Read Biblia Mixe de Quetzaltepec Mateo 23 Bible Online

Mateo 23 - Biblia Mixe de Quetzaltepec bible

Mateo 23

¹Ok, ja Jesús t'ënëmaay ja mayjyä'äy ets ja y'ijxpëjkpëtëjk:

²Yë tsajptëkotyëtë yaj'ijxpëjkpëtëjk ets fariseë ja'ayëty, mëti'ipë ënä'ämën tëyajtën nyija'awëtëpën, yë'ë kyajpxnajxtëp mëti'ipë ja Moisés ojts tni'ënä'ämën.

³Paaty miitsëty, mëmëtowtë ets patuntë wi'ix m'ënë'ëmxëtën; je'eyëp ko ka'ap tii xynyi''ijxtu'utëty ijxtëm winë tuntën, jä'ä ko yë'ëjëty jëëmpit winë tuntë ets ka'ap jyëtu'unëty ijxtëm winë tnimëtya'aktën.

⁴Je'emtyëty tpëjkta'aktë ja tsëmy kë'ëy, ijxtëm ja ja'ay ka'ap myäyëtëty tpatsëmtëty; ets atsip ja ja'ay tukpatsëmtë winë. E yë'ëjëty nitu'knu'unën ja kyë'ë kyejky mëpaat tkatukpaatë ja tsëmy kë'ëy.

⁵Yë'ëkyëjxm winë tuntë ets ja ja'ay t'ixtëty. Mëpaatëp wyimpokëjxy ets kyë'ëkëjxy tkëxjaaynyëtë mëti'ipë kuja'ay miinpën: ja wyit yenyjo'oxnë tpëjkta'aktë ets ja ja'ay y'ëna'antëty ko nëkooyë Tios t'ëwtajnëtë.

⁶Jëjp'ampë u'unyääypyäjn tsyojktëp ma ja ka'ayën ukën y'ityën, jëjp'amëtypë u'unyääypyäjn tyuk'u'unyëjantëp jap tsajptëkoty,

⁷ko muum nyëjkxtë jä'ä tsoktë ets ja ja'ay kyajpxpo'kxëtëty wintsë'kën mëët në'ëjoty tu'ujoty ets yaj'ijxpëjkpë yajtijtëty.

⁸Miits këtii yë'ë xytsyojkën'atëty ets ja ja'ay mtijëtëty yaj'ijxpëjkpë, jä'ä ko miitsëty aak tu'kmëku'uk ets tu'uk je'eyë xymyëët'atë ja yaj'ijxpëjkpë.

⁹Këtii näjyëtu'un pën xytyijtëty teety yaa naaxwiiny, jä'ä ko tu'ukyë je'eyë ja mTeetyëty xymyëët'atë, mëti'ipë jamën tsajpjotm.

¹⁰Këtii xytsyojkën'atëty ets ja'ay mtijëtëty tu'uwinwoopë, jä'ä ko tu'ukyë je'eyë mëti'ipë tu'uwinwoopën, yë'ë Kristë.

¹¹Mëti'ipë mëj'äämpy naxaanpën ni'ikyë mëpaat myëku'uk tmëtuny.

¹²Jä'ä ko mëti'ipë kë'ëm nämyëjpëjktakëpën naxym nëjkx yajpëjktä'äky, e mëti'ipë yu'unk naxym näpyëjktakëpën, mëj nëjkx nyäxy.

¹³Mon tuk miitsëty myajpaatë, yaj'ijxpëjkpëtëjkëty, mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Ko miits xy'ëtuktë ja tsajpjotmëpë kutujkën këtiipë jam pën tyëkëty. Ets ni miits mkatëkëtë ets ni yë'ë ja'ay xykyayajtëkëtë.

¹⁴Mon tuk miitsëty myajpaatë, yaj'ijxpëjkpëtëjkëty mëti'ipë nyija'awëtëpën ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Ni miits mkanaxtë ets ni mmëku'uk xykyayajnaxtë mëti'ipë ja naxantëpën.

¹⁵Mon tuk miitsëty myajpaatë, yaj'ijxpëjkpëtëjkëty mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Mtuknajxtaaytyëp miits ja naaxwiinyëtë ets ja mejy ko ja mja'ay xy'ixta'atë, ets ko xypyaatë ja mja'ayëty, wäänëni'ik ëxëëk xyajjat xyajkëpätë ets nyëjkxëty jap ëyoowtaknjoty këtiinëm miitsëty.

¹⁶Mon tuk miitsëty myajpaatë, mëti'ipë jëtu'un ja'ay'ajtëpën tä wiints winye'epyën; mëti'ipë ënantëpën: ko pën nyäwyaantä'äkyë je'eyë ma tsajptëjkën, ka'ap yë jëtu'unpë tyuny; ënät tëy ko twaantä'äky yë pu'ts pujxn jap tsajptëkoty, ënät tëy tjanty xyëëwaty ko wyaantä'äkyëty.

¹⁷Kutsuu kulokë miitsëty mja'ay'atë. ¿Ix tii ni'ik myajmëjnajxtëp, ja pu'ts pujxn; këtii xynyijawëtë ko yë pu'ts pujxn ënät tsyowpaaty ko kënu'kxy wyi'im jap tsajptëkotyë?

¹⁸Näyjyëtu'un miits m'ëna'antë: Pën kyajpxpatyp ja wintsë'këntyakn ko tii twaantä'äky ka'ap tsyowpaaty; ënäty tsyowpaaty pën kyajpxpatyp ja ayajk ako'onën mëti'ipë jamën ma wintsë'këntyaknën.

¹⁹Wiintsëty. ¿Mëti'ipë ni'ik kopkpëky, ja mëti'ipë yajyojxpën ëkë ja mëti'ipë yajwatsypyën ja yoxyë?

²⁰Pën myëwaantäkpy ja wintsë'këntyakn, ka'ap yi'iyë tmëwaantä'äky ja wintsë'këntyakn, näjyëtu'un tu'kë'ëyë mëti'ipë jam ijtpën wintsë'këntyaknkëjxm;

²¹ets pën myëwaantäkpy ja mëjtsajptëjk, ka'ap yi'iyë tmëwaantä'äky ja mëjtsajptëjk; näjyëtu'un ja Tios, mëti'ipë jap tsajptëkoty tsënääpyën.

²²Pën myëwaantäkpy ja tsajp, ka'ap yi'iyë tmëwaantä'äky ja tsajp; näjyëtu'un tmëwaantä'äky ja Tios ets ja y'ënyääytyakn ma yajkutukyën.

²³Mon tuk miitsëty myajpaatë, yaj'ijxpëjkpëtëjkëty, mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Mjatukniwë'ëmtëp ja Tios ja jyä'ä ko tii xyajwintëwtë, ijxtëm: ja menta, anis ets cominë; je'eyëp ko ka'ap xymyëjpëjkta'aktë ja ënä'ämën tëyajtën mëti'ipë kopkpëkyën yajpatunëty, ijxtëm: ja nipaye'eyën mëtëypyë, ja pa'ëyo'ow najts'ëyo'owën ets oypyë juukyajtën. Ya'atëtën ijty ni'ik oy ja kopkpëky, oknëm ma ja Tios ja y'ayajk y'ako'onën yajmo'oyën.

²⁴Miitsëty, wiints tyu'uwinwoop, axity miits winë xy'uuktë ets ja tsukts ka'ap nyaxëty, je'eyëp ko jëtu'un miitsëty ijxtëm jeexyë xyjyëëntë ja jëyujk mëti'ipë mëjën.

²⁵Mon tuk miitsëty myajpaatë, yaj'ijxpëjkpëtëjkëty, mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën, nëkëjxy ja a'ukën xytyätypyujtë ets näjyëtu'un ja atojkxën, e ko mtontë määtstë ets ko yë'ë xytyäty tsyojkën'ajtë ja wit meeny ka'ap ja xyjyotmayjyawëtë.

²⁶Miitsëty ijxpëkyjyä'äytyëjkëty wiintstëjkëty, jëwyiin yajwa'atstë mëti'ipë jotjotyën ets wa'ats wyë'ëmëty mëti'ipë nëkëjxyën.

²⁷Mon tuk miitsëty myajpaatë, yaj'ijxpëjkpëtëjkëty, mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Jëtu'un miitsëty ijxtëm ja o'kpëjutën, tëëpë yajjaamnikoyën, nëkëjxypyë y'oytyunyëtyën, je'eyëp ko jap jootjoty aak o'kpëpajk ets ak tok jap.

²⁸Oyjyä'äy miits mkëxë'ëktë nëkëjxy ets jëtu'un yaj'ixy oy yowë mjot mwinma'anyëty; e miitsëty, ujts ja mjot mwinma'anyëty mëët yë ëxëëkpë ets wiinkë'ëy akë'ëy je'eyë m'oyjä'äy'atë.

²⁹Mon tuk miitsëty myajpaatë, yaj'ijxpëjkpëtëjkëty, mëti'ipë nyija'awëtëpën ja ënä'ämën tëyajtën, wiinkë'ëy akë'ëypyë oyjyä'äy mnäpyëjkta'akëtën. Miits ja o'kpë jut myaj'o'oyëtëp ma ja Tios ja kyäjpxynyajxpëtëjk nyaaxtëjkëtën ets oy të xyaj'ijxëntëkëtë ja potsy ma të xynyipotsëtën ja wa'ats ja'aytyëjkëty,

³⁰ets m'ëna'antë: Ko jeexyë ënäty ëëtsajtëm jää njuuky'ajtëmë ma ojts jyuuky'atën ja n'ap'ajtëmë, ka'ap jeexyë ojts jëtu'unpë ja winma'any mpatëmë ets y'ooktëty ja käjpxynyajxpëtëjkëty.

³¹Ko miits jëtu'un m'ëna'antë, jää kë'ëm xykyupëktë ko yë'ë ja m'aptëjkëty ojts tyaj'ooktë ja käjpxynyajxpëtëjkëty.

³²Tuunka'pxtë ënät mëti'ipë ja m'aptëjk ojts tyajtso'onta'aktën.

³³Jëtu'un miitsëty tä tsa'anyën, tsa'any mteety'ajt mtaak'ajtëp, ¿wi'ix xykyukä'äka'antë ja tëytyu'unën mëti'ipë jap ëyoowtaknjoty?

³⁴Paaty miits ntuknikäxa'antë ja Tios ja kyäjpxynyajxpëtëjk, wijyjyä'äytyëjkëty ets yaj'ijxpëjkpëtëjk. E miitsëty myaj'ookantëp jënaakëty ets xyajkruutspäta'antë, tam mëti'ipë nëjkx xykyukox xykyutsiikëtën tsajptëkoty ets nëjkx xypyajëtijta'aktë winnaax win.

³⁵Jëtu'unts miits mtuka'ajëtëty ja poky ko ënäty të y'ooktë ni'ëmukë ja oyjyä'äytyëjk, Abel tyuktso'ontäkpy ets ja Zacarías tukjëjpkëxy, ja Berequías ja myaank, mëti'ipë myaj'o'ktën jap tsajptëkoty ma ja wa'atspë ja tsajptëkotën, ma y'ityën ja wintsë'këntyakn.

³⁶Tëyës n'ëna'any ko tkëpäjta'aja'antë ja ja'ay mëti'ipë tyam juuky'ajtëpën.

³⁷Jerusalenkëtë kajpn, Jerusalenkëtë kajpn, mëkës njajawë ko të xyaj'ooktë ja käjpxynyajxpëtëjk ets të xykyuka'atstë mëti'ipë ja Tios të tjakexyën ets jeexyë ja y'aaw y'ayuk mtukmëmëtya'akëtë. Kanaak okës miits të njawoowmuka'antë ijxtëm ja këtseytyaak ja y'u'unk tyajmukyën ets tmu'uxy, e miitsëty ka'ap jëtu'un të xykyupëktë.

³⁸Ix ënät ja mtëjk apak të wyi'imy.

³⁹Jëtu'un yam n'ënëëmëtë ko ka'ap miits xy'ëk'ijxnëtëtyës, jäänëm ko m'ëna'antëty: Kënu'kxy yë mëti'ipë miinpën Wintsën xyëëwkyëjxm.