Read Biblia Mixe de Quetzaltepec Lucas 16 Bible Online

Lucas 16 - Biblia Mixe de Quetzaltepec bible

Lucas 16

¹Näyjyëtu'un ja Jesús ya'atë tukmëmëtyäky ja y'ijxpëjkpëtëjk: Jää ijty tu'uk ja ja'ay kumeenypë, myëët'ajtyp tu'uk ja tyuunpë mëti'ipë tyukkëwent'ajtypyën ja nyaax kyam ets ojts yajtuk'ëwaanë ko ja tyuunpë wiinktsow tyajtuny ja wit meeny.

²Ënät ja kumeenyjyä'äy ja tyuunpë twoowtsooy ets t'ënëmaay: ¿Tëy jëtu'un ijxtëm myajnikäjpxyënë? Tuk'ëwa'anëkës tii të xytyuny, jä'ä ko pën jëtu'un mijts ka'ap tjëkyepy m'ëktuunëty ma ëjtsën.

³Tääts ja tuunpë wyinmaay: ¿Tiijës ënät ntunëp koos yë nwintsën yë ntuunk xypyëjkëty? ka'apës tii mëk'ajtën nmëët'aty etsës nkamtunëty ets tsëtyuumpës koos ja ayajk ako'onën n'amëtowëty.

⁴Tääts wyinma'anypyäty tii tyunäämpyën ets ojts myäy tyäjy: Tëës nnijawë tiis ntunëpën ets wi'ixës ja ja'ay xykyupëktëty tyëkoty koos ja nwintsën ja ntuunk xypyëjkëty.

⁵Ënät nitu'ukjaty twoowtsooy ja ja'ay mëti'ipë ja wyintsën myënu'kxy'ajtëpën. Tääts t'ënëmaay ja mëwyiinpë ojts myinyën: ¿Jënu'un yë nwintsënës xymyënu'kxy'äty?

⁶Tääts y'ëtsooy: Mëko'px tu'ts yë olivë on. Tääts ja tuunpë y'ënäny: Tyaa ja nyinoky mëti'ipë mjaayën, pe'tym jaaytyëkats, wëxtyikxy majk tu'ts je'eyë pëjkta'ak.

⁷Ënät ja wiinkpë tyajtëëy: ¿E mijts, jënu'un xymyënu'kxy'äty? Tääts y'ëtsooy: Mëko'px xa'k ja tsajpmokway. Tääts t'ënëmaay: Tyaa ja nyinoky mëti'ipë mjaayën, pe'tym jaaytyëkats, majkta'px xa'k je'eyë pëjkta'ak.

⁸Tääts ja wintsën tnija'awëy ko ja tuunpë ka'apë oy myëtunyën, tëë oy tniwijy'äty wi'ix tii tunëtyën. Jëtu'un yë ja'ayëty y'ëtë'ëtstë nyiwijy'ajtëp ja kyë'ëmtuunkëty, ets ni'ik mëti'ipë akootstuuy yajpatëpën këtiinëm mëti'ipë tëë ja të'kxën jajën tpaatën.

⁹Jëtu'un miits nkajpxwijtë ko ja wit meeny mëti'ipë ka'ap myëtëyëtyën, jam xyajtuntëty ma ja ja'ayëtyën ets xypaatëty ja mëti'ipë m'oyjyawëtëpën; jä'ä ko ënäty ja mwit mmeeny kyëxtë mmëët'atëp pën m'oyjyawëtëpën.

¹⁰Pën oy yajtuunpy ja wit meeny wäänëpë, näjyëtu'un tyajtuna'any ja maypyë. Pën ka'ap tyajtuny oy ja wit meeny wäänëpë, nän ka'ap tyajtuna'any oy ja maypyë.

¹¹Pën ka'ap miits oy xyajtuntë ja wit meeny ka'apë myëtëyëtyën, ¿wi'ix oy xy'ëkyajtuntëty ja mëti'ipë mëtëyën?

¹²Pën ka'ap miits ja ja'ay ja jyä'ä oy xyajtuunëtë, ¿wi'ix oy xyajtuna'antë mëti'ipë mjä'ä'ajtëpën?

¹³Ka'ap tjëkyepy tu'uk ja tuunpë tmëtunëty nimäjtsk ja wintsën; jä'ä ko wä'än jëtää tu'uk oy tmëtunëty ets tu'uk ka'ap oy tmëtunëty; ja mëti'ipë ka'ap oy tmëtunyën jä'ä y'ëxëëk'ixëp e ja mëti'ipë oy myëtuumpyën jä'ä y'oyjyawëp. Paaty näjyëtu'un ka'ap tjëkyepy yajmëtunëty ja Tios ets näjyëtu'un yajmëtuunpëty ja wit meeny.

¹⁴Ja fariseë ja'ayëty mëti'ipë ja meeny yi'iyë y'atsojktëpën. Tam ënäty tmëtowtë, paaty ja Jesús je'eyë nëxik tukxiktë.

¹⁵Ënät ja Jesús y'ënëmaayëtë: Miits win'ë'ëmpëtëjkëty, wa'ats mnäyajnaxëtë ma ja ja'ayëtyën, e ja Tios nyija'ap ko y'ëxëëkëty ja mjot mwinma'anyëty; jä'ä ko mëti'ipë ja ja'ay myëjpëjktaktëpën, Tios y'ëxëëk'ijxyp yë'ë.

¹⁶Yë ënä'ämën tëyajtën ets käjpxynyajxpëtëjk jääpaat jyëjpkëxy ma ja Juan Yajnëëpäjtpë jyuuky'äjtyën. Ets tsyo'ontä'äky ja oy aaw oy ayuk mëti'ipë Tios kyutujkën'ajtypyën ets may ja ja'ay jam tyëkëja'antë.

¹⁷Ka'ap tsyipëty ets tsajp ets naaxwiinyëtë kyutëkoyëty, yë'ë ni'ik tsip wi'ix ja ënä'ämën tëyajtën yajpatunëty.

¹⁸Ko pën ja tyo'oxytyëjk t'ëxmatsëty ets ja wiinkpë tpëkëty, pëjkën ukën ënäty kyawintsë'këp; ko pën tpëkëty ja to'oxytyëjk mëti'ipë ënäty të yaj'ëxmatsyën, pëjkën ukën ënäty ja wyintsë'kën yajtëkooyëp.

¹⁹Jam ijty tu'uk ja kumeenyjyä'äy, xoxy pëky, oytyuny, aak winjemy nyäxyoxyë ets xëmë ka'ayën ukën mëj nipëjktaakë.

²⁰Jamts ja ja'ay wiinkpë mëti'ipë xyëëwajtypyën Lázaro, ëyoopëja'ay ets pu'utspëjkëp, jam y'u'unyë winjëpom ma ja kumeenyjyä'äy ja tyëjkën.

²¹Yajxon tjakayä'äny ja tsajpkääky apu'uxk mëti'ipë ka'apën naaxkëjxy ma ja kumeenyjyä'äy ja kyääypyäjnën; jam ja uk nyiminyë ets ja pyu'uts yajniweey.

²²Ënät ojts y'o'knë ja Lázaro ets yajnëjkxë ja Tios ja y'anklës jam tsajpjotm ma ja Abraham yajpaatyën; ok ja kumeenyjyä'äy näjyëtu'un y'o'ky, tääts nyaaxtëjkëy.

²³Jap ënäty y'ëyoy ja kumeenyjyä'äy ma ja o'kpë nyipätën, tääts ojts y'ijxë'ëky ets t'ijxpaty ko jam tsajpjotm yajpaaty ja Abraham mëët ja Lázaro.

²⁴Tääts jap mëk yujk'ënany: Tatë Abraham, pa'ëyoowkës. Tun mëyajtën, käx yë Lázaro, wä'än yë kyë'ëjëjp tyajxooky ets tmëminëty, wä'änës yë nyä'än tyajxooky. Mëkës yap jëënjoty n'ëyoy.

²⁵Tääts ja Abraham y'ënëmaayë: U'unk, yë'ë mja'amyätsëp ko mijts akujk jotkujk të mjuuky'äty naaxwiiny; yë Lázaro, tëë y'ëyoy; e tyam, tëë tpaaty ja jotkujk'ajtën; mijts tyam mtuka'ajëp ets mëk m'ëyowëty.

²⁶Ëpëky näjyëtu'un, tää tu'uk ja mëjjut mëti'ipë ëpëkyjyäty xyaj'ijtëmën. Pën yaa yajpatp ets jyanaxa'any ma miitsëtyën, ka'ap tjëkyepy. Näy ka'ap tjëkyepy ets yam myinëty ja ja'ay mëti'ipë yajpatëpën ma miitsëtyën.

²⁷Ënät ja kumeenyjyä'äy y'ëtsooy: Tatë Abraham, pën jëtu'un, tun mëyajtën, käx yë Lázaro maas nteety yë tyëjkën.

²⁸Jaaktamës ja nmëkä'äx ja nimëkoxk ets nëëmëty ko wä'än t'ëxmatstë ja ëxëëk winma'any këtiipë yaa näjyëtu'un myintëty ëyoopë ëyoowtaknjoty.

²⁹Tääts ja Abraham y'ënäny: Tam tmëët'atë ja Moisés ja y'ënä'ämën ets mëti'ipë ja Tios kyäjpxynyajxpë ojts nikajpxtën, wä'än tmëtoowkukëtë wi'ix y'ënä'änyën.

³⁰Ënät ja kumeenyjyä'äy y'ëtsooy: Tatë Abraham, jootwinpitëp yë'ëty, je'eyëp ko ënät ko tu'uk yë o'kpë jyuukpyëkëty ets nyinëjkxëtëty.

³¹Tääts ja Abraham y'ëtsooy: ¿Pën ka'ap tkupëktë mëti'ipë ja Moisés jyääyën ets wi'ix y'ëna'antën ja Tios ja kyäjpxynyajxpëtëjk, nän ka'ap tmëpëka'antë oy tu'uk ja o'kpë jyatimjyuukpyëjkpë.