Read Biblia Mixe de Quetzaltepec Marcos 16 Bible Online

Marcos 16 - Biblia Mixe de Quetzaltepec bible

Marcos 16

¹Ko ja po'kxënxëëw nyäjxy, ënät ja Maria Magdalena ets ja Santiagë tyaak, mëët ja Salomé ojts tjuytyë ja pa'akxu'kpë nëë ets ja Jesús nyi'kx kyopk tuknikuutsanëtë.

²Tääts ojts tukninëjkxtë jopyëp, tominkë xëëw, sëmaan'ëjxy, mëjjajp poopjajp,

³tääts nyäy'ëna'anëtë: ¿Pën jëtää ja tsaa ënät jyëtijëp?

⁴Ko y'ijx'ëwtijtë, ënät t'ijxtë ko ja mëjtsaa ka'ap maanë mëti'ipë ja jut y'akë'ë'ajtypyën, tëë ënäty yajjëtijy.

⁵Ko tyëjkëtyë tsaajutjoty, jap t'ijxtë aka'any'äämpy tu'uk ja yä'äy ëna'k jam y'u'unyë poopxoxy yaj'ixy. Tääts ja to'oxytyëjk tsyë'këtyë,

⁶e ja yä'äy ëna'k jëtu'un y'ënëmaayëtë: Këtii mtsë'ëkëtë. Miits yë'ë m'ixtaaytyëp ja Jesús, Nazaretëtë ja'ay, mëti'ipë ojts kyëruutspetyën. Tëë jatëkok jyuukpyiky, ka'ap ja yaa pën. Oy xytyim'ixtëty ma ojts yajpëjktä'äkyën.

⁷Nëjkx ja y'ijxpëjkpëtëjk tuk'ëwaanëtë ets näjyëtu'un xytyuk'ëwaanëtëty ja Pedro: Tam jëwyiin ja Jesús nyijkxy Galilea oknëm miitsëty, ja y'ijxpëjkpëtëjk jatëkok wyoowmukäämpy, ets xy'ixtëty jëtu'un ijxtëm ojts nikäjpxyën.

⁸Tääts pyëtsëëmtë pëyi'ikyë jap o'kpëjutjoty, mëët ja tsë'ëkë ets ja jotmay. Ets ka'ap pën t'ëwa'anëtyë jä'ä ko tsë'këtyëp ënäty.

⁹Ko ja Jesús jyuukpyijky, sëmaan'ëjxy jopyëp; Maria Magdalena ojts y'ixyë jëyëjp, mëti'ipë ënäty tëë ja ku'oypyë niwëxtujk y'ëxmatsyën.

¹⁰Ënät ja Maria Magdalena ojts nyijkx ets tuk'ëwa'anëy mëti'ipë ja Jesús ënäty mëët të jyëtityën, mëti'ipë ënäty jam moontëp tujktëpën ets jëëytyëp yaxtëpën.

¹¹Ko tmëtoowtë ko ja Jesús jyuuky'äty ets ko ja to'oxytyëjk ënäty të t'ixy, ka'ap tmëpëjktë.

¹²Ko jëtu'un y'ëknajxy, ënät ja Jesús wiink nyänyikëxë'kë ma ënäty nimäjtsk ja ja'ay tyu'uye'eytyën, kyamjotm nyëjkxtë.

¹³Ko t'ixkajptë, ënätyë wyimpijtë ets ojts nyëjkxtë Jerusalén. Ënät ja myëku'uktëjk tuk'ëwa'anëtyë, je'eyëp ko nän kä'äp myëpëjkëtë.

¹⁴Ok ja Jesús ojts jatëkok nyänyikëxë'ëkyë ma ja y'ijxpëjkpëtëjk ënäty nimajktu'uk yajpaatën ma ja kaaypyäjnën, jamts ojts mëk y'ojëtë jä'äkyëjxm ko ka'ap tmëpëktë ko jyayajtuk'ëwaanëtë ko ja Jesús të yaj'ixy, ko tëë jatëkok jyuukpyiky.

¹⁵Ets yaj'ënëmaaytyë: Nëjkxtë naaxwiinyëtë apëtsëmy ets ja oy aaw oy ayuk xykyajpxwa'kxtëty.

¹⁶Pën myëpëjkpy ets nyëëpety, yë'ë nëjkx nyitso'oky; e pën kamëpëjkp, yë'ë nëjkx yajkpoky'ixy.

¹⁷Ja ja'ay mëti'ipë mëpëjktëpën, yë'ë tyuntëp: Ëjts mëët yë nxëëw nëjkx t'ixkäxtëty ja ku'oypyë; kyajpxtëp ja wiink ayuk;

¹⁸myatstëp ja tsa'any ets ka'ap tsyu'utsëtëty; ko ajotkumonë t'uuktëty ja ëxëëk nëë, ka'ap wi'ix jyatëty; näjyëtu'un ko ja pa'amja'ay tkë'ënixajtëty, yajtso'oktëp.

¹⁹Ko ja y'ijxpëjkpëtëjk ojts jëtu'un tmëmëtyakta'ay, ënät ja Jesús pya'tëjkëy tsajpjotm; Tios ojts tuknipëjktaakë ets pya'tëkëty tsajpjotm ets nyaaxwe'tsy ma ja Tios ja y'a'oykyë'ëjën.

²⁰Tääts ja y'ijxpëjkpëtëjk tsyo'ontë ets ojts tkajpxwa'kxtë ja Tios ja y'aaw y'ayuk oy tyimmaajëty. Wintsën Jesukristë ojts pyutëkëtë ets ja ja'ay tuk'ijxtëty tuknijawëtëty ko tyiyëty jyääntyëty mëti'ipë kyajpxtëpën, jä'ä ko tuntë winë mëët ja Tios ja myëj'ajtën.