Read Biblia Mixe de Quetzaltepec Mateo 20 Bible Online

Mateo 20 - Biblia Mixe de Quetzaltepec bible

Mateo 20

¹Jëtu'un ja tsajpjotmëpë kutujkën npëjktakmëty ijxtëm tu'uk ja kukamën, mëti'ipë ojts tsyoonyën tsojkyë tuunpë ixtääpyë ets tyuntëty ma ja tsyätym kamën.

²Ojts tkäjpxy'atë ko tu'k denario yajmëjuya'antë ja tu'kxëëwpë ets tkejxy ja tuunpë jam kyamjotm.

³Tääts ojts tsyo'onkojnëpë mëj petyxyëëw. Ënät t'ijxpaty ja ja'ay jam tyänëtë maayjotm mëti'ipë ka'ap tii tyuunkëtyën

⁴ets t'ënëmaay: Nëjkx jam näjyëtu'un mtuntë nkamjotmës ets nmëjuytyëty ijxtëm pyaat'atyën. Ënät ojts nyëjkxtë.

⁵Tääts ja kukam ojts tsyo'onkojnëpë kujkxyëëw ets jatëkok mëj jënäkyxyëëw.

⁶Tim tsu'ujënëp ënätynyë ko nyëjkxkojnëpë maayjotm ets tpaty ja ja'ayëty mëti'ipë ka'ap tii ja tyuunkëtyën ets tyajtëëy: ¿Tii ko miits yaa mtänëtë xëënaxy ets nitii xykyatuntë?

⁷Ënät y'ëtsoowtë: Jä'ä ko ka'ap pën ëëts xytyuunkmo'otë. Tääts y'ënëmaayëtë: Nëjkx jam näjyëtu'un mtuntë nkamjotmës.

⁸Ko tsyu'ujënë, tääts ja kukam t'ënëmaay ja tyuunpë wintsën: Mëkajpxmuk yë tuunpëtëjk ets xymyëjuyëty: yë'ë jëyëjp mëjuyëp mëti'ipë ok të tyëkëtën tuunpë ets ok xymyëjuytyëty mëti'ipë jëyëjp të tyëkëtën tuunpë.

⁹Tääts myiintë ja mëti'ipë ënäty të tyëkëtën tuunpë jënäkyxyëëw ets nitu'ukjaty kä'pxy ja myeeny t'ëxajëtyë tu'k denario.

¹⁰Ok, ko ojts tyuka'ajëtë ja mëti'ipë ënäty jëyëjp të tyuuntëkëtën, jëtu'un myäytyë tyajtë ko wäänëni'ik yajmëjuya'antë; e ko t'ijxtë ko näjyëtu'un yajmëjuytyë tu'k denario.

¹¹Ko t'ëxajëtyääytyë ja myëju'uny, tam mëti'ipë ojts ka'ap ja myëju'uny tukjotkëtä'äkyën, ja kukam yajnikajpxp,

¹²ets t'ënëmaaytyë: Ya'atë ja'ayëty, ok të tyuuntëkëtë, je'eyë të tyuntë tu'k horë, ets näjyëtu'un të xymyëjuy ijxtëm ëëtsëtyën, etsës tu'kxëëwnaxyës të tuntë ets xëëw'an tëë nmëmëta'aktës.

¹³Tääts ja kukam nitu'uk t'ëtsooy: Mëku'uk, ka'ap maa nmëtëkoy, jëtu'un të nkäjpxy'ajtëmë ko tu'k denario nmëjuyä'äny ¿këtiijë?

¹⁴Ëxajë ja mëju'uny ets mnëjkxëty. Pën ëjts të ntuknipëjktaakë koos jëtu'un nmëjuyä'äny tä mëti'ipë ok të tyëkëtën tuunpë,

¹⁵ëjts kë'ëm xypyatp wi'ixës nyajtuunkpaata'any yë nmeenyës, ¿këtiijë? ¿Ëkë yë'ë xytyukka'oy'ijxpës koos oy tii ntunyë?

¹⁶Pën tyam ok yajpatëp, jä'ä jëyëjp itantëp; ets mëti'ipë tyam jëyëjp yajpatëp, jä'ä ok itantëp. Nimay ja ja'ay jyayajyaxtsowtë, niwäänë wyinkëta'aktë.

¹⁷Tam ënäty ja Jesús tyu'uye'ey mëët ja y'ijxpëjkpëtëjk, jam nyëjkxtë Jerusalén, ko ojts ëpëky tmëkajpxmuky ja y'ijxpëjkpëtëjk ets t'ënëmaay:

¹⁸Ejxtëm xy'ixtën, jam nëjkxëmë Jerusalén, ma ja naaxwiinyëtë ja'ay ja y'U'unk yajkë'ëyaka'anyën: ma ijxpëkyjyä'äytyëjkëtyën, teetytyëjkëtyën, yaj'ijxpëjkpëtëjkëtyën mëti'ipë ënä'ämën kutujkën nyija'awëtëpën ets tni'ënä'ämëja'antë ets y'ookëty,

¹⁹tkë'ëyaka'antë ma jaaypyaat jaaypyo'kxyën, mëti'ipë nëjkx nyëxi'iky tyukxi'ikyën, twoptën tka'atstën ets tyajkruutspätën, e kom tëkëëk xëëw tääts ja tëkëëk jyuukpyëka'any.

²⁰Ënät ja Zebedeo y'u'unk myiintë mëët ja tyaak ma ja Jesús ets ja u'unktaak nyäkyoxtënaaytyakë Jesús wyintuuy, t'amëtoy tu'uk ja mëyajtën.

²¹Tääts ja Jesús tyajtëëy: ¿Tii mtsojkpy? Ets ja to'oxytyëjk y'ëtsooy: Ëjts yë'ëjës ntsojkpy etsës ja nmaank nimäjtsk jam y'u'unyëtëty mpë'am ma mkutujktaknën, tu'uk m'a'oytsyow ets tu'uk m'anajnytsyow.

²²Tääts ja Jesús y'ëtsooy: Miitsëty ka'ap xynyijawëtë tii m'amëtoowtëpën. ¿Mëmëta'aktëp ja ëyo'on mëti'ipës nkupëkäämpyënë? Tääts y'ëtsoowtë: Nmëmëta'aktëpës yë'ë.

²³Tääts ja Jesús y'ëtsoowëtë: Wä'än jëtää xymyëmëta'aktëty ja ëyo'on ijxtëmës n'ëyowa'anyën, je'eyëp ko ja ënyääytyakn mëti'ipë jamën maas yë nkutujktaknën, ka'ap y'ëjtsëty xypyääty miits nmo'otëty. Jä'ä yajmo'otëp mëti'ipë ja nTeetyës të tuknipëjktaakën.

²⁴Ko jëtu'un tmëtoowtë ja Jesús ja y'ijxpëjkpëtëjk ja nimajkpë, tääts tukjoot'anpëjktë ja nimäjtskpë ja myëku'ukëty tu'kkä'äxpë.

²⁵Tääts ja Jesús twoowmujky ja y'ijxpëjkpëtëjk ets t'ënëmaay: Ejxtëm xynyijawëtën, ma ja'ayëtyën mëti'ipë ka'ap yë Tios tnijawëtën, yë yajkutujkpëtëjkëty amëj akëjxm y'ënä'ämtë ma ja ja'ayëtyën mëti'ipë pa'tjuuky'ajtëtëp ets ja mëti'ipë kutujkënmëët näjya'awëtëpën, jëtu'un y'ëne'emy ijxtëm ja tyimjot tyimwinma'anyën.

²⁶E ma miitsëtyën ka'ap tjëkyepy näjyëtu'un m'ëtë'ëtstëty. Mëti'ipë mëj'äämpy naxaanpën ni'ikyë mëpaat myëku'uk tmëtuny

²⁷ets mëti'ipë jëyëjp'ataanpën, ni'ikyë mëpaat nyäpyëjktä'äkyë tä tu'uk mëtuunpën.

²⁸Jëtu'un ijxtëm ëjtsën, ka'apës yë'ëjëty të niminy etsës yë ja'ay xymyëtunëty, yë'ëjës të niminy etsës ja ja'ay nmëtunëty etsës nkëpätëty ja naaxwiinyëtë ja'ay ja nyëë pyoky.

²⁹Ko tsyo'onëtë Jericó, nimay ja Jesús ja'ay pyatso'onë.

³⁰Jamts ënäty nimäjtsk ja ja'ay wiintspë y'u'unyëtë tu'u ëkë'ëm. Ko tmëtoowtë ko ja Jesús jam nyäxy, tääts tyëjkëtyë yaxpë jojkpë: Wintsën, yajkutujkpë David y'u'unk, pa'ëyoowtëkës.

³¹Tääts ja ja'ay ojts y'ojëtë ets y'ëmontëty ets wäänëni'ik tyëjkëtyë yaxpë jojkpë: Wintsën, yajkutujkpë David y'u'unk, pa'ëyoowtëkës.

³²Ënät ja Jesús wya'k'o'oyëy ets ojts tmëkäjpxy ja ja'ay mëti'ipë wiintsëtyën ets tyajtëëy: ¿Tii mtsojktëp ets ntukmëtuntëty?

³³Tääts y'ëtsoowtë: Wintsën, yë'ëjës ntsojktëp etsës xyaj'ijxë'ëktëty.

³⁴Tääts ja Jesús pya'ëyoowëtë ets ojts ja wyiin tyo'onxëtë. Ënätyë ja ja'ay ja wiintsëtypë ojts y'ijxpëktë ets ja Jesús tpatso'ontë.