Read Biblia Mixe de Quetzaltepec Marcos 8 Bible Online

Marcos 8 - Biblia Mixe de Quetzaltepec bible

Marcos 8

¹Tëkok ja mayjyä'äy myujktë ma ja Jesús ënäty jamën, ka'ap tii tmëët'atë tii kyäytyëpën. Ënät ja Jesús tyaxëy ja y'ijxpëjkpëtëjk ets t'ënëmaay:

²Mpa'ëyoopyës ya'atë ja'ayëty, jä'ä ko tëkëëk xëëw tyamnë ma mëët nyajpatëmën ets ka'ap tmëët'atë tii kyäytyëpën.

³Koos ayuu nkäxtëty ma tyëjkën, tsojk yuukëtawtëty tu'ujoty, jä'ä ko tam mëti'ipë jëkäm tso'ontëpën.

⁴Tääts ja y'ijxpëjkpëtëjk ojts y'ëtsowtë: ¿Wi'ix yë mayjyä'äy nyajkä'ämyëty ma ka'ap pën tsyëënën?

⁵Ënät ja Jesús tyajtëëy ja y'ijxpëjkpëtëjk: ¿Jënaak ja tsajpkääky jap xymyëët'atë? Tääts y'ënantë: Wëxtujk.

⁶Ënät ja Jesús ja ja'ay t'ënëmaay ets nyaaxwäätstëty naaxkëjxy. Ënät ja wëxtujkpë ja tsajpkääky tkoonë'ky ets ja Tios tkukajpxëy. Tääts ojts tujkwä'kxy ja tsajpkääky ets tmooy ja y'ijxpëjkpëtëjk ets yë'ë ja ja'ay tkumaytyëty, jëtu'un ojts tuntë.

⁷Jamts ënäty wäänë ja xi'imk të'ëts näjyëtu'un tmëët'ajtpëtë. Ënät ja Jesús ojts tkukajpxë ja Tios ets ja y'ijxpëjkpëtëjk tmooy ets tyajwa'kxtëty.

⁸Tääts ja ja'ay ni'ëmukë kyääytyë ku'uxyë. Ënät ja y'ijxpëjkpëtëjk ok tpëjkmujktë wëxtujk katsy ja natëkë.

⁹Nimajktaxk milën ënäty ja ja'ay të kyäytyë. Tääts ja Jesús ojts mëët nyäjyëjpkajpxtutënë.

¹⁰Ënätyë tyëjkëy jap kepy nëëwinye'epyëjoty mëët ja y'ijxpëjkpëtëjk ets ojts nyëjkxtë Dalmanuta y'itjotm.

¹¹Ënät ja fariseë ja'ayëty tnimiintë ja Jesús ets je'eyë twinma'any'ixa'antë, yë'ë y'ixantëp pën jam muum kyajpxtëkoy, ets t'amëtowtë ja Jesús ets tyaj'ixëtëty tu'uk ja mëj'ajtën ets yajmëpëkëty pën janty jam tsyoony ma Tiosën.

¹²Tääts ja Jesús ojts mëk xyajku'ty ets y'ënäny: ¿Tii ko ya'atë ja'ay t'amëtowtë tu'uk ja mëj'ajtën? Tëy miits n'ënëëmëtëty ko jëtu'unpë ja ja'ay ka'ap nyitëkëty yajtuk'ixëty nitii mëj'ajtën.

¹³Tääts twinwa'ktuty ets ojts jatëkok tyëkë jap kepy nëëwinye'epyëjoty ets ojts nyijkx jam nëë'awinmtsow.

¹⁴Tëë ënäty tja'atyëkoytyë ja kyääkyëty, tu'uk jap je'eyë ja tsajpkääky tmënëjkxtë kepy nëëwinye'epyëjoty.

¹⁵Tääts ja Jesús ja y'ijxpëjkpëtëjk t'ënëmaay: Näkyëwent'atëtë, këtiipë ja fariseë ja'ayëty ets ja Herodes ja'ay mtukpaatëtëty ja tsajpkääky nyitsooy.

¹⁶Tääts ja y'ijxpëjkpëtëjk myäytyë tyajtë: Paty jëtää jëtu'un y'ënä'äny jä'ä ko ka'ap nmëmi'inëmë ja tsajpkääky.

¹⁷Ojts ja Jesús nijawë ko jëtu'un myäytyë tyajtë, ënät y'ënëmaayëtë: ¿Tii ko mnäy'ëna'anëtë ko ka'ap tii xymyëët'atë ja tsajpkääky? ¿Ka'anëmën xywyinmëtowtë ets xyjyä'äkyukëtë? ¿Janty juun miitsëty ja mjot mwinma'anyëty?

¹⁸¿Tam mjawiinëty ets ka'ap m'ixtë? ¿Tam mjatatskëty ets ka'ap mmëtowtë? ¿ka'ap tii xyjyä'ämyätstë?

¹⁹Ko ojts nyajwä'kxyës mëkoxk ja tsajpkääky ma ënäty mëkoxk mil ja ja'ay yajpaatën, ¿jënaak katsy ojts ja natëkë xypyëjkmuktë? Tääts y'ëtsoowtë: Majkmäjtsk katsy.

²⁰E mja'amyäjtstëp näjyëtu'un koos ja wëxtujkpë ja tsajpkääky ojts nyajwä'kxy ma ënäty taxk mil ja ja'ayëtyën, ¿jënaak katsy ojts ja natëkë xypyëjkmuktë? Tääts y'ëtsoowtë: Wëxtujk.

²¹Ënät ja Jesús ja y'ijxpëjkpëtëjk t'ënëmaay: ¿Ka'anëm xyjyä'äkyukëtë?

²²Tääts jyajtë jam Betsaida. Jamts ja Jesús yajtuknimiiny tu'uk ja ja'ay wiintspë ets ojts yajmënu'kxtä'äky tkë'ënixajëty ja wiints ets tyajktso'okëty.

²³Ënät ja Jesús twijtsë'ky kyë'ëkëjxy ja wiints ets twoowpëtsëëmy jam kajpnjotm. Ënät tuktwinkutsujëy ja wiints ets ojts mëët ja kyë'ë tja'axëtity. Ojts tkë'ënixajy ets tyajtëëy pën ijxp.

²⁴Ënät ja ja'ay ja wiintspë ojts y'ijxë'ëky ets y'ënäny: Ijxpës, jëtu'unës ja'ay n'ixy kepyën ye'eytyëp yowë.

²⁵Tä ja Jesús jatëkok ojts wyinkumatsëty ets ja ja'ay ja wiintspë ojts oy y'ijxpëky, aak wa'ats winë t'ijxnë, jëtu'un ojts tsyo'oky akëtä'äky.

²⁶Ënät kyäjxë ja Jesús ma tyëjkën ets y'ënëmaayë: Ka'ap kajpnjotm mnëjkxëty.

²⁷Tääts ja Jesús tsyo'ony mëët ja y'ijxpëjkpëtëjk, jam ojts nyëjkxtë ma ja Cesarea ets Filipo y'itjotmën. Jam tu'ujotm ojts ja Jesús ja y'ijxpëjkpëtëjk tyajtëy: ¿Wi'ix yë ja'ay y'ëna'antë, pën ëjts?

²⁸Ënät ja Jesús ja y'ijxpëjkpëtëjk y'ëtsoowtë: Tam mëti'ipë ënantëpën ko mijts Juan Yajnëëpäjtpë, wiinkpë y'ëna'antë ko mijts m'Eliësëty, nän tam mëti'ipë ënantëpën ko mijts Tios kyäjpxynyajxpë.

²⁹Tääts ja Jesús yajtëëwëtë: E miitsëty, ¿wi'ix m'ëna'antë, pën ëjts? Ënät ja Pedro y'ëtsooy: MKristë mijts, mëti'ipë ënäty minaanpën.

³⁰Tääts ja Jesús ojts mëktä'äky t'ënëëmë ja y'ijxpëjkpëtëjk ko yë'ëjëty.

³¹Tääts ja Jesús tuk'ijxpëjktso'ony ja y'ijxpëjkpëtëjk wi'ix ënäty mëk y'ëyo'onpaata'anyën. Ko ka'ap kyupëka'anyë ja mëjja'aytyëjk, ja teety wintsëntëjk ets ja tsajptëkotyëtë yaj'ijxpëjkpëtëjk. Ojts tuk'ëwaanë ko yaj'ooka'anyë ja ja'ay je'eyëp ko kom tëkëëk xëëw jatëkok jyuukpyëka'any.

³²Wa'ats tuknija'awëy ja y'ijxpëjkpëtëjk. Tääts ja Pedro ojts ëpëky twoownëjkxy ja Jesús ets ojts t'ojy.

³³E ja Jesús ojts wya'akwinpity ets ja y'ijxpëjkpëtëjk twin'ijxpejty nixim niyam, tääts ja Pedro twinkukajpxëy: Winwa'ktutkës, jëtu'un mijts mkäjpxy ijxtëm ja mëtsipën. Ka'ap jëtu'un tii xymyëmay xymyëtajy ijxtëm ja Tiosën, jëtu'un mmay mtajy ijxtëm oynapën naaxwiinyëtë ja'ayën.

³⁴Ënät ja y'ijxpëjkpëtëjk ets ja mayjyä'äy tyaxëy, ets t'ënëmaay: Pën tsyojkpy etsës n'ijxpëjkpë'atëty, wä'än kyë'ëm winma'any tja'atyëkoy ets ja wyinma'any mëk tpëjkta'akëty, ëyowëp ijxtëm tu'uk ja ja'ay kyëruuts tpatsëmyën ko ja y'o'kën t'anëjkxë, ënätës xypyaminëty.

³⁵Jä'ä ko pën ka'ap wi'ix jyata'any, kë'ëm ja jyuukyajtën tyajtëkoyëty; e pën y'ëxmajtsypyën ja jyuukyajtën koos ënäty ëjts xypyatsoony ets tmëtoow'ity ja oy aaw oy ayuk, yë'ë yajtso'okäämpy ja jyuukyajtën.

³⁶¿Tii ja ja'ay tyajwa'anëty ja wit meeny ëkë ja pëjktä'äky ëkë winëjaty pën yajtëkoopy ja jyuukyajtën?

³⁷Ëkë ¿Jënu'un ja ja'ay myäyëtëty tkujuyëty ja jyuukyajtën?

³⁸Pën xytyuktsëtyuumpës ets pën ja n'aaw n'ayukës tyuktsëtyuumpy ma ya'atë pokyjyä'äyëtyën, näjyëtu'unës nëjkx ntuktsëtyuny koos jatëkok nminëty mëët ja nTeetyës ja myëj'ajt y'oyajtën ets ja y'anklëstëjk wa'atspë.