Read Biblia Mixe de Quetzaltepec Lucas 15 Bible Online

Lucas 15 - Biblia Mixe de Quetzaltepec bible

Lucas 15

¹Ni'ëmukë ja yajkukëpäjtpëtëjkëty ets ja pokyjä'äytyëjkëty nimiintë ja Jesús ets tmëtoow'ita'antë mëti'ipë nyimëtyäkpyën.

²Paaty ja fariseë ja'ayëty ets ja tsajptëkotyëtë yaj'ijxpëjkpë wiink ijty t'ixtë ets y'ëna'antë: Ya'atë Jesús aakyë'ë pokyjä'äytyëjk mëët ye'eymyuky nyajxmuky ets tmëëtkay tmëët'uuky.

³Ënät ja Jesús nimëtyaktso'ony ya'atë ijxpäjtën:

⁴Pën myëët'ajtyp nimëko'px yë tsajppax ets tu'uk pyutëkoy, ¿këtii jëtää t'ëxmatsy ja majkta'px majkmokx majktaxkpë jam kamjotm ets nëjkx t'ixta'ay ja mëti'ipë tëkoy'ijtpën koonëm tpaatyë?

⁵Ko tpaaty, akujk jotkujk nyäjyawëty, ets kyejkykyëjxm tpëjktä'äky,

⁶ets ko jyä'ty ma tyëjkën ënät twoowmuky ja jyiiky myëku'uk mëti'ipë mëët nyämyäyën ets nëëmë: Mëëtxoontaktëkës, tëëjës ja ntsajppax npaaty mëti'ipë të y'ëktëkoy'ijtpën.

⁷Tëyës n'ëna'any ko näjyëtu'un jam tsajpjotm xyoonta'aktë ko tu'uk ja pokyjyä'äy jyotwinpity këtiinëm ja nimajkta'px majkpë ja wa'ats ja'ayëty mëti'ipë ka'ap tyajmëyatën jyootwinpitëty.

⁸N'ëkpëjktakmëty tu'uk ja to'oxytyëjk mëti'ipë myëët'ajtypyën majk ja meenywyä'kxy ets tu'uk pyutëkoyëty, ¿ka'ap jëtää ja jyëën tyajmëjëty ets tyëkëty päätë'kpë tyëkoty koonëm tpaatëtyë?

⁹Ko tpaaty ënät ja myëku'uktëjk, myëjëën myëtëjk tuk'ëwa'anëtyä'äy ets t'ënëëmë: Mëëtxoontaktëkës, jä'ä ko tëëjës ja nmeeny npaaty mëti'ipë të tyëkoy'ityën.

¹⁰Jëtu'un miits nëëmëtë ko näjyëtu'un ja Tios ja y'anklës xyoonta'aktë ko tu'uk ja pokyjyä'äy jyootwimpity.

¹¹Näyjyëtu'un y'ënäny ja Jesús: Tu'uk ja ja'ay, nimäjtsk ja myaank.

¹²Tääts ja myaank mutskpë y'ënëmaayë: Tatë, mooykyës ja nkuma'ayën mëti'ipës xypyaat'ajtpën. Tääts ja u'unkteety ojts tyajkwä'kxy ja näykyumayë ets tkumaay ja y'u'unk y'ëna'k.

¹³Naam yajkumaaytyääpy ënäty ja mutskpë ets ënätyë to'ktaay winë. Tääts ojts nyijkx jëkäm najëtijtpë. Jamts ja myeeny tyajtuuntaay mëti'ipë ënäty myëët'ajtypyën ko kyë'ëm winma'any tyajtuuny.

¹⁴Ko ja myeeny tyajtuuntaay, tääts ja yuu tsyo'ontäky jam ma ja kajpnën ets ja yuu pyätë.

¹⁵Ënät ja tuunk t'amëtooy ma tu'uk ja kukajpnën. Ets ja ja'ay kyäjxë kamjotm ëtsëm këwent'ajtpë.

¹⁶Nëkooyë yuu'o'kënë ets tjë'kxanë ja ëtsëm jë'kxy.

¹⁷Tä ojts myäy tyäjy ets y'ënäny: Ma ja nteetyës ja tyëjkën, ku'uxyë ja tuunpë jam kyäytyë y'uuktë ets natëjkëp winë, tyamts ëjts yaa nyuu'ookaanpë.

¹⁸¿Tii koos nkanëjkxy maas ja nteety ja tyëjkën?, etsës nëëmëty: Tatë, tëëjës nmëtëkoy ja Tios ets mijts.

¹⁹Ka'apës tyam xy'ëknitëjkënë xytyijëtyës m'u'unk, yajtuunkës ijxtëm yë mtuunpë xyajtunyën.

²⁰Ënät tyu'utëjkëy ets ojts nyijkx ma ja tyeety ja tyëjkën. Jëkämnëm ënäty myiny ko ja tyeety y'ijxpatë, tääts pëyi'ikyë nyitso'onë ets pya'ëyoowë ets myënäänë ets tsyu'kxë.

²¹Ënät t'ënëmaay ja tyeety: Tatë, tëëjës nmëtëkoy ja Tios ets mijts, ka'apës tyam xy'ëknitëjkënë xytyijëtyës m'u'unk.

²²Ënät ja u'unkteety t'ënëmaay ja tyuunpëtëjk: Tsojk nëjkx ja oypyë wit xyajtsoontë ets xytyukxoxtëty, pëjktakëtë kyë'ëjiits ets kyë'ëk.

²³Nëjkx ja tsajpkaa tu'uk xyajtsoontë ni'kxpë ets xyaj'ooktëty. Tsojk nka'ayëm n'ukëm ets nxëëwtu'unëmë.

²⁴Yë'ë ko ya'atë n'u'unkës, jëtu'un tpaaty ijxtëm jeexyë të y'o'knën ets tyam jëtu'un ijxtëm jeexyë jatëkok të jyuukpyikyën; jëtu'un tpaaty ijxtëm jeexyë të tyëkoy'ityën e tyam ijxtëm jeexyë të yajpaatyën. Tääts ja xëëw tsyo'ontäky.

²⁵E ja myëj maank, jam ënäty kyamjotm. Ko wyimpijty ma ja tyëjkën, ënät tmëtoowpaty ko ja ja'ay xyu'uxtë wyoptë, y'ätstë pyëktë.

²⁶Tääts tyaxëy tu'uk ja tuunpë ets tyajtëëy tii ënäty jam tuunëp jatëp.

²⁷Tääts ja tuunpë ojts tyuk'ëwa'anxëty: Tëë ja m'uty jyä'ty. Tëë mteety tyaj'ooky tu'uk yë tsajpkaani'kxpë, jä'ä ko të jyä'ty yë m'uty oy mëk.

²⁸Tääts ja kä'äxkopk jyoot'anpëjky, ka'ap tyëkëjany tyëkoty. Ënät ja tyeety ojts pyëtsimy ets y'ënëmaayë mëktä'äky ets tyëkëty tëkoty.

²⁹Jëtu'un t'ëtsooy ja tyeety: Mnija'ap ko kanaak jëmëjt mijts të nmëtuny ets xëmë të nmëmëtoy; mijts nitiijës të xykyamo'oy, oy jeexyë yë'ë'ajty tsajppax ets ja nxëëw jeexyë ntunyës mëët ja nmëku'uktëjkës.

³⁰E ko ya'atë m'u'unk të jyä'ty, mëti'ipë mmeeny të tyajkëxyën mëët ja ku'into'oxytyëjkëty, myaj'o'këp yë tsajpkaani'kxpë.

³¹Tääts ja u'unkteety y'ënäny: U'unk maay, mijts xëmë myajpaaty mëët ëjts e yë pëjktä'äky mëti'ipës jää nmëët'ajtypyën aakmijts yë mjä'ä.

³²Tyam, kopkpëky ntu'unmëty yë xëëw, tsojk ntukxoontakëmë. Jä'ä ko ya'atë n'u'unkës, jëtu'un tpaaty ijxtëm jeexyë të y'o'knën; e tyam, tëë jyuukpyiky; jëtu'un tpaaty ijxtëm jeexyë të tyëkoy'ityën e tyam tëë yajpaaty.