Read Biblia Mixe de Quetzaltepec Mateo 16 Bible Online

Mateo 16 - Biblia Mixe de Quetzaltepec bible

Mateo 16

¹Tääts ja fariseë ja'ayëty ets ja saduceos tnimiintë ja Jesús ets twinma'any'ixa'antë, yë'ë ojts t'amëtowtë ja Jesús ets tunëty mëj'ajtën mëti'ipë yajknikëxë'ëkëp ko Tios të kyexyë.

²E ja Jesús jëtu'un y'ëtsoowëtë: Ko jyënäkyxyëëw'aty jëtu'un m'ëna'antë: Pojë'ëkanëptëm yë'ë, jä'ä ko xy'ixtë tsyaptsjajy;

³ets ko jyopyëp'aty, jëtu'un m'ëna'antë: kajtëm pyojë'ëka'any, jä'ä ko xy'ixtë tsyaptsjajy ets wyintuky. Pën miitsëty nëkooyë xynyija'awënëtë ¿wi'ix xyajkajpxtëtyën yë tsajp?, ¿wi'ix ko xykyanijawëtë? ja mëj'ajtën mëti'ipë tyam tuunëp jajtëpën.

⁴Ja ëxëëk ja'ay, mëti'ipë Tios y'ëxmajtstëpën, yë'ë y'amëtoowtëp ets tyunëtëty ja mëj'ajtën. Ka'ap tii mëj'ajtën yajtuk'ixa'antë, yi'iyë mëti'ipë ojts tyunyë jyätyën ko ja Jonás jyuuky'äjty. Tääts twinwa'ktuty ets ojts nyijkxy.

⁵Ko ja Jesús mëët ja y'ijxpëjkpëtëjk ja mejy tuknajxtë ets jyajtë jamtsow nëë'awinm, ja y'ijxpëjkpëtëjk ojts tja'atyëkoytyë ja tsajpkääky.

⁶Ënät ja Jesús y'ënëmaayëtë: Näkyëwent'atëtë. Këtii mnätyukwin'ëënëtëty yë tsajpkääkytsyooy mëti'ipë myëët'ajtëpën yë fariseë ja'ayëty ets saduceos ja'ayëty.

⁷Ënät ja y'ijxpëjkpëtëjk aak ayi'iyë nye'ëna'anëtë: Paty jëtää jëtu'un y'ënä'äny jä'ä ko ka'ap ja tsajpkääky të nmëmi'inëmë.

⁸Ojts ja Jesús tnijawë ko jëtu'un y'ëna'antë ets y'ënëmaayëtë: ¿Tii ko m'ëna'antë ko ka'ap xymyëët'atë tsajpkääky? Tim wäänë miits mmëpëktë.

⁹¿Ka'anëm xyjyä'äkyukëtë ets ka'ap xyjyä'ämyätstë koos ja tsajpkääky ojts nyajwä'kxy ma ja nimëkoxk mil ja ja'ayën ets ko ojts kanaak katsy nyatëkë ja tsajpkääky ets ja nëë jëyujk?

¹⁰¿Ets ni xykyaja'amyätstë koos ojts ja tsajpkääky wëxtujkpë nyajwä'kxy ma nimajktaxk mil ja ja'ayën ets ojts ëpëky nyatëkë mëti'ipë mpëjkmujktën?

¹¹¿Wi'ix miits xykyaja'akyukëtë ko ka'ap yë'ëjëty ntijyës yë tsajpkääky nyitsooy mëti'ipë yë tsajpkääky yajtukxëpiinpën? Näkyëwent'atëtë ko mtukpaatëtëty ja fariseë ja'ayëty ets saduceos ja tsajpkääky ja nyitsooy.

¹²Ënät tja'akyujkëtyë ko ënäty ka'ap yë'ëjëty tijy ja tsajpkääky ja nyitsooy, mëti'ipë ja tsajpkääky yajtuktsooyëpën, yë'ë tukmëmëtyakëtëp ja fariseë ja'ayëty ja y'ijxpëjkënëty ets ja saduceos ja wyinma'anyëty.

¹³Ko ja Jesús jyä'äjty jam Cesarea y'itjotm, ma ja Filipo kajpnën; ënät ja y'ijxpëjkpëtëjk tyajtëëy: ¿Wi'ix yë ja'ay y'ëna'antë, ko tnimëtya'aktë yë naaxwiinyëtë ja'ay y'U'unk?

¹⁴Ets y'ëtsoowtë: Tam mëti'ipë ënantëp ko mijts Juan Yajnëëpäjtpë, tam mëti'ipë ënantëp ko mijts mEliiësëty ets tam mëti'ipë ënantëpën ko mijts mJeremiiësëty ets wiinkpë y'ëna'antë ko Tios käjpxynyajxpë mijts.

¹⁵Tä ja Jesús tyajtëëy: E miitsëty ¿wi'ix m'ëna'antë, pën ëjts?

¹⁶Tääts ja Simón Pedro y'ëtsooy: MKristë mijts, ja juuky Tios ja y'U'unk.

¹⁷Ënät ja Jesús y'ënëmaayë: Akujk jotkujk mijts, Simón, Jonás yë myaank, jä'ä ko ka'ap jyä'äyëty të mtuknijawëty, Tios Teety tsajpjotmëpë yë'ë të mmo'oyë jëtu'unpë winma'any.

¹⁸Pedro mijts yë mxëëw. Jëtu'un mijts ijxtëm ja tsaajën maas ja tsajptëjk nkojë'ëka'anyën. Ets ni ja o'kën kyamëmëtaa'akëtëty.

¹⁹Nmo'ojäämpy ja tsajpjotmëpë kutujkën ja nyi'ëwatsn ets xynyikajpxëty mëti'ipë tuunp katuunpën. Pën tii mijts mkakupëjkpy yaa naaxwiiny, näjyëtu'un ka'ap yajkupëkëty jam tsajpjotm; ets pën tii mijts mkupëjkpy yaa naaxwiiny, näjyëtu'un yajkupëkëty jam tsajpjotm.

²⁰Tääts ja Jesús ojts t'ëne'emy ja y'ijxpëjkpëtëjk ets ka'ap pën tuk'ëwaanëtëty ko yë'ë Kristë.

²¹Tääts ja Jesús ja y'ijxpëjkpëtëjk tmëmëtyaktso'ony ets t'ënëmaay ko kwanë nyëjkxa'any jam Jerusalén ets ja mëjja'aytyëjk, ja teety wintsëntëjk ets ja tsajptëkotyëtë yaj'ijxpëjkpëtëjk yaj'ëyowa'anyë ets ja ja'ay yaj'ooka'anyë, je'eyëp ko kom tëkëëk xëëw jyuukpyëka'any jatëkok.

²²Ënät ja Pedro ëpëky wyoownëjkxë ets y'ojyë tä y'ënëmaayë: Ka'ap mëpaat yë Tios jëtu'un tyajkutuky Wintsën, ka'ap mëpaat jëtu'un mjaty.

²³Tääts ja Jesús wya'akwinpijty ets t'ënëmaay ja Pedro: Winwa'ktutkës mijts. Jëtu'un mkäjpxy ijxtëm yë mëjku'u tsokyën. Je'eyës mijts xy'atsipy. Ka'ap mwinma'any jyëtu'unëty ijxtëm yë Tiosën; jëtu'un mijts mwinma'any ijxtëm yë ja'ayën.

²⁴Tääts ja Jesús t'ënëmaay ja y'ijxpëjkpëtëjk: Pën tsyojkpy etsës n'ijxpëjkpë'atëty, wä'än ja kyë'ëm winma'any tja'atyëkoy ets ja wyinma'any mëk tpëjkta'akëty ijxtëm tu'uk ja ja'ay kyëruuts tpatsëmyën ko ja y'o'kën t'anëjkxë, etsës xypyatsoonëty.

²⁵Jä'ä ko pën ka'ap wi'ix jyata'any, tëkoyëp ja jyuukyajtën; e pën ja jyuukyajtën wintëkoopy mëët ëjtskyëjxm, jä'äts pyaatëp ja nitsokën.

²⁶¿Tii ja ja'ay nyawa'anëty oy tjaniwaanta'ay tu'kë'ëyë winë yaa naaxwiiny pën yajtëkoopy ja jyuukyajtën? ¿Ëkë jënu'un ja ja'ay ja jyuukyajtën t'ëknikëpäjtu'utëty?

²⁷Jä'ä ko minaanp yë naaxwiinyëtë ja'ay Y'u'unk mëët ja tyeety ja myëj'ajt y'oyajtën ets ja y'anklëstëjk ets tmo'oja'any nitu'ukjaty pën wi'ixëty pën të jyuuky'ätyën.

²⁸Tëy miits n'ënëëmëtë ko tää yaa ja ja'ay yajpaatë mëti'ipë ka'ap y'ooka'antën koonëm t'ixtëty ko ënäty myiny ja yajkutujkpë, ja naaxwiinyëtë ja'ay ja y'U'unk.