Read Biblia Mixe de Quetzaltepec Mateo 18 Bible Online

Mateo 18 - Biblia Mixe de Quetzaltepec bible

Mateo 18

¹Näy jää ja Jesús ojts ja y'ijxpëjkpëtëjk nyiminyë ets yajtëëwëtë: ¿Pën ni'ik mëj'äämpy ma ja tsajpjotmëpë kutujkën?

²Tääts ja Jesús tu'uk ja pi'k ëna'k tyaxëy ets tpëjktäky itkujky,

³ets y'ënäny: Tëy miits n'ënëëmëtë, pën ka'ap miits ja mjuukyajtën xyajtëkatstë ets mwinpitë ijxtëm yë pi'k ëna'kën, ka'ap nëjkx mtëkëtë ma tsajpjotmëpë kutujktaknën.

⁴Pën yujy naxym näpyëjktakëp ijxtëm yë pi'k ëna'kën, yë'ë mëj'äämpy naxaanp ma ja tsajpjotmëpë kutujktaknën.

⁵Ets pën kyupëjkpy ëjtskyëjxm tu'uk ja pi'k ëna'k ijxtëm ya'atën, nän ëjts ënäty xykyupëjkp.

⁶Pën nitu'uk ya'atë pi'k ëna'k yajpokytyuunpy mëti'ipës xymyëpëjkpën, nikë oy jeexyë ja paantaak yajtukyo'ktsumy ets kyinëty këkmejyjoty.

⁷Ëxëëk tjapaaty ko yaa naaxwiiny naaxkëjxy yi'iyë jää'ajtp wi'ix ja'ay pyokytyunëtyën. Jää'ataanp yë xëmë, je'eyë ko ja ja'ay mëti'ipë ja myëku'uk yajpokytyuunpyën ëxëëk ja jyata'any kyëpäta'any.

⁸Paaty n'ënëëmë, pën myajpokytyuunëp yë mkë'ë ëkë yë mteky, katspux ets jëkäm pëjkta'ak; nikë oy ko mtëkëty kë'ëtu'uk ëkë tekytyu'uk ma ja Tios ja kyutujktaknën ets këtii ko myajpëjkta'akëty ëyoowtakntujp xëmëkyëjxm mëët ja mkë'ë ëkë ja mteky mäjtsk.

⁹Ets pën myajpokytyuunëp yë mwiin, juut ets ixka'ats; nikë oy ko mtëkëty wiintu'uk ma ja Tios ja kyutujktaknën këtii ko myajpëjkta'akëty ëyoowtaknjoty mëët ja mwiin mäjtsk.

¹⁰Këtii pi'k ëna'k jëkäm xypyëjkta'aktëty. Jä'ä ko yë'ëty myëët'ajtëp yë y'anklësëty jam tsajpjotm mëti'ipë yajpatëpën xëmë Tios wintum.

¹¹Jä'ä ko yë naaxwiinyëtë ja'ay yë y'U'unk yë'ë të tniminy ets tyajtso'oka'any mëti'ipë të tyëkoyën.

¹²¿Wi'ix miits m'ëna'antë? Pën tu'uk ja'ay nimëko'px yë kyupixyny ets tu'uk tyëko'oyxyëtëty ¿këtii t'ëxmatsëty ja nimajkta'px majkmokx majktaxkpë jam kopkëjxm ets nëjkx t'ixta'ay mëti'ipë të tyëkoyënë?

¹³Tëy n'ënëëmëtë ko tpaatëty ja mëti'ipë tëkoy'ijtpën, wäänëni'ik tukxoonta'aka'any këtiinëm ja majkta'px majkmokx majktaxkpë mëti'ipë ka'ap ye'eytyëkoytyën.

¹⁴Näyjyëtu'un ja Tios, miits ja mTeetyëty tsajpjotmëpë ka'ap tsoky ets nitu'uk y'u'unk y'ëna'k mutskpë ye'eytyëkoyëty.

¹⁵Pën tëë mmëtëkoyë ja mmëku'uk, mëmëtya'ak ets tuk'ënëëmë wi'ix të mmëtëkoyën. Ko tja'akyukëty wi'ix xy'ënëëmën, tëë ënäty jatëkok xymyëku'ukpëky.

¹⁶Pën kajts tmëjpëjktä'äky wi'ix ënäty xyjya'ënëëmën wow tu'uk mäjtsk ja ja'ay ets t'ixtëty nijawëtëty wi'ix ënäty xim yam ja mpoky mnätyukwinmëtowëtën.

¹⁷Ets pën ka'ap näjyëtu'un yajmëjpëjkta'aktë, ënëëmë ja mëpëjkpëtëjk ma ye'eymyuktën. E pën kajts näjyëtu'un yajmëjpëjkta'aktë, jëtu'un tääpë ja'ay nëjkx xyajnajxnëtë tä mëti'ipë ka'ap myëpëkyën, ëkë ijxtëm ja yajkukëpäjtpëtyën mëti'ipë Roma myëtuuntëpën.

¹⁸Tëy miits n'ënëëmëtë, pën tii mkutsuumtëp yaa naaxwiiny, näjyëtu'un kutsumy wyë'ëmëty tsajpjotm; ets pën tii mmëkäjëtyëp yaa naaxwiiny, näjyëtu'un mëkäjë wyë'ëmëty jam tsajpjotm.

¹⁹Jëtu'un n'ënëëmëtë pën nimäjtskja'ay nyäkyäjpxyë ets tii t'amëtowa'antë ja nTeetyës tsajpjotmëpë, yajmo'otëp yë'ëjëty.

²⁰Jä'ä ko ma nimäjtsk nitëkëëk ja'ay yajpaatyën ëjts nxëëwkyëjxmës, tamës ëjts itkujky nyajpaaty.

²¹Tääts ja Pedro ojts tninëjkxy ja Jesús ets tyajtëëy: Wintsën, ¿jënaak okës ja nmëku'uk nmëmä'kxtukëty koos xymyëtëkoyëty? ¿Wëxtujk okë?

²²Ets ja Jesús y'ëtsooy: Ka'ap yam mijts n'ënëëmë ko wëxtujk ok. Jëtu'unës n'ëna'any ko wëxtujk'ok xynyiwinpitëty ja tëkë'px majkpë.

²³Paatyës jëtu'un n'ëna'any: Yë tsajpjotmëpë kutujkën jëtu'un yë'ë ijxtëm tu'uk ja yajkutujkpë tmëtyoyën ja meeny mëët ja tyuunpëtëjk mëti'ipë të tyajtunyën.

²⁴Tam ënäty tmëtyoowtsoony ja meeny ko yajmëja'ajty tu'uk ja ja'ay mëti'ipë kanaak millon ja nyu'kxyën.

²⁵Ja ja'ay ka'ap ënäty tii ja myeeny mëti'ipë tyukëpätëpën ja nyu'kxy. Tääts ja yajkutujkpë y'ënäny ets yajtookëty tääpë ja'ay mëët ja tyo'oxytyëjk, ja y'u'unk y'ëna'k ets tu'kë'ëyë mëti'ipë myëët'ajtypyën, jëtu'un ja nyu'kxy tyaj'ëtukëty.

²⁶Ojts ja ja'ay nyäkyoxtënaaytyä'äkyë ma ja yajkutujkpën ets tmënu'kxtäky: Wintsën, mëmä'kxtujkës. Jaakmooykyës wäänë tiempë etsës nkëpätëty mëti'ipë nmënu'kxy'äjtypyën.

²⁷Ja yajkutujkpë pya'ëyoow ets nyimä'kx ja myënu'kxy, jëtu'un ëwaatsëtum ojts wyi'imy ja ja'ay.

²⁸Ko ja tuunpë tsyo'ony, ënät ojts tpaaty ja myëku'uk mëti'ipë ënäty mënu'kxy'ajtëpën mëko'px xëëw nituny, ets tmajtsy ets tyo'kpeeny, tääts t'ënëmaay: Mëkëpäjtkës.

²⁹Tääts ja mëtuunpë wyinkoxtënaaytyakë ets myënu'kxtakë: Mëmä'kxtujkës. Nkëpätëpës yë'ë.

³⁰E ja tu'uk ka'ap tkupëjky, pujxn tëkoty ojts ja mëtuunpë tyajpëjktä'äkyë koonëm tkëpätëty ja nyu'kxy.

³¹Ko jëtu'un t'ijxtë ja wiinkëtypë ja tuunpëtëjk, ka'ap ojts oy t'ixtë, paaty ojts tninëjkxtë ja yajkutujkpë ets tukmëmëtyaktë wi'ix ënäty ja tuunpë ja myëku'uk të tunyën mëti'ipë të yajpokymye'kxyën.

³²Tääts ja yajkutujkpë twoowtsooy ja tuunpë ets t'ënëmaay: Ninu'un kya'oyëty yë mjot mwinma'any. Tëë nime'kxy koos të xywyinkoxtänë ets të xy'amëtoy nänyimä'kxë,

³³näjyëtu'un jeexyë mijts ja mmëëtmëtuunpë të xynyime'kxy ijxtëm mijts të nime'kxyën.

³⁴Mëk ja yajkutujkpë jyoot'anpëjky ets ojts tni'ënä'ämë ets pujxn tëkoty yajpëjkta'akëty ja ja'ay koonëm tkëpäjta'ajëty mëti'ipë nyu'kxy'äjtypyën.

³⁵Tääts ja Jesús jyaak'ënany: Näjyëtu'un ja nTeetyës tsajpjotmëpë tuna'any ja ja'ay ma miitsëtyën, pën jää miitsëty ka'ap ja mmëku'uk xynyimä'kxtë.