Read Biblia Mixe de Quetzaltepec Mateo 14 Bible Online

Mateo 14 - Biblia Mixe de Quetzaltepec bible

Mateo 14

¹Näy jää it ja yajkutujkpë Herodes ojts tmëtoy'äty ja Jesús ko yajnimëtyä'äky. Yë Herodes jam ënäty yajkutuky Galilea,

²ets t'ënëmaay ja tyuunpëtëjk: Yë'ë ja Juan Yajnëëpäjtpë të jyuukpyiky, paaty tuny winë mëët yë mëj'ajtën.

³Jä'ä ko tëë ja Herodes ënäty tni'ënä'ämë ja Juan ets yajmatsëty wä'än tsumy t'ity. Ja y'uty Filipo ja tyo'oxytyëjk mëti'ipë xyëëwajtypyën Herodías yë'ë ënäty të y'ënë'ëmxëty ets tmatsëty ja Juan,

⁴jä'ä ko yë Juan tëë ënäty t'ënëëmë ja Herodes: Ka'ap tjëkyepy mijts xytyo'oxytyëjk'atëty yë m'uty yë tyo'oxytyëjk.

⁵Oy ja Herodes tjayaj'ooka'any ja Juan, tsyë'këp ja mayjyä'äy, jä'ä ko ja mayjyä'äy jëtu'un myäytyë tyajtë ko ja Juan Tios kyäjpxynyajxpë yë'ë.

⁶E jää ma ja Herodes nyänyixëëwtunyën, ma ja xyëëw kyä'äxpäjnën, ënät ojts ja Herodías ja nyëëx tyëkë äjtspë, tap ënäty ja ja'ay jyatëtë ets ja Herodes tyukjotkëtak ko ja Herodías ja nyëëx y'ejtsy.

⁷Ënät tukwinwa'anëy wä'än tiijëty, tii y'amëtoopyën.

⁸Ja kiixy tëë ënäty ja tyaak y'akajpxëty, ënät t'ënëmaay ja Herodes: Yaa xyakëty texyjoty ja Juan Yajnëëpäjtpë ja kyëpajk.

⁹Ja yajkutujkpë Herodes ko jëtu'un tmëtooy ka'ap ojts jotkujk nyäjyawëty, e komë tëë ënäty ja mayjyä'äy tukmëtoy ko yakäämpy tii tyim'amëtoopy ja to'oxy'ëna'k, ënät ni'ënä'ämëy ets ja Juan ja kyëpajk yajmo'ojëty texyjoty.

¹⁰Ënät ni'ënä'ämëy ets ja Juan ja kyëpajk yajkatspuxëty jap pujxn tëkoty.

¹¹Tääts ojts tmënëjkxtë texyjoty ets tmooytyë ja to'oxy'ëna'k ets ja to'oxy'ëna'k tmooy ja tyaak.

¹²Ok jyajtë ja Juan ja y'ijxpëjkpëtëjk, ets jap pujxn tëkoty tmëtpëtsëëmtë ja o'kpë ets tyajnaaxtëjkëtyë. Ojts tninëjkxtë ja Jesús ets tukmëmëtyaktë.

¹³Ko ja Jesús tnija'awëy, ënät jam nätyu'uk tsyo'ony kepy nëëwinye'epyëjoty, jëkäm ojts nyijkxy. Ko ja ja'ay tnija'awëtyë ënät tsyo'ontë ma ja kyajpnëtyën ets ojts t'anëjkxëtë ja Jesús tekye'epy.

¹⁴Ko ja Jesús pyëtsiimy kepy nëëwinye'epyëjoty ets t'ixy ja mayjyä'äy, ënät tpa'ëyooy ets tyajtsoky ja pa'amja'ay mëti'ipë ënäty të tmëmintën.

¹⁵Tsu'ujënëp ënätynyë, ko ja y'ijxpëjkpëtëjk myëwinkoonëtë ets y'ënëmaayëtë: Tëë tsyu'ujënë ets apak ya'atë it. Wimpakäjxnë yë ja'ayëty, wä'än nëjkx yë kyääky tyojkx tjuytyë kajpntum.

¹⁶Tääts ja Jesús y'ëtsoowëtë: Ka'ap tyimkëwanëty ets nyëjkxtëty, yajkaytyë miitsëty.

¹⁷Ets y'ëtsoowtë: Je'eyë ëëts tmëët'atë mëkoxk yë tsajpkääky ets mäjtsk yë ajkx.

¹⁸Tääts ja Jesús y'ënëmaayëtë: Yaa yajmintë.

¹⁹Ënät ni'ënä'ämëy ets ja mayjyä'äy nyaaxwäätstëty ujtskëjxy. Tääts tkoonë'ky ja mëkoxkpë ja tsajpkääky ets mäjtsk ja ajkx. Ënät pya'at'ijxy tsajpkëjxm ets ojts tkënu'kxy. Tääts ojts tujkwä'kxy ja tsajpkääky ets tmooy ja y'ijxpëjkpëtëjk, e ja y'ijxpëjkpëtëjk ots tkumaaytya'atë ja mayjyä'äy.

²⁰Ni'ëmukë ja ja'ay kyääytyääytyë ku'uxyë. Ënät tpëjkmujktë ja tsajpkääky natëkë, majkmäjtsk katsy ojts wyinmuky mëët ja ajkx natëkë.

²¹Nimëkoxk mil ja ye'etyëjk y'ijtë mëti'ipë ojts kyäytyën, ëpëky ja to'oxytyëjkëty ets ja pi'k ëna'këty.

²²Ok ma ya'atë jëtu'unpë tyuunën jyaajtën, ënät ja Jesús ja y'ijxpëjkpëtëjk tyajtëjkëy kepy nëëwinye'epyëjoty ets jëyëjp myejy nyaxtëty, jä'ä ko ja Jesús ëtyä'äkyë'äämpy ënäty jam y'ëknäjyëkyäjpxyë ma mayjyä'äyën.

²³Ko nyäjyëkajpxë, tääts pya'tëjkëy nätyu'uk jam kopkëjxm Tios mëkajpxpë. Ko kyootsëy, nätyu'uk ënäty jam yajpaaty,

²⁴ja kepy nëëwinye'epyë tëë ënäty këjää tmëjëkämkäknë ja wintë'ëts naax. Yajxon ja kepy nëëwinye'epyë jyänty pyojyu'kxy, jä'ä ko jëëmpit'äämpy ënäty pyojy.

²⁵Komjëpom, tim tsojk ojts ja Jesús nyinëjkxëtë ye'epy mejy wiinkëjxm.

²⁶Ko ja y'ijxpëjkpëtëjk y'ijxëtë ko ye'ey nëëwiinkëjxy, tääts ojts tsyë'ëkëtë ets yaxpë jojkpë tyëjkëtyë: Poj yë'ë.

²⁷Tääts ja Jesús y'ënëmaayëtë: Jotmëk yajpaatë. Ëjts yë'ë. Këtii mtsë'ëkëtë.

²⁸Ënät ja Pedro y'ëtsooy: Wintsën, pën mjanty mijts, yajkutuk etsës nnëjkxëty nëëwiinkëjxy ye'epy ma mijtsën.

²⁹Tääts ja Jesús y'ënäny: Min. Ënät ja Pedro pyëtsiimy kepy nëëwinye'epyëjoty ets ojts nyijkxy nëëwiinkëjxy ye'epy ma ja Jesúsën.

³⁰E ko mëk tja'awëy ja mëkpoj, ënät tsyë'këy ets nyëëkuyejtsy. Tääts yaxpë jojkpë tyëjkëy: Wintsën, yajpëtsëëmkës.

³¹Ënätyë ja Jesús ojts myätsyë kyë'ëkëjxy ets t'ënëmaay: Yi'inëm mijts ja mëpëjkën xymyëëtëty. ¿Tii ko të mmaaytyëkatsy?

³²Ko jap tyëjkëtyë kepy nëëwinye'epyëjoty, ënätyë ja poj nyäjxy.

³³Ets pënjaty ënäty jap kepy nëëwinye'epyëjoty, ojts nyäkyoxtënaaytya'akëtë Jesús wyintuuy ets t'ënëmaaytyë: Tëy jëtu'un, Tios U'unk mijts.

³⁴Ko tuknajxtë ja mejy ets jyajtë Genesaret y'itjotm.

³⁵Ojts ja ja'ay t'ixkajptë ja Jesús mëti'ipë ënäty jam kukajpnajtëpën. Jä'äts ja mëtyä'äky ojts tyajkye'eywya'kxtë jënu'un tu'kë'ëyë ja itjotmën ets tukninëjkxtaaytyë ja pa'amja'ay,

³⁶ets tmëpëjktsoowtë ko oy je'eyë tyukpaatëtëty ja wyit jëjp; ets tu'kë'ëyë mëti'ipë patëtëp ja wit, ojts tsyokta'atë.