja'ayën mëti'ipë kutëjk'ajtpën, nyija'ap mëti'ipë jap tëkoty myëët'ajtypyën pëjkë'ëky, ets ko tii jap tyajpëtsëma'any nyija'ap mëti'ipë jemyën ets mëti'ipë tëkën.

⁵³Ko ja Jesús tnimëtyaktaay ja ijxpäjtën, ënät jam tsyo'ony,

⁵⁴ets ojts jyä'ty kyajpnjoty. Jam ojts yaj'ijxpëjktsoony tsajptëkotm. Janty mëj'ixy ja ja'ay tja'awëtyë ets y'ënantë: ¿Ma ya'atë ja'ay jëtu'unpë ijxpëjkën të tjaty? ¿Wi'ix myäyë mëj'ajtën tyaj'ixëtëty?

⁵⁵¿Këtii yë'ëjëty ja tsäjtspë y'u'unkë ets taak'aty yë Maria? ¿Këtii yë'ëjëty yë Santiago myëkä'äx mëët ja José, Simón ets ja Judas?

⁵⁶¿ets këtii yaajëty yë tsyë'ë ets y'uty to'oxytyëjkpë tsyëënëtë? ¿Maa tyajtsoony mëti'ipë nyija'apën?

⁵⁷Ets ka'ap ojts t'oyjyawëtë ja Jesús: Tääts ja Jesús y'ënëmaayëtë: Oymyaajëty, mëj'äämpy ja'ay tjëkyäptë yë Tios yë kyäjpxynyajxpë; jam ma kyë'ëm naax kyë'ëmkajpnën ka'ap ja'ay jam myëj'ixyë.

⁵⁸Ets ka'ap ja Jesús jam ja mëj'ajtën may tuuny, jä'ä ko ka'ap ja ja'ay myëpëkyë.