Read Biblia Mixe de Quetzaltepec Marcos 10 Bible Online

Marcos 10 - Biblia Mixe de Quetzaltepec bible

Marcos 10

¹Tääts ja Jesús tsyo'ony jam Capernaúm ets ojts nyijkx Judea y'itjotm, awinmtsow ma ja Jordán mëjnëëjën ets tukjëtijtëy ja itjot mëti'ipë wë'ëmpën xëëwpëtsëmtsyow. Ënät ja ja'ay nimay myujktë jatëkok ma ënäty jamën ets ojts tyaj'ijxpëjktsoony, ijxtëm xëmë yaj'ijxpëkyën.

²Tääts ja fariseë ja'ayëty ojts jënaakën tninëjkxtë ja Jesús, ets je'eyë twinma'any'ixa'antë, tyajtëëwtë: ¿Kutujkp ets ja ye'etyëjk tyo'oxytyëjk t'ëxmatsëtyë?

³Tääts ja Jesús y'ëtsooy: ¿Wi'ix ja Moisés tni'ënä'ämë?

⁴Ënät y'ëtsoowtë: Yajkutujkpy ja Moisés ets ja ye'etyëjk t'ëxmatsëty ja tyo'oxytyëjk pën myoopy jëyëjp ja noky mëti'ipë yajnikëxë'ëkpyën ko tëë t'ëxmatsy.

⁵Tääts ja Jesús y'ëtsooy: Jä'äkyëjxm ja Moisés jëtu'un tyajkutujky ko ka'ap mja'akyukëtë.

⁶Ko ja Tios tyajkojtso'ontäky winë, ye'etyëjk ets to'oxytyëjk ojts tpëjktä'äky.

⁷Paaty ja ye'etyëjk y'ëxmatsäämpy ja tyaak tyeety ets ja tyo'oxytyëjk tpuwa'akëja'any,

⁸jëtu'unts nimäjtsk tu'ukyë y'itëty. Ka'ap ëpëkyjyäty yajpaatë, tu'ukyë yajpaatë.

⁹Paaty ka'ap tjëkyepy ja ja'ay tyajkwa'kxëty mëti'ipë ja Tios të tyajnämyukyën.

¹⁰Ko ënäty jap tëkoty yajpaatë, ënät ja Jesús ja y'ijxpëjkpëtëjk yajtëëwëtë mëti'ipë ja Jesús ënäty të tmëtyä'äkyën.

¹¹Tä ja Jesús y'ënäny: Pën ja tyo'oxytyëjk y'ëxmajtsyp ets wiinkpë tpëky, ja tyo'oxytyëjk ënäty myëtëkoopy ja mëjëwyiimpë të tpëkyën.

¹²E ko ja to'oxytyëjk ja nyiye'etyëjk t'ëxmatsy ets ja wiinkpë ye'etyëjk tpëky, nän yajwintsë'këntëkoopy ënäty ja pëjkën ukën.

¹³Ënät ja Jesús ojts tukninëjkxtë ja pi'k ëna'k ets tkënu'kxëty e ja y'ijxpëjkpëtëjk ojts t'ojtë ja ja'ay mëti'ipë ja pi'k ëna'k wyoowmiintëpën.

¹⁴Ko ja Jesús jëtu'un t'ijxy, ënät jyoot'anpëjky ets y'ënäny: Ixmatstë yë pi'k ëna'k, wä'än xynyimintës, ka'ap xy'ëtuktëty, jä'ä ko yë'ë jëtu'unpë ja'ay nyäpyëjktä'äkyën tä pi'k ëna'kën yë'ë Tios tsyokpy ma kyutujktaknën.

¹⁵Tëy miits n'ënëëmëtë, pën ja Tios ja kyutujkën ka'ap tkupëjkë ijxtëm ja pi'k ëna'kën, ni wintim nijëna'a kyatëkëty jam ma Tios kyutujktaknën.

¹⁶Ënät ja Jesús ojts ja pi'k ëna'k tmëjwoy, ets ojts tkënu'kxy, je'eyë ja kyë'ë tuknikony.

¹⁷Ko ja Jesús ënäty jam tsyoona'any, ënät tu'uk ja ja'ay pëyi'ikyë nyimiinë ets nyäkyoxtënaaytyakë ma yë'ëjën. Tääts y'ënëmaayë: Oypyë Wintsën, ¿tiis mëpaat ntuny etsës npaatëty ja juukyajtën xëmëkyëjxmëpë?

¹⁸Ënät ja Jesús y'ëtsooy: ¿Tiis ko jëtu'un xytyijy oypyë Wintsën? Yi'iyë Tios tu'uk oy.

¹⁹Mnija'ap ja Tios ja y'ënä'ämën, mëti'ipë ënaanpën: ka'ap myajja'ay'ookëty, ka'ap xyajwintsë'këntyëkoyëty ja pëjkën ukën, ka'ap mmäätsëty, ka'ap pën xynyi'antaakëty, mwintsë'ëkëp ja mtaak mteety.

²⁰Tääts ja ja'ay y'ëtsooy: Wintsën, mutsknëm tääpë tu'kë'ëyë mpatuunta'ayës.

²¹Ënät ja Jesús wyintë'kxpäjtë mëët tu'uk ja oyjyot oywyinma'any ets y'ënëmaayë: Tu'uk mjaaktëkoy'ajtxëty. To'kta'a mëti'ipë mmëët'ajtypyën ets mo'o ja ëyoopëja'ay. Ënät ja Tios ja kuma'ayën mmo'ojëtëty tsajpjotm. Täänëm xypyaminëtyës.

²²Ko ja ja'ay jëtu'un tmëtooy, ënät tyëjkëy kuma'ay kutajëpë, jä'ä ko kumeenyjyä'äy ënäty.

²³Ënät ja Jesús y'ijx'ëwëtijty ets t'ënëmaay ja y'ijxpëjkpëtëjk: Tsip ni'ik ets ja kumeenyjyä'äy tyëkëty ma ja Tios ja kyutujktaknën.

²⁴Tääts ja y'ijxpëjkpëtëjk mëk tja'awëtyë ko ja Jesús jëtu'un y'ënäny. Ënät ja Jesús y'ënëmaayëtë jatëkok: U'unk ëna'këty, tsip ni'ik ets ja kumeenyjyä'äy tyëkëty ma ja Tios ja kyutujktaknën.

²⁵Nikë ka'ap tsyipëty ets tu'uk ja jëyujk jëku'ux nyaxëty xu'uny jutjoty ets këtiinëm ko tu'uk ja kumeenyjyä'äy tyëkëty ma Tios ja kyutujktaknën.

²⁶Ko ja y'ijxpëjkpëtëjk jëtu'un tmëtoowtë, janty mëk ojts tjawëtë ets jaxim jayam nyäy'ënanëtë: ¿Pën ëkmayëtëp ets ja nitsokën tpaatëty?

²⁷Tääts ja Jesús ojts wyintë'kxëtë ets y'ëtsoowëtë: Yë ja'ayëty tsip yë tjawëtë, yë Tios ka'ap tiitsip tjawë; jä'ä ko yë'ë maaytyääyëp winë.

²⁸Ënät ja Pedro y'ënäny: Tëës tu'kë'ëyë n'ëxmajtsta'atë mëti'ipës ijty nmëët'ajtëpën ets mijts të myajpatsoony.

²⁹Tääts ja Jesús y'ëtsooy: Tëy miits n'ënëëmëtë, pën të t'ëxmatsy ja tyëjk, myëkä'äxtëjk, tyaak tyeety, y'u'unk y'ëna'k, ëkë nyaax mëët ko të tja'akyukë ja oy'aaw oy ayuk ets koos të xymyëpëky,

³⁰wäänëni'ik t'ëxajëja'any winë tyam ma jyuuky'ätyën, pyatäämpy mëko'px'am ja tyëjk, y'uty, y'äjty, tsyë'ë, tyaak, y'u'unk y'ëna'k ets nyaax. Oy yajpajëtijta'aktëty, ok nëjkx jyuuky'äty xëmëkyëjxm ko ënäty tpaaty ja nyixëëw nyijëmëjt.

³¹Je'eyëp ko may mëti'ipë tyam jëyëjp'ajtëpën, ix'ok nëjkx nyaxtë; ets may mëti'ipë tyam ix'okën, jëyëjp nëjkx nyaxtë.

³²Jam ënäty pya'tëkëtë Jerusalén, ja Jesús jëyëjp nëjkxp ets ja y'ijxpëjkpëtëjk ix'ok, tääts ja y'ijxpëjkpëtëjk myäytyë tyajtë ets ja mëti'ipë ix'am miintëpën tsë'këtëp. Ënät ja Jesús ëpëky twoowpëtsëëmy ja nimajkmäjtskpë ja y'ijxpëjkpëtëjk ets tukmëmëtyäky wi'ix ënäty jyata'anyën.

³³Ets t'ënëmaay: Jerusalén tyam npa'tëjkëmë, ma ja Naaxwiinyëtë ja'ay ja y'U'unk yajkë'ëkyaka'anyën ma ja teety wintsëntëjkëtyën ets tsajptëkotyëtë yaj'ijxpëjkpëtëjkëtyën; yë'ë yakutukantëp ets y'ookëty ets tukë'ëkëja'antë ja ja'ay mëti'ipë ka'ap jyutiisëty.

³⁴Ets nëxi'ika'an tukxi'ika'antë, twintsuj'an tjëjptsuja'antë, ets tyaj'ooka'antë; je'eyëp ko, kom tëkëëk xëëw jyuukpyëka'any.

³⁵Tääts ja Santiagë mëët ja Juan, Zebedeo myaank ojts nimintë ja Jesús ets t'ënëmaaytyë: Wintsën, yë'ëjës ntsojktëp ets tu'uk yë mëyajtën xytyunëty xymyo'otëtyës mëti'ipës n'amëtowantëpën.

³⁶Tääts ja Jesús ojts tyajtëy: ¿Tiitsën mtsojktëp ets ntunëtyës ma miitsëtyën?

³⁷Tääts y'ënantë: Mtunëp yë mëyajtën, ko ënäty xypyääty ja mëj'ajt mkutujkën, xyaj'u'unyëtëpës nitu'uk m'a'oy'äämpy ets nitu'uk m'anajny'äämpy.

³⁸Ënät ja Jesús y'ëtsoowëtë: Ka'ap xynyijawëtë mëti'ipë m'amëtoowtëpën. ¿Mkupëktëp ja ëyo'on ijxtëmës n'ëyowa'anyënë, ets mnëëpätëty ijxtëmës nëëpäta'anyënë?

³⁹Tääts y'ëtsoowtë: Nkupëktëpës. Ënät ja Jesús y'ënëmaayëtë: Tëy, näjyëtu'un miits m'ëyo'onpaatëty ijxtëm ëjtsën ets näjyëtu'un mnëëpäta'antë ijxtëm ëjtsën,

⁴⁰e ko miits xy'amëtowtë ets m'u'unyëja'antë ëjts n'anajny n'aka'anyës, ka'ap y'ëjtsëty xypyaat'aty nmo'otëty, yë'ë yajmo'ojantëp pën të yajktuknipëjktaakëtën.

⁴¹Ko jëtu'un tmëtoowtë ja nimajkpë ja Jesús ja y'ijxpëjkpëtëjk, ënät tukjoot'anpëjktë ja Santiagë ets ja Juan.

⁴²Tääts ja Jesús ja y'ijxpëjkpëtëjk tmëkajpxmujky ets t'ënëmaay: Mnija'awëtëp miitsëty ko ma ja naax kajpnën ka'apë jyutiis'atën tää yajkutujkpëtëjk mëti'ipë näjya'awëtëpën mëët ja mëk'ajtën ets y'ënä'ämëty mëk ma ja jyä'äyën, ets yë'ë ja kyutujkën tyim yajtunäämpy ma ja naax kajpnën.

⁴³E ma miitsëtyën ka'ap tjëkyepy jëtu'un pën jyä'äy'atëty. Pën tsyojkën'ajtyp mëj y'ita'any ma miitsëtyën, myëtunëp jëyëjp ja myëku'uktëjk.

⁴⁴E pën jëyëjp'ataanpën, myëtuunta'ajëp ja jyiiky myëku'uk.

⁴⁵Jä'ä ko ka'ap yë'ëjëty ëjts të niminy etsës nyajmëtunëty, yë'ëjës të niminy etsës ja ja'ay nmëtunëty ets nkëpätëtyës may ja ja'ay ja pyoky ko ni'o'ktu'utëtyës, jëtu'unts may nyitso'oktëty.

⁴⁶Tääts jyajtë jam Jericó. Ko ja Jesús ënäty të kyajpnpëtsëmy mëët ja y'ijxpëjkpëtëjk ets ja mayjyä'äy. Jam tu'u ëkë'ëm tu'uk ja ja'ay wiintspë y'u'unyë mëti'ipë xyëëwajtypyën Bartimeo, ja Timeo y'u'unk.

⁴⁷Ko ja ja'ay wiintspë tmëtooy ko nyäxy ja Jesús, Nazaretëtë ja'ay, ënät tyëjkëy yaxpë jojkpë: Jesús, yajkutujkpë, David yë y'u'unk y'ok, pa'ëyoowkës.

⁴⁸Tääts ja mayjyä'äy ojts y'ojyë ets y'amonëty. Ka'ap ja ja'ay ja wiintspë y'amony, ni'ikyë tyëkë yaxpë jojkpë ets y'ënä'äny: Yajkutujkpë, David yë y'u'unk y'ok, pa'ëyoowkës.

⁴⁹Tääts ja Jesús wya'ak'o'oyëy ets ja ja'ay t'ënëmaay: Nëjkx wowtë. Tääts t'ënëmaaytyë ja wiints: Tsojk pëtë'ëk, tam myajmëkäjpxy.

⁵⁰Ënät ja Bartimeo ja nyijän tnajtspojtsëy ets pyëti'ky, tä ja Jesús tmëwinkoony.

⁵¹Ets ja Jesús yajtëëwë: ¿Tii mtsojkpy ets ntukmëtunëty? Tääts ja ja'ay wiintspë y'ëtsooy: Wintsën, ijxpëkaanpës.

⁵²Ënät ja Jesús y'ënëmaayë: Nëjkxnë, tëë mtso'oky, jä'ä ko të xymyëpekyës. Jëtu'un ja ja'ay wiintspë ënätyë y'ijxpëjky ets ja Jesús tpatso'ony.