Read Biblia Mixe de Quetzaltepec Marcos 15 Bible Online

Marcos 15 - Biblia Mixe de Quetzaltepec bible

Marcos 15

¹Ko xyiinytyäky, ënät ja teety wintsëntëjk nyiye'eypyäjtë mëët ja mëjja'aytyëjkëty, ja tsajptëkotyëtë yaj'ijxpëjkpëtëjk ets ni'ëmukë ja tsajptëkotyëtë yajuntë'ajtpë. Ënät ja Jesús ojts tyajnëjkxtë kë'ëtsumy ma ja Pilato. Jamts tkë'ëyajktë.

²Tääts ja Pilato tyajtëëy ja Jesús: ¿Mijts ja jutiis ja'ayëty yajkutujkpë? Tääts ja Jesús y'ëtsooy: Ëjts, ijxtëm mijts m'ëna'anyën.

³Tääts ja teety wintsëntëjk may ja ë'ënën tpëjktaktë.

⁴Ënät ja Pilato tyajtëëy ja Jesús jatëkok: ¿Ka'ap m'ëtsoyë? Ix, kanaakpëky ja ja'ay mni'ëënëty.

⁵E niwi'ix ja Jesús kya'ëtsooy ets ja Pilato mëk tja'awëy.

⁶Ëmaayxyëëwjoty ja yajkutujkpë Pilato ijty tu'uk t'ëxmatsy ja tsumyjä'äy mëti'ipë ja mayjyä'äy wyin'ijxtëpën.

⁷Jamts tu'uk ja tsumyjä'äy mëti'ipë xyëëwajtypyën Barrabás, jä'ä ënäty jap tsumy mëët ja wiinkëtypë mëti'ipë tëë yajja'ay'ooktën ko ënäty të tsyiptuntë mëët ja yajkutujkpë.

⁸Tääts ja mayjyä'äy myiintë ets t'ënëmaaytyë ja Pilato ets jëtu'un tunëty winë ijxtëm tuntën winjëmëjt.

⁹Ënät ja Pilato y'ëtsooy: ¿Mtsojktëp ets n'ëxmatsëtyës yë jutiis ja'ay yajkutujkpë?

¹⁰Jä'äkyëjxm ko nyija'ap ënäty ko ja teety wintsënëty näjyënaxë tjawëtë, paaty ënäty të tkë'ëyaktë ja Jesús.

¹¹Tääts ja teety wintsëntëjk ets ja tsajptëkotyëtë yaj'ijxpëjkpëtëjk ojts ja mayjyä'äy t'akajpxëtë ets y'ëna'antëty ko Barrabás y'ëwaatsëpëtsëmëty.

¹²Ënät ja Pilato tyajtëëwkojnëpë ja mayjyä'äy: ¿Wi'ixës mtunëty mëti'ipë miits mtijtëpën jutiis ja'ay yajkutujkpë?

¹³Ënät mëk'äämpy y'ëtsoowtë: Yajkruutspät.

¹⁴Tääts ja Pilato t'ënëmaay ja mayjyä'äy: ¿Tiixë të mtukmëtuuntëkoyëtë? Tääts ojts jatëkok wäänë mëk tyëkëtë yaxpë jojkpë ets y'ënantë: Yajkruutspät.

¹⁵Yajjotkujkëjäämpy ënäty ja Pilato ja mayjyä'äy, tääts tyaj'ëwaatsëpëtsëëmy ja Barrabás ets ojts tni'ënä'ämë ja Jesús ets yajkwopëty jëtu'un tkë'ëyäjky ets kyëruutspätëty.

¹⁶Tääts ja tsiptuunpëtëjk ojts tyajnëjkxtë ja Jesús ma ja yajkutujkpë ja tyëjkën, jamts ni'ëmukë ja tsiptuunpë myujktë.

¹⁷Ojts ja tsu'unk wit tukxoxtë, ets tpëjktaktë kyëpajkëjxm tu'uk ja äpny awiity ijxtëm ja kujänën.

¹⁸Ko jëtu'un tuuntë, tääts tmëyax tmëjojktë: Mëj yajkutujkpë, jutiis ja'ay kyutujkpë.

¹⁹Ojts ja kepy tukuwojpë'ëktë, ojts nitsujëtë, ojts nëxik tukxiktë, twinkoxtänëtë ets nyätyijyë t'ëwtajtë.

²⁰Ko jëtu'un nëxiktë tukxiktë, tääts ja tsu'unk wit tuknijääntutë jatëkok ets ja kyë'ëm wit tukxojxtë mëti'ipë ënäty wyit'ajtypyën. Tääts twoowpëtsëëmtë ets tyajkruutspäta'antë.

²¹Jam ënäty nyäxy tu'uk ja Cirenë ja'ay, Simónk'ajtp, Alejandro ets Rufo tyeety, kamjotm ënäty tsyoony. Yë'ë ojts t'atsip'atë ets tpatsëmëty ja Jesús ja kryuuts.

²²Tääts ja tsiptuunpë ojts tyajnëjkxtë ja Jesús ma ja it txëëwatyën Gólgota, jä'ä nyiwijy O'kpë Këpajk.

²³Jamts tmooytyë ja tsatsym nyëë mëti'ipë ënäty të t'atäämuktën mëët ja tsooy mëti'ipë xyëëwajtypyën mirra; je'eyëp ko kä'äp ja Jesús t'uky.

²⁴Ënät tyajkruutspäjtë ets ja tsiptuunpëtëjkëty tni'ëyë'ktë ja Jesús ja wyit ets tnijawëtë tii pën tuka'ajëp.

²⁵Jää ënäty taxtujk yaxp ko ja Jesús tyajkruutspäjtë.

²⁶Ënät ja letrë ojts jam tpëjkta'aktë mëti'ipë ënaanpën: Jutiis yajkutujkpë.

²⁷Nimäjtsk ja mä'tspë tyajkruutspäjtë tu'kpa'ajaty mëët ja Jesús, tu'uk a'oytsyow ets tu'uk anajnytsyow.

²⁸

²⁹Ko ja ja'ay jam nyaxtë kruuts'ëjxm, je'eyë kyujëpiptë ets nëëxi'ik tukxi'iktë ja Jesús: Aa, mijts jä'ä ijty mnetyijëp ko xyjyijtë'ëka'any ja mëjtsajptëjk ets tëkëëk xëëw jatëkok xykyoja'any.

³⁰Näyajtso'okët kë'ëm ets mjënakëty jam kruutskëjxm.

³¹Ja teety wintsënëty mëët ja tsajptëkotyëtë yaj'ijxpëjkpëtëjk näjyëtu'un nëxi'iktë tukxi'iktë ja Jesús ets y'ëna'antë: Yë'ë ojts ja ja'ay tyajtso'oky, e yë'ë kë'ëm ka'ap tjaty nyäyajtso'okëtëty.

³²Wä'änts ënät tyam tjënäky tääpë Kristë kruutskëjxm, yë Israel yajkutujkpë, jëtu'unts n'ijxmëty ets nmëpëjkmëty. Yë'ëpaat mëti'ipë ënäty jam mëëtën kruutskëjxm ojts nyëxi'iky tyukxi'ikyë.

³³Ko kyujkyxyëëw'ajty, tääts ja naaxwiinyëtë kyootsëy, jäänëm xyiinytyäky mëj jënäkyxyëëw.

³⁴Näy jää, mëj jënäkyxyëëw ja Jesús ojts mëk y'ënä'äny: Eloí, Eloí, ¿lamá sabactani? Jä'ä nyiwijy: nTiosës, nTiosës, ¿tiijës ko të xy'ëxmatsy?

³⁵Jënaakën mëti'ipë ënäty jam myëtoowtëpën, jä'ä ënantë: Mëtowtë, yë'ë myëkäjpxyp ja käjpxynyajxpë Elías.

³⁶Tääts ojts tu'uk ja ja'ay pëyi'ikyë tyajtsoony mëti'ipë këxë'kpën ijxtëm tu'uk ja pixynyën ets ojts tukpakony ja tsatsym nyëë xun ets tukjëjptijëy ja paxy, tääts ja Jesús tukwinmuuka'any ets ja ja'ay y'ënäny: Ixmatstë, tsojk n'ijxëm pën ëknimiinëp yë Elías ets yajjënäkëtëty kruutskëjxm.

³⁷Ënät ja Jesús mëk yujk'ënany ets y'o'ky.

³⁸Ja atëëytyuk mëjtsajptëkotypë ojts kujkwä'kxy y'akë'tstuky, këpajkm kyë'tstso'ony ets tyimkë'tskëtäky jëtu'un ix'am.

³⁹Ja tsiptuunpë wintsën mëti'ipë ënäty jam tënääpyën ma ja Jesúsën, ko ojts t'ijxy ko tëë ja Jesús y'ooky, ënät y'ënäny: Mëtëy yë'ë ko ijty ya'atë ye'etyëjk Tios y'u'unk'atyë.

⁴⁰Jam ja to'oxytyëjkëty jëkäm y'ijx'itë. Tam ënäty ja Maria Magdalena, ja Salomé ets ja Maria mëti'ipë tyaak'ajtypën ja Santiagë ets ja José.

⁴¹Ja to'oxytyëjkëty, jä'ä ënäty ja Jesús të tpajëtitë ets të tputëkëtë ko ja Jesús y'ijty jam Galilea. Näy tam ënäty ja to'oxytyëjkëty wiinkëtypë nimay mëti'ipë ojts tpanëjkxtën jam Jerusalén.

⁴²Winkon ënätynyë ma ja po'kxënxëëw yajnipëjktaakën,

⁴³tääts ja José myiiny, Arimatea ja'ay; tu'uk ja tsajptëkotyëtë yajjuntë'ajtpë mëti'ipë wintsë'ëkë ijtpën, yë'ë ënäty jyëjp'ijxyp ko myina'any ja Tios ja kyutujkën, ënät ojts nyijkx amëk jotmëk ma ja Pilato ets t'amëtooy ja Jesús ja nyi'kx kyopk.

⁴⁴Tääts ja Pilato mëk tja'awëy ko tmëtooy ko tëë ja Jesús y'o'knë. Ënät tyaxëy ja tsiptuunpë wintsën ets tyajtëëy pën tëë ënäty ja Jesús jyäänty'o'knë.

⁴⁵Ko ja tsiptuunpë wintsën ojts tnikäjpxy ko jyëtu'unëty, ënät ojts tni'ëtsoy ets ja José yajmo'ojëty.

⁴⁶Tääts ja José tjuuy tu'uk ja linë wit ets tyajjënäjky ja o'kpë, yë'ë tyukwinpijt ja linë wit ets tpëjktäky tsaajutjoty. Ko jam tpëjktäky, tääts ja mëjtsaa ojts tuk'akë'ëy.

⁴⁷Ja Maria Magdalena mëët ja Maria, mëti'ipë ja José tyaak'ajtypën ojts t'ixtë ma ja Jesús ënäty të yajpëjktä'äkyën.