Read Biblia Mixe de Quetzaltepec Mateo 24 Bible Online

Mateo 24 - Biblia Mixe de Quetzaltepec bible

Mateo 24

¹Tso'omp ënäty ja Jesús ma ja mëjtsajptëjkën. Ko ja y'ijxpëjkpëtëjk myëwinkoonëtë ets tyuk'ixa'anëtë ja mëjtsajptëjk ko ja nyipotsy janty'oy kyëxë'ëky.

²Ënät ja Jesús y'ënëmaayëtë: ¿M'ijxtëp ya'atë tu'kë'ëyë? Tëy n'ënëëmëtë ko ya'atë tsaapotsy nitu'uk kyawë'ëma'any, tu'kë'ëyë jyijta'aja'any.

³Tam ënäty ja Jesús y'u'unyë Olivos kopkwinm, ko ja y'ijxpëjkpëtëjk nyimiinëtë ets yajtëëwëtë aak ayi'iyë: Tuk'ëwa'anëtëkës jëna'a jëtu'un jyata'any kyëpäta'any ets tii ijxwë'ëmën yajtuk'ixëp ko ënäty mijts miny ets ko ja naaxwiinyëtë ënäty kyukëxë?

⁴Ënät ja Jesús y'ëtsoowëtë: Näkyëwent'atëtë ets ka'ap pën mwin'ëënëtëty.

⁵Jä'ä ko may ja ja'ay myina'any ijxtëm jeexyë ëjtsën ets y'ëna'ana'any: Ëjts jëtu'un ja Kristë ets may ja ja'ay twin'ëëna'any.

⁶Ko miits xymyëtoy'atëty ja tsip xii yaa ets ko ja ja'ay tsyiptuntëty, ka'ap mtsë'ëkëtëty, kopkpëky ko jëtu'un tyunëtëty jyatëtëty, je'eyëp ko ka'anëm ënäty tpaaty ets ja naaxwiinyëtë kyukëxëty.

⁷Jä'ä ko tsiptunantëp ja naax kajpn nixim niyam naaxwiinyëtë apëtsëmy. Itaanp ja yuu xëëw ets ja naaxwiinyëtë yu'kxa'any xiitsow yaatsow.

⁸Ko jëtu'un tyunëtëty jyatëtëty, je'eyë ënäty ja ëyo'on tsyo'ontä'äkynyëm.

⁹Ënät miits myajkë'ëyaktëty ets myajtsaatytyuntëty ets ja ja'ay myaj'ookëtëty. Tu'kë'ëyë ja'ay nëjkx m'ëxëëk'ixëtë jä'äkyëjxm ko ënäty ëjts xymyëpëktë.

¹⁰Nimay nëjkx ja ja'ay jää t'ëxmatstë ja myëpëjkën ets nyäkyë'ëyakëtëty ets nyämyëtsip'atëtëty nixim niyam.

¹¹May nëjkx nyätyijëtë Tios kyäjpxynyajxpë ets may ja ja'ay nëjkx twin'ëëny.

¹²Jä'äkyëjxm ko ënäty ja ëxëëkpë ku'oypyë myëjtëkë, paaty may ja ja'ay ka'ap oy t'ëkmëët'atanëtë ja nätsyokë.

¹³Temë pën xymyëpëjkpës mapaat jyëjpkëxyën, yë'ë nëjkx nyitso'oky.

¹⁴Ets ya'atë aaw ayuk oypyë ma Tios kyutujkën yajnimëtyä'äkyën, nëjkxëp yajkajpxwä'kxy ma tu'kë'ëyë naaxwiinyëtën ets nëjkx ja ja'ay tnija'awëtya'atë, täänëm ja naaxwiinyëtë kyukëxëty.

¹⁵Ojts ja käjpxynyajxpë Daniel tkuja'ay ja ëxëëkpë ja tuuntëko'oyën. Ko miits xy'ixtëty ma ja wa'atspë ja itën, mëti'ipë nokykyajpxpën wä'än tja'akyukë,

¹⁶ënät nëjkx kyä'äktë ja ja'ayëty mëti'ipë yajpatëpën jam Judea ets nëjkx kyäktso'oktë jam kopkëjxm;

¹⁷ets pën ënäty të pyetyën tyëjkëjxm jä'ä xëëw, ka'ap y'ëkjënajknëty ets tii tyajpëtsëma'anëty jap tyëkoty;

¹⁸ets pën ënäty kyamjotm, ka'ap nyäkwyimpitëty ets ja wyit twitsëty.

¹⁹Mëk nëjkx y'ëyowtë ja to'oxytyëjkëty mëti'ipë ënäty ja u'unk nyëkëjxm'ajtëpën ets mëti'ipë ënäty yaj'u'unktsi'tstëpën jä'ä xëëw.

²⁰Amëtowtë pëjktsowtë ja Tios ets ka'ap jëtu'un jyatëty jä'ä xëëw ma ënäty pyotmëtyën, ëkë säpëtë xëëwën.

²¹Mëk nëjkx ja ëyo'on jotmay yaj'ixy, mëti'ipë ka'ap nijëna'a yaj'ixynyëmën maju'unëm ja naaxwiinyëtë tsyo'ontä'äkyën ets ka'ap jëtu'un ok y'ëkyaj'ixanë.

²²Ko jeexyë ja Tios ja ëyo'on jotmay tkayajkëxy tkayajnaxy, tsip jeexyë ets ja ja'ay tmëmëta'aktë, paaty tyajkëxa'any tyajnaxa'any jä'ä ko tsoky tjawë ja y'u'unk y'ëna'k mëti'ipë të twin'ixyën.

²³Ets ko pën jää m'ënë'ëmxëtëty: Ixtë, tyaa ja Kristë, ëkë y'ëna'antëty: Ixtë, xim jä'ä, këtii xymyëpëktëty.

²⁴Jä'ä ko minantëp ja ja'ayëty mëti'ipë nëjkx nyätyijëtën Kristë ets mëti'ipë nätyijëtëpën Tios kyäjpxynyajxpë; nëjkxëp tyaj'ixëtë ja mëj'ajtën ets wi'ix kawi'ixëty nëjkx winë tuntë ets yë'ëpaat nëjkx yajwin'ëëntë mëti'ipë ënäty ja Tios të twin'ixyën.

²⁵Tëë yam ntuk'ëwaanëtë mëti'ipë tunan jatanëpën.

²⁶Paaty, ko pën m'ënë'ëmxëtëty: Ixtë, xim jä'ä të'ëts'itjotm, këtii jam mnëjkxtëty; ëkë oy mja'ënë'ëmxëtëty: Ixtë, tyap jä'ä tëkoty, këtii xymyëpëktëty,

²⁷Jä'ä ko jëtu'un ja naaxwiinyëtë ja'ay ja y'U'unk myina'any ijxtëm ja wëtsuk yaj'ixyën xëëwpëtsëmy ets xëëwkëtä'äky.

²⁸Ma ënäty jam tii të y'ookyën, jam ja majkwejkxy myuka'antë.

²⁹Ko ënäty të nyäxy ja ëyo'on jotmay, jää nëjkx ja xëëw wyinkootsë ets ka'ap ja po'o y'ana'any. Ka'ata'ajaanp ja matsa'a tsajpwinm ets ja ënä'ämpëtëjk yajkutujkpëtëjk nëjkxëp yu'kxpëjkta'atë.

³⁰Ets yaj'ixa'any jam tsajpwinm ja ijxpäjtën ko ja naaxwiinyëtë ja'ay ja y'U'unk myina'any yootsjoty, mëët ja mëk'ajtën kutujkën ets oy'ajt mëj'ajtën,

³¹ets tkäxa'any ja anklëstëjk mëët ja pujxnxuxn mëti'ipë mëk tyukxu'uxantëpën ets myujkta'aja'antë xiitsow yaatsow ja ja'ayëty mëti'ipë ënäty të yajwin'ixtën, tyso'onta'akëty ma xëëw pyëtsimyën ets jampaat ma kyëtä'äkyën.

³²Jatë ya'atë nyi''ijxpëjkën ja higo kepy: ko xye'entyjiitsy ets ja y'ääy pyëtsimy, yë'ë yajtuknija'ap ko myiny wyinkony ja xëkopk'ajtën.

³³Näy timjëtu'un ko xy'ixtëty ja ëyo'on tyunyë jyätyë, yë'ë mtuknijawëtëp ko tëjk ëkë'ëyën ja naaxwiinyëtë ja'ay ja y'U'unk yajpatnë.

³⁴Tëy miits n'ënëëmëtë, ko ya'atë jää tyuna'any jyata'anyë maanëm ënäty ja ja'ay ka'ap y'ooktënëm mëti'ipë jää tyam yajpatëpën.

³⁵Këxaanp naxaanp yë tsajp ets naaxwiinyëtë, e yë n'aaw n'ayukës nijëna'a kyakëxa'any kyanaxa'any.

³⁶Ni pën tkanijawë tii xëëw tii po'o jëtu'un tyuna'any jyata'anyë, ni anklëstëjk tsajpjotmëtë ets ni ëjts nkanijawë, ëjts Tios y'U'unk; Tios Teety, yë'ë tu'uk nyija'ap.

³⁷Ijxtëm tyuunë jyaajtën ko ja Noé jyuuky'äjty, näjyëtu'un tyuna'any jyata'anyë ko ënäty ja naaxwiinyëtë ja'ay ja y'U'unk myiny jatëkok.

³⁸Jä'ä ko ka'anëm ënäty ja komtuu myiny, kaaytyëp uktëp ets pëjktëp uktëp ënäty ja ja'ayëty.

³⁹Ma ënäty ka'ap pën tmëmay tmëtajyën tii, jää ojts myiny ja komtuu ets tyajnëjkxtaay oy tyimtiijëty. Näyjyëtu'un nëjkx tyunyë jyätyë ko ënäty ja naaxwiinyëtë ja'ay ja y'U'unk wyimpity.

⁴⁰Jam ënäty ja ye'etyëjk tyuntë nimäjtsk kyamjotm; tu'uk yajmënëjkxa'any ets tu'uk wyë'ëma'any.

⁴¹Nimäjtsk ja to'oxytyëjk ënäty jyëtstë; tu'uk yajmënëjkxa'any ets tu'uk wyë'ëma'any.

⁴²Wijy kujk mjuuky'atëty, jä'ä ko ka'ap xynyijawëtë jëna'a myina'any ja mWintsënëty.

⁴³Yë'ë nijawëtë, ko jeexyë tu'uk ja kutëjk nijawë ko koots myina'any ja mä'tspë ma tyëjkën, ka'ap jeexyë myaanaxy këtiipë tyëkëty ja mä'tspë ma tyëjkën ets tyonëty myäätsëty.

⁴⁴Paaty miits näjyëtu'un mnäkyëwent'atëtëty, jä'ä ko jääjës nëjkx nminy ko ënäty miits ka'ap xyjyëjp'ixtës.

⁴⁵¿Pën jëtää ja tuunk oy y'ëkmëpëtsëmëp? ko ja Wintsën tyajwë'ëmëty tu'uk ja tyuunpë ma ja tyëjkën mëti'ipë yajja'akyäyëpën tiempëpaaty.

⁴⁶Akujk jotkujk ja tuunpë yajpaaty mëti'ipë tukxoonta'akanëpën ja Wyintsën ko ënäty pyäätyë tuunp mëtoop.

⁴⁷Tëy miits n'ënëëmëtë, ko ja Wintsën yë'ë nëjkx tyuknipëkyë ja tuunk wä'än mëti'ipë tuunkëty ets yë'ë tniwintsën'atëty.

⁴⁸E pën tääpë mëtuunpë ëxëëk ja jyot wyinma'any, ets myäyëty tyajëty ko ja wyintsën ka'ap tsyojkwinpita'any

⁴⁹ets twopëty tka'atsëty ja tuunpëtëjk ets tmëëtkaay tmëët'uknëty ja ëmu'ukyë ja'ay;

⁵⁰ma ënäty ka'ap t'a'ixy tjëjp'ixyën wyimpita'any ja wyintsën, jää nëjkx ja wyintsën y'ëkëty myiny,

⁵¹tääts nëjkx tyiytyunyë ets pyëjktä'äkyë ma ja ja'ayëtyën mëti'ipë wiinkë'ëy akë'ëy oyjyä'äy'ajtëpën. Ënät myina'any ja ëyo'on jotmay ma y'ityën ja jë'ëyën yaxën ets ma ja ja'ay ka'ap jeky ja ëyo'on tmëmëtä'äkyën.