Read Biblia Mixe de Quetzaltepec Mateo 25 Bible Online

Mateo 25 - Biblia Mixe de Quetzaltepec bible

Mateo 25

¹Jëtu'un ja tsajpjotmëpë kutujkën jyata'any ko tpaatëty ja xëëw jëmëjt ijxtëm jyäjtyën tëkok ma ënäty ja ja'ay pyëktën: nimajk ja to'oxy'ëna'këty mëti'ipë ojts ja kyutë'kxn tkontën ets t'ëwxitë ja ye'etyëjk pëjkpë.

²Nimëkoxk, ka'ap tii mëj tjawëtë; ets nimëkoxk, kuwinma'anyëty.

³Mëti'ipë ka'ap tii mëj tjawëtë jyamënëjkxtë ja kyutë'kxn, je'eyëp ko ka'ap ojts ja y'on tkontë ëpëky ets t'atääm'utstëty ja kyutë'kxn.

⁴E ja mëti'ipë näjyëjp'ijxëtëpën kyoontë ja y'on ëpëky mëët ja kyutë'kxnëty.

⁵Ja ye'etyëjk pëjkpë kä'äpyëm tsyojkja'ty. Tääts ojts ni'ëmukë ja ma'ayë pyata'ajëtë ets myaanajxtë.

⁶Tsu'um it ojts tmëtowtë ayuk janty mëk y'ënä'äny: Tää ja ye'etyëjk pëjkpë myiny. Pëtë'ëktë, nëjkx jëjpye'eyyë'ëktë.

⁷Tääts ja to'oxy'ëna'këty ojts ni'ëmukë pyëtë'kta'atë ets ja kyutë'kxn tyajmëjjëtyë.

⁸Ënät ja nimëkoxkpë mëti'ipë ka'ap tii mëj tjawëtën, t'ënëmaaytyë ja mëti'ipë jëjp'ixy yajpatëpën: Mooytyëkës wäänë yë m'on, pi'itsaanp yë nkutë'kxnëtyës.

⁹E ja jëjp'ixypyë yajpaatën je'eyë y'ëtsoowtë: Ka'ap, jä'ä ko kyamëta'akëty ko yam nmo'otëty e ëëts tiis nyajtuntëp. Nikë nëjkx timjyuytyë ma tyookyën jëtu'un jotkujk xyajtuntëty.

¹⁰Tam ënäty të nyëjkxtë on juupyë ko ojts jyä'ty ja ye'etyëjk pëjkpë. Ja to'oxy'ëna'këty mëti'ipë ojts jëjp'ixy yajpaatën, jä'ä ojts mëët tyëkëtë jap tëkoty ja ye'etyëjk pëjkpë ma ja xëëw tyuna'anyën. Ënät ja tëjk'aaw ojts y'ëtujknë.

¹¹Ok ojts jyamiinëtë ja wiinkpë ja to'oxy'ëna'këty nimëkoxkpë ets y'ënantë: Wintsën, Wintsën, yaj'ëwa'ats yë tëjk.

¹²Tääts ja ye'etyëjk pëjkpë y'ëtsooy: Tëy n'ënëëmëtë, miits ka'ap n'ixy'atë.

¹³Näjyëjp'ixëtë, jä'ä ko ka'ap xynyijawëtë pën tii xëëw tii mëtëy jatëkok nmina'anyës.

¹⁴Näyjyëtu'un ja Tios ja kyutujktakn npëjktakmëty ijxtëm tu'uk ja ye'etyëjkën mëti'ipë jëkäm nëjkxpën. Ko tsyoona'any, ënät tmëkajpxmujkta'ay ja tyuunpëtëjk ets tuknipëky ets ja meeny tyaj'u'unk'atëty.

¹⁵Tu'uk tmooy mëkoxk mil ja meeny mëti'ipë ni'ik tsoowpatpën, tu'uk tmooy mäjtsk mil ets tu'uk tmooy tu'uk mil. Jëtu'un tmooy wi'ixëty ja tuunpë kyuwijy'atën. Ënät ojts nyijkxy jëkäm.

¹⁶Ja tuunpë mëti'ipë ja meeny y'ëxajëyën mëkoxk mil, jä'ä ojts tyaj'u'unk'aty nän ja mëkoxk mil.

¹⁷Näyjyëtu'un mëti'ipë y'ëxajëyën mäjtsk mil, ojts tyaj'u'unk'aty.

¹⁸Temë mëti'ipë y'ëxajëyën tu'uk mil, je'eyë ojts tnitajy naaxjoty ets tyu'tsy.

¹⁹Komjeky ja wintsën wyimpijty ets tpaye'eytyääy ja myeeny.

²⁰Ënät ja mëjëyëjpë myiiny mëti'ipë ënäty ja meeny të t'ëxajën mëkoxk mil ets tjaakniyajkëy nän ja mëkoxk mil ja y'u'unk ets y'ënäny: Wintsën, mëkoxk mil ojts mijts xymyo'oyës ja meeny, e tëëjës njaakyaj'u'unk'aty nän ja mëkoxk mil, tyaa ëxajë.

²¹Tääts ja wyintsën y'ënëmaayë: Oy jëtu'un, oy ets tëy tëtä'äky winë të xytyuny të xykyäjpxy. Jä'ä ko oy tii yiin wään të myajtukë'ëtëkë, tëë oy mtuny mkäjpxy, jyëkyejpy winë mëjpë këjääpë myajtukmë'ëxmatsëty. Tëkë ma ja xoontakën yajpaatyën ets mjuuky'atëty akujk jotkujk mëët ëjts.

²²Ënät näjyëtu'un myiiny ja mëti'ipë ënäty ja meeny të t'ëxajën mäjtsk mil ets y'ënäny: Wintsën, mäjtsk mil ja meeny ojts xymyo'oyës, e tëëjës nän ja mäjtsk mil njaakyaj'u'unk'aty, tyaa, ëxajë.

²³Oy jëtu'un, oy ets tëy tëtä'äky winë të xytyuny të xykyäjpxy. Jä'ä ko oy tii yiin wään të myajtukë'ëtëkë, tëë oy mtuny mkäjpxy, jyëkyejpy winë mëjpë këjääpë myajtukmë'ëxmatsëty. Tëkë ma ja xoontakën yajpaatyën ets mjuuky'atëty akujk jotkujk mëët ëjts.

²⁴E kom ok myiiny ja tuunpë mëti'ipë ja meeny y'ëxajëyën tu'uk mil ets ja wyintsën t'ënëmaay: Wintsën, nija'apës ko mijts m'ëwa'anëty ets nija'apës ko jam ja pëjktä'äky xyajpëtë'ëky ma ka'ap mni'ipy mkojyën ets myajpëtë'kpy ja pëjktä'äky ma ka'ap të mtëëmwëjyën.

²⁵Paatyës të ntsë'ëkë etsës të nyu'utys ja mmeeny. E tsyaats ja mëti'ipës ojts xymye'eyën.

²⁶Tääts ja wyintsën y'ëtsoowë: Mijts, ka'ap oy mmëtuunpëty, nëkoo m'ëk nuux'ajnë. Pën mnija'ap koos ja pëjktä'äky nyajpëtë'ëky ma ka'ap ni'ipy nkojyënës ets nyajpëtë'kpyës ma ka'ap tii ni'ipyënës,

²⁷ojts jeexyë je'eyë ja nmeenyës xykyë'ëyäky ets wiink ja'ay të tyaj'u'unk'aty ets jëtu'un koos jeexyë ënäty nwinpity tamës jeexyë jatëkok ja nmeeny npaaty ets mëët ja nyi'u'unk.

²⁸Ets t'ënëmaay ja ja'ayëty mëti'ipë ënäty jamëtyën: Pëjkëtë yë meeny ja tu'kmilpë ets yë'ë mo'otë mëti'ipë myëët'ajtypyën majk mil.

²⁹Jä'ä ko, pën tii myëët'ajtyp, wäänëni'ik jyaak timyajmo'oja'any ets may tmëët'atëty; ets pën tii yiin wään myëët'ajtyp, yajpëjkëtya'ajaanp tu'kë'ëyë mëti'ipë ënäty myëët'ajtypyën.

³⁰Ets ya'atë mëtuunpë mëti'ipë ka'ap oy myëtunyën, yajpëtsëmtë jap tëja'p, wä'än jap akootstuuy twë'ëmy. Ma myina'anyën ja jë'ëyën yaxën ets tsipkä'äxën.

³¹Ko myinëty ja naaxwiinyëtë ja'ay ja y'U'unk mëët ja të'kxën jajën ets ja y'anklëstëjk ni'ëmukë, ënät nyaaxwäätsa'any ma ja kyutujktaknën mëti'ipë myëët'ajtypyën ja mëj'ajt oyajtën.

³²Ets ja naaxwiinyëtë ja'ay ni'ëmukë nyämyuka'anët ma yë'ëjën ets twoowa'kxa'any ja ja'ay, jëtu'un tä yë kupixyny këwent'ajtpë twoowä'kxyën ja kyupixyny ets ja tsyajppax.

³³A'oy'äämpy tpëjkta'aka'any ja jëtu'unpë tä kupixynyën ets anajny'äämpy tpëjkta'aka'any ja jëtu'unpë tä tsajppaxën.

³⁴Ets ja yajkutujkpë t'ënëëmëja'any ja mëti'ipë y'a'oytsyowën: Mintë miitsëty, mëti'ipë ja Tios Teety të kyënu'kxëtën. Ëxajëtë ja kutujktakn mëti'ipë miitsëty të myajtuknipëjktaakëtën ko ojts ja Tios tyajkojy ja naaxwiinyëtë.

³⁵Jä'ä ko të nyuu'ookyës, tëëjës miitsëty xyajkaytyë; koos të ntëëtsë tëëjës miits xyajnëë uuktë; koos jëtu'unyë të n'any të mpojy, tëëjës xyjyëënmo'o xytyëjkmo'otë;

³⁶koos ja nwit ntujkxy të kyaka'ty, tëëjës ja nwit nxox xymyo'otë; koos npëjkë, ojtsës miits xykyu'ixëtë; koos tsumy matsy n'ijty, ojtsës xynyimintë.

³⁷Ënät ja wa'ats ja'aytyëjk tyajtëëwtë: ¿Wintsën, jëna'ajën mijts të myuu'ookyë ets të nyajkaytyë? ¿Ëkë jëna'ajën të mtëëtsë ets të nyajnëë'uuktë?

³⁸¿Kajëna'a mijts maa të mkayaj'ixy jëtu'unyë m'any mpojy ets të myajtëjkmo'oy ets kajëna'a maa pën të mka'ixyë niwa'ats ëxwa'ats ets të myajxoxy?

³⁹¿Ëkë jëna'a mijts të n'ixtë mpëkyë m'ixyë ets të myajpa'am'ixy, ëkë të myaj'ixy pujxn tëkoty ets të myajku'ixë?

⁴⁰Ënät ja yajkutujkpë y'ëtsowa'any: Tëy miits n'ënëëmëtë, ko të xytyuntë tu'kë'ëyë ja oypyë ja tu'unën kajpxën ma ja'ayëtyën mëti'ipë ënäty yajpatëpën ëmaay amutsk, ëjts jëtu'un të xymyëtuntë.

⁴¹Ënät ja yajkutujkpë t'ënëëmëja'any ja ja'ayëty mëti'ipë yajpatëpën anajnytsyow: Winwa'ktutëkës, miitsëty yë'ë mpat mnitëjkëyëtëp ets ëxëëk mjatëty, nëjkxtë jap jëënjoty ma jëën nijëna'a kyapi'itsyën, mëti'ipë të yajtuknipëjktaakën yë mëjku'u mëët yë y'anklëstëjk.

⁴²Jä'ä ko të nyuu'ookyës, miitsëty ka'apës të xyakaytyë; koos të ntëëtsë miitsëty ka'apës të xyajnëë uuktë;

⁴³koos jëtu'unyë të n'any të mpojy, ka'apës të xyjyëënmo'o të xytyëjkmo'otë, koos ja nwit të kyaka'ty, ka'apës ja nwit të xymyo'otë; koos të mpokyë ets koos tsumy matsy të n'ity ka'apës të xynyimintë.

⁴⁴Ënät näjyëtu'un tyajtëëwtë: ¿Wintsën, jëna'a mijts të myuu'ookyë, ëkë jëna'a të mtëëtsë, ëkë të m'any të mpojy, ëkë niwa'ats ëxwa'ats të mjëtity, ëkë të mpëky të m'ixyë ëkë pujxn tëkoty të myajpaaty ets ka'ap të mputëkëtë?

⁴⁵Ets ja yajkutujkpë y'ëtsowa'anëtë: Tëy miits n'ënëëmëtë, ko tu'kë'ëyë mëti'ipë miits ka'ap të xytyuntë oy ma tyaapë ja'ayëtyën ëmaay amutskpë, ëjtsën jëtu'un miits të xytyuntë.

⁴⁶Ja ëxëëk ja'ay ëts jap yë nyëjkxa'antë ëyoowtaknjoty, e ja wa'ats ja'ayëty jap ja nyëjkxa'antë ma juukyajtën yajpaatyën xëmëkyëjxmëpë.