Read Biblia Mixe de Quetzaltepec Lucas 13 Bible Online

Lucas 13 - Biblia Mixe de Quetzaltepec bible

Lucas 13

¹Jää it ja Jesús ojts nyiminyë jënaakën ja ja'ay mëti'ipë tukmëmëtyakën ko ënäty ja Pilato të txëpiny ja jyot nye'pny ja Galilea ja'ay mëët ja jëyujk ne'pyny mëti'ipë të wyintsë'kën'atyën.

²Ënät ja Jesús y'ënëmaayëtë: ¿Wi'ix miits maytyë mtajtë? ¿Wä'än jëtää yë'ëkyëjxmëty jëtu'un të jyat të kyëpätë tääpë Galilea ja'ayëty ko ni'ik pyokyjyä'äy'atë ets ka'ap jyëtu'unëty ja myëkukajpnëtyë?

³Jëtu'un miits nëëmëtë ko ka'ap; miitsëty pën ka'ap xy'ëxmatstë ja m'ëxëëk winma'anyëty, näjyëtu'un m'ooka'antë.

⁴Ets ja ja'ayëty mëti'ipë o'ktën nimajkmokxtëkëëk ma ja Siloé potsy nyijijtpäjtëtën, ¿wä'än jëtää ni'ik pyokyjyä'äy'atë ets ka'ap jyëtu'unëty mëti'ipë tsënaaytyë Jerusalénkë?

⁵Jëtu'un miits nëëmëtë ko ka'ap; miitsëty pën ka'ap xy'ëxmatstë ja m'ëxëëk winma'anyëty, näjyëtu'un m'ooka'antë.

⁶Tääts ja Jesús tnimëtyäky ya'atë ijxpäjtën: Tam ijty tu'uk ja ja'ay tmëëtëty ja higo kepy kyamjotm. Tääts ojts nyijkx ets t'ixa'any pën jam ja tyëëm ets nitu'uk tkapaty ja higo tëëm.

⁷Jamts ja tyuunpë tu'uk mëti'ipë ja naax kyëwent'ajtypyën ets t'ënëmaay: Ix, mëtëkëëk jëmëjt tyam nmëye'eyës ya'atë kam ets ja higo tsa'am njatuka'anyës, je'eyëp ko ni tu'ukës yë tyëëm nkapatë. Po'otë'knë këtiipë naax nëkoo tyajwintukëty.

⁸Ets ja tuunpë y'ëtsooy: Wintsën, wä'än tjaaktänë ja tu'kjëmëjtën, minës n'ëkyajkuwa'atsyës ets tyam ntuknako'owëtyës yë pu'utsynyaax,

⁹wä'änxyëp jëtu'un tyëëm'atëty. Pën ka'ap, tääts yajpujxë'ëkëty.

¹⁰Tëkok jyäjty kyëpejty jam ënäty ja Jesús yaj'ixpëky po'kxënxëëwëtë tsajptëkotm.

¹¹Japts ënäty tu'uk ja to'oxytyëjk. Majkmokx tëkëëk jëmëjt ënäty të y'ijnë ma pyatënën ja pa'am. Tëë jyëku'uxënë, ka'ap y'ëkkoowkujkënë, ku'oypyë jëtu'un tuunëp.

¹²Ko Jesús t'ijxy, tääts tyaxëy ets t'ënëmaay: Tëë yë mpa'am mniwa'atsyë, oy mëk tyam mijtsnë.

¹³Tääts ojts tkë'ënixajy ets kyoowkujkëy, ojts ja jyëxk tyiy ets ja Tios tmëjja'aw tjaantyja'awëy.

¹⁴E ja tsajptëjk wintsën ojts tukjoot'anpëky ja Jesús ko ja to'oxytyëjk ojts tyajtso'oky po'kxënxëëwjoty paaty ja ja'ay t'ënëmaay: Tëtujkxëëw nyikutukyëty ets ja'ay tyuntëty. Pën mtso'okantëp, mintë oyjyëna'ajëty ets ka'ap pyo'kxën xëëwjotyëty.

¹⁵Ënät ja Wintsën y'ëtsooy: Win'ë'ënpë ¿Këtii jëtää miits ja mjëyujk mtsajpkaa xymyëkäjëtëty po'kxënxëëwjoty ets nëjkx xyajnëë'uuktë?

¹⁶Ya'atë to'oxytyëjk, Abraham yë y'u'unk y'ok, pa'amjotm yë mëjku'u të yaj'ityë majkmokx tëkëëk jëmëjt, ¿këtii jëtää pyaat'atyë ets tsyo'okëty po'kxënxëëwjotyë?

¹⁷Ko ja Jesús jëtu'un y'ënäny, tääts ja myëtsip tsyëtyu'unpatë, e ja mayjyä'äy tyukxoontaktë tu'kë'ëyë mëti'ipë ja Jesús tyuunpyën mëjwiin këjää.

¹⁸Näyjyëtu'un ja Jesús y'ënäny: ¿Tii ntukmë'ijxkijpxmëp ja Tios ja kyutujkën, tii jëtää mëët tyu'knaxëty?

¹⁹Jëtu'un yë'ë ijxtëm ja mostasë pajkën mëti'ipë ja'ay wyijpyën kyamjotm. Ko myuxy ets yony ijxtëm tu'uk ja kepyën, jam ja joon ja pyä'än tpëjkta'aktë ma ja y'ääy xye'entyën.

²⁰Tääts ja Jesús jyaak'ënany: ¿Tii ntukmë'ijxkijpxmëp ja Tios ja kyutujkën?

²¹Jëtu'un yë'ë ijxtëm tu'uk ja to'oxytyëjk tëkëëk apëjkën ja levadura tukmëtijën ja tsajpmokway ets xyunëty.

²²Jam ënäty ja Jesús nyijkx Jerusalén ets yaj'ixpëky maajëty ja kajpn tuknaxyën mëjpë mutskpë.

²³Ënät ja ja'ay tu'uk yajtëëwë: Wintsën, ¿niwäänë jëtää ja ja'ay mëti'ipë nëjkx nyitso'oktënë? Tääts ja Jesús y'ëtsooy:

²⁴Jam mëpaat mtëkëtë ma ja tëjk'aawën xu'utspë. Jëtu'un miits nëëmëtë ko may ja ja'ay nëjkx jyatëkëja'antë, je'eyëp ko ka'ap nëjkx nyaxtë.

²⁵Ko ja kutëjk pyëtë'ëkëty ets ja tëjk'aaw tyaj'ëtukëty, pën jap ënäty miits të mwë'ëmtë tëja'p, mjaakukajpxëtëp ma ja tëjk'aawën ets mja'ëna'antëty: Wintsën, yaj'ëwa'ats yë tëjk'aaw, tëkëjantëpës. Ënät ja kutëjk m'ëtsowëtëty: ka'apës nijawë mpën miitsëty.

²⁶Ënät miits m'ëna'ana'antëty: Tu'ukmukyë ijty ëëtsajtëm nka'ayëm n'ukëm ko ijty xyaj'ixpëktës kajpnjoty.

²⁷Ets myaj'ëtsowtëty: Tëës nnikäjpxy ko ka'apës nijawë mpën miitsëty. Jëwa'aktë ni'ëmukë mëti'ipë tyuuntëpën ja ëxëëkpë.

²⁸Ënät ja ja'ay nëjkx jyë'ëtë ya'axtë ets nyätyëtskääpëtëty ko t'ixtëty ja Abraham, Isaac, Jacob ets ni'ëmukë ja Tios ja kyäjpxynyajxpëtëjk, jap ma Tios ja kyutujktaknën, tyam ënäty miitsëty ni'ikyë të myaj'ëxwojptëpë.

²⁹Jä'ä ko ye'eymukantëp ja naaxwiinyëtë ja'ay xiitsow yaatsow, anajny aka'any ets kyäya'antë jam ma ja Tios ja kyutujktaknën.

³⁰Ënät nëjkx pënëty jëyëjp nyaxtë mëti'ipë tyam okëtyën, ets ix'ok mëti'ipë tyam jëyëjpëtyën.

³¹Tam ja fariseë ja'ayëty mëti'ipë ja'ajtën ma ja Jesús jamën ets t'ënëmaaytyë: Nikë oy ko mtsoonëty yaa ets mnëjkxëty wiinktsow, jä'ä ko myaj'ookanëp yë Herodes.

³²Ets ja Jesús y'ëtsooy: Nëjkx ënëëmëtë tääpë wax: Ko tyam ets jëpom yë ku'oypyë n'ixkäxa'anyës ets nyajtso'oka'anyës yë pa'amja'ay, ets wëxtëjkm nyajjëjpkëxa'anyës.

³³Oy jyatimwyi'ix'ajtpë, njaakyajktu'uye'eyäämpyës yë ntuunk tyam jëpom ets wëxtëjkm. Jä'ä ko ka'ap tjëkyepy wiinktsow yë Tios yë kyäjpxynyajxpë y'ookëty pën ka'ap jyamëty Jerusalén.

³⁴Ets ja Jesús jyaak'ënany: Miits, Jerusalenkëtë ja'ayëty, Jerusalenkëtë ja'ayëty, myaj'o'ktëp ja Tios ja kyäjpxynyajxpë ets tëë xykyuka'atstë mëti'ipë të myajtuknikäxtën. Kanaak'okës miits të njawoowmuka'antë ijxtëm ja këtseytyaak y'u'unk tmu'uxyën ets ka'ap të xykyupëktë.

³⁵Ix ja mtëjk, apak wyë'ëmanë. Jëtu'un yam nëëmëtë ko ka'ap miits xy'ëk'ijxnëtëtyëts, jäänëm ko m'ëna'antëty: Kënu'kxy ja mëti'ipë myëmiinpyën ja Wintsën ja xyëëw.